Lajmet

“Energji për Barazi”, kërkohet rritja e përqindjes së grave në sektorin e energjisë

Published

1 year ago

October 18, 2024

UBTnews

Një prej sfidave më të mëdha për gratë e punësuara në sektorin e energjisë, po thuhet se është përqindja e ulët e tyre në pozitat e ndryshme teknike e menaxheriale, si në kompani private dhe publike. E për këto probleme, MCC/MCA Kosovë, ka lansuar projektin “Energji për Barazi”, aktivitet i cili synon fuqizimin e grave në sektorin e energjisë në Kosovë.

“Energji për Barazi” ka tri nën aktivitete, prej të cilave gratë në sektorin e energjisë do të përfitojnë grante në vlerë prej 2.5 milionë dollarë, mundësi punësimi nga ana e trajnimeve dhe shpërblime.

Kështu ka thënë drejtori i këtij projekti JETA, MCA Kosovë, Hamit Qeriqi.

“Komponenti kryesor është i granteve që do të jepen për kompanitë e energjisë. Komponenti tjetër, është mundësi për zhvillim të fuqisë punëtore, përmes trajnimeve të stafit dhe të kompanive. Komponenti i tretë, është i çmimeve apo shpërblimeve që, do të jepen për kompanitë të cilat bëjnë ndryshime, krijojnë politika dhe ambient të përshtatshme, për punësimin, mbajtjen dhe zhvillimin në karrierë të punëtoreve gra në kompanitë e tyre”, ka thënë Qeriqi.

Qeriqi ka shtuar se në të njëjtën kohë do të kontribuojnë edhe në përfshirjen e grave, që nuk janë më pjesë e tregut të punës, përmes trajnimeve të ndryshme, prej të cilave edhe do të punësohen.

“Një prej problemeve kryesore ka qenë përqindja e ulët e tyre në sektorin e energjisë por, edhe pozita të ndryshme teknike dhe menaxheriale që mbajnë gratë, qofshin kompani private apo publike. Të njëjtën kohë do të kontribuojmë edhe me përfshirjen e grave, të cilët nuk janë aty më në tregun e punës, përmes trajnimeve të ndryshme, të bashkëngjiten në fuqinë punëtore, në sektorin e energjisë, që do të jenë të punësuara pas atyre trajnimeve apo, punën praktike që do të ofron aktiviteti “Energji për Barazi”, ka shtuar Qeriqi.

E vlera e këtyre granteve, do të ndahen sipas bizneseve.

Për ndërmarrjet mikro të vogla, vlera e granteve do të jetë deri në 30 mijë dollarë, për ndërmarrjet e mesme deri 60 mijë dollarë, kurse për ndërmarrjet e mëdha që kanë mbi 200 punëtorë të punësuar, vlera do të jetë 120 mijë dollarë.

Qeriqi, ka theksuar se duhet marrë parasysh se do të kërkohet bashkëfinancim nga ndërmarrjet.

“Vlera e granteve në total, është një përllogaritje që do të jenë diku 2.5 milionë dollarë, gjatë kohës kur do të zbatohet projekti. Por e kemi ndarë në kategori të ndryshme, varësisht prej madhësisë së normales, për ndërmarrjet mikro të vogla do të ketë vlerë deri në 30 mijë dollarë, të mesëm planifikojmë që vlera maksimale të jetë 60 mijë dollarë, kurse për ndërmarrjet e mëdha që kanë mbi 200 punëtorë të punësuar, vlera do të jetë 120 mijë dollarë, duke pasur parasysh se do të kërkohet bashkëfinancim nga ndërmarrjet”, ka theksuar ai.

Projekti “Energji për Barazi” ka filluar në korrik të këtij viti dhe planifikohet të përfundojë me 30 prill të 2029.

Up Next

Kurti në Paris: Kosova në mesin e ekonomive me rritjen më të shpejtë në Ballkan

Don't Miss

Von der Leyen do ta vizitojë Ballkanin Perëndimor javën e ardhshme

Rajoni

Rektori Hajrizi viziton UniMarconi në Romë

Published

6 hours ago

November 8, 2025

Driton Iseni

Gjatë vizitës zyrtare në Itali, Rektori i UBT-së, Prof. Dr. Edmond Hajrizi, zhvilloi një vizitë në Universitetin UniMarconi, i pari institucion digjital i i akredituar në Itali.

Me këtë rast, Rektori Hajrizi u takua me Rektorin e UniMarconi-t, Prof. Marco Abate, me Prof. Ulrike Haider-Quercia, udhëheqëse e Shkollës së Doktoratës, si dhe me Prof. Francesco Gaspari, përgjegjës për bashkëpunimin ndërkombëtar.

Të dy rektorët shkëmbyen përvoja rreth zhvillimit të universiteteve moderne, bashkëpunimeve ndërkombëtare dhe mundësive për forcimin e partneritetit ndërmjet dy institucioneve në fusha të ndryshme, si mobiliteti akademik, studimet e përbashkëta, projektet kërkimore dhe inovacioni.

Lajmet

Bellingham dhe Foden rikthehen në kombëtaren e Anglisë

Published

23 hours ago

November 7, 2025

UBT News

Jude Bellingham dhe Phil Foden janë rikthyer në skuadrën e Anglisë për ndeshjet kualifikuese të Kupës së Botës kundër Serbisë dhe Shqipërisë.

Trajneri Thomas Tuchel ka ftuar për herë të parë mesfushorin e Bournemouthit, Alex Scott, i cili ka bërë paraqitje mbresëlënëse këtë sezon. Nga ana tjetër, Jack Grealish dhe Danny Welbeck nuk janë përfshirë në listë, ndërsa mungojnë edhe Ollie Watkins dhe Myles Lewis-Skelly.

Bellingham, që kishte munguar në grumbullimin e kaluar për shkak dëmtimi, është rikthyer në formë me Real Madridin, duke shënuar tre gola në katër ndeshjet e fundit. Edhe Foden ka shkëlqyer me Manchester Cityn, ku shënoi dy herë në Ligën e Kampionëve kundër Borussia Dortmund.

“Jemi të kënaqur që janë rikthyer. Të dy kanë qenë vendimtarë për klubet e tyre dhe tani mund të ndihmojnë edhe kombëtaren,” tha Tuchel.

Anglia kryeson Grupin K me 18 pikë pas gjashtë ndeshjeve, ndërsa përballet me Serbinë në Wembley të enjten dhe me Shqipërinë në Tiranë të dielën.

Skuadra e Anglisë:

Portierë: Henderson, Pickford, Pope

Mbrojtës: Burn, Guehi, James, Konsa, O’Reilly, Quansah, Spence, Stones

Mesfushorë: Anderson, Bellingham, Henderson, Rice, Rogers, Scott, Wharton

Sulmues: Bowen, Eze, Foden, Gordon, Kane, Rashford, Saka./S.K/KP/

Sport

Vdes në moshën 24 vjeçare lojtari i Cowboys, Marshawn Kneeland

Published

1 day ago

November 7, 2025

UBT News

Sipas autoriteteve ligjore, ka vdekur mbrojtësi i Dallas Cowboys, Marshawn Kneeland në moshën 24 vjeçare. Ekipi lëshoi një deklaratë të enjten duke mos përmendur shkakun e vdekjes.

“Me trishtim të madh, Dallas Cowboys njoftojnë se Marshawn Kneeland ndërroi jetë tragjikisht këtë mëngjes. Marshawn ishte një shok skuadre i dashur dhe anëtar i organizatës sonë. Mendimet dhe lutjet tona në lidhje me Marshawn janë me të dashurën e tij Catalina dhe familjen e tij.”, thuhet në njoftim.

Cowboys kanë vënë në dispozicion burime këshillimi për të gjithë lojtarët, trajnerët dhe stafin.

Lojtarët aktualisht janë në javën e pushimit dhe nuk janë planifikuar të stërviten përsëri deri të hënën.

Policia e DPS-së gjeti automjetin e Kneeland të rrëzuar në Dallas Parkway në drejtim të jugut pranë Warren Parkway. Sipas raportit, Kneeland iku nga vendi i ngjarjes në këmbë dhe oficerët kontrolluan zonën me ndihmën e K-9 dhe njësive të dronëve.

Ndërsa autoritetet po kërkonin Kneeland, një dispeçer u tha oficerëve se njerëzit që e njihnin kishin marrë një mesazh në grup nga Kneeland duke i thënë lamtumirë. Përafërsisht tre orë më vonë, Kneeland u gjet i vdekur./S.K/NFL/

Rajoni

Profesorët e UBT-së përfaqësojnë institucionin në konferencën ndërkombëtare të projektit COWEB në Sarajevë

Published

1 day ago

November 7, 2025

Driton Iseni

Profesorët Dr. Engelbert Zefaj dhe Dr. Mentor Shaqiri përfaqësuan UBT-në në konferencën punuese ndërkombëtare të projektit COWEB, e cila u mbajt në Sarajevë, në ambientet e International Burch University.

Gjatë konferencës, përfaqësues nga universitete partnere të rajonit prezantuan punimet dhe rezultatet e tyre kërkimore, duke ndarë përvoja mbi zhvillimin e praktikave të reja në mësimin virtual bashkëpunues.

Në këtë kuadër, profesori i UBT-së Dr. Engelbert Zefaj mbajti një prezantim me temën: “Kultura dhe Ndërkulturaliteti në Mësimin Virtual Bashkëpunues (VCL): Ndikimet Pedagogjike dhe Vlerësimi i Studentëve”, ku theksoi rëndësinë e bashkëpunimit ndërkulturor dhe ndikimin pozitiv të tij në përmirësimin e përvojës së të nxënit.

Projekti COWEB ka për qëllim ndërtimin e kapaciteteve në institucionet e arsimit të lartë në Ballkanin Perëndimor për bashkëpunim ndërkombëtar virtual, duke promovuar pedagogji inovative dhe bashkëkrijimin e përmbajtjeve digjitale që forcojnë aftësitë dhe kompetencat e shekullit XXI.

Nëpërmjet pjesëmarrjes aktive në këtë projekt, UBT vazhdon të dëshmojë rolin e tij si një ndër institucionet lidere në avancimin e metodave bashkëkohore të mësimdhënies dhe në nxitjen e bashkëpunimit akademik ndërkombëtar në rajonin e Ballkanit Perëndimor.