Studentja e programit Master në UBT, Dorentina Zogu, njëkohësisht profesioniste shëndetësore në Qendrën Klinike Universitare të Kosovës – Pediatri, mori pjesë në Kongresin e Parë Klinik të Kirurgëve Shqiptarë, i cili u mbajt për herë të parë në Kosovë më 25–27 shtator 2025.

Në këtë ngjarje shkencore, Dorentina pati rastin të prezantojë hulumtimin e saj me temë: “Standardizing Medical Procedures to Enhance the Quality of Student Clinical Practice in Kosovo”.

Qëllimi i hulumtimit ishte të theksonte rëndësinë e standardizimit të procedurave mjekësore si bazë për zhvillimin e një praktike klinike më cilësore për studentët e mjekësisë në Kosovë, duke u harmonizuar me standardet ndërkombëtare.

Pikat kryesore të gjetjeve ishin:

• Standardizimi rrit cilësinë e edukimit klinik;
• Përmirëson sigurinë e pacientëve;
• Forcon përgatitjen profesionale të mjekëve të ardhshëm.

Kongresi mblodhi mbi 300 prezantime shkencore dhe 235 ligjërues, prej të cilëve 70 ndërkombëtarë, duke e shndërruar Kosovën për tri ditë rresht në qendër të dijes dhe inovacionit kirurgjik.

Ky hulumtim përfaqëson një hap të rëndësishëm drejt avancimit të edukimit mjekësor dhe sistemit shëndetësor në vend, duke dëshmuar njëkohësisht rolin e UBT-së në fuqizimin e shkencës dhe të profesionistëve të rinj shëndetësorë.

Komisioni Qendror i Zgjedhjeve (KQZ) mori vendim për emërimin e anëtarëve të Këshillave të Vendvotimeve të rregullta, atyre me kusht dhe anëtarëve rezervë për Zgjedhjet Lokale, të cilët do të angazhohen në ditën e zgjedhjeve, më 12 tetor 2025.

Udhëheqësi i Këshillit për Operacione Zgjedhore, Arianit Elshani, ka deklaruar se “janë vetëm 3 komuna që përbëhen me nga 6 anëtarë, ndërsa komunat e tjera përbëhen me nga 5 anëtarë”.

Kundër këtij vendimi u shprehën dy anëtarët e Lëvizjes Vetëvendosje. Anëtari Alban Krasniqi tha se ata mbesin kundër në çdo rast ku është e përfshirë Lista Serbe.

“Ne që nga fillimi kemi qenë kundër. Na bënë të pamundur për me vendos për votimin e një liste të tillë. Bazuar në argumentet që kemi ngrit dhe vazhdojmë që të qëndrojmë”, u shpreh ai.

Sipas vendimit të KQZ-së, emërohen 14,305, anëtarë të 2,571 vendvotimeve të rregullta dhe 54 vendvotimeve me kusht, ndërkaq 1,200 anëtarë të tjerë do të jenë rezervë.

Sipas Ligjit për Zgjedhjet e Përgjithshme, Këshilli i Vendvotim është përgjegjës për sigurimin e integritetit, sigurisë dhe të qetësisë në procesin e votimit dhe numërimit në vendvotim nën mbikëqyrjen e drejtpërdrejtë nga Komisioni Komunal i Zgjedhjeve.

Procesi zgjedhor në Republikën e Kosovës, do të organizohet në 948 Qendra të Votimit me gjithsej 2,625 vendvotime, prej të cilave 910 Qendra të Votimit për votimin e rregullt me 2,571 vendvotime dhe 38 Qendra të Votimit për votimin me kusht me gjithsej 54 vendvotime.

Në pikën e fundit të rendit të ditës, KQZ mori vendim për miratimin e procedurës standarde të veprimit në lidhje me të drejtat dhe detyrat e vëzhguesve të akredituar në Zgjedhjet Lokale 2025.

Qëllimi i kësaj procedure është përcaktimi i rregullave të sjelljes, të drejtave dhe detyrimeve të vëzhguesve të akredituar nga KQZ, në procesin e vëzhgimit të zgjedhjeve në Qendrat e Votimit, Vendvotime, Qendra Komunale të Numërimit, Qendrën e Numërimit dhe Rezultateve dhe në hapësirat tjera që ndërlidhen me aktivitetet zgjedhore. Kjo procedurë do t’iu dërgohet të gjitha organizatave vëzhguese të akredituara nga KQZ./D.B/EO

Bashkimi Evropian ka bërë të ditur sot se ka rivendosur sanksione të gjera ndaj Iranit për shkak të programit të tij bërthamor, pasi Kombet e Bashkuara rivendosën masat e tyre gjithëpërfshirëse.

“Sot, BE-ja rivendosi sanksionet kundër Iranit për shkak të mosrespektimit të vazhdueshëm të marrëveshjes bërthamore. Dera për negociata diplomatike mbetet e hapur,” thuhet në një deklaratë të presidencës së BE-së.

Bashkimi Evropian deklaroi se sanksionet përfshijnë ngrirjen e aseteve të Bankës Qendrore Iraniane dhe bankave të tjera iraniane, si dhe ndalime udhëtimi për disa zyrtarë iranianë.

Gjithashtu, BE-ja ndaloi blerjen dhe transportin e naftës bruto nga Irani, si dhe shitjen ose furnizimin me ar dhe pajisje të caktuara detare.

OKB-ja ndërmori këtë hap gjatë fundjavës pasi fuqitë perëndimore aktivizuan mekanizmin e ashtuquajtur “snapback” nën marrëveshjen bërthamore të vitit 2015.

Sanksionet e rivendosura nga blloku me 27 vende përfshijnë masat e OKB-së që ndalojnë veprimtaritë bërthamore dhe balistike të Teheranit, transmeton RTSh.

Teherani i ka cilësuar si “të pajustifikuara” rivendosjen e sanksioneve të OKB-së.

Një tjetër talent i futbollit zviceran ka vendosur të ndryshojë ekipin kombëtar, ku mbrojtësi 22-vjeçar Albian Hajdari ka vendosur të luajë për Kosovën, pavarësisht se ka përfaqësuar të gjitha ekipet kombëtare të të rinjve të Zvicrës dhe ka marrë disa thirrje për kombëtaren e parë zvicerane.

Hajdari, i cili luan aktualisht te TSG Hoffenheim në Bundesliga dhe ka një vlerë tregu prej 12 milionë frangash zvicerane, debutoi për Zvicrën vetëm në një miqësore, duke lënë të hapur mundësinë e ndërrimit të kombëtares.

Federata e Kosovës ka shfrytëzuar rastin dhe pas negociatave intensive, e ka bindur lojtarin të përfaqësojë Kosovën në kualifikueset për Kupën e Botës.

Ky vendim ka thelluar tensionet mes dy federatave, ku drejtori i ekipit kombëtar zviceran, Pierluigi Tami, ishte qetësuar më herët për një largim të mundshëm, por ky është refuzimi i tretë i rëndësishëm brenda një periudhe të shkurtër për Zvicrën, pas Avdullahut dhe Kospos.

Në anën tjetër, presidenti i Federatës së Kosovës, Agim Ademi, e konsideron këtë një fitore të madhe: “Do të na bënte krenarë nëse ai do të zgjidhte Kosovën”, tha ai në një intervistë.

Me kapitenin Amir Rrahmani të lënduar, Hajdari ka shanse reale për një rol titullari në mbrojtjen e Kosovës në ndeshjet ndaj Sllovenisë dhe Suedisë. Ndërkohë, Zvicra mbetet me konkurrencë të fortë në mbrojtje, por humbja e talenteve me shtetësi të dyfishtë po sfidon strategjinë e saj për zhvillimin e lojtarëve.

Ky rast nënvizon përplasjen e vazhdueshme mes federatave për tërheqjen e lojtarëve me potencial të lartë dhe shtetësi të dyfishtë, një çështje që mund të ndikojë në rrugëtimin e të dy kombëtareve drejt Kupës së Botës 2026./S.K/KP/ “Blick.ch”