Humza Yousaf ka dhënë dorëheqjen si kreu i Partisë Kombëtare Skoceze (SNP) dhe kryeministër i Skocisë.

Vendimi erdhi menjëherë pasi Yousaf i dha fund aleancës së SNP-së me të Gjelbrit skocez, gjë që shkaktoi dy vota mosbesimi të paraqitura nga partitë opozitare që Yousaf dukej se kishte gjasa t’i humbiste.

Pasuria e SNP-së pro-pavarësisë është lëkundur mes një skandali financimi dhe dorëheqjes së Nicola Sturgeon si udhëheqës i partisë vitin e kaluar. Një luftë e brendshme ka pasuar mbi atë se sa progresive duhet të paraqesë partia politikat e saj ndërsa kërkon të tërheqë votuesit./UBTNews/

Ministri i Infrastrukturës, Liburn Aliu ka njoftuar se kanë nënshkruar memorandum me komunën  e Mitrovicës në vlerë 368 mijë euro. Aliu tha se financimi do të bëhet për projektin e rrugës “Çlirimi”, “Luj Braj”, “Norbert Jokli” dhe “Boro Stankoviq”.

“Vazhdojmë me nënshkrimin e memorandumit me Komunën e Mitrovicës së Veriut, të cilën komunë po e financojmë me 368.000.00 €. Përmes këtij Memorandumi po e bëjmë financimin e tërësishëm të projektit infrastrukturorë: Projekti i Rrugës “Çlirimi”, “Luj Braj”, “Norbert Jokli” dhe “Boro Stankoviq””, thuhet në njoftimin e ministrit.

Krerët institucional kanë bërë homazhe në Drenicë në nderim të martirëve dhe dëshmorëve të Ushtrisë Çlirimtare të Kosovës.

Presidentja e Republikës së Kosovës, Vjosa Osmani gjatë homazheve në Vërboc dhe Shtuticë në 25-vjetorin e masakrave në këto dy fshatra dhe në fshatrat përreth tha se sakrifica e heronjve dhe dëshmorëve të UÇK-së, nuk do të harrohet kurrë.

“Sa më afër lirisë, brutaliteti i forcave të regjimit gjenocidal të Serbisë rritej e manifestohej në mënyrën më çnjerëzore, ndaj në ofensivën e tyre vranë 280 banorë të kësaj ane vetëm pse ishin shqiptarë. Në mbrojtje të popullsisë civile u vunë vajza e djem të UÇK-së, në krye me komandant Ilaz Kodrën. Përballë egërsisë së regjimit kriminal, Ilazi me 42 bashkëluftëtarë qëndruan me guxim dhe vendosmëri deri në flijim. Ata ranë në fushë të betejës, duke u bërë të pavdekshëm”, ka theksuar Presidentja Osmani.

Edhe kryeministri Albin Kurti gjatë homazheve në Gllobar, Verboc dhe Shtuticë, ka përkujtuar shqiptarët e vrarë nga këto fshatra dhe zonat përreth, nga forcat policore e ushtarake të Serbisë më 30 prill 1999.

“Para 25 vjetëve janë vrarë 276 shqiptarë, që dëshironin të jetonin të lirë në tokën e tyre stërgjyshore dhe gjaku i tyre është sot dritë e lirisë, është rrënjë e Republikës sonë, për çfarë ne u përkulemi përjetësisht dhe shprehim mirënjohjen tonë për këto familje të dëshmorëve që po qëndrojnë gjithnjë të fortë”, tha kryeministri Kurti.

Duke vlerësuar flijimet kaq të mëdha të popullit në fshatrat Shtuticë, Gllobar, Verboc, Baks, e mbarë Kosovës, ai tha se Kosova demokratike me progres të gjithanshëm që po e forcon sundimin e ligjit, sovranitetin, integritetin territorial, por gjithashtu edhe drejtësinë dhe ekonominë, është dëshmia që ia ka vlejtur sakrifica edhe për çlirim edhe për përparim.

Punëtorë të përfaqësuar nga sindikatat në vend do të mbajnë protestë nesër (e mërkurë), me rastin e 1 Majit, Ditës Ndërkombëtare të Punëtoreve. Punëtorët pritet të shprehin pakënaqësitë e tyre për paga të ulëta, për të drejtat dhe sigurinë në punë.

Për këtë protestë janë bërë bashkë Sindikata e Bashkuar e Arsimit, Shkencës dhe Kulturës (SBASHK), Bashkimi i Sindikatave të Pavarura të Kosovës (BSPK) dhe Sindikata e Pavarur e Punëtorëve të Sektorit Privat. Vetëm gjatë vitit 2023 kanë humbur jetën 11 punëtorë dhe 330 aksidente në vendin e punës.

Paga minimale vazhdon të mbetet ende 130 euro për të punësuarit e moshës nën 35 vjet, dhe 170 euro për të punësuarit e moshës mbi 35 vjeçare.

Kryetari i SBAShK-ut, Rrahman Jasharaj ka theksuar për KosovaPress se kjo protestë vjen pas mungesës së dialogut social dhe qasjes së gabuar me sindikatat nga ana e qeverisë. Ai shton se numri i protestuesve vetëm nga SBASHK-u pritet të kalojë mbi 1 mijë.

“Jo vetëm arsimin, por edhe sektorët po i gjen në mungesë të dialogut social, me një qasje tepër të gabuar të qeverisë Kurti, dhe në këtë rast për SBAShK-un me një qasje të gabuar të ministres Nagavci, e cila i ka ikur që nga shtatori i grevave të vitit 2022, edhe përkundër kërkesave tona që të takohemi e të bisedojmë për të gjitha çështjet e shqetësimet. Pra, mungon dialogu në mungesë të vullnetit të Qeverisë dhe ja qe më 1 maj do të kemi një protestë, nuk do të jetë në përmasa të mëdha, do të marrin pjesë vetëm kryetaret, gjegjësisht udhëheqësit, duke filluar nga çerdhet, shoqatat që i kemi në çerdhe, arsimi para universitar, universitetet, kryetaret e nivelit komunal të Universiteteve dhe kryesia e SBAShK-ut, e kësaj radhe në këtë protestë do jenë edhe anëtar nga Federata e Sindikatave të Punëtorëve Teknik të sektorit privat, të cilin e udhëheq kolegu, Jusuf Azemi”, thotë Jasharaj.

Ndërsa kryetari i Sindikatës së Pavarur të Punëtorëve të Sektorit Privat, Jusuf Azemi thotë se festa e 1 Majit, nuk po i gjen shumë punëtor në Kosovë. Sipas të dhënave në terren, nga bizneset, ai thotë se vetëm dy muajt e parë të vitit janë mbi 150 mijë punëtor që nuk do të kthehen më në Kosovë, pasi kanë gjetur kushte më të mira në vendet evropiane. Ai shton se gjendja e punëtorëve që kryejnë shërbime për institucionet shtetërore është e mjerueshme.

“Ka disa ndryshime. Festa e 1 majit shumë punëtorë nuk po i gjen më në Kosovë, ata veç janë jashtë. Punëtorët e kompanive private janë në një gjendje më të mirë që kanë qenë, sidomos në ndërtimtari dhe gastronomi, aty ku është puna më e vështirë dhe mund të kemi lëvizje pozitive. Por, punëtorët në gjendjen më të rëndë gjenden aty ku kompanitë kryen shërbime për institucionet shtetërore, shembull për Rektoratin, UP-në dhe këtu kemi gjendjen shumë të rëndë. Për një muaj kemi kërkuar që të bëhet rritja e pagave të punëtorëve të këtyre punëtorëve dhe për një muaj grevë dolëm me po ato paga që kanë qenë më herët. Sot këta punëtorë marrin pagë 292 euro, një periudhe tranzitore për të cilën duhet gjetur vende tjera më të mira që paguhen më mirë…1:20 Shifrat e ikjes kanë qenë marramendëse, ne e dimë që gjithë ata që kanë ik nga 1 janari, një pjesë e madhe janë kthyer deri te kompletimi i dokumentacionit, por ne konsiderojmë që muajin janar dhe shkurt, diku mbi 150 mijë punëtor nuk do te kthehen më në Kosovë, sepse kanë gjetur vendet e tyre të punës jashtë, duke u nisur nga paga e sigurimet shëndetësore”, thotë Azemi.

Në anën tjetër, kryetari i BSPK-së, Atdhe Hykolli derisa tregon se do i bashkëngjiten kësaj proteste, thotë se arsyet për të protestuar janë të shumta.

“Me 1 maj sindikatat nuk festojnë, por protestojnë, arsyeja është se kemi për shumëçka të protestojmë. Do të protestojmë për kushtet e punës, për marrëveshjen e përgjithshme kolektive, për Këshillin Ekonomiko-Social që nuk e kemi ende, për sigurimin shëndetësor e shumë gjëra tjera. BSPK e mbështet çdo protestë, dhe patjetër se do jem edhe unë aty nesër në mbështetje të mësimdhënësve, të mësuesve të ndershëm që kemi në Kosovë”, thotë Hykolli.