Kryeministri shqiptar, Edi Rama në bashkëbisedimin në rubrikën “Sy m’Sy” me qytetarët në rrjetet sociale u ndal tek anëtarësimi i Shqipërisë në BE, ku theksoi se vendi ka një kalendar të dakordësuar me Komisionin Evropian për tre vite 2024-2027, duke e quajtur këtë një rekord historik.

Rama ndër të tjera shtoi se kalendari i 2027-së është shumë i ngjeshur dhe mjafton një lëkundje që e gjithë puna e bërë deri tani për negociatat të shkojë dëm.

“Ka disa që teorizojnë që kjo është kot sepse në të gjitha rastet BE nuk do të marrë brenda as Shqipërinë dhe askënd tjetër, ose që do ta marrë Shqipërinë pavarësisht se kush fiton. Po të shikosh me kujdes ankohen shumë, por janë përfituesit më të mëdhenj të rritjes ekonomike, të gjitha mundësive të shtuara këto vite. Përgjithësisht them se s’mund të bëj asnjë insinuatë pa pasur fakte, por bazuar në fakte pjesa më e madhe teorizojnë, ndërkohë që nuk deklarojnë atë që marrin plotësisht, pra një pjesë të pagës.

Qajnë hallin pensionistëve. Qajnë hallin edhe se u kopjua programi. Është gjëja më qesharake, a thua se bëhet fjalë për ndonjë kod atomik, apo kod kasaforte të ndonjë sekreti. U kopjua kodi i Da Vinçit. Megjithëse iu qajnë hallin pensionistëve, nuk japin kontributin e tyre për Fondin e Sigurimeve Shoqërore, deri këtu është niveli i banaliteti dhe hipokrizisë dhe krijesave kënetore.  Megjithëse ju qajnë hallin pensionistëve nuk kontribuojnë ndërkohë që e vërtetë është shumë më ndryshe, që nga fakti që vonesa apo kohëzgjatja e negociatave nuk është diçka që lidhet me mua dhe qeverinë tonë thjeshtë. Përcaktojnë edhe këtë si një mëkat të Rilindjes, por është një fakt që shikohet fare kollaj.

Kemi një kalendar të dakordësuar me Komisionin Europian për tre vjet 2024-2027, për të mbyllur negociatat. Do të jetë një rekord absolut historik dhe kjo jo pse jemi ndryshe nga të tjerët, por sepse BE është e interesuar të na marrë ne brenda në këtë moment. Kalendari i 2027 është shumë i ngjeshur dhe mjafton një lëkundje dhe mjafton që në anën tjetër të gjenden individë që nuk kanë probleme me ligjin dhe si mendoni ju që BE këto nuk i merr në konsideratë”, tha Rama.

Rama tha se më 11 maj, Partisë Socialiste i duhet një mandat me shumicë domethënëse për ta çuar Shqipërinë në Bashkimin Evropian. Ai theksoi se në këto zgjedhje, Partia Socialiste po përpiqet të japë dy mesazhe kryesore.

“Arsyeja që unë them që duhet një shumicë domethënëse nuk është rastësi, nuk është thjeshtë për këtu se për kë do votojmë ne, por është edhe për atë në Bruksel kryefjala e imazhi i fushatës sonë. Ndërthurja e ngjyrave dhe e flamujve si kartëvizitë e fushatës sonë, sepse ne po bëjmë një rrugë dhe dy punë. Po japim mesazh të qartë shqiptarëve dhe po përpiqemi t’i japim një mesazh të qartë Brukselit duke shpresuar që shqiptarët do ta mbështesin këtë mesazh. Më 11 Maj, Brukseli do marrë mesazhin shumë të qartë që një shumicë kërkojnë anëtarësimin tani dhe këtë mesazh shqiptarët mund ta japin. Nuk bëhet kollaj dot. Ne, populli shqiptar, duam të hyjmë në BE tani”, tha ai./tvklan.al

Asocacioni për Gazetarët Shqiptarë ka dërguar në Gjykatën Kushtetuese kërkesën për shpalljen anti-kushtetuese të vendimit të qeverisë shqiptare për mbylljen e TikTok.

Isa Myzyraj, në një deklaratë para GJK u shpreh se legjitimimi i një vendimi të tillë, do të sillte një precedent të rrezikshëm që mund t’i hapte më pas rrugën edhe mbylljen e rrjeteve të tjera sociale apo edhe mbyllje përfundimtare të Internetit.

“Nuk mund të shkohet në censurë të plotë dhe mbyllje të rrjeteve sociale. Kjo cënon lirinë e shprehjeve dhe të drejtën ekonomike të qytetarëve shqiptarë. Jemi besimplotë që anëtarët e GJK nuk do ta legjitimojë sepse kjo do të krijojë precedent që mund të çojë në mbylljen e rrjeteve të tjera sociale, apo mbylljen e internetit nga kjo qeveria apo qeveri të tjera që do të vijnë më pas”, tha kreu i Asocacionit për Gazetarët Shqiptarë.

Një aksident tragjik ka ndodhur në Gessopalena të Italisë, ku një shqiptar humbi jetën teksa punonte në një fermë. Viktima është identifikuar nga mediat italiane si Gentjan Muça, 31-vjeç.

Sipas të njëjtave burime, traktori ka përfunduar në një kanal dhe është përmbysur, duke zënë poshtë shqiptarin.

Urgjenca, madje një helikopter u dërgua nga Pescara për t’i shpëtuar jetën të riut, por nuk mund të bënin asgjë. Ai humbi jetën në vendin e ngjarjes.

“Nuk ka fjalë për ta përshkruar dhimbjen e kësaj dite të tmerrshme. I shprehim ngushëllime familjes dhe miqve në këtë moment të vështirë. Ai ishte një persona, kujtimet e së cilit do të qëndrojnë në zemra tona. Zoti e prehtë në paqe”, tha kryebashkiaku i Gessopalena-s, Mario Zulli kur mësoi lajmin e tmerrshëm.

Sipas mediave italiane, i riu shqiptar do të varroset në atdhe, në Shqipëri.

Platforma TikTok do të duhej të niste mbylljen e saj ditën e djeshme për 1.5 milion llogari të përdoruesve në territorin shqiptar.

Autoriteti Kombëtar për Sigurinë Kibernetike kishte kërkuar nga kompanitë e internetit marrjen e masave të nevojshme për bllokimin e aksesit në aplikacionin TikTok dhe infrastrukturën e tij digjitale në territorin shqiptar brenda datës 13 mars 2025.

Ndërkohë, tashmë në orët e mbrëmjes së kësaj date mund të thuhet me siguri se kjo kërkesë nuk është zbatuar.

Përdoruesit e platformës në Shqipëri vijojnë aksesin në të, ajo që është vërejtur gjatë vëzhgimit të funksionimit të platformës është se ndonjëherë përdoruesit kanë hasur probleme dhe vonesa në prodhimin e kontentit apo aksesin në llogari.

Mbetet për t’u parë se si do të procedohet në orët në vazhdim dhe a do të realizohet kërkesa për mbylljen totale të platformës.

Kërkesa e Autoriteti Kombëtar për Sigurinë Kibernetike në bashkëpunim me Agjencinë e Komunikimeve Elektronike, i drejtohej kompanive të internetit, në mënyrë që këto të fundit të bllokonin IP e TikTok në Shqipëri.

URDHRI I AKSK:

Autoriteti Kombëtar për Sigurinë Kibernetike (AKSK) me shkresën nr. 1196 prot., datë 10.03.2025 (administruar në AKEP me nr. 359/2 prot., datë 10.03.2025), ka kërkuar marrjen e masave të nevojshme për bllokimin e aksesit në aplikacionin TIK TOK dhe infrastrukturën e tij digjitale në territorin shqiptar, duke ndërmarrë veprimet e mëposhtme:

Bllokimi i IP-ve të TikTok në territorin e Shqipërisë.

Bllokimi i DNS-ve te TikTok në territorin e Shqipërisë.

Bllokimi i SNI (Server Name Indications) të TikTok në territorin e Shqipërisë.

Bllokimi i IP-ve të kompanisë ByteDance në territorin e Shqipërisë.

Në shkresën e AKSK-së citohet baza ligjore (Vendimi i Këshillit të Ministrave nr. 151 datë 6.3.2025) dhe listën e të gjitha IP-ve dhe domaineve, për të cilat kërkohet bllokimi i aksesit.

Bazuar në germën ç), të pikës 2 të nenit 30 të ligjit nr. 54/2024 “Për komunikimet elektronike në Republikën e Shqipërisë” dhe germës e), pika 1, të nenit 9, si dhe pikës 9 të Aneksit E, të Rregullores së AKEP nr. 47 datë 26.10.2017 “Për zbatimin e regjimit të Autorizimit të Përgjithshëm”, çdo operator/sipërmarrës që ofron shërbime/rrjete të komunikimeve elektronike sipas regjimit të autorizimit të përgjithshëm, duhet të respektojë kufizimet e transmetimeve të përcaktuara me përmbajtje të paligjshme ose të dëmshme nga AKSK.

Për sa më lart, ju përcjellim shkresën e AKSK-së, secili sipërmarrës (ISP), duhet te paraqese konfirmim me shkrim në AKEP dhe për dijeni AKSK, për mbylljen e aksesit IP-ve dhe domaineve të cituara në shkresën e AKSK, brenda datës 13 mars.