Filmi “Shame and Money” ka pasur sonte premierën rajonale në Teatrin Kombëtar të Sarajevës, si pjesë e programit garues “Competition Programme – Narrative Feature Film” të Festivalit të Filmit në Sarajevë.

Filmi është me regji të Visar Morinës, ndërsa në rolet kryesore interpretojnë Astrit Kabashi, Flonja Kodheli, Alban Ukaj, Kumrije Hoxha dhe Fiona Gllavica.

Premiera në Sarajevë shënon një tjetër prezantim të rëndësishëm ndërkombëtar për kinematografinë kosovare dhe ekipin e filmit./A.K/

Sipas të dhënave zyrtare nga Qendra Klinike Universitare e Kosovës (QKUK), gjatë fundjavës së fundit në Qendrën Emergjente janë realizuar gjithsej 967 shërbime mjekësore.

Nga numri i përgjithshëm i rasteve të trajtuara, 291 pacientë kanë marrë ndihmë në Reanimim, 224 në Emergjencën Internistike, 208 në atë Ortopedike dhe 179 në Emergjencën Kirurgjike. Gjithashtu, 62 persona kanë marrë shërbime mjekësore në Sallën e Vogël për përpunimin, pastrimin dhe qepjen e plagëve.

Sa i përket natyrës së lëndimeve dhe incidenteve të regjistruara gjatë kësaj periudhe, numrin më të madh e përbëjnë viktimat e aksidenteve në komunikacion, me gjithsej 72 persona të lënduar. Po ashtu janë evidentuar 10 raste të personave të përfshirë në përleshje fizike, 5 raste të intoksikimit apo helmimit, 3 raste të lëndimeve nga armët e ftohta si dhe 1 rast nga arma e zjarrit.

Për trajtim të mëtejmë shëndetësor në klinika të ndryshme të QKUK-së janë hospitalizuar 86 pacientë, ndërsa gjatë kësaj fundjave janë regjistruar edhe 3 raste të vdekjes. /E.A/

Sipas bilancit të publikuar nga Ministria e Mbrojtjes, gjatë 24 orëve të fundit në mbarë Shqipërinë janë raportuar 33 vatra zjarri, prej të cilave 8 vijojnë të jenë aktive dhe 5 të tjera ndodhen nën monitorim. Për përballimin e situatës janë angazhuar 535 forca operacionale dhe 51 mjete zjarrfikëse, me mbështetjen e Forcave të Armatosura përmes 100 efektivëve, helikopterëve dhe dy avionëve të specializuar Air Tractor.

Operacionet më intensive tokësore dhe ajrore po zhvillohen në Malin e Dajtit në Tiranë, ku ndërhyrja po mbështetet nga dy helikopterë pa paraqitur rrezik për zonat e banuara, si dhe në Gurë-Lurë të Dibrës ku janë hapur korridore ndarëse që kanë penguar përhapjen e flakëve drejt shtëpive.

Ndërhyrje me mjete ajrore dhe forca të shumta ushtarake e bashkiake po kryhen edhe në Lufaj të Mirditës, Qafë Helmës, Bruç, Fushë-Lajë të Pukës dhe Rrjoll, kjo e fundit e monitoruar edhe me dronë. Autoritetet konfirmojnë se Agjencia Kombëtare e Mbrojtjes Civile po koordinon veprimet mes strukturave qendrore dhe vendore, ndërsa në asnjë prej vatrave aktive nuk raportohet kërcënim i drejtpërdrejtë për banesat. /Eeuronews/

Baleti Kombëtar i Kosovës ka marrë pjesë për herë të parë në edicionin e 23-të të “International Bodrum Ballet Festival”, në Bodrum të Turqisë.

Trupa kosovare prezantoi shfaqjen “Correr o Fado”, me koreografi nga Daniel Cardoso.

Shfaqja u interpretua në dy mbrëmje, më 12 dhe 13 gusht, dhe u prit tejet mirë nga publiku i shumtë në Bodrum.

Performancat e Baletit Kombëtar të Kosovës u përcollën me duartrokitje të gjata, duke shënuar një tjetër prezantim të rëndësishëm ndërkombëtar për trupën kosovare./A.K/