Pakicat janë rekrutuar në punë të detyruar në rajonin e Xinjiang-ut të Kinës, në sektorë të tillë si bujqësi dhe prodhim, kështu ka përfunduar një raport nga një ekspert i pavarur i OKB-së, në atë që tha se mund të përbënte “skllavërim si një krim kundër njerëzimit”.

Pekini është akuzuar për ndalimin e mbi një milion ujgurëve dhe pakicave të tjera myslimane në Xinjiang, si dhe për sterilizimin të detyruar të grave dhe imponimin e punës së detyruar.

Shtetet e Bashkuara dhe ligjvënësit në vendet e tjera perëndimore e kanë akuzuar Kinën për kryerje të “gjenocidit” kundër grupeve minoritare, akuza këto që Pekini vazhdon t’i mohojë.

Raporti i publikuar të martën nga raportuesi i posaçëm i OKB-së për skllavërinë moderne, Tomoya Obokata, vuri në dukje dy “sisteme të dallueshme të mandatuara nga shteti” në Kinë në të cilat ka ndodhur puna e detyruar, duke cituar raporte të grupeve të ekspertëve dhe OJQ-ve, si dhe viktima.

Njëri është një sistem qendrash arsimore dhe trajnimi për aftësitë profesionale, në të cilin minoritetet ndalohen dhe i nënshtrohen vendosjes në punë, ndërsa tjetri përfshin përpjekjet për të reduktuar varfërinë nëpërmjet transferimit të punës, në të cilin punëtorët ruralë zhvendosen në “punë dytësore ose terciare”.

“Ndërsa këto programe mund të krijojnë mundësi punësimi për pakicat dhe të rrisin të ardhurat e tyre… raportuesi special konsideron se treguesit e punës së detyruar që tregojnë natyrën e pavullnetshme të punës së kryer nga komunitetet e prekura kanë qenë të pranishme në shumë raste”, thuhet në raport.

Natyra dhe shtrirja e kompetencave të ushtruara mbi punëtorët — duke përfshirë mbikëqyrjen e tepruar dhe kushtet abuzive të jetesës dhe të punës — mund të “kanë vlerën e skllavërimit si një krim kundër njerëzimit, që meriton një analizë të mëtejshme të pavarur”, tha ai.

Raportuesit specialë janë ekspertë të pavarur të emëruar nga Këshilli i OKB-së për të Drejtat e Njeriut, por që nuk flasin në emër të organizmit botëror.

Kina ka këmbëngulur prej kohësh se po drejtonte qendra të trajnimit profesional në Xinjiang të dizajnuara për të luftuar ekstremizmin, me presidentin Xi Jinping që vizitoi rajonin muajin e kaluar dhe përshëndeti “progresin e madh” të bërë në reforma dhe zhvillim./UBTNews/