Lajmet

Drita mposhtet nga AZ Alkmaar

Published

6 months ago

December 12, 2025

UBT News

Drita u mposht nga AZ Alkmaar në ndeshjen e Ligës së Konferencës, e zhvilluar mbrëmë në “Fadil Vokrri”, një duel ku mysafirët shfrytëzuan efikasitetin dhe përvojën për ta marrë një fitore të merituar.

Rezultati i rëndë vjen në një ndeshje ku gjilanasit kërkuan pikë për t’u mbajtur në garën e renditjes, por përballë një kundërshtari më superior nuk ia dolën.

Holandezët e hapën ndeshjen herët, me Mijnans që realizoi në minutën e 17-të pas një aksioni të shpejtë, duke e vendosur Dritën në disavantazh të hershëm.

Pjesa e dytë solli edhe goditjen e dytë, kur Jansen në minutën e 58-të e dyfishoi rezultatin, në një fazë kur Drita po tentonte të rikthehej në lojë.

Me kalimin e minutave, Alkmaari kontrolloi ritmin dhe shfrytëzoi hapësirat, ndërsa Sadiç vulosi gjithçka në minutën e 90-të për epilogun 0:3.

Humbja ka ndikim të drejtpërdrejtë në renditje, ku Drita zbret në vendin e 15-t dhe mbetet me vetëm 8 pikë pas pesë ndeshjeve, me gol-diferencë 4:5. Ndërkohë, Alkmaari ngjitet ndjeshëm në tabelë, në vendin e 11, duke arritur në kuotën e 9 pikëve me gol-diferencë të balancuar 7:7 pas triumfit të sotëm.

Ndeshja u zhvillua nën praninë e tifozëve të shumtë në Prishtinë, por përkundër mbështetjes, Drita nuk arriti ta shfrytëzonte avantazhin e terrenit, duke pësuar njërën nga humbjet më të rënda të këtij edicioni në Evropë.

Gjilanasit tashmë do të kërkojnë reagim në sfidat e mbetura për të ruajtur shanset në fazën e Ligës së Konferencës,/S.K/KP/

Vendi

Mbi 100 gramë kokainë dhe marihuanë kapen në Vërmicë

Published

7 hours ago

June 19, 2026

UBT News

Dogana e Kosovës, në bashkëpunim me Policinë e Kosovës, ka zbuluar dy raste të substancave narkotike gjatë kontrolleve në Pikën Kufitare të Vërmicës.

Në rastin e parë, gjatë kontrollit të një automjeti që po hynte në Kosovë, janë gjetur 104.90 gramë substancë e dyshuar si kokainë, e fshehur në çantën personale të një udhëtari.

Ndërkaq, në rastin e dytë janë zbuluar 5.53 gramë substancë e dyshuar si marihuanë, e fshehur në bagazhin e një automjeti. Gjatë kontrollit është gjetur edhe një thikë kuzhine e padeklaruar.

Rastet janë proceduar për hetime të mëtejshme nga autoritetet kompetente.

/A.K/

Vendi

Mbyten dy vajza të mitura në Tale

Published

7 hours ago

June 19, 2026

UBTNews

Një ngjarje e rëndë ka ndodhur mesditën e sotme në plazhin e Tales, ku dy vajza të mitura, të moshës 11 dhe 9 vjeçe, janë mbytur në det.

Sipas njoftimit zyrtar të Policisë, tragjedia ka ndodhur rreth orës 12:50. Pas marrjes së informatës, zyrtarët policorë kanë dalë menjëherë në vendngjarje dhe, në bashkëpunim të ngushtë me pushuesit e tjerë, kanë bërë të mundur gjetjen dhe nxjerrjen e trupave të pajetë në breg.

“Në bashkëpunim me pushuesit, është bërë e mundur gjetja dhe nxjerrja e trupave të pajetë në breg“, thuhet në njoftimin e policisë. /E.A/

Vendi

Dyshime për cilësinë: Bllokohen mbi 1 mijë e 400 infuzione në Spitalin e Mitrovicës

Published

9 hours ago

June 19, 2026

UBTNews

Shërbimi Spitalor Klinik dhe Universitar i Kosovës (ShSKUK) ka njoftuar se ka bllokuar përkohësisht 1,432 njësi të një produkti mjekësor në Spitalin Rajonal “Sami Haxhibeqiri” në Mitrovicë, pas dyshimeve se ai mund të mos jetë brenda specifikave të kërkuara të cilësisë.

Bëhet fjalë për infuzionet e llojit Compound Sodium Lactate (500 ml). Alarmi u ngrit fillimisht nga farmacistja përgjegjëse e spitalit, gjë që vuri në lëvizje Inspektoratin Farmaceutik dhe Agjencinë e Kosovës për Produkte dhe Pajisje Medicinale (AKPPM).

Pas një inspektimi të dytë të kryer më 17 qershor, autoritetet urdhëruan bllokimin e menjëhershëm të këtij kontingjenti deri në pranimin e rezultateve nga analizat laboratorike. ShSKUK ka njoftuar opinionin publik se ky është një masë parandaluese dhe se mbetet e përkushtuar për të garantuar sigurinë e plotë të pacientëve dhe cilësinë e barnave nëpër spitalet publike. /E.A/

Lajmet

KQZ gati për rezultatet përfundimtare: Përfundon rinumërimi i 185 vendvotimeve

Published

10 hours ago

June 19, 2026

UBTNews

Komisioni Qendror i Zgjedhjeve (KQZ) ka përmbyllur zyrtarisht procesin e rinumërimit për të gjitha 185 vendvotimet e kontestuara. Sipas zëdhënësit të KQZ-së, Valmir Elezi, procesi ka përfunduar sot në orën 12:00 dhe të dhënat e reja tashmë janë përditësuar në platformën zyrtare të rezultateve.

Me këtë hap, KQZ-ja ka mbyllur teknikisht të gjitha aktivitetet e administrimit të votave dhe është gati për shpalljen e rezultateve përfundimtare të zgjedhjeve të 7 qershorit.

Megjithatë, përpara shpalljes zyrtare, duhet të respektohen afatet ligjore për ankesat e mundshme. Elezi sqaroi se sot përfundon afati për ankesat lidhur me administrimin e numërimit nga dita e mërkurë (17 qershor), ndërsa po ashtu do të pritet nëse do të ketë ankesa për procesin e rinumërimit të përmbyllur sot.

Për më tepër, para se të procedohet tutje, KQZ-ja do të kërkojë një konfirmim zyrtar nga Paneli Zgjedhor për Ankesa dhe Parashtresa (PZAP) për të vërtetuar nëse ka ndonjë ankesë tjetër ende në shqyrtim.

Në fund, Qendra e Numërimit dhe Rezultateve (QNR) do të hartojë një raport të detajuar për gjetjet në secilin prej 185 vendvotimeve. Ky raport synon të konfirmojë se procesi i parë i numërimit nëpër komuna është zhvilluar me saktësi dhe në përputhje të plotë me vullnetin e shprehur të qytetarëve, raporton Ekonomia Online. /Ekonomia Online/ /E.A/