Edon Zhegrova po vazhdon të marrë vëmendje në mediat italiane dhe evropiane, pas paraqitjes së tij në fitoren 2:0 të Juventusit ndaj Napolit, ku kontribuoi me një asistim.

Paraqitja e reprezentuesit të Kosovës ka nxitur reagime të shumta, me disa prej mediave të njohura që i kanë bërë thirrje trajnerit Luciano Spalletti t’i japë më shumë hapësirë në fushë.

Zhegrova u inkuadrua në lojë në minutën e 59-të dhe menjëherë i dha më shumë gjallëri repartit ofensiv të Juventusit, duke rrezikuar vazhdimisht përmes driblimeve, depërtimeve dhe harkimeve.

Një statistikë interesante nga kjo ndeshje është se kosovari realizoi më shumë goditje brenda vetëm tri minutave sesa dy sulmuesit Kolo Muani dhe Nick Woltemade gjatë gjithë takimit.

Paraqitja e tij nuk kaloi pa u vënë re nga mediat prestigjioze si “Goal”, “Tuttomercatoweb” dhe “Corriere della Sera”, të cilat vlerësuan ndikimin e tij në lojën e skuadrës torineze.

“Një aksion i tij solli golin e epërsisë 1:0. U inkuadrua në lojë dhe i dha gjallëri skuadrës. Padyshim që meriton më shumë hapësirë”, shkroi “Tuttomercatoweb”.

Ndërkohë, “Corriere della Sera” e vlerësoi kontributin e tij me fjalët: “Freskia dhe energjia e re që bëjnë diferencën”.

Edhe mediumi “Goal” theksoi ndikimin e Zhegrovës pas inkuadrimit në lojë.

“I futur në lojë në minutën e 59-të, Zhegrova solli freski dhe më shumë depërtim në sulmin e Juventusit. Rreth minutës së 75-të, ai pati dy goditje radhazi që u bllokuan nga mbrojtja e Napolit, duke e mbajtur kundërshtarin nën presion, ndërsa Juventusi kërkonte golin e fitores”, shkroi “Goal”.

Kështu, paraqitjet e fundit të Zhegrovës po shtojnë zërat se reprezentuesi kosovar meriton më shumë minuta në dispozicion te Juventusi.

D.L

Atletico Madridi ka arritur një marrëveshje në parim me mbrojtësin e Manchester Unitedit, Lisandro Martinez, për kushtet personale të kontratës, duke hapur rrugën për një transferim të mundshëm gjatë afatit kalimtar të janarit ose në verën e ardhshme.

Sipas mediumit “North Bank Insider”, negociatat mes përfaqësuesve të futbollistit argjentinas dhe klubit madrilen kanë nisur prej kohësh, ndërsa trajneri Diego Simeone thuhet se e dëshiron me ngulm transferimin e tij.

Martinez ka kontratë me Manchester Unitedin deri në verën e vitit 2027, me mundësi vazhdimi edhe për një sezon tjetër. Megjithatë, sipas raportimeve, mbrojtësi nuk ka ndërmend të rinovojë kontratën apo të aktivizojë opsionin e vazhdimit të saj.

Ky qëndrim raportohet se lidhet edhe me pakënaqësitë e tij ndaj drejtuesve të klubit anglez, pas kritikave të bëra në lidhje me humbjen e Manchester Unitedit ndaj Atletico Madridit.

Pavarësisht marrëveshjes së arritur me futbollistin, Atletico Madridi ende nuk ka gjetur gjuhën e përbashkët me Manchester Unitedin për transferimin e tij.

Klubi spanjoll mund të tentojë ta konkretizojë marrëveshjen që në afatin kalimtar të janarit.

Ndërkohë, Martinez së fundmi u ndëshkua me karton të kuq në përballjen ndaj Chelseat dhe për këtë arsye do të mungojë në ndeshjen e ardhshme të Manchester Unitedit kundër Aston Villas, në kuadër të Premier League.

D.L

Juventusi ka shënuar fitore me rezultat 2:0 ndaj Napolit, në derbin e vlefshëm për javën e dhjetë të Serie A, ku protagonist ishte edhe futbollisti kosovar Edon Zhegrova.

Reprezentuesi i Kosovës u inkuadrua në lojë në minutën e 59-të dhe kontribuoi me një asistim në golin e epërsisë për skuadrën torineze.

Zhegrova arriti të lirohej nga presioni i një futbollisti kundërshtar dhe më pas asistoi për Kerim Alajbegoviqin, i cili me një goditje të fuqishme nga distanca, duke shfrytëzuar edhe ndihmën e shtyllës, realizoi për 1:0.

Fitoren e Juventusit e vulosi Jeremie Boga, i cili në minutën e 87-të shënoi golin e dytë për rezultatin përfundimtar 2:0.

Për Zhegrovën ky ishte asistimi i dytë në tetë ndeshje të zhvilluara këtë sezon, ndërsa ka realizuar edhe dy gola.

Napoli luajti me një futbollist më pak nga minuta e 75-të, pasi Luca Marianucci u ndëshkua me kartonin e dytë të verdhë dhe u përjashtua nga loja. Në pjesën e dytë, për skuadrën napolitane u aktivizua edhe mbrojtësi kosovar Amir Rrahmani.

Pas kësaj fitoreje, Juventusi ngjitet në vendin e shtatë me 17 pikë, ndërsa Napoli zbret në pozitën e tetë me 14 pikë.

D.L

Piloti italian Kimi Antonelli ka hyrë në histori të Formula 1, duke u bërë kampioni më i ri në historinë e këtij sporti.

20-vjeçari siguroi titullin e kampionit pas përfundimit në vendin e tretë në Çmimin e Madh të Meksikës, dy gara para mbylljes së sezonit.

Me këtë sukses, Antonelli theu rekordin e mëparshëm që mbahej nga gjermani Sebastian Vettel, i cili ishte shpallur kampion në vitin 2010, në moshën 23-vjeçare e 133-ditëshe. Ndërsa italiani e arriti këtë sukses në moshën 20-vjeçare e 68-ditëshe.

Piloti i Mercedesit kryeson renditjen me 365 pikë, ndërsa shoku i tij i skuadrës, George Russell, renditet i dyti me 242 pikë.

Pas këtij suksesi historik, emocionet ishin të mëdha për Antonellin, i cili në një intervistë me ish-kampionin e botës, Nico Rosberg, nuk i fshehu ndjenjat dhe mirënjohjen për njerëzit që e ndihmuan të arrinte këtë sukses.

“Pa Mercedesin dhe pa familjen time, nuk do të isha këtu. Jam pa fjalë. Po përpiqem ende ta përpunoj atë që ndodhi”, u shpreh italiani.

Ai gjithashtu e cilësoi të jashtëzakonshme ndarjen e podiumit me dy kampionë të shumtë të botës, Max Verstappen dhe Lewis Hamilton.

Garën në Meksikë e fitoi Max Verstappeni i Red Bullit, ndërsa në vendin e dytë përfundoi Lewis Hamilton i Ferrarit.

D.L