Monedha kripto ia kaloi më 2020 të gjithë monedhave të tjera digjitale duke arritur tani vlerën 70 miliardë dollarë. Bazuar në një meme, në një kopje, monedha tregon tani me ironi sa e ndjeshme është ndaj shakave.
U desh vetëm një shaka për ta ulur me 30 përqind vlerën e monedhës digjitale Dogecoin (doxh-koin), një prej monedhave më të përhapura kripto. Monedha kripto, e cila filloi si shaka në mediat sociale tetë vjet më parë, humbi më shumë se një të tretën e vlerës pasi Elon Musk, një nga njerëzit më të pasur të botës dhe mbështetësi më i fuqishëm i Dogecoin-it, e quajti monedhën dixhitale “bixhoz”, gjatë një bisede në emisionin televiziv Saturday Night Live, fundjavën e kaluar.
Rënia e madhe ishte dështim për fryrjen shumëjavore të entuziastëve të Dogecoinit, në prag të shfaqjes së Muskut si i ftuar në emisionin televiziv popullor. Çmimi i Dogecoinit arriti nivelin rekord të ngjitjes para transmetimit të emisionit, tifozët organizuan festa për të ndjekur së bashku emisionin duke parashikuar rritje të madhe të monedhës kripto, pas shfaqjes së Muskut në emision.
“Musk mbase është i lumtur të bëjë një shaka për monedhën kopje, por investitorët janë duke ndier tani dhimbje të vërtetë,” tha Justin d’Anethan, shef i shitjeve të Diginex, një kompanie për këmbimin e pasurive digjitale, me qendër në Hong Kong.
“Rezervat e Dogecoin janë në thelb të palimituara, dhe të paqëndrueshme në afat të gjatë. Çështja është kush do shesë i pari dhe kush do mbetet në fund për të ngritur valixhet”.
Interesimi për monedhat kripto ka qenë vitet e fundit i madh dhe e ka rritur vlerën e të gjitha monedhave digjitale në më shumë se 2.3 trilion dollarë (1.9 trilion euro), mbështetur nga trilionë dollarët dhënë prej bankave dhe qeverive për të simuluar monedhat digjitale, dhe përkrahur nga shumë investitorëve institucionalë.
Ndërkohë që Bitcoin, monedha kripto e vlerësuar shumë më tepër se të tjerat, ka qenë në qendër të vëmendjes dhe është mbledhur në sasi rekord, kanë qenë të ashtuquajturat monedha të vjetra digjitale si Ethereum dhe Dogecoin ato që kanë marrë kryesinë kohët e fundit.
Çfarë fshihet pas pupullaritetit në rritje të Dogecoinit?
Nuk ka shpjegim të lehtë për të kuptuar çmimin në rritje të Dogecoinit, i cili u krijua si shaka e improvizuar gjatë furisë së monedhave kripto të vitit 2013, dhe mori si logo qenin e racës Shiba Inu. Mbytja me para në dorë falë planeve simuluese të qeverisë, spekullimet e shoqëruara nga frika e humbjes së shansit, mbështetja e dhënë nga Musk dhe nga disa tifozë të thjeshtë online nxitur nga dashuria e mediave sociale për Doge meme, janë disa nga arsyet që fshihen pas ngjitjes në qiell të Dogecoinit, që ka parë vitet e kaluara rritje monetare prej 20.000 përqind.
“Mania për Dogecoinin filloi me tregtarët me pakicë që erdhën nga platformat e mediave sociale. Komuniteti i shitjeve me pakicë u bind se Dogecoin do arrijë të shkojë deri tek 1 dollari dhe për shumë prej tyre, parimet nuk kishin rëndësi”, i tha Deutsche Welle-s Edward Moya, analist tregu tek Oanda. “Mbështetja e dhënë nga njerëz të famshëm si Elon Musk dhe Mark Cuban, ofroi justifikimin e duhur për shumë investitorë dhe ndezi tek ta pasionin e ri”.
Gjatë një mbështetjeje të madhe për rritjen eksplozive të Dogecoinit, firma komerciale e Muskut, Space X filloi të pranonte pagesa për një mision satelitor në Hënë me monedha kripto. Misioni i financuar nga Dogecoin, i planifikuar për 2022, quhet “DOGE-1 Mission to the Moon,” misioni Doge-1 drejt Hënës.
Është Dogecoini Bitcoini i ardhshëm?
Kjo ka qenë një nga pyetjet më të shpeshta bërë muajt e fundit në Google lidhur me monedhën kripto. Dogecoini dhe Bitcoini janë dy egërsira të ndryshme, megjithëse edhe Dogecoin bazohet në të njëjtin kod software-i si Bitcoini.
Dogecoin ka mundësinë e krijimit të rezervave pa limit, gjë që do të thotë se ata që kërkojnë të mbeten investitorë të monedhës në një periudhë të gjatë kohe, do të duhet të shohin me kalimin e kohës rënien e vlerës së investimit të tyre. Nga ana tjetër Bitcoin, ka rezerva fikse prej 21 milionë njësish, gjë që e bën atë më të pakët në sasi, por me vlerë më të madhe kthimi — njësoj si floriri dhe diamantët të cilat kanë rezerva të limituara.
Ndërkohë që Dogecoin u krijua për të qenë monedhë kripto për “njerëzit e thjeshtë”, Bitcoini u krijua për tu kthyer në monedhë të decentralizuar digjitale, si alternativë për paratë Fiat që kontrollohen nga bankat dhe i paguajnë taksat qeverisë.
Shumë tifozë për vdekje të monedhave digjitale e shohin Dogecoinin dhe entuziazmin spekulativ për të si minim të qëllimit afatgjatë, për t’i marrë vendin kryesor monedhave kripto si Bitcoin dhe Ethereum. Ata thonë se imitimi i monedhave, memecoin, është vetëm një aset spekulativ, që mbulohet nga pak investitorë insitucionalë.
Megjithëse Dogecoin ka bërë rrugë të gjatë që nga fillimet satirike deri në kthimin në monedhën më popullore kripto të tipit peer to peer, nuk shihet që ai të jetë duke iu afruar qëllimit të minimit të dominancës së Bitcoinit. Vlera prej 70 bilionë dollarësh është shumë e vogël në krahasim me vlerën prej 1 trilioni të Bitcoinit.
“Dogecoin është kopësht kalamajsh në monedhat kripto. Ai u krijua për të bërë gallatë dhe tregon si funksionon monedha kripto,” i tha Deutsche Welle-s, Jeff Gallas, themeluesi i Fondacionit gjerman të Bitcoinit. “Pra, është një gjë e mirë të fillosh me të, për të edukuar veten me mënyrën e funksionimit të monedhave kripto dhe për të mos e marrë shumë seriozisht.”
A është Dogecoini investim i mirë?
Përgjigja që merret për këtë pyetje varet nga persioni të cilit ia drejton. Tifozët e Dogecoinit betohen për të duke e quajtur monedhën kripto të së ardhmes, kurse Musk e quan “krypton e popullit”. Përqindjet e ulëta që ka në transaksione dhe rezervat e mëdha e bëjnë Dogecoinin të përshtatshëm për t’u përdorur në rrjet si monedhë për blerjet online të përmbajtjeve si blogera dhe krijuesa të Reddit dhe YouTube. Me të është më e lehtë të minosh procesin e krijimit të bitcoineve të rinj nëpërmjet problemeve komplekse matematikore, gjë që do të thotë se transaksionet me Dogecoin mund të procedohen më shpejt se me Bitcoinin.
Njerëz të tjerë e shohin Dogecoinin si shumë spekulativ dhe me investime riskante, shumë më të mëdha se Bitcoin apo Ethereum. Pavarësisht nga mbështetja që i jep Musk, asnjë nga kompanitë e tij nuk ka investuar publikisht tek Dogecoin, sa ka investuar tek Bitcoin.
Edhe vetë Musk i ka kërkuar njerëzve të “investojnë me vetëdije”, duke thënë se nuk është gjë e mençur të investosh kursimet e jetës në monedhat kripto, të cilat duhen parë aktualisht si spekulative.
“Dogecoin nuk pritet të kthehet në monedhën e preferuar që do të përdoret nga Amerika e korporatave, por tani për tani interesi i tregtarëve me pakicë mund të bëjë që Dogecoini të pësojë të njëjtin fat si GameStop,” thotë Moya. “Vlerësimi i Dogecoinit nuk është i justifikueshëm, por mbështetja e tregtarëve me pakicë duket e paepur dhe mund ta mbajë çmimin e saj shumë më të lartë se vlerësimi i arsyeshëm”. (DW)
Aplikacioni i njohur i mesazheve, Snapchat, ka njoftuar se do të fillojë të tarifojë përdoruesit për ruajtjen e fotove dhe videove në funksionin Memories, i prezantuar për herë të parë në vitin 2016.
Sipas kompanisë, përdoruesit që kanë më shumë se 5GB përmbajtje të ruajtur në Memories do të duhet të paguajnë për ta mbajtur atë të disponueshme. Snapchat nuk ka dhënë ende detaje mbi çmimin, duke theksuar se ndryshimi do të zbatohet gradualisht në të gjithë botën.
Ky njoftim ka shkaktuar shqetësim tek përdoruesit e rrjeteve sociale. Kompania pranoi se kalimi nga një shërbim falas në një shërbim me pagesë “nuk është i lehtë”, por shtoi se kjo do të sjellë vlerë për përdoruesit.
Funksioni Memories lejon ruajtjen e fotove dhe videove, të cilat mund të shfaqen më pas si “memories” ose “throwbacks” çdo vit.
Ky ndryshim nuk do të ndikojë tek abonentët e Snapchat+ dhe Snapchat Premium. /A.Z/UBT News/
Sipas thashethemeve që qarkullojnë, Apple mund të sjellë vitin e ardhshëm një iPhone të palosshëm, i cili aktualisht njihet si iPhone Fold.
Ky model pritet të përfshijë një panel fleksibël OLED, të prodhuar nga Samsung Display, raportojnë mediat.
Lee Cheong, president i Samsung Display, ka konfirmuar prodhimin masiv të paneleve OLED për telefonat e palosshëm, të cilët do t’i dërgohen një klienti nga Amerika e Veriut.
Megjithëse emri i kompanisë nuk është bërë publik nga Cheong, burimet e shumta sugjerojnë se bëhet fjalë për Apple.
Sipas përfoljeve, iPhone Fold mund të ketë një ekran të jashtëm 5.5 inç dhe një ekran të brendshëm 7.8 inç, i cili paloset. Telefoni pritet të përdorë një sensor Touch ID të vendosur anash, në vend të Face ID.
Nëse këto thashetheme rezultojnë të sakta, telefoni mund të prezantohet në shtator 2026, së bashku me serinë e re iPhone 18, edhe pse data mund të ndryshojë. Çmimi fillestar pritet të jetë mbi 2,000 dollarë. /A.Z/UBT News/
OpenAI po përgatitet për publikimin e një aplikacioni të pavarur social, i cili do të funksionojë me modelin e tyre të ardhshëm të videos, Sora 2, raporton Wired.
Aplikacioni thuhet se është shumë i ngjashëm me TikTok, me një rrjedhë vertikale videosh dhe navigim me “swipe-to-scroll”.
Megjithatë, kjo aplikacion do të krijojë vetëm përmbajtje të gjeneruar nga inteligjenca artificiale, që do të thotë se përdoruesit nuk do të kenë mundësi të ngarkojnë foto apo video nga telefoni i tyre.
OpenAI do të kufizojë Sora 2 që të gjenerojë videot deri në 10 sekonda ose më pak për përdorim brenda aplikacionit.
Nuk është e qartë se cilat do të jenë kufizimet e modelit jashtë aplikacionit. TikTok, pasi kishte kufizim prej 15 sekondash, më pas i lejoi përdoruesit të postojnë video deri në 10 minuta. Thuhet gjithashtu se aplikacioni i ri përfshin një mjet për verifikimin e identitetit.
Nëse përdoruesi aktivizon këtë, Sora 2 do të mund të përdorë pamjen e tyre në videot që gjeneron. Kjo do të thotë se njerëzit tjerë mund të etiketojnë përdoruesit e të përdorin pamjen kur bëjnë remix të videove të tyre. Si masë sigurie, OpenAI do t’u dërgojë përdoruesve njoftime sa herë që dikush tjetër përdor pamjen e tyre, edhe në rastet kur dikush krijon një video, por nuk e poston në rrjedhën e aplikacionit.
Softueri refuzon të gjeneron video për shkak të kufizimeve të të drejtave të autorit. Nuk është e qartë sa të forta do të jenë masat mbrojtëse, dhe raportohet se OpenAI do të kërkojë nga mbajtësit e të drejtave që të heqin dorë nga përmbajtja e tyre në videot që Sora 2 gjeneron.
Sa i përket arsyes pse OpenAI po lançon një aplikacion social, Wired sugjeron se kompania ka parë një mundësi pasi presidenti amerikan Donald Trump ka shtyrë disa herë afatin për ByteDance që të vendosë biznesin amerikan të TikTok-ut nën kontrollin e SHBA-së.
ViDuke shtuar komponentën sociale në Sora, OpenAI ndoshta synon të tërheqë njerëzit që të përdorin modelin e tyre, duke e bërë të vështirë largimin nga aplikacioni dhe komuniteti që krijohet rreth tij. /A.Z/UBT News/
Meta ka filluar të kalojë përdoruesit adoleshentë të Facebook dhe Messenger në llogari të reja, të dizajnuara posaçërisht për ta, me masa të shtuar sigurie dhe mundësi mbikëqyrjeje nga prindërit.
Kjo iniciativë vjen në një kohë kur kompania raporton se “qindra miliona” adoleshentë janë aktivë në Instagram, Facebook dhe Messenger.
Llogaritë e posaçme për adoleshentë u prezantuan në Instagram një vit më parë, ndërsa këtë vit ato u bënë të disponueshme për përdoruesit në SHBA, Kanada, Mbretërinë e Bashkuar dhe Australi. Tani, Meta po i shtrin këto llogari në mbarë botën.
Të gjithë përdoruesit do të kalojnë automatikisht në këto llogari të reja, që janë bërë të detyrueshme për këtë grupmoshë. Për adoleshentët nga 13 deri në 15 vjeç, kërkohet leje prindërore për të ndryshuar cilësimet e sigurisë.
Meta përdor inteligjencën artificiale për të identifikuar përdoruesit që mund të japin të dhëna të pasakta për moshën e tyre. Llogaritë e reja ofrojnë funksione që lejojnë prindërit të monitorojnë aktivitetin e fëmijëve, duke përfshirë kontrollin e kohës së kaluar para ekranit dhe mbikëqyrjen e kontakteve të tyre.
Përveç kësaj, këto llogari kanë cilësime të forta privatësie dhe sigurie, për të kufizuar ndërveprimet midis adoleshentëve dhe të rriturve të panjohur.
Në të njëjtën kohë, Instagram po zgjerohet me një program për të ndihmuar shkollat fillore dhe të mesme në SHBA që të raportojnë më shpejt rastet e ngacmimit dhe sjelljeve problematike.
Ky program është implementuar fillimisht në bashkëpunim me një grup të përzgjedhur shkollash dhe tani çdo shkollë në SHBA mund të aplikojë për t’u bërë pjesë e tij. Meta thotë se ka marrë komente pozitive nga institucionet pjesëmarrëse. /A.Z/UBT News/
