Lajmet

Drejtori i CIA-s u takua me udhëheqësin e talebanëve në Kabul

Published

5 years ago

August 24, 2021

UBT news

Drejtori i CIA-s, William J. Burns, është takuar ballë për ballë me udhëheqësin më të lartë të talebanëve në Kabul të hënën, sipas dy zyrtarëve amerikanë, transmeton UBT News.

SHBA-të po vazhdojnë të transportojnë qytetarët amerikanë dhe aleatët e saj afganë nga Afganistani, në një afat që skadon më 31 gusht.

Administrata e Biden ka qenë në kontakt me zyrtarët talebanë gjatë gjithë procesit të evakuimit, si në terren në Afganistan ashtu edhe në Doha, Katar.

Por takimi i fshehtë, i raportuar për herë të parë të martën nga The Washington Post, midis Burns dhe bashkëthemeluesit dhe nënkryetarit të talebanëve, Abdul Ghani Baradar, “përbën shkëmbimin e drejtpërdrejtë të pikëpamjeve të nivelit më të lartë që kur grupi militant mori kontrollin e kryeqytetit”, tha një zyrtar amerikan për CNN, transmeton UBT News.

Ai shtoi se takimi nënvizon gjithashtu pikëpamjen brenda administratës se ata kanë nevojë për një kuptim më të qartë se ku qëndrojnë talebanët në disa çështje.

Zyrtari amerikan i tha CNN se takimi u zhvillua nën drejtimin e Presidentit Joe Biden, i cili pasqyron pikëpamjen brenda administratës se Burns është diplomati më i sprovuar dhe një nga veteranët më të besuar në ekipin e tij.

Megjithatë, CIA ende nuk është deklaruar për këtë takim, dhe nuk pranoi të komentojë për CNN në lidhje me të.

Kujtojmë se SHBA ka evakuuar mijëra njerëz nga aeroporti i Kabulit që po largohen nga vendi pas marrjes së kontrollit të vendit nga talebanët.

Talibanët e kanë përshkruar 31 gushtin si një “vijë të kuqe” dhe kërcënuan me pasoja nëse Shtëpia e Bardhë vonon tërheqjen e trupave të saj.

“SHBA duhet t’i përmbahet largimit të trupave nga Afganistani deri në këtë datë (31 gusht 2021). Përndryshe, do të jetë një shkelje e qartë”, tha një zëdhënës i talebanëve për CNN për afatin e evakuumit të njerëzve, duke shtuar se në rast të një vonese, “ne do të marrim vendimet e duhura dhe të nevojshme”./UBTNews

Vendi

Mbi 100 gramë kokainë dhe marihuanë kapen në Vërmicë

Published

16 hours ago

June 19, 2026

UBT News

Dogana e Kosovës, në bashkëpunim me Policinë e Kosovës, ka zbuluar dy raste të substancave narkotike gjatë kontrolleve në Pikën Kufitare të Vërmicës.

Në rastin e parë, gjatë kontrollit të një automjeti që po hynte në Kosovë, janë gjetur 104.90 gramë substancë e dyshuar si kokainë, e fshehur në çantën personale të një udhëtari.

Ndërkaq, në rastin e dytë janë zbuluar 5.53 gramë substancë e dyshuar si marihuanë, e fshehur në bagazhin e një automjeti. Gjatë kontrollit është gjetur edhe një thikë kuzhine e padeklaruar.

Rastet janë proceduar për hetime të mëtejshme nga autoritetet kompetente.

/A.K/

Vendi

Mbyten dy vajza të mitura në Tale

Published

17 hours ago

June 19, 2026

UBTNews

Një ngjarje e rëndë ka ndodhur mesditën e sotme në plazhin e Tales, ku dy vajza të mitura, të moshës 11 dhe 9 vjeçe, janë mbytur në det.

Sipas njoftimit zyrtar të Policisë, tragjedia ka ndodhur rreth orës 12:50. Pas marrjes së informatës, zyrtarët policorë kanë dalë menjëherë në vendngjarje dhe, në bashkëpunim të ngushtë me pushuesit e tjerë, kanë bërë të mundur gjetjen dhe nxjerrjen e trupave të pajetë në breg.

“Në bashkëpunim me pushuesit, është bërë e mundur gjetja dhe nxjerrja e trupave të pajetë në breg“, thuhet në njoftimin e policisë. /E.A/

Vendi

Dyshime për cilësinë: Bllokohen mbi 1 mijë e 400 infuzione në Spitalin e Mitrovicës

Published

18 hours ago

June 19, 2026

UBTNews

Shërbimi Spitalor Klinik dhe Universitar i Kosovës (ShSKUK) ka njoftuar se ka bllokuar përkohësisht 1,432 njësi të një produkti mjekësor në Spitalin Rajonal “Sami Haxhibeqiri” në Mitrovicë, pas dyshimeve se ai mund të mos jetë brenda specifikave të kërkuara të cilësisë.

Bëhet fjalë për infuzionet e llojit Compound Sodium Lactate (500 ml). Alarmi u ngrit fillimisht nga farmacistja përgjegjëse e spitalit, gjë që vuri në lëvizje Inspektoratin Farmaceutik dhe Agjencinë e Kosovës për Produkte dhe Pajisje Medicinale (AKPPM).

Pas një inspektimi të dytë të kryer më 17 qershor, autoritetet urdhëruan bllokimin e menjëhershëm të këtij kontingjenti deri në pranimin e rezultateve nga analizat laboratorike. ShSKUK ka njoftuar opinionin publik se ky është një masë parandaluese dhe se mbetet e përkushtuar për të garantuar sigurinë e plotë të pacientëve dhe cilësinë e barnave nëpër spitalet publike. /E.A/

Lajmet

KQZ gati për rezultatet përfundimtare: Përfundon rinumërimi i 185 vendvotimeve

Published

19 hours ago

June 19, 2026

UBTNews

Komisioni Qendror i Zgjedhjeve (KQZ) ka përmbyllur zyrtarisht procesin e rinumërimit për të gjitha 185 vendvotimet e kontestuara. Sipas zëdhënësit të KQZ-së, Valmir Elezi, procesi ka përfunduar sot në orën 12:00 dhe të dhënat e reja tashmë janë përditësuar në platformën zyrtare të rezultateve.

Me këtë hap, KQZ-ja ka mbyllur teknikisht të gjitha aktivitetet e administrimit të votave dhe është gati për shpalljen e rezultateve përfundimtare të zgjedhjeve të 7 qershorit.

Megjithatë, përpara shpalljes zyrtare, duhet të respektohen afatet ligjore për ankesat e mundshme. Elezi sqaroi se sot përfundon afati për ankesat lidhur me administrimin e numërimit nga dita e mërkurë (17 qershor), ndërsa po ashtu do të pritet nëse do të ketë ankesa për procesin e rinumërimit të përmbyllur sot.

Për më tepër, para se të procedohet tutje, KQZ-ja do të kërkojë një konfirmim zyrtar nga Paneli Zgjedhor për Ankesa dhe Parashtresa (PZAP) për të vërtetuar nëse ka ndonjë ankesë tjetër ende në shqyrtim.

Në fund, Qendra e Numërimit dhe Rezultateve (QNR) do të hartojë një raport të detajuar për gjetjet në secilin prej 185 vendvotimeve. Ky raport synon të konfirmojë se procesi i parë i numërimit nëpër komuna është zhvilluar me saktësi dhe në përputhje të plotë me vullnetin e shprehur të qytetarëve, raporton Ekonomia Online. /Ekonomia Online/ /E.A/