Sport

Drita gati për finalen kundër Llapit

Drita do të synojë me çdo kusht që të del triumfuese dhe ta fitojë trofeun e Kupës së Kosovës pas afro dy dekadave

Published

4 years ago

on

Ditën e nesërme me fillim nga ora 20:00, stadiumi “Fadil Vokrri”, do të jetë nikoqir i përballjes mes Dritës dhe Llapit në finalen e Kupës së Kosovës.

Drita do të synojë me çdo kusht që të del triumfuese dhe ta fitojë trofeun e Kupës së Kosovës pas afro dy dekadave, ndërsa Llapi do të ketë për qëllim ta mbrojë titullin e kampionit të kësaj kupe pasiqë e fitoi vitin e kaluar.

Një ditë para ndeshjes, trajneri i Dritës, Ardian Nuhiu dhe kapiteni Ardian Limani, kanë folur në një konferencë për media, duke treguar vlerën e kësaj ndeshjeje dhe se si do të tentojnë ta ndalin skuadrën e Llapit.

Nuhiu ka thënë skuadra e tij ka bërë përgatitjet për finalen.

“Është vetëm një ndeshje futbolli, ndeshje të cilën e kemi përgatitur si çdo ndeshje tjetër, nuk diskutohet, është finale, dhe kemi marrë të gjitha masat se çfarë mund të ndodh në një finale”, tha Nuhiu.

Nuhiu foli edhe për rrezikun që mund të paraqitet nga skuadra e Llapit, ku potencoi se sulmi i llapjanëve është tejet i rrezikshëm.

“Është skuadër, e cila shënon shumë realisht, apo mos gabofsha është skuadra e cila ka shënuar më së tepërmi këtë vit. Duhet të kemi kujdes sepse kanë sulm të shpejtë dhe të rrezikshëm. E potencova edhe më herët se kemi marrë të gjitha masat duke përgatitur, duke eliminuar pikat e forta të tyre dhe të shfrytëzojmë dobësitë që mund të paraqiten nesër mbrëma”, tha Nuhiu.

Po ashtu, trajneri i Dritës tregoi se trofeu i Kupës së Kosovës veçse që ka rëndësi për stafin dhe lojtarët, rëndësi të madhe ka edhe për qytetin e Gjilanit dhe tifozët “Intelektualët”.

“Është një mundësi që të shkruajmë histori, është e rëndësishme që të fitojmë këtë trofe për qytetin, për tifozët tanë ‘Intelektualët’ gjithashtu edhe për ne si staf, apo edhe futbollistët mendoj që e kanë merituar të stolisemi me këtë trofe”, Ardian Nuhiu.

Për fund, Nuhiu potencoi se pret spektakël në tribuna, pasi që të dyja skuadrat kanë tifozëri të zjarrta.

“Kam besim të plotë se nesër do të vinë një numër i madh i tifozëve tanë ‘intelektualët’, gjithashtu nuk do të mungojnë edhe nga ekipi kundërshtarë, sepse edhe ata kanë tifozë të zjarrtë. Do të jetë një spektakël në tribuna, por kam besim të plotë se takohen dy skuadrat të cilat kanë siguruar Evropën, dhe thjesht luajnë për atë trofe të cilat do ta kërkojmë ta fitojmë”, tha Nuhiu.

Krahas trajnerit Nuhiu, edhe kapiteni i skuadrës, Ardian Limani, foli për rëndësinë që ka ndeshja e nesërme, pasi do të jetë finalja e parë e tij.

“Mendoj se çdo trofe është i rëndësishëm për secilin lojtar, por aq më tepër për një kapiten është privilegj dhe përgjegjësi dhe momentin kur e fiton një trofe dhe e ngrit është shumë i veçantë. Për mua personalisht kjo do të jetë finalja e parë dhe për këtë arsyeje do të ishte shumë i veçantë edhe trofeu, sepse unë mirë e di edhe vuajtjen e tifozëve që e presin me padurim këtë trofe që mungon shumë vite”, tha Limani. /UBTNews/

Related Topics:
Continue Reading

Sport

Lineker dhe Rooney kritikojnë Tuchelin pas eliminimit të Anglisë: “Na kushtoi me vendimet e tij”

Published

46 minutes ago

on

July 16, 2026

By

Legjendat e futbollit anglez, Gary Lineker dhe Wayne Rooney, kanë drejtuar kritika të forta ndaj përzgjedhësit të Anglisë, Thomas Tuchel, pas humbjes 2:1 ndaj Argjentinës në gjysmëfinalen e Kupës së Botës.

Gary Lineker vlerësoi se qasja taktike e Anglisë pas golit të epërsisë ishte e gabuar dhe tepër mbrojtëse.

“Ne shënuam një gol, pastaj u kthyem në mbrojtje. Taktikisht ishte e habitshme, për të qenë plotësisht i sinqertë. Ishte një veprim negativ nga ana e Tuchelit”, deklaroi Lineker në podcastin “The Rest is Football”.

Kritikave iu bashkua edhe Wayne Rooney, i cili beson se vendimet e trajnerit gjerman ndikuan drejtpërdrejt në eliminimin e Anglisë.

“Vendimet që ka marrë Thomas Tuchel, duhet të jemi të sinqertë, na kanë kushtuar me eliminim”, u shpreh legjenda e Manchester Unitedit.

Anglia u eliminua në gjysmëfinale pas humbjes 2:1 nga Argjentina, e cila tashmë ka siguruar një vend në finalen e madhe të Kupës së Botës.

D.L

Continue Reading

Sport

Romero dhe Martinez kundër Gary Neville: “Ne përgjigjemi në fushë”

Published

51 minutes ago

on

July 16, 2026

By

Mbrojtësit e Argjentinës, Cristian Romero dhe Lisandro Martinez, kanë reaguar ashpër ndaj kritikave të legjendës së futbollit anglez, Gary Neville, duke i cilësuar komentet e tij si të padrejta.

Neville kishte kritikuar paraqitjet e dy mbrojtësve argjentinas, por pas fitores së Argjentinës ndaj Anglisë me rezultat 2:1 në gjysmëfinalen e Kupës së Botës, Romero dhe Martinez nuk i kursyen përgjigjet e tyre.

“E vetmja gjë që shpresoj kur të dal në pension është të mos bëhem aq budalla. Shpresoj të mos kritikoj asnjë lojtar”, deklaroi Romero për “DSports”.

Edhe Lisandro Martinez ishte i drejtpërdrejtë në reagimin e tij ndaj kritikave.

“Jemi mësuar që njerëzit të flasin gjithmonë për ne. Duket sikur atyre u pëlqen ta bëjnë këtë, por ne përgjigjemi në fushë, gjithmonë me respekt”, tha mbrojtësi argjentinas.

Argjentina siguroi një vend në finalen e madhe pas triumfit ndaj Anglisë, ndërsa në sfidën për titull do të përballet me Spanjën të dielën.

D.L

Continue Reading

Sport

Shishja e Pickfordit zbulon planin ndaj Messit dhe Argjentinës

Published

7 hours ago

on

July 16, 2026

By

Argjentina siguroi një vend në finalen e madhe të Kupës së Botës, pasi mposhti Anglinë me rezultat 2:1 në një gjysmëfinale plot emocione. Përveç festës së madhe në fushë, vëmendjen e rrjeteve sociale e tërhoqi edhe një moment i pazakontë pas përfundimit të takimit.

Menjëherë pas vërshëllimës së fundit të gjyqtarit, futbollistët argjentinas gjetën në fushë shishen e ujit të portierit anglez, Jordan Pickford. Në të ndodheshin shënime të detajuara me udhëzime për mënyrën se si duhej të reagonte në rast se ndeshja do të vendosej me penallti.

Në shishe ishin të shënuar emrat e lojtarëve kryesorë të Argjentinës, përfshirë Lautaro Martinez, Julian Alvarez, Enzo Fernandez dhe Lionel Messi. Pranë secilit emër kishte udhëzime specifike, si: “shtiru sikur do të hidhesh majtas, por hidhu djathtas”, “qëndro në qendër” ose “hidhu djathtas”, duke treguar strategjinë e përgatitur nga stafi anglez për një seri të mundshme penalltish.

Kamerat filmuan momentin kur Nico Gonzalez, Lionel Messi dhe Marcos Senesi po e shikonin me kureshtje shishen, ndërsa një pjesë e bisedës së tyre u bë virale pas leximit të buzëve.

“Shikoni çfarë gjeta. Ka shënime për Lautaron, Julianin…”, dëgjohet të thotë Nico Gonzalez, ndërsa Messi e shikon me habi përmbajtjen e shishes dhe kërkon t’i përkthehen udhëzimet e shkruara në anglisht.

Pamjet u shpërndanë me shpejtësi në rrjetet sociale, ku shumë tifozë e cilësuan momentin si një nga skenat më interesante dhe kurioze pas përfundimit të ndeshjes.

D.L

Continue Reading

Lajmet

Argjentina përmbys Anglinë me magjinë e Messit dhe arrin në finalen e madhe

Published

8 hours ago

on

July 16, 2026

By

Argjentina ka siguruar një kualifikim dramatik për në finalen e madhe pasi mposhti Anglinë me rezultatin 2:1 në gjysmëfinalen e zhvilluar në Atlanta. Edhe pse anglezët kaluan të parët në avantazh në minutën e 55-të me golin e Anthony Gordon, argjentinasit nuk u dorëzuan dhe treguan një karakter të jashtëzakonshëm në minutat e fundit të lojës.

Lionel Messi ishte sërish vendimtar duke dhuruar dy asistime kyçe: fillimisht për supergolin e Enzo Fernandezit që barazoi shifrat në minutën e 85-të, dhe më pas për Lautaro Martinezin, i cili shënoi golin e fitores në minutën e 92-të.

Me këtë përmbysje të madhe, Argjentina shkon në finalen e dytë radhazi dhe ka shansin e artë të mbrojë trofeun e Kupës së Botës të fituar në Katar në vitin 2022, një sukses që historikisht e kanë arritur vetëm Brazili dhe Italia shumë kohë më parë.

Ndeshja finale do të luhet këtë të dielë në New Jersey në orën 21:00, ku Argjentina do të përballet me Spanjën, e cila eliminoi Francën. Ndërkohë, Anglia dhe Franca do të diskutojnë vendin e tretë të shtunën në orën 23:00. /E.A/

Continue Reading

Të kërkuara