Hakerët, të cilët mendohet se punojnë për regjimin e Koresë së Veriut, kanë realizuar një grabitje masive, duke arkëtuar me sukses të paktën 300 milionë dollarë nga një vjedhje rekord prej 1.5 miliard dollarësh të kriptovalutave. Sipas mediave të huaja, kriminelët, të njohur si Lazarus Group, arritën të “përvjedhin” këtë shumë të madhe të tokenëve digjitalë në një veprim në shkëmbimin e kriptomonedhave ByBit, dy javë më parë.

Pas kësaj grabitjeje, ka nisur një “lojë e vazhdueshme” për të gjurmuar dhe bllokuar hakerët nga konvertimi i suksesshëm i kriptovalutave në para të përdorshme. Ekspertët e sigurisë nënvizohet se Lazarus Group po punon pa pushim, 24 orë në ditë, duke përdorur teknika të sofistikuara për të fshehur gjurmët e parave të vjedhura, duke mundësuar që ato të përdoren për zhvillimin ushtarak të regjimit të Koresë së Veriut.

Dr. Tom Robinson, bashkëthemelues i hetuesve të kriptovalutave Elliptic, thotë se Lazarus Group është jashtëzakonisht i avancuar në pastrimin e kriptovalutave. “Ata kanë shumë njerëz që punojnë me mjete automatike dhe kanë vite përvojë. Mund të shohim nga aktiviteti i tyre se ata janë duke punuar pa ndërprerje dhe mund të bëjnë vetëm disa orë pushim çdo ditë.”

Analiza nga Elliptic përputhet me informacionet nga ByBit, i cili ka konfirmuar se 20% e fondeve të vjedhura tani janë “errësuar”, që do të thotë se ka shumë pak mundësi që ato të rikuperohen. Kjo tregon për nivelin e lartë të sofistikimit të operacioneve të Lazarus Group, që janë të aftë të fshijnë çdo gjurmë të aktivitetit të tyre dhe të mbrojnë fondet nga ndjekjet.

Më 21 shkurt, Lazarus Group hakuan një nga furnizuesit e ByBit dhe ndryshuan fshehurazi adresën e portofolit digjital në të cilën po dërgoheshin 401,000 monedha kriptomonedha Ethereum. ByBit, në atë kohë, mendoi se po transferonte fondet në portofolin e vet dixhital, por ato përfunduan në duar të hakerëve. Megjithatë, CEO i ByBit, Ben Zhou, siguroi klientët se asnjë nga fondet e tyre nuk ishte marrë.

Për të luftuar këtë krim të sofistikuar, ByBit ka lancuar programin Lazarus Bounty, që inkurajon anëtarët e publikut të ndihmojnë në gjurmimin e fondeve të vjedhura dhe t’i ngrijnë ato aty ku është e mundur. Ky program synon të ngadalësojë përpjekjet e Lazarus Group për të pastruar paratë e vjedhura dhe për të ndihmuar autoritetet në rikuperimin e fondeve.

Shtetet e Bashkuara dhe aleatët e saj kanë akuzuar Koreen e Veriut për realizimin e dhjetëra hakimeve gjatë viteve të fundit, duke i përdorur të ardhurat e fituara për të financuar zhvillimin ushtarak dhe bërthamor të regjimit të Kim Jong-un. Kjo grabitje e fundit tregon se Lazarus Group mbetet një aktor kryesor në fushën e krimit kibernetik dhe një kërcënim i vazhdueshëm për sigurinë globale./UBTNews/

Dita ditës kur ndikimet e ndryshimeve klimatike po shkaktojnë tronditje të mëdha në çdo cep të botës, Kosova nuk është imune nga pasojat shkatërruese që po mbajnë peshë në ekosistemet natyrore dhe gjithashtu në strukturat ekonomike e shoqërore. Ngrohja globale, thjesht e matshme përmes rritjes së temperaturave mesatare dhe shfaqjes së fenomeneve ekstreme si thatësira dhe reshje të pakontrolluara, ka ndikuar drejtpërdrejt në fushat më jetike të zhvillimit të Kosovës: bujqësinë, biodiversitetin, dhe shëndetin publik.

Këto ndryshime po sfidojnë jo vetëm infrastrukturën dhe natyrën, por gjithashtu kërkojnë angazhim të menjëhershëm dhe strategji afatgjata për të ndihmuar komunitetin kosovar të përballojë pasojat e këtij fenomeni të paevitueshëm.

Në këtë kontekst të rëndësishëm, Faruk Foniqi, gjeograf dhe specialist në fushën e Sistemeve të Informacionit Gjeografik (GIS) dhe Remote Sensing, ndihmon për të ofruar një kuptim më të thellë të asaj se si këto ndryshime po ndikojnë në mjedisin dhe sektorët e ndryshëm të Kosovës. Foniqi shpërndan njohuri dhe shembuj konkret që tregojnë përmasat e kësaj krize ekologjike, si dhe për rolin jetik të teknologjive gjeohapësinore për një të ardhme më të qëndrueshme dhe rezistente ndaj ndryshimeve klimatike.

Në pyetjen se si po ndikon ndryshimi i klimës në Kosovë dhe cilat janë fushat më të prekura nga këto ndryshime, profesori vlerëson se efektet e këtij fenomeni janë tashmë të dukshme dhe po ndikojnë në sektorë kyç të ekonomisë dhe mjedisit. Ai thotë se ndryshimet klimatike kanë sjellë rritje të temperaturave mesatare, çka ka ndikuar ndjeshëm në bujqësi, duke ulur prodhimtarinë dhe duke ndryshuar ciklet e të mbjellave. Po ashtu, profesori shprehet se fenomenet ekstreme, si thatësirat dhe përmbytjet, kanë krijuar sfida të mëdha për infrastrukturën dhe jetesën e komuniteteve.

“Në vitet e fundit, thatësirat e shpeshta dhe reshjet ekstreme kanë dëmtuar rëndë sektorin e bujqësisë duke rrezikuar të ardhurat e fermerëve dhe sigurinë ushqimore, ashtu edhe ekonominë e vendit”, thekson profesori.

Përflitet se degradimi i tokës dhe shpyllëzimi po avancojnë me ritme të shpejta, duke e bërë edhe më të brishtë ekosistemin e Kosovës përballë ndryshimeve klimatike. Se cilët janë disa shembuj konkret të ndikimit të ndryshimeve klimatike në mjedisin dhe sektorët kryesorë të Kosovës, profesori vlerëson se këto ndryshime tashmë po e sfidojnë seriozisht stabilitetin ekonomik dhe ekologjik të vendit. Ai thotë se bujqësia është ndër fushat më të prekura, ku reduktimi i rendimentit dhe mungesa e ujit po e vështirësojnë ndjeshëm jetesën e fermerëve dhe sigurinë ushqimore. Në të njëjtën kohë, profesori Foniqi shprehet se biodiversiteti po pëson dëmtime të mëdha, pasi ndryshimi i klimës po shkatërron habitatet natyrore, duke rrezikuar zhdukjen e shumë specieve autoktone.

“Temperaturat e larta dhe kushtet e reja klimatike po ndikojnë drejtpërdrejt në përhapjen e sëmundjeve të lidhura me ngrohjen globale, duke vënë në rrezik shëndetin e popullatës, veçanërisht të grupeve më të ndjeshme, si fëmijët dhe të moshuarit”, u shpreh ai.

Vlerësohet se, përballë këtyre sfidave Kosova duhet të veprojë me urgjencë, duke zbatuar politika të qëndrueshme mjedisore dhe duke investuar në teknologji të gjelbra, në mënyrë që të zbutë efektet e ndryshimeve klimatike dhe të garantojë një të ardhme më të sigurt për qytetarët e saj.

Si mund të përdoren teknologjitë gjeohapësinore për të monitoruar dhe vlerësuar pasojat e ndryshimeve klimatike në Kosovë, profesori vlerëson se këto teknologji luajnë një rol thelbësor në analizën dhe parandalimin e fenomeneve klimatike ekstreme. Ai thotë se Sistemet e Informacionit Gjeografik (GIS) dhe sensorët në distancë mundësojnë mbledhjen e të dhënave në kohë reale, duke ndihmuar në monitorimin e ndryshimeve në përdorimin e tokës dhe mbulimin e pyjeve. Po ashtu, profesori shprehet se imazhet satelitore ndihmojnë në vlerësimin e përmbytjeve dhe modelimin e thatësirave, duke i dhënë institucioneve mundësinë të hartojnë politika të qëndrueshme për menaxhimin e burimeve natyrore.

“Përdorimi i teknologjisë gjeohapësinore ka mundësuar hartimin e zonave të rrezikut nga fatkeqësitë natyrore dhe krijimin e strategjive efektive për mbrojtjen e komuniteteve lokale”, thekson Foniqi, i cili tutje shton se përmes këtyre teknologjive, Kosova ka mundësi të rrisë kapacitetin e saj në parashikimin dhe reagimin ndaj ndryshimeve klimatike, duke krijuar një mjedis më të qëndrueshëm dhe më të mbrojtur ndaj krizave ekologjike.

Kur flitet për mundësitë dhe sfidat që ka Kosova në integrimin e teknologjive gjeohapësinore në strategjitë e saj për luftimin e pasojave të ndryshimeve klimatike, profesori vë në theks se vendi ka një potencial të madh për të përfituar nga këto teknologji, por përballet edhe me pengesa të konsiderueshme. Ai thotë se një nga mundësitë më të rëndësishme është bashkëpunimi me organizata ndërkombëtare, si ESA dhe NASA, për transferimin e njohurive dhe teknologjisë, duke lehtësuar kështu ndërtimin e kapaciteteve të brendshme. Po ashtu, qasja në të dhëna të hapura, si ato nga programi Copernicus, mund të ndihmojë në monitorimin në kohë reale të fenomeneve klimatike dhe në marrjen e masave parandaluese.

“Kosova ka nevojë për një qasje më të organizuar dhe investime të qëndrueshme për të shfrytëzuar plotësisht potencialin e teknologjive gjeohapësinore”, shprehet profesori Foniqi.

Gjithnjë duke ju referuar profesorit, sfidat kryesore përfshijnë koston e lartë të pajisjeve dhe softuerëve të specializuar, si dhe mungesën e ekspertëve të trajnuar për përdorimin e këtyre teknologjive. E sipas tij, një tjetër pengesë është fragmentimi i të dhënave mjedisore dhe mungesa e një platforme të centralizuar, e cila do të mundësonte shkëmbimin e informacionit mes institucioneve relevante.

“Në këtë kontekst, Kosova duhet të investojë në ndërtimin e kapaciteteve teknike dhe krijimin e një infrastrukture të qëndrueshme digjitale, për ta bërë teknologjinë gjeohapësinore një mjet të fuqishëm në luftën kundër ndryshimeve klimatike”, tha profesori.

Në temën se si të dhënat e mbledhura nga satelitët dhe sistemet GIS mund të ndihmojnë në parashikimin dhe menaxhimin e fatkeqësive natyrore të lidhura me ndryshimet klimatike në Kosovë, profesori i gjeoinformatikës, Foniqi, thekson rëndësinë e integrimit të teknologjisë në politikat mjedisore dhe strategjitë e menaxhimit të rreziqeve.

Sipas tij, përdorimi i imazheve satelitore dhe analizave të avancuara gjeohapësinore ka mundësuar identifikimin e zonave të rrezikuara nga përmbytjet dhe rrëshqitjet e dheut, veçanërisht në rajonet malore të Kosovës. “Falë sistemeve GIS dhe të dhënave satelitore, ne kemi mundësi të parashikojmë ndikimet e reshjeve intensive dhe të përcaktojmë masat që duhen ndërmarrë për të mbrojtur komunitetet lokale”, shpjegon profesori Foniqi.

Përveç kësaj, ai thekson se këto teknologji po përdoren gjithnjë e më shumë për të monitoruar ndryshimet në mbulesën bimore dhe përdorimin e tokës, çka ndihmon në identifikimin e thatësirave dhe hartimin e strategjive për menaxhimin e burimeve ujore. “Në një kohë kur ndryshimet klimatike po bëhen gjithnjë e më të ndjeshme, është thelbësore që institucionet të investojnë në platformat e të dhënave të hapura dhe në krijimin e një infrastrukture të integruar të informacionit mjedisor”,  thotë ai.

Sipas ekspertëve, integrimi i teknologjive gjeohapësinore në Kosovë mbetet ende sfidë për shkak të kostove të larta dhe mungesës së një databaze të centralizuar. Megjithatë, profesor Foniqi thekson se me bashkëpunimin e duhur mes institucioneve akademike, qeveritare dhe sektorit privat, vendi mund të përfitojë nga përparësitë e këtyre teknologjive për të përmirësuar menaxhimin e fatkeqësive natyrore dhe për të siguruar një zhvillim më të qëndrueshëm.

Kur profesori Foniqi ndalet në pyetjen se si mund të përmirësohet infrastruktura e të dhënave dhe kapacitetet teknologjike në Kosovë për monitorimin dhe menaxhimin e ndryshimeve klimatike në një periudhë afatgjatë, ai vlerëson se “përmirësimi i infrastrukturës së të dhënave dhe kapaciteteve teknologjike mund të arrihet përmes një qasjeje të integruar që përfshin investime, bashkëpunim ndërinstitucional dhe zhvillim të fuqisë punëtore”.

Ai argumenton se “krijimi i një platforme të centralizuar për të dhënat mjedisore, e cila mundëson akses të hapur dhe të koordinuar për të gjitha institucionet përkatëse, do të ishte një hap thelbësor”. Kjo platformë, sipas tij, duhet të mbështetet nga “teknologji të avancuara si GIS (Sistemet e Informacionit Gjeografik) dhe Remote Sensing, duke lehtësuar analizat e sofistikuara të ndryshimeve klimatike dhe parashikimin e fatkeqësive natyrore”

Profesori thekson gjithashtu se investimi në kapacitetet njerëzore është po ashtu thelbësor. Trajnimet dhe programet arsimore në fushën e teknologjive gjeohapësinore, në bashkëpunim me universitetet dhe institucionet ndërkombëtare, janë të domosdoshme për “krijimin e një grupi të kualifikuar ekspertësh vendas”. Ai thekson se “përfshirja e sektorit privat dhe startupeve teknologjike në zhvillimin e zgjidhjeve digjitale për menaxhimin e klimës mund të sjellë risi dhe qasje të reja”.

Për më tepër, profesori sugjeron se, angazhimi në programe ndërkombëtare si Copernicus, Galileo ose projekti ESA për monitorimin e tokës do të mundësonte qasje në të dhëna të sofistikuara satelitore dhe burime financiare për zhvillimin e infrastrukturës teknologjike. Ai vlerëson gjithashtu rëndësinë e forcimit të legjislacionit dhe krijimit të politikave të qarta për menaxhimin e të dhënave mjedisore, duke shtuar se këto masa “do të siguronin qëndrueshmëri institucionale dhe funksionim të qëndrueshëm të sistemeve të monitorimit”.

Duke përfunduar fjalën dhe jo diskutimin mbi temën që kërkon trajtim të vazhdueshëm, profesori Foniqi thotë se duke shfrytëzuar avancimin e teknologjive gjeohapësinore dhe angazhimin institucional të koordinuar, Kosova ka mundësinë të përballojë sfidat e ndryshimeve klimatike dhe të krijojë një të ardhme më të qëndrueshme për brezat që vijnë./UBTNews/

Gazetare: DIONESA EBIBI

Çmimet e larta janë arsyeja kryesore që konsumatorët gjermanë hezitojnë të kalojnë në automjete elektrike, zbuloi një studim i porositur nga dpa dhe i publikuar të dielën. Studimi, i kryer nga instituti kërkimor YouGov, zbuloi se 47% e të anketuarve përmendën kostot e tepërta si pengesën kryesore për blerjen e një makine elektrike.

Faktorë tjerë kryesorë përfshinin gamën e kufizuar të automjeteve me bateri, një problem për 42% të të anketuarve dhe mungesën e stacioneve të karikimit, në 40%. Vetëm 30% e të anketuarve u penguan nga çmimet e larta të energjisë elektrike, ndërsa 24% shprehën rezerva se teknologjia ende nuk është zhvilluar plotësisht.

Shitjet e automjeteve elektrike ranë me 27% në Gjermani në vitin 2024 pas skadimit të një subvencioni qeveritar, klientët nuk janë të gatshëm të shpenzojnë shuma të mëdha për të kaluar në modelet me bateri.

12% e të anketuarve thanë se do ishin të gatshëm të paguanin më shumë se 30,000 € (31,110 dollarë) për automjet elektrik. Pavarësisht rritjes së konkurrencës nga Kina, makinat elektrike të lira mbeten një gjë e rrallë në Gjermani, me klubin e automobilistëve ADAC që liston vetëm gjashtë modele me bateri në shitje nën vlerën prej 30,000 euro.

Prodhuesi më i madh i makinave në Evropë, Volkswagen, po planifikon një model elektrik të nivelit fillestar me çmim prej rreth 20,000 €.

Të anketuarit në sondazhin e YouGov treguan një preferencë të qartë për prodhuesit gjermanë dhe evropianë, por ata nuk ishin të përgatitur të paguanin një çmim të konsiderueshëm për ta.

Adobe ka lajmëruar se ka lansuar softuerin e famshëm të Photoshopit në formën e aplikacionit për telefon, si fillim në sistemin operativ të Apple, iOS. Kompania planifikon të lansojë aplikacionin e Photoshopit për sistemin operativ Android më vonë gjatë vitit, raporton “Techcrunch.com”.

Në lajmërimin e tyre, Adobe ka thënë se po ndërton një aplikacion “që nga themeli për të pritur një brez të ri pasionantësh të imazheve dhe dizajnit në mundësitë e pafundme të Photoshopit”.

Me aplikacionin e ri të Photoshop në telefonat e Apple, përdoruesit mund të kenë qasje si në shërbimet falas dhe në ato me pagesë përmes një dizajni miqësor që ofrohet nga kompania. Për ata përdorues, që duan të kenë qasje në shërbimet premium të aplikacionit dhe të Photoshopit në ueb, Adobe ka publikuar një plan mujor, me pagesë prej 7.99 dollarë në muaj.

Përmes mundësimit të Photoshopit në telefon, Adobe po synon përdorues të rinj, veçanërisht ata të grupmoshave të reja që janë mësuar të përdorin telefonat e tyre për qëllime kreative.

“Ne kaluam shumë kohë duke biseduar me krijuesit dhe autorët, veçanërisht me brezin e ri të krijuesve që janë shumë të rehatshëm me telefonat, dhe u munduam të kuptojmë rastet e tyre unike të përdorimit të pajisjeve mobile”, ka thënë Shambhavi Kadam, drejtor i lartë i menaxhimit të produkteve në Adobe Photoshop.