Përfaqësuesja e Kosovës në futbollin e femrave ka mësuar kundërshtarët për edicionin e ardhshëm të UEFA Women’s Nations League 2027.

Shorti është tërhequr të martën në Nyon të Zvicrës, ku Kosova është vendosur në Grupin 4 të Ligës B, së bashku me Slloveninë, Turqinë dhe Hungarinë.

“Dardanet” do të synojnë të paraqiten sa më mirë në këtë edicion, pasi siguruan avancimin në Ligën B duke e përfunduar në vendin e parë Grupin C2 në kampanjën e kaluar.

Ndërkohë, Kosova nuk arriti të kualifikohej në plejofin e Botërorit të vitit 2027, që do të mbahet në Brazil, pasi u eliminua nga Austria në raundin e parë.

Edhe Përfaqësuesja e Shqipërisë ka mësuar kundërshtarët e saj. Ajo do të garojë në Grupin 1 të Ligës B, ku do të përballet me Belgjikën, Rumaninë dhe Serbinë.

D.L

Xhudistja kosovare, Arba Hasanaj, është vetëm një fitore larg medaljes në Lojërat Olimpike për të Rinj, që po zhvillohen në Dakar të Senegalit.

Hasanaj po garon në kategorinë deri në 78 kilogramë, ku deri më tani ka regjistruar disa fitore të rëndësishme.

Ajo e nisi garën me fitore me Ippon ndaj Lenishka Figueroa Cirino nga Porto Riko. Në duelin e dytë u mposht nga braziliania Clarisse Vallim, por vazhdoi garimin përmes repesazhit.

Në këtë fazë, xhudistja kosovare triumfoi ndaj Hannah McHenry të Australisë dhe Ashly Herrera Espinosa të Nikaraguas, duke siguruar mundësinë për të luftuar për medaljen e bronztë.

Për medaljen e bronztë, Hasanaj do të përballet me austriaken Sellina Woegerer.

D.L

E ardhmja e Erling Haalandit te Manchester City mund të jetë e pasigurt, nëse klubi anglez përballet me sanksione të rënda për shkeljet e dyshuara financiare në Ligën Premier.

Sulmuesi norvegjez vazhdon të jetë një nga lojtarët kryesorë të “Citizens”, ndërsa këtë sezon ka regjistruar nëntë gola në nëntë xhirot e para të kampionatit anglez. Ai ka kontratë me klubin deri në vitin 2034, por mundësia e largimit të tij nuk është përjashtuar as nga babai i tij, Alf-Inge Haaland.

Ky i fundit ka folur për situatën që po kalon Manchester City, duke theksuar se fillimisht duhet pritur vendimi përfundimtar lidhur me çështjen financiare të klubit.

“Mendoj se duhet të presim rezultatin e apelit. Mund të përfundojë shpejt, megjithëse ka tifozë, klube rivale dhe, mbi të gjitha, gazetarë që po e synojnë Cityn tani. Pra, thjesht duhet të presim dhe të shohim se cili do të jetë rezultati i apelit”, deklaroi Alf-Inge.

Ai shtoi se Manchester City beson në pafajësinë e tij dhe se për momentin Erling është i përqendruar vetëm te futbolli.

“City beson se ka prova të forta për të vërtetuar pafajësinë e tij dhe mendoj se është më mirë të presim vendimin. Erling po mendon vetëm të luajë sa më shumë futboll dhe është i përqendruar në këtë. Mendoj se jemi kryesisht ne, jashtë fushës, që mendojmë pak më shumë për këtë”, u shpreh ai.

Në rast se Manchester City përballet me masa të rënda sportive, përfshirë edhe mundësinë e rënies nga kategoria, Haaland pritet të jetë njëri prej emrave më të kërkuar në tregun e transferimeve.

Në mesin e klubeve që mund të shfaqin interesim për shërbimet e tij përmendet edhe Real Madridi. Gjiganti spanjoll prej kohësh e ka vlerësuar sulmuesin norvegjez, ndërsa prania e Kylian Mbappes në repartin ofensiv do të mundësonte krijimin e një dysheje të jashtëzakonshme sulmuese.

Megjithatë, për momentin, gjithçka mbetet në nivelin e spekulimeve, pasi Haaland ka kontratë afatgjatë me Manchester Cityn dhe nuk ka sinjale zyrtare për një largim të mundshëm.

D.L

Ish-portieri i Real Madridit, Santi Canizares, ka kritikuar ashpër sulmuesin Vinicius Junior, duke e cilësuar rinovimin e kontratës së brazilianit si një gabim nga ana e klubit madrilen.

Canizares, i cili kishte kundërshtuar vazhdimin e bashkëpunimit me Viniciusin që verën e kaluar, beson se sulmuesi e ka shteruar vlerën e tij te “Los Blancos” dhe se sjellja e tij po ndikon negativisht në imazhin e klubit.

“Ndoshta jam i vetmi që mendon kështu, por e konsideroj këtë vendim një gabim. Për mua, rinovimi i kontratës së Viniciusit ishte gabim, sepse lojtari e kishte shteruar plotësisht vlerën e tij. Gjithashtu, nuk mendoj se oferta e Arsenalit ishte reale”, deklaroi Canizares.

Ish-portieri spanjoll zbuloi se kishte shpresuar që Reali të mos ia rinovonte kontratën brazilianit, në mënyrë që ai të largohej si lojtar i lirë në verën e vitit 2027.

“Shpresoja që Real Madridi të mos ia rinovonte kontratën dhe që Vinicius të largohej si lojtar i lirë në verën e vitit 2027, pasi e kishte shteruar vlerën e tij. Nuk do të kishte pasur asnjë problem me këtë”, u shpreh ai.

Canizares gjithashtu vuri në pikëpyetje mundësinë e transferimit të Viniciusit te Arsenali, duke theksuar se pengesa, sipas tij, nuk lidhet me cilësitë futbollistike të brazilianit, por me karakterin dhe sjelljen e tij.

“Nuk shoh asnjë mundësi që ai të shitet te Arsenali, jo për shkak të aftësive të tij, por sepse është një i ri me shumë probleme dhe jo çdo klub e dëshiron atë”, deklaroi spanjolli.

Ai shtoi se klubet e mëdha i kushtojnë rëndësi të veçantë edhe imazhit të tyre, duke krahasuar mundësinë e transferimit të Viniciusit me atë të lojtarit Diomande.

Kritikat e ish-portierit nuk u ndalën vetëm te rinovimi i kontratës, pasi ai e konsideroi gjithashtu gabim vendimin për ta aktivizuar brazilianin në fushë.

“Rinovimi i kontratës së tij është gabim, por aktivizimi i tij në ndeshje është një gabim i dyfishtë. Ai e ka shteruar vlerën e tij. E transferuat me një çmim të ulët, ju dha një përfitim të madh dhe fitoi dy Liga të Kampionëve me ju.

Shpresoj që të gjitha marrëveshjet të jenë kaq të suksesshme, por kjo çështje tashmë ka përfunduar”, përfundoi Canizares.

D.L