Sport

Drita nuk planifikon përforcime për janar, synon dy trofetë me fondin aktual

Published

5 years ago

on

Kampioni në fuqi e Kosovës në futboll, Drita, të martën nga ora 13:30 do t’i nisë përgatitjet për stinorin pranveror. Faza përgatitore do të fillojë me të gjithë lojtarët të cilët ishin pjesë e ekipit kampion edhe në vjeshtë.

Ekipi nga Gjilani ende nuk është përforcuar në afatin kalimtar të janarit, por as nuk ka larguar ndonjë futbollist. Drejtuesit e Dritës janë duke shikuar mundësinë që të sjellin në ekip vetëm lojtarë cilësorë, të cilët janë të nivelit të njëjtë ose më të lartë sesa futbollistët që kanë aktualisht në skuadër.

Drejtori i përgjithshëm i Dritës, Feti Murseli, ka thënë për KOHËN se në Kosovë nuk ka lojtarë të cilët mund t’i transferojnë, sipas tij, për shkak të kontratave që ata kanë me klubet e tyre. Murseli theksoi se fokusi është jashtë Kosovës, për shkak të cilësisë më të lartë.

“Nëse arrijmë të gjejmë ndonjë lojtar që është i nivelit të njëjtë ose më i mirë sesa lojtarët që i kemi, atëherë do ta transferojmë. Në të kundërtën, nuk do të transferojmë lojtarë të nivelit më të ulët. Mund të them se në Kosovë nuk ka lojtarë që ne kërkojmë, për shkak se kanë kontrata me klubet e tyre. Ne jemi duke shikuar të sjellim ndonjë lojtar nga jashtë Kosovës”, tha Murseli. Ai tregoi se më 20 janar ekipi do të niset drejt Antalyas në Turqi për fazë përgatitore.

Të njëjtin mendim me drejtorin Murseli e ndan edhe trajneri i skuadrës, Ardian Nuhiu. Ai shton se u beson shumë lojtarëve që ka në ekip, kurse sa u përket përforcimeve, thekson se mund të mbyllin afatin pa e sjellë asnjë lojtarë.

“Të gjithë futbollistët që i kemi në skuadër janë me kontrata dhe nuk do të largohet asnjë. Janari është i varfër sa u përket transferimeve, pasi lojtarët janë nën kontrata. Ne nuk jemi në bisedime me ndonjë lojtar, por do të shohim gjatë rrugës nëse do të kemi ndonjë lojtar cilësor që mund ta sjellim në ekip, atëherë do ta bëjmë një gjë të tillë. Sigurisht, e kam fjalën për lojtarë cilësorë të nivelit të Dritës ose më të mirë. Por nuk e përjashtoj mundësinë që të mos transferojmë asnjë lojtar. Unë i besoj këtij ekipi, kemi kontingjent të madh të lojtarëve”, ka deklaruar trajneri shqiptar nga Maqedonia e Veriut.

Nuhiu konfirmon se krahas përgatitjeve që do t’i fillojnë të martën, gjatë javës do të kenë edhe teste mjekësore.

“Do të nisim përgatitjet të martën. Do të kemi edhe kontrollet mjekësore brenda javës për të parë gjendjen e secilit lojtar. Do të jenë kontrolle të zakonshme. Në Kosovë do të qëndrojmë vetëm dy javë, e më pas do të zhvendosemi në Antalya”, tha Nuhiu. Sipas tij, qëndrimi në qytetin bregdetar të Turqisë, do të shërbejë për t’u përgatitur sa më mirë. Pozitive i sheh edhe ndeshjet miqësore që do t’i zhvillojnë ndaj skuadrave evropiane.

“Gjatë qëndrimit në Antalya do të mundohemi ta shfrytëzojmë kohën më të mirë që është atje, fushat, e po ashtu edhe kundërshtarët për ndeshje miqësore, të cilët janë të nivelit më të lartë dhe na ndihmojnë shumë që të përgatitemi sa më mirë. I kemi aranzhuar katër ndeshje miqësore. Ende nuk i dimë kundërshtarët pasi me këtë punë po merret agjencia , por e dimë që janë klube evropiane. Këto ndeshje miqësore me ekipe të nivelit të lartë janë të mira dhe të rëndësishme edhe për ndeshjet evropiane, pavarësisht që janë miqësore. Për ne e rëndësishme është që lojtarët të kapin formën e tyre”, shtoi Nuhiu.

Nuhiu konfirmoi se skuadra që ai drejton do të luftojë në të dyja fontet.

“Do të jetë një garë e fortë. Janë disa klube që kërkojnë titullin e kampionit. Synimi ynë është që të mbrojmë titullin. Do të shohim kundërshtarin e radhës në Kupë. Sigurisht do të japim më të mirën që të fitojmë edhe atë trofe”, përfundoi Nuhiu, i cili në sezonin e kaluar fitoi titullin e kampionit. Me Nuhiun në krye, Drita arriti deri në raundin e tretë të Ligës së Evropës, që është “rekord” për një klub kosovar në garat evropiane.

Drita do ta nisë stinorin pranveror nga pozita e parë. Pas 18 xhirove të luajtura, “intelektualët” kanë arritur 12 fitore, 5 barazime dhe kanë pësuar vetëm një humbje. Me 41 pikë renditen në vendin e parë, me tri pikë më shumë se Ballkani që është i dyti. Drita është skuadra e vetme në Superligë që e ka pësuar vetëm një humbje në stinorin vjeshtor. Drita së bashku me Ballkanin kanë sulmin më të mirë në ligë. Gjilanasit kanë realizuar 30 gola, kurse suharekasit 43.

Po ashtu, Drita bashkë me Prishtinën kanë mbrojtjen më të mirë në ligë. Drita ka pranuar 13 gola, kurse Prishtina 12 sosh

Related Topics:
Continue Reading

Sport

UEFA pezullon përkohësisht Prestiannin pas incidentit me Vinicius

Published

10 hours ago

on

February 23, 2026

By

Pas incidentit të dyshuar racist në ndeshjen e parë të playoff-it të Liga e Kampionëve, futbollisti argjentinas Gianluca Prestianni i Benfica është pezulluar përkohësisht për ndeshjen e kthimit kundër Real Madrid. Vendimi është marrë nga Komisioni i Disiplinës dhe Etikës i UEFA përpara ndeshjes që zhvillohet këtë të mërkurë.

UEFA bëri të ditur se pezullimi vlen pavarësisht vendimeve të mundshme që organet disiplinore mund të marrin pas përfundimit të hetimit në vijim. Si arsye për masën e përkohshme, institucioni evropian përmendi një shkelje të dyshuar të nenit 14 të Rregullores Disiplinore të UEFA-s, që lidhet me sjellje diskriminuese.

Incidenti ndodhi të martën e javës së kaluar. Pas golit të fitores 1:0 dhe festimit të tij, sipas deklarimeve të lojtarit dhe bashkëlojtarit të tij francez Kylian Mbappé, braziliani Vinícius Júnior është ofenduar në mënyrë raciste. Pretendohet se Prestianni e ka quajtur atë “majmun”.

Argjentinasi i ka mohuar akuzat. Gjatë incidentit, ai ishte parë duke e mbuluar gojën me fanellë.

Continue Reading

Sport

Dalin në shitje biletat për Kosovë – Sllovaki

Published

13 hours ago

on

February 23, 2026

By

Federata e Basketbollit e Kosovës (FBK) ka njoftuar se kanë dalë në shitje biletat për ndeshjen e dytë parakualifikuese të Kosovës për FIBA EuroBasket 2029, ku përfaqësuesja e Kosovës do të përballet me Sllovakinë.

Ndeshja Kosovë – Sllovaki do të zhvillohet më 27 shkurt 2026, me fillim nga ora 19:00, në Palestra sportive Sezai Surroi, në Prizren.

Sipas njoftimit, biletat do të jenë në dispozicion nga sot deri më 27 shkurt 2026 dhe mund të blihen në fanshopin e KB Bashkimit në Prizren, që ndodhet përballë Palestra sportive Sezai Surroi.

Kjo sfidë është e vlefshme për raundin e dytë parakualifikues drejt EuroBasket 2029, ndërsa FBK u ka bërë thirrje tifozëve që të mbështesin ekipin kombëtar në këtë përballje të rëndësishme.

Ekipi i Kombëtares së Kosovës në basket do të përfaqësohet nga këta lojtarë:

Valon Bunjaku

Divine Myles

Musab Mala

Jon Ismajli

Mikaile Tmusic

Erjon Kastrati

Arian Qallaku

Muhamedali Janjeva

Samir Zekiqi

Bardh Istrefi

Gëzim Morina

Dardan Kapiti

Lis Shoshi

Të ftuar nga shtabi teknik, por që nuk do të jenë të disponueshëm për këtë ndeshje:

Dardan Berisha

Drilon Hajrizi

Meriton Ismaili

Pas vlerësimit të stafit mjekësor, është konstatuar se këta lojtarë kanë nevojë për kohë shtesë rikuperimi dhe nuk janë në gjendje optimale për paraqitje.

Kosova synon një paraqitje të fortë para publikut vendas, ndërsa përkrahja nga tribuna pritet të jetë një shtysë e madhe në këtë sfidë të rëndësishme.

D.L

Continue Reading

Sport

FBK nderohet me çmimin “Arritje të Veçantë” në Mbrëmjen Gala “Laureatët 2025” të KOK-ut

Published

18 hours ago

on

February 23, 2026

By

Komiteti Olimpik i Kosovës (KOK) ka organizuar Mbrëmjen Gala “Laureatët 2025”, një ngjarje tradicionale ku nderohen më të mirët e sportit kosovar për arritjet e vitit paraprak.

Në këtë mbrëmje të veçantë morën pjesë përfaqësues të shumtë të komunitetit sportiv, si dhe Kryeministri i Kosovës, Albin Kurti.

Gjatë ceremonisë, Federata e Basketbollit e Kosovës (FBK) u nderua me çmimin “Arritje të Veçantë” për organizimin e suksesshëm të kualifikimeve për FIBA 3×3 Europe Cup dhe Kampionatit Evropian për Divizionin C për vajzat U18.

Çmimin në emër të FBK-së e pranoi Adriatik Rraci, zëvendës Sekretar i Përgjithshëm dhe Drejtor i Përfaqësueseve në federatë.

Në këtë mbrëmje gala, kryetari i FBK-së, Arben Fetahu – njëherësh nënkryetar i KOK-ut – ndau gjithashtu disa nga çmimet për laureatët e tjerë.

Nga Federata e Basketbollit e Kosovës morën pjesë edhe Granit Rugova, Drejtor i Programeve dhe Projekteve Zhvillimore, si dhe Aulona Muhadri, anëtare e Bordit të FBK-së.

Mbrëmja “Laureatët 2025” konfirmoi edhe një herë vlerësimin për kontributin dhe sukseset e federatave sportive në zhvillimin dhe promovimin e sportit në Kosovë.

Continue Reading

Sport

Mbyllen Lojërat Olimpike Dimërore Milano Cortina 2026

Published

18 hours ago

on

February 23, 2026

By

Pas 16 ditësh garash emocionuese, Lojërat Olimpike Dimërore Milano Cortina 2026 u mbyllën me një ceremoni spektakolare të zhvilluar në Arena e Veronës.

Ceremoninë e shpalli zyrtarisht presidentja e Komiteti Olimpik Ndërkombëtar, Kirsty Coventry, e cila në fjalën e saj përmbyllëse iu drejtua sportistëve me mesazhin: “Ishit të guximshëm, të patrembur, plot zemër dhe pasion.”

Kosova ishte pjesë e kësaj ngjarjeje madhore sportive. Në ceremoninë e mbylljes, flamurin e Kosovës e mbajti skitari Drin Kokaj, i cili përfaqësoi vendin në disiplinën e sllallomit në skijimin alpin, duke përmbyllur kështu paraqitjen e ekipit kosovar në këto Lojëra.

Në renditjen e përgjithshme të medaljeve, Norvegjia kryesoi me 41 medalje, e ndjekur nga Shtetet e Bashkuara të Amerikës me 33 medalje dhe Italia me 20 medalje.

Lojërat e ardhshme Olimpike Dimërore do të mbahen në Alpet Franceze në vitin 2030, ku pritet të mblidhen sërish sportistët më të mirë të botës për një tjetër festë të madhe të sporteve dimërore.

D.L

Continue Reading

Të kërkuara