Në mungesë të kuorumit ka dështuar mbledhja e Komisionit hetimor parlamentar për procesin e subvencionimit të blerjes së teksteve shkollore dhe mjeteve mësimore për nxënësit e nivelit të arsimit fillor dhe arsimit të mesëm të ulët për vitin shkollor 2023/2024.

Në këtë komision pritej të intervistoheshin Fadile Dyla, sekretare e përgjithshme e MASHTI-t, Avni Rexha, ushtrues detyre i drejtorit të Departamentit të arsimit parauniversitar, Genc Hamzaj nga Agjencia e Shoqërisë së Informacionit – ASHI.

Për këtë dështim të kësaj mbledhje nga opozita akuzuan mazhorancën, ndërsa deputetët nga pozita kanë thënë se nuk do të marrin pjesë për shkak të kushtëzimit nga ana e partive opozitarë për shkarkimin e shefes së grupit parlamentar të Lëvizjes Vetëvendosje Mimoza Kusari-Lila, në mënyrë që të marrin pjesë në votime.

Kryetari i komisionit Shemsedin Dreshaj ka thënë se kanë qenë të përgatitur që sot të vazhdojnë me intervistimin e dëshmitarëve të radhës.

“Siç e shihni edhe sot do të dështojë kjo mbledhje për shkak të mungesës së kuorumit. Realisht, ne kemi qenë të përgatitur sot të vazhdojmë me intervistimin e dëshmitarëve të radhës dhe të përmbyllim procesin drejt një raporti final për të gjeturat e shumta gjatë këtij procesi intervistues”, tha Dreshaj.

Ndërsa, deputeti i Partisë së Demokratike të Kosovës, Bekim Haxhiu ka thënë se bojkotimi nga mazhoranca nuk do të ndalë hetimet për subvencionimin e teksteve shkollore.

“Bojkoti i këtij komisioni nga ana e deputetëve mazhorancës nuk është se do të ndalë hetimin për dyshimin mbi subvencionimin e teksteve shkollore, të gjeturat që ky komision i ka hasur gjatë punës. Tani është edhe koha që ekspertët të vazhdojnë të punojnë… Ka dyshime të bazuara që mjetet nga subvencionimi i teksteve shkollore janë derdhur jashtë Kosovës. Në disa prej dokumentacioneve që na janë dërguar drejtoritë e arsimit kemi parë që te vendi i bankave është i mbuluar me taulanti. Kemi hasur llogari bankare të ndryshme, prej 16 numrave, të cilat nuk janë numra të llogarive bankare në Republikën e Kosovës. Kjo ka nxitur edhe më shumë dyshimin tonë, se mjetet nga subvencionimi i teksteve shkollore kanë përfunduar edhe në llogari bankare jashtë vendit nga ata që nuk i kanë pasur fëmijët në shkollat e Kosovës”, ka thënë Haxhiu.

Edhe deputeti tjetër nga Partia Demokratike e Kosovës, Ardian Kastrati ka theksuar se bojkoti nga pozita është i planifikuar.

“Mendoj se ky është shantazh i qëllimshem, bojkot i planifikuar i pushtetit mafioz, i përfaqësuesve të organizatës mafioze të quajtur Vetëvendosje… E kemi të qartë që nga katër milionë të planifikuara këta kanë kapërcyer në 11 miliardë, e këtu ka dyshime të hatashme”, tha Kastrati.

Në anën tjetër, lidhur me dështimin e mbledhjes së këtij komisioni janë deklaruar nga partia në pushtet. Deputeti nga Lëvizja Vetëvendosje, Armend Muja ka përmendur kushtëzimin e opozitës lidhur me shkarkimin e shefes së grupit parlamentar Mimoza Kusari-Lila.

“Tashmë sabotimi i punës së anëtarëve të komisionit nga opozita, një komision hetimor të cilin ata vetë e propozuan është evidente kur shihen kampanja shpifje që këta kanë filluar. Apo ideja është që ky komision hetimor jo të shpërfaqë të vërtetën dhe të diskutohet në kuvend, por ata kanë marrë tashmë një pozicion që ka qenë pengesë që nga fillimi. Ata thonë që pa shkarkuar shefen e GP-së, ne nuk votojmë as ligje, as marrëveshje ndërkombëtare, dhe që është e vërteta ne këtu kemi marrë besimin nga votuesit e Kosovës të avancojmë programin tonë, dhe nuk jemi këtu për të shërbyer si paterice e makinacioneve të lodhëta të opozitës. Mesazhin e popullit të Kosovës këta e kanë marrë me 14 shkurt. Një mesazh më të mirë do ta marrin më 9 shkurt”, tha Muja.

Ndërkaq, deputetja e Lëvizjes Vetëvendosje Arjeta Fejza ka thënë se anëtarët e opozitës në komision nuk kanë treguar gatishmëri të përmbushin misionin e komisionit të formuar me kërkesën e vetë tyre.

“Për planin e punës dhe mënyrën se si ka pasur të vazhdohet intervistimi, propozimi ka qenë prej grupit tonë parlamentar. Ne kemi marrë përsipër dhe kemi bërë një plan të detajuar edhe për orarin e intervistave duke e planifikuar një punë intensive të komisionit me intervista të cilat do të mbaheshin çdo ditë, madje edhe të shtunave. Anëtarët e opozitës në këtë komision nuk kishin gatishmëri që të realizojnë misionin e komisionit, të cilin ata kishin kërkuar të themelohet vetë”, tha Fejza.

Ndryshe, edhe javën e kaluar ka dështuar mbledhja e të njëjtit komision në mungesë të kuorumit.

Khalil al-Hayya, udhëheqës i lartë politik i Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian – ka konfirmuar më 18 tetor vdekjen e liderit të grupit, Yahya Sinwar.

Përmes një deklarate televizive, Al-Hayyaa, përsëriti qëndrimin e Hamasit se nuk do të lirojë pengjet izraelite që u kapën gjatë sulmit të 7 tetorit 2023 në jug të Izraelit.

Ai tha se pengjet nuk do të lirohen derisa nuk arrihet një armëpushim për luftën në Gazë.

“Këta të burgosur nuk do t’iu kthehen derisa nuk do t’i jepet fund agresionit në Gazë dhe [ushtria izraelite] të tërhiqet nga Gaza”, tha ai.

Sinwar, i cilësuar si arkitekti i sulmit të 7 tetorit 2023 që e nxiti luftën në Gazë mes Izraelit dhe Hamasit, u vra në jug të Gazës nga një sulm izraelit më 17 tetor.

Sinwar ishte zgjedhur udhëheqës i grupit pas vrasjes së Ismael Haniyehut në korrik, në një sulm të dyshuar izraelit në kryeqytetin iranian, Teheran.

Para se të merrte udhëheqjen e Hamasit, Sinwar kishte drejtuar krahun e armatosur të grupit.

Ndryshe, gjatë sulmit të 7 tetorit të vitit të kaluar, Hamasi vrau afër 1.200 persona – shumica civilë – në jug të Izraelit dhe rrëmbeu afër 250 të tjerë. Si pasojë e ofensivës izraelite, në Gazë janë vrarë më shumë se 42.000 palestinezë./REL/

Nën sloganin “Mos HESHT”, Ministria e Punëve të Brendshme ka shënuar sot 18 Tetorin – Ditën e Bashkimit Evropian kundër trafikimit me qenie njerëzore, ku këtë vit në fokus do të jetë ndërgjegjësimi, identifikimi dhe trajtimi i fëmijëve në situatë rruge, lëmosh-kërkuesve dhe fëmijëve që braktisin shkollën.

Koordinatori nacional kundër trafikimit me njerëz, zëvendësministri i Punëve të Brendshme Blerim Gashani theksoi se trafikimi me njerëz paraqet një nga shkeljet më të rënda të të drejtave dhe lirive të njeriut.

“Trafikantët qenien njerëzore e shndërrojnë në mall dhe ndryshe trafikimi njihet edhe si skllavëri e shekullit 21. Dhe, nga kjo dukuri nuk ka shpëtuar pa u prekur edhe Kosova, marrë parasysh edhe tranzicionin që ka kaluar. Andaj, institucionet e Kosovës kanë treguar përkushtim për të mbrojtur vlerat më elementare të të drejtave të njeriut dhe kanë marrë masat e nevojshme në përputhshmëri me konventat dhe direktivat ndërkombëtare”, tha Gashani.

Gashani vuri në pah se për luftimin me sukses të trafikimit me njerëz kërkohet bashkëpunim i ngushtë ndërinstitucional duke përfshirë edhe organizatat joqeveritare dhe organizatat apo institucionet tjera ndërkombëtare.

“Institucionet e Kosovës do të vazhdojnë edhe më fuqishëm të kryejnë aktivitete dhe të marrin masa për çrrënjosjen e kësaj dukurie. Lufta kundër trafikimit me njerëz, veçanërisht shfrytëzimit të fëmijëve, kërkon një përpjekje të përbashkët nga të gjitha sektorët e shoqërisë,” tha ai.

Procesi i Berlinit ka ndikuar në bashkëpunimin më të madh të gjashtë vendeve të Ballkanin Perëndimor. Kështu u tha në debatin për Procesin e Berlinit, në jubileun e dhjetë të tij.

Ambasadori gjerman, Jorn Rohde, tha se krijimi i tregut të përbashkët rajonal ndikon në jetën e njerëzve dhe bizneseve.

Derisa përmendi benefitet e marrëveshjeve të arritura të vendeve të rajonit në kuadër të Procesit të Berlinit, ai e përshëndeti sërish vendimin e kryeministrit Albin Kurti, i cili bëri të ditur se nga 1 janari i vitit 2025 do të heq regjimin e vizave për Bosnjë Hercegovinën.

“Këto 10 vite kanë qenë dëshmi e angazhimit të Gjermanisë në Kosovë dhe në Ballkanin Perëndimor në përgjithësi. Ajo që mund të tingëllojë teknike, krijimi i një tregu të përbashkët rajonal ndikon në jetën e njerëzve, bizneseve, studentëve çdo ditë për shkak të procesit të Berlinit. Tarifat e roaming-ut të telefonave tuaj celularë janë më të ulëta, për shkak të procesit të Berlinit ka një partneritet rajonal klimatik me Gjermaninë që vlen më shumë se 1.5 miliardë euro, për shkak të procesit të Berlinit. Ju mund të udhëtoni me letërnjoftime në rajon dhe më lejoni të përshëndes sërish vendimin e kryeministrit Kurti javën e kaluar, që Kosova të njeh në mënyrë të njëanshme letërnjoftimet nga Bosnja dhe Hercegovina që nga 1 janari. Mendoj se ky është një gjest i fuqishëm i vullnetit të mirë dhe bujar….Së bashku me Kosovën, së bashku me të gjitha palët e interesuara dhe palët, kemi arritur të zhbllokojmë CEFTA-n pas disa vitesh qëndrim në vend”, tha ai.

Në anën tjetër, Jeton Zulfaj, këshilltar politik i kryeministrit Albin Kurti, tha se Procesi i Berlinit është forca shtytëse që rajoni të lidhet me njëri-tjetrin si dhe të integrohet më shumë me Bashkimin Evropian.

Ai tha se Kosova vazhdimisht është proaktive në kuadër të këtij mekanizmi rajonal të bashkëpunimit.

“Procesi i Berlinit lindi nga kjo rrethanë gjeopolitike, për t’i dhënë shpresë rajonit dhe për të mbajtur gjallë zgjerimin, dhe që atëherë ka qenë forca shtytëse që rajoni të lidhet me njëri-tjetrin, të qëndrojë i lidhur dhe të integrohet më shumë dhe të lidhet me BE-në. Pra, integrimi në BE, bashkëpunimi rajonal dhe integrimi ekonomik, por edhe lidhja me zgjerimin, sepse kjo është shumë e rëndësishme që rajoni të ketë këtë perspektivë për t’u bërë i gjithë anëtarë i BE-së dhe tani që 10 vjet më vonë, zgjerimi është përsëri në agjendë dhe të gjitha vendet e Ballkanit Perëndimor tani janë kthyer. Procesi i Berlinit ka pasur rol të rëndësishëm për ta mbajtur këtë gjallë. Pra, kjo është pjesa e parë që është shumë e rëndësishme që ne e kemi pasur këtë proces dhe ne festojmë dhe Kosova ka qenë mbështetëse kryesore, duhet të them se kemi qenë shumë aktivë dhe proaktivë, sepse siç tregojnë shifrat, është në interes të Kosovës, dhe sigurisht një arritje e madhe ka qenë përveç agjendës së lidhjes ka qenë Tregu i përbashkët Rajonal, të cilin e përmendëm. Por në vetvete, ajo duhet të jetë më shumë për atë që ne bëjmë me të sesa se si kemi arritur të mbështesim tregun e përbashkët rajonal. Për të kujtuar vitin 2021, duke ditur llojin e vështirësive që kemi në CEFTA, që është marrëveshja për tregtinë dhe ajo kyçe, kishim ardhur me një ide se si të krijonim një alternativë, e cila nuk do ta pakësonte CEFTA-n, por do të mundësonte anashkalojmë këto probleme që kemi tashmë”, theksoi Zulfaj.

Ndërkaq, Nora Hasani, nga Oda Ekonomike Gjermano-Kosovare, tha se Kosova ka përfituar nga Procesi i Berlinit.

“Dëshiroj gjithashtu të falënderoj qeverinë gjermane që është partner shumë i fortë dhe ka mbajtur gjallë procesin e Berlinit dhe ka lehtësuar të gjitha këto vështirësi që kemi, veçanërisht gjatë muajve dhe javëve të fundit. Kur bëhet fjalë për marrëdhëniet e biznesit me Gjermaninë për ne është e lehtë të thuhet se kemi pasur përmirësim. Nuk shihet vetëm nga të dhënat, por edhe nga të gjitha statistikat që kemi dhe pjesë e kësaj nuk është vetëm procesi i Berlinit, nuk do të ishte e saktë të thuhet se është një ndikim i drejtpërdrejtë nga procesi. Por ne kemi një diasporë të madhe atje dhe tradicionalisht Gjermania ka qenë investitori më i madh i huaj në Kosovë. Kemi pasur rritje të tregtisë edhe gjatë viteve të fundit. Por ka elementë të ndryshëm që kanë luajtur një rol vendimtar këtu. Domethënë të gjitha këto vështirësi në zinxhirin e furnizimit që kompanitë gjermane dhe evropiane patën gjatë Covid-it, gjatë gjithë këtyre ndryshimeve gjeopolitike tani. Por megjithatë, ka disa pjesë dhe mekanizma të tjerë të procesit të Berlinit që nuk po diskutohen në panele si ky. Tani do të doja të fokusohesha në këto iniciativa shumë praktike që u ndërmorën përmes qeverisë gjermane për të rritur tregtinë dhe investimet në rajon. Dhe unë po flas këtu për nismën e blerjeve të Ballkanit Perëndimor, është gjithashtu një ‘foshnjë’ e vogël e procesit të Berlinit. Është duke u organizuar nga një partner i yni, shoqata federale gjermane për logjistikën e menaxhimit të zinxhirit të furnizimit”, deklaroi ajo.

Ndërkaq, Alban Hashani nga Instituti Rinvest tha se tregu i përbashkët rajonal por edhe marrëveshja për CEFTA-n janë hapa të rëndësishëm për të riafirmuar bashkëpunimin rajonal.

“Tregu i përbashkët rajonal dhe veçanërisht me marrëveshjen për CEFTA-n dhe miratimin e diferencimit të dytë të planit të veprimit të tregut të përbashkët rajonal, mendoj se janë hapa të rëndësishëm për të riafirmuar rolin e Procesit të Berlinit, por edhe për të riafirmuar rrugën e Ballkanit Perëndimor drejt BE-së. Bazuar kryesisht në vlerat e BE-së dhe gjithashtu në tregun e përbashkët rajonal. Dhe unë mendoj se bashkëngjitur këtij plani të ri veprimi të tregut të përbashkët rajonal është një bashkëngjitje e rëndësishme e planit të rritjes, e cila do të mbështeste reformat për të lidhur ekonomitë e Ballkanit Perëndimor me tregun e përbashkët të BE-së”, tha ai