Lajmet

Edhe LDK-ja kërkon dorëheqjen e Berishajt

LDK-ja me akuza ndaj VV-së.

Publikuar

Lidhja Demokratike e Kosovës konsideron se Lëvizja Vetëvendosje si partia në pushtet po merret me propagandë duke iu kthyer të kaluarës me qëllim që ta mbuloj paaftësinë qeverisëse të saj. Edhe kjo parti po ashtu kërkon dorëheqjen e ambasadorit të Kosovës në Kroaci, Martin Berishaj.

Në një konferencë për media, zëdhënësja e Lidhjes Demokratike të Kosovës, Sibel Halimi u shpreh se dështimet e Qeverisë së Kosovës në të gjitha fushat i ka përjetuar më së shumti qytetari i Kosovës. Sipas saj, si rezultat i mosveprimit të qeverisë, inflacioni ka arritur vlerën mbi 20 për qind.

“Në sfidat që po kalojmë partia në pushtet merret me propagandë në vend se të ofrojë zgjidhje me problemet me të cilat ballafaqohen qytetarët tanë. Dje ishim dëshmitarë sesi pushteti që i ka krejt, iu kthye zanatit të vet si të vetmin mjet të artikulimit politik. Propaganda e partisë në pushtet vazhdimisht i kthehet të kaluarës për t’i ikur përgjegjësive dhe ta mbulojë paaftësinë qeverisëse. Mungesën e rezultateve të partisë në pushtet më së miri e përjetojnë qytetarët tanë në përditshmërinë e tyre. Në ekonomi dështim, në shëndetësi dështim, në arsim dështim. Kur flasim për ekonomi faktet flasin ndryshe përgjatë dy vjetëve ka pasur vetëm stagnim, ekonomia është ngulfatur, vetëm 9% e buxhetit për investime kapitale është shfrytëzuar, kjo i bie që janë 700 milionë euro më pak në qarkullim vlera e të cilave po humbet çdo ditë. Inflacion mbi 20%, ndër më të lartit në Evropë, si rezultat i mos veprimit të qeverisë, sot produktet ushqimore janë dyfishuar… E vetmja rritje janë importet nga Serbia – është rritje rekorde prej 370 milionë euro. Skandali tjetër që ndërlidhet me Serbinë janë edhe 600 mijë euro transfere nga GEN i Serbisë para, të cilat nuk dimë se ku kanë shkuar dhe kënd e kanë financuar, skandal ky ku përfshihen ambasadorë të pushtetit”, theksoi ajo.

Zëdhënësja e LDK-së ka thënë se kjo parti vazhdimisht ka kërkuar dhe vazhdon të kërkojë dorëheqjen e ambasadorit të Kosovës në Kroaci, Martin Berishaj.

“Prej kur ka dalë skandali në medie kemi kërkuar dorëheqjen e tij, mirëpo fatkeqësisht edhe përkundër që mediat sllovene dhe kroate faktikisht postojnë dhe bëjnë publike skandalin me Martin Berishajn, ndërkaq nga ana e partisë në pushtet ende nuk kemi dorëheqje. Prandaj, edhe përkundër që kallëzimi penal i është ngritur Berishaj, ende nuk kemi dorëheqje, rekomandimi dhe propozimi ynë konkret ka qenë për shkak të mos dëmtimit të imazhit të Republikës së Kosovës të dorëhiqet Martin Berishaj”, tha Halimi.

Sibel Halimi nga LDK teksa ka renditur dështimet e Qeverisë Kurti në politikë të jashtme, shëndetësi e arsim u shpreh se “kushërinjtë mesa duket nuk ishin vetëm për dasma, ishin edhe për pozita shtetërore”.

“Regres dhe stagnim kemi edhe në politikën e jashtme. Siç dihet, nuk ka ndodhur asnjë njohje gjatë dy vjetëve të qeverisjes në pushtet, asnjë anëtarësim në organizatat ndërkombëtare, ka pasur vetëm skandale të llojit të Martin Berishajt, huqje të panumërta në Twitter dhe së fundmi letra komike e ministrit Sveçla dërguar Gjermanisë për të kërkuar lëvizje me pasaporta të skaduar për qytetarët e Kosovës… Lista e dështimeve është shumë më e gjatë kur flasim për policinë s’ka drejtor me muaj të tërë, kur flasim për energji ka 72 mijë euro humbje energjie çdo ditë, kur flasim për drejtësinë kemi vjedhje provash në Institutin e Mjekësisë ligjore, kur flasim për nepotizëm ka pasur punësime masive të familjarëve të ministrave dhe deputetëve të pushtet duke kulmuar me super skandalin e punësimeve në KEK, kushërinjtë mesa duket nuk ishin vetëm për dasma, ishin edhe për borde e ndërmarrje publike e për pozita tjera shtetërore”, tha Halimi.

Sa i takon pjesës veriore të vendit, zëdhënësja e LDK-së, Sibel Halimi u shpreh se nga partia në pushtet për barrikaduesit dhe sulmuesit e policisë në atë pjesë të Kosovës ka pasur amnisti dhe lirim e arrest shtëpiak për personat e akuzuar për terrorizëm.

Lajmet

Të mërkurën takimi i radhës për dinarin, optimizëm për marrëveshje

Publikuar

nga

Më 15 maj (e mërkurë) për herë të gjashtë me radhë në Bruksel do të takohen kyenegociatorët e Kosovës dhe Serbisë, në lidhje me Rregulloren e BQK-së ku ndalohet përdorimi i dinarit në Kosovë. Pas përfundimit të fazës së tranzicionit të Bankës Qendrore, në partinë në pushtet theksojnë se s’ka asnjë alternativë që e parandalon apo shtynë vendimin për dinarin. Në anën tjetër, njohës të procesit të dialogut janë optimist se në takimin e nesërm do të arrihet një dakordim për çështjen e dinarit. Optimist gjatë ditës u shfaq edhe vet ndërmjetësi i Bashkimit Evropian për dialogun, Miroslav Lajçak.

Pjesëmarrjen e zëvendëskryeministrit Besnik Bislimi në takimin e Brukselit e ka konfirmuar këshilltari i tij, Klisman Kadiu, mirëpo nuk dha detaje të tjera sa i përket mundësisë së arritjes së një marrëveshje.

Ndërkaq, deputetja e LVV-së, njëherësh kryetare e Komisionit për Punë të Jashtme, Arbëreshë Kryeziu-Hyseni, thotë për KosovaPress se vendimi për ndalimin e përdorimit të dinarit serbë në Kosovë nuk do të prolongohet apo anulohet vetëm pse nuk i konvenon Serbisë.

Sipas saj, ekzekutivi është i gatshëm të bashkëpunojë sa i përket ofrimit të ndihmës për qytetarët serbë që jetojnë në Kosovë, në mënyrë që konvertimi në euro të jetë sa më i lehtë që të jetë e mundshme.

“Çfarëdo alternative që shkon kundrejt qëndrimit tonin si qeveri dhe si institucion i BQK-së për ne është i papranueshëm. As nuk negociohet dhe as nuk ka alternativë tjetër qoftë që e parandalon apo e shtyn vendimin për dinarin. Thjeshtë ata duhet të pranojnë faktin se ky vendim do të implementohet pasi të tejkalohen hapat e tranzicionit nga BQK-ja. Ne jemi të gatshëm të bashkëpunojmë sa i përket ofrimit të ndihmës për qytetarët serbë që jetojnë në Kosovë, në mënyrë që konvertimi në euro të jetë sa më i lehtë që të jetë e mundshme. Por nuk jemi të gatshëm që qoftë të prolongojmë apo anulojmë vetëm pse nuk po i përgjigjet Serbisë”, thotë ajo.

Në anën tjetër, analisti politik, Fidan Ukaj, thotë se do të ketë një pajtim në heshtje për çështjen e dinarit.

“Mendoj se do të ketë një kalim në heshtje të kësaj problematike. Qytetarët serbë tashmë ka më shumë se një dekadë që janë mësuar me euron dhe mendoj se më shumë ka qenë një propagandë politike e Vuqiqit që me dramatizua një gjë të tillë. Mendoj se kjo periudha tre mujore e dhënë nga institucionet e Kosovës ka qenë ndihmës e madhe për qytetarët serbë apo qoftë për bizneset që me i ndërruar çmimet dhe për qytetarët që me i konvertu dinarët në euro. Mendoj se do të zbatohet rregullorja e BQK-së nga takimi i paralajmëruar…Pres që të ketë një dakordim nga propozimet e faktorit ndërkombëtar dhe të gjendet një zgjidhje për çështjen e dinarit”, thekson Ukaj.

Më 12 maj ka përfunduar faza e tranzicionit që ka ndërmarrë BQK-ja për rregulloren, rrjedhimisht edhe një nga masat lehtësuese që ishte mosaplikimi i gjobave dhe masave, si ndalimi i importimit të valutave të huaja për subjektet që operojnë me para të gatshme në përputhje me Ligjin për Bankën Qendrore dhe ligjet e tjera në fuqi.

Për çështjen e dinarit palët janë takuar pesë herë të tjera në Bruksel, mirëpo kanë dështuar të arrihet një ujdi kompromisi. Me rregulloren e re të Bankës Qendrore të Kosovës (BQK), euroja u caktua si valuta e vetme në Kosovë për kryerjen e pagesave me para të gatshme nga 1 shkurti.

Vazhdo të lexosh

Lajmet

Gërvalla e Peci vizitojnë Leposaviqin: Në çdo cep shihet dhe ndihet kujdesi i shtuar i institucioneve

Publikuar

nga

Ministrja e Punëve të Jashtme dhe Diasporës, Donika Gërvalla dhe ministri i Bujqësisë Pylltarisë dhe Zhvillimit Rural, Faton Peci kanë vizituar Leposaviqin, më saktë Bistricën e Shalës dhe Boletinin.

Gërvalla ka thënë se tash në çdo cep shihet dhe ndihet kujdesi i shtuar i institucioneve ndaj kësaj pjese të harruar dhe braktisur të Republikës së Kosovës.

“Nga Bistrica e Shalës në komunën e Leposaviqit e deri në Boletin. Bashkë me Ministrin Faton Peci një paradite në këto vise të Kosovës me bukuri të rrallë dhe potencial të madh jo vetëm në fushën e agroturizmit, të lëna mizorisht prapa me dekada të tëra. Tash, në çdo cep shihet dhe ndihet kujdesi i shtuar i institucioneve ndaj kësaj pjese të harruar dhe braktisur të Republikës së Kosovës”, ka shkruar Gërvalla.

Vazhdo të lexosh

Lajmet

“Duam të kthehemi në shtëpi”, thotë nëna ukrainase e cila u largua nga Kharkivi

Publikuar

nga

Olesiia është mësuese në Ukrainë dhe deri dje jetoi në qytetin e dytë më të madh të Ukrainës, në Kharkiv. Ajo thotë se ka frikë për fëmijët e saj.

“Duan të kthehen në shtëpi, por shqetësohen… dhe po flasin sikurse të rritur dhe madje kuptojnë edhe më shumë lidhur me atë që po ndodh”, i tha ajo BBC-së.

Ajo tha se bashkëshortin e ka në Kharkiv sepse i duhet të punojë.

“Dua që gjithçka të jetë në rregull dhe të kthehemi në shtëpi”./UBTNews/

Vazhdo të lexosh

Lajmet

Rusia vazhdon sulmet në Kharkiv

Publikuar

nga

Në sulmet e reja ruse në qytetin e Kharkivit katër persona janë plagosur, njoftuan zyrtarët ukrianas më 14 maj.

Një burrë dhe tri gra u plagosën si pasojë e granatimeve nga forcat ruse në orët e para të së martës, tha Oleh Sinehubov, guvernator i rajonit të Harkivit.

Rusia sulmoi qytetin e dytë më të madh të Ukrainës me bombat e reja UMPB D-30, që janë bomba me precizitet të lartë dhe veprojnë sikurse raketat lundruese.

Përdorimi i këtyre lloj bombash nuk ka mundur të konfirmohet në mënyrë të pavarur, ndërkaq Moska ende nuk ka komentuar për këto pretendime të Ukrainës.

Lufta ka lënë të vrarë mijëra persona, ka detyruar miliona të tjerë të zhvendosen dhe i ka shndërruar qytetet ukrainase në gërmadha.

Në ditët e fundit, Rusia po shtyn përpara një sulm tokësor të saj në rajonin e Harkivit, që gjendet pranë kufirit me Rusinë.

Ndërsa sulmet e reja ruse në Harkiv po ndodhin në ditën kur sekretari amerikan i Shtetit, Antony Blinken, po qëndron në Ukrainë në një vizitë të paparalajmëruar, gjatë së cilës do të takohet me krerët shtetëror ukrainas.

Qëllimi i vizitës është që të riafirmohet mbështteja e Uashingtonit për Kievin, forcat e të cilit po përballën tashmë me pushtimin rus për më shumë se dy vjet./REL

Vazhdo të lexosh

Të kërkuara