Përfaqësuesja e Kosovës në karate ka arritur një rezultat të shkëlqyer në Kampionatin Ballkanik të zhvilluar në Stamboll të Turqisë, duke grumbulluar gjithsej 10 medalje, prej të cilave një e artë, tri të argjendta dhe gjashtë të bronzta.

Dita e fundit e garave solli tri medalje të bronzta në konkurrencën ekipore. Ekipi i djemve për kadetë, ekipi i vajzave për kadete si dhe ekipi i djemve për juniorë arritën të ngjiten në podiumin e fituesve duke siguruar medalje të bronzta për Kosovën.

Në garat individuale, suksesin më të madh e shënoi Emira Maqedonci, e cila u kurorëzua kampione e Ballkanit duke fituar medaljen e artë. Me medalje të argjendta u nderuan Suela Arifi, Qëndresa Ibrahimi dhe Prijam Gashi, ndërsa medaljet e bronzta në konkurrencën individuale i rrëmbyen Alea Kelmendi, Krenar Ismajli dhe Amar Daku.

Rezultati i arritur në Stamboll rikonfirmon ngritjen e karatesë kosovare në arenën rajonale, me federatën, trajnerët dhe sportistët që morën urime të shumta për përfaqësimin dinjitoz të flamurit të Kosovës. /E.A/

Fisnik Asllani ka festuar në mënyrën më të mirë paraqitjen e tij jubilare në Bundesliga, duke shënuar një gol dhe dhuruar një asistim në fitoren e Hoffenheimit ndaj Schalke 04, me rezultat 2:1.

Sulmuesi i Përfaqësueses së Kosovës ishte ndër protagonistët kryesorë të kësaj fitoreje, me të cilën Hoffenheimi vazhdon ngjitjen në tabelën e kampionatit gjerman. Pas këtij triumfi, skuadra e tij ka grumbulluar 12 pikë dhe renditet në pozitën e nëntë.

Asllani qëndroi në fushë deri në minutën e 78-të, kur u zëvendësua. Paraqitja e tij u vlerësua me notën 7.6 nga platforma SofaScore.

Përveç golit dhe asistimit, sulmuesi kosovar regjistroi edhe katër goditje drejt portës, fitoi dy duele dhe kompletoi një driblim, duke dëshmuar edhe një herë rëndësinë e tij në repartin ofensiv të Hoffenheimit.

Ky ishte goli i tretë i Asllanit në Bundesliga këtë sezon, ndërsa kosovari ka gjetur rrjetën edhe në garat evropiane.

Paraqitja e tij vjen në një moment të rëndësishëm, para angazhimeve të ardhshme të Përfaqësueses së Kosovës, ku Asllani pritet të jetë një nga pikat kryesore të repartit ofensiv.

D.L

Kombëtarja e Kosovës në hendboll është mposhtur nga Hungaria me rezultat 34:20, në ndeshjen e zhvilluar të dielën mbrëma në Ferizaj, në kuadër të xhiros së dytë të kualifikimeve për Kampionatin Evropian 2028.

Përkundër humbjes, Dardanët e nisën mjaft mirë takimin, duke krijuar epërsi prej 6:3 në minutën e shtatë. Megjithatë, Hungaria, si favorite e grupit dhe njëra prej kombëtareve më të forta në Evropë, arriti të rikthehej në lojë dhe ta përmbyste rezultatin.

Pjesa e parë përfundoi me epërsi 17:12 për mysafirët, ndërsa në pjesën e dytë hungarezët e thelluan edhe më shumë dallimin për ta siguruar fitoren me rezultat 34:20.

Në paraqitjen e Kosovës ndikuan edhe mungesat e shumta të lojtarëve të rëndësishëm, si Egzon Gjuka, Leonard Gegaj, Valon Dedaj dhe Kastriot Jupa. Vështirësitë u shtuan edhe me përjashtimin e Jon Muqollit në minutën e 11-të.

Drenit Tahirukaj dhe Shaban Zogaj ishin golashënuesit më të mirë te Kosova, me nga pesë gola, ndërsa Olsi Mulaj realizoi katër dhe Matej Thaqi tri. Portieri Haris Berisha regjistroi nëntë pritje.

Ndeshja u zhvillua në një atmosferë të jashtëzakonshme sportive, në praninë e rreth 2.500 shikuesve në Ferizaj.

Pavarësisht rezultatit, Kombëtarja e Kosovës tregoi angazhim dhe karakter përballë një kundërshtari të nivelit të lartë evropian.

D.L

Edon Zhegrova vazhdon të mos e fitojë vendin në formacionin startues të Juventusit, duke u aktivizuar sërish si zëvendësues.

Juventusi barazoi 2:2 në udhëtim ndaj Fiorentinës, në ndeshjen e vlefshme për xhiron e 11-të të Serie A, të zhvilluar të dielën mbrëma.

Futbollisti kosovar u inkuadrua në lojë në minutën e 57-të, në një moment kur Juventusi ishte në disavantazh prej 2:1.

Golin e parë për Juventusin e shënoi Nick Woltemade, ndërsa Bremer realizoi golin e barazimit në minutën e 66-të, duke vulosur rezultatin përfundimtar 2:2.

Për vendasit shënuan Mateo Pellegrino në minutën e katërt dhe Alieu Njie në minutën e 54-të.

Edhe pse po aktivizohet rregullisht, Zhegrova vazhdon të luajë kryesisht si zëvendësues. Në nëntë paraqitje në Serie A, ai ka kontribuuar me dy gola dhe dy asistime.

Juventusi vazhdon të jetë larg objektivave të tij këtë sezon, duke u renditur në pozitën e shtatë me 18 pikë. Në anën tjetër, Fiorentina gjendet në vendin e 15-të me nëntë pikë.

D.L