Lajmet

Divergjencat mes partnerëve politike, e dërguan Preshevën në zgjedhje

Published

4 years ago

April 19, 2021

Betim Gashi

Mosmarrëveshjet në mes koalicionit qeverisës Alternativa për Ndryshim (APN), Lëvizja për Reforma (LR) dhe Lista Srpska (LS) kanë bërë që në kohë pandemie të ketë zgjedhje të parakohshme komunale në Preshevë. Zgjedhjet nxorën fituesin, ndërsa ende është e paqartë se kush nga partitë politike do të arrijë të krijoj shumicën e re në Kuvendin Komunal të Preshevës.

Lirigzona Nuredini

Preshevë, 17 prill – Më 28 mars, qytetarët në komunën e Preshevës u janë drejtuar kutive të votimit për të zgjedhur pushtetin e ri komunal. Këto zgjedhje janë organizuar për të tretën herë me radhë brenda 5 vitesh, për arsye të mosmarrëveshjeve në mes partive politike, për qeverisje komunale.

Në gusht të vitit të kaluar, partitë opozitare Partia Demokratike Shqiptare dhe Partia për Veprim Demokratik, pas dorëheqjes së Sami Saliut, Kryetarit të Kuvendit Komunal nga radhët e partisë Lëvizja për Reforma, kishin mbledhur nënshkrime nga këshilltarët për të mbajtur seancë të jashtëzakonshme
komunale për shkarkimin edhe të kryetarit të Komunës, Shqiprim Arifi. Ata nuk i arritën votat e nevojshme, kjo pasi vota e një këshilltari doli të jetë e pavlefshme. E gjithë kjo, dyshohet të ketë qenë një “kurth” i organizuar nga partia Alternativa për Ndryshim e kryesuar nga Shqiprim Arifi.

Mustafë Shaqiri, nënkryetar i opozitares Partia Demokratike Shqiptare, këto zgjedhje i sheh si një mundësi që qeverisja e ardhshme të bëhet më mirë.

“Partia Demokratike Shqiptare i ka mirëpritur këto zgjedhje. Që nga viti 2016 ishim në opozitë dhe duke pasur parasysh keqmenaxhimin dhe keqpërdorimin e buxhetit komunal nga ana e pushtetit në ikje, PDSH vazhdimisht trumbetoi në opozitë dhe e bëri opozitën për të shkuar në zgjedhje që Presheva të qeveriset më mirë”, deklaroi ai.

Koalicioni në mes partive politike, Alternativa për Ndryshim, Lëvizja për Reforma dhe Lista Srpska, ka qeverisur komunën tre vite, dhe nga viti 2016 del të jetë koalicioni i pestë që u shpërbë e që ndodhi në mesin e dhjetorit të vitit të kaluar.

Hasan Hasani, kandidat për këshilltar nga radhët e partisë Lëvizja për Reforma, paraqet qëndrimet e partisë që i takon.

“Zgjedhjet e jashtëzakonshme në Preshevë pasuan si rezultat i shkëputjes së marrëveshjes me partnerin e koalicionit Alternativa për Ndryshim (APN), pasi më u shteruan të gjitha mundësitë e bashkëpunimit për qeverisje. Lëvizja për Reforma (LR), gjatë kohës që ishte në qeverisje ka qenë konstruktive, por Alternativa për Ndryshim (APN), ishte treguar mospërfillëse, dhe duke e parë Lëvizjen për Reforma numra në Kuvend”, deklaroi Hasani për UBTNews.

Me shpresë për një të ardhme më të mirë për të rinjtë, zhvillim ekonomik e siguri të shtuar, qytetarët kanë përdorur të drejtën për votim. Kështu thotë për UBTNews, 40-vjeçari B.N, që doli nga qendra e votimit.

“Unë votova duke shpresuar për një të ardhme më të mirë fillimisht për rininë tonë dhe për mbarë vendin”, deklaroi ai.

Mirëpo Shkodran Ismaili, njohës i çështjeve politike, thotë se këto zgjedhje paraqesin jo stabilitet politik, pasi që është e vështirë të qeveriset një komunë kur nuk ka kompromis.

“Mendoj se jemi në një situatë jostabile i cili buron nga numri i këshilltarëve në Kuvendin Komunal,
sepse në çfarëdo situate dhe pozicioni që ta vështirësosh, edhe po të ketë një kompromis, e që do të
jetë vështirë i arritshëm, ai përsëri pas një kohe të shkurtër do të prodhojë zgjidhje të parakohshme ose
ndonjë situatë të palakmueshme. Stabilitet jam i bindur se nuk do të ketë edhe për një kohë të gjatë në
Komunë të Preshevës”, thotë ai.

Në këto zgjedhje kanë marrë pjesë gjashtë parti politike, Alternativa për Ndryshim, Lëvizja për Reforma, Partia Demokratike Shqiptare, Partia për Veprim Demokratik, Alternativa Demokratike Shqiptare dhe Unioni Demokratik Shqiptar, dhe një parti e serbëve e cila është koordinuar në një listë të përbashkët në mes tetë partive politike të serbëve.

Nga rezultatet e këtyre zgjedhjeve të çertifikuara tashmë, Alternativa për Ndryshim renditet fituese me 6 mijë e 21 vota, e dyta doli Partia Demokratike Shqiptare me 4 mijë e 173 vota, partia e tretë rezultoi të jetë Partia për Veprim Demokratik me 3 mijë e 368 vota, partia Lëvizja për Reforma si e katërta me 2 mijë e 545 vota, Lista Srpska ka marrë 1 mijë e 222 vota, ndërsa partitë Unioni Demokratik Shqiptar si dhe Alternativa Demokratike Shqiptare morën 483 respektivisht 441 vota. Tani opsioni mbetet i hapur se kush nga partitë politike do të arrijë të krijojë shumicën e re në Kuvendin Komunal të Preshevës./UBTNews

Lajmet

IKSHPK bën thirrje për kujdes nga temperaturat e larta, këto janë udhëzimet

Published

18 minutes ago

July 26, 2025

UBTnews

Instituti Kombëtar i Shëndetësisë Publike (IKSHPK) bën thirrje që sot qytetarët të kenë kujdes nga temperaturat e larta.

Nga IKSHPK ka dale sot me udhëzime për mbrojtje nga të nxehtit dhe temperaturat e larta, që pritet të arrijnë deri në 40 gradë.

“Vala e të nxehtit që po mbizotëron këto ditë mund të ndikojë negativisht në shëndetin dhe mirëqenien e qytetarëve, veçanërisht të grupeve të cenueshme. Periudhat e gjata me temperatura të larta gjatë ditës dhe natës krijojnë stres në trup dhe rrisin rrezikun e sëmundjeve apo vdekjeve nga ekspozimi ndaj nxehtësisë”, thuhet në njoftim.

Sipas IKSHPK-së, veprimet që duhet të ndërmerren për t’u mbrojtur janë: Qëndroni larg të nxehtit: Shmangni daljet dhe aktivitetet e rënda gjatë orëve më të nxehta. Qëndroni në hije dhe kaloni 2-3 orë në një vend të freskët.

“Mbajeni trupin të freskët dhe të hidratuar: Përdorni veshje të lehta (pambuku), bëni dush të freskët, lagni lëkurën dhe pini ujë rregullisht (1 gotë/orë – 2-3 litra/ditë). Mbajeni shtëpinë të freskët: Ajroseni gjatë natës kur jashtë është më freskët. Ditën mbyllni dritaret dhe përdorni perde për të penguar rrezet e diellit”, thuhet në njoftim.

Po ashtu IKSHPK bën thirrje për kujdes për grupet e cenueshme: Për të moshuarit mbi 65 vjeç: Kontaktoni rregullisht sidomos ata me sëmundje kronike, paaftësi apo që jetojnë vetëm.

Po ashtu për fëmijët: Mos i lini kurrë në automjete të parkuara. Shmangni ekspozimin në diell gjatë orëve më të nxehta (10:00–17:00).

Lajmet

Sot shënohet Dita memoriale e policëve të rënë në detyrë

Published

20 minutes ago

July 26, 2025

UBTnews

Nën përkujdesjen e ministrit në detyrë të Punëve të Brendshme Xhelal Sveçla dhe drejtorit të përgjithshëm të Policisë së Kosovës Gazmend Hoxha, sot do të mbahen një sërë aktivitetesh me rastin e Ditës memoriale e punonjësve policorë të rënë në krye të detyrës.

Më 11 gusht të vitit 2021, Qeveria e Kosovës kishte propozuar dhe miratuar që 26 korriku të shënohet si Dita e Policëve të rënë në krye të detyrës. Kjo ditë ishte shënuar për herë të parë në korrik të vitit 2022 dhe përkon me rënien heroike të Enver Zymerit 14 vjet më parë.

Agjenda e aktiviteteve:

08:00 – Vizita te familja e zyrtarit policor të rënë në kryerje të detyrës Muhamed Lika. (Familja e Lika – në Kaçanik. Pjesëmarrës drejtori i Përgjithshëm i Policisë Gazmend Hoxha dhe menaxhmenti i PK-së)

09:00 – Homazhe shtetërore. (Lapidari i Policëve të rënë – Drejtoria e Përgjithshme e Policisë. Pjesëmarrës personalitetet e larta shtetërore)

10:00 – Homazhe te varri i Heroit Afrim Bunjaku. (Samadrexhë, Vushtrri. Pjesëmarrës personalitetet e larta shtetërore)

10:15 – Vizitë në familjen e Heroit Afrim Bunjaku. (Samadrexhë, Vushtrri. Pjesëmarrës personalitetet e larta shtetërore)

10:45 – Homazhe te varri i Heroit Enver Zymeri. (Dubovc, Vushtrri. Pjesëmarrës personalitetet të larta shtetërore)

11:30 – Vizitë në familjen e Heroit Enver Zymeri. (Familja e Heroit Enver Zymeri– në Vushtrri. Pjesëmarrës personalitetet e larta shtetërore)

12:30 – Homazhe tek lapidari në vendin e rënies së Heroit Enver Zymeri. (Varage – Zubin Potok, pjesëmarrës: personalitetet e larta shtetërore)

Në shënim të 14-vjetorit të rënies së Hero Enver Zymeri dhe Ditës Memoriale të zyrtarëve policorë të rënë në krye të detyrës, do të organizohen aktivitete sportive që përfshijnë ecje, çiklizëm, vozitje me motorë dhe gara me kajak. Marshutat e ekipeve përfshijnë zona/komuna nga jugu drejt veriut të Kosovës, përmes vendit të rënies së Heroit Enver Zymeri, Varage-Zubin Potok.

17:00 – Ceremonia e pritjes së marshuesve në Qendrën për trajnim për kërkim-shpëtim “Berim”, Zubin Potok- Ujman.

Lajmet

Sot tentimi numër 53 në Kuvend

Published

21 minutes ago

July 26, 2025

UBTnews

Deputetët e zgjedhor do t’iu drejtohen sërish sot ulëseve të tyre në përpjekjen e radhës, e pesëdhjetë e treta, për të konstituuar legjislaturën e nëntë, të dalë nga zgjedhjet e 9 shkurtit.

Vazhdimi i radhës mbahet nga ora katërmbëdhjetë, për herë të parë në më pak se dyzetetetë orë pasi Gjykata Kushtetuese ka vendosur masë të përkohshme ndaj seancave të Kuvendit, që nga e diela 27 korrik deri më 8 gusht.

Kuvendi sipas kësaj mase të përkohshme do t’i konsumojë ditët e mbetura të afatit 30 ditorë, por nuk do të mund të merr asnjë vendim tjetër deri më 8 gusht. Kjo masë ndërlidhet me kërkesat e parashtruara nga PDK dhe LDK.

Kujtojmë, Lëvizja Vetëvendosje, Guxo e Alternativa në seancat e deritanishme kanë dështuar të sigurojnë votat për kryetar të Kuvendit.

Lajmet

Arrest shtëpiak ndaj katër të pandehurve për keqpërdorim të pozitës zyrtare në Gjakovë

Published

17 hours ago

July 25, 2025

UBTnews

Gjykata Themelore në Gjakovë ka caktuar masën e arrestit shtëpiak në kohëzgjatje prej një (1) muaji ndaj të pandehurve A.B., E.B., A.L. dhe A.K., shtetas të Republikës së Kosovës, për shkak të dyshimit të bazuar se kanë kryer veprën penale “’Keqpërdorim i pozitës apo autoritetit zyrtare”.

Sipas kërkesës, gjatë viteve 2018 dhe 2019, ekziston dyshimi i bazuar se të pandehurit A.B., Drejtor i Drejtorisë për Urbanizëm dhe Mbrojtje të Mjedisit, dhe E.B., Udhëheqëse e Sektorit Urbanistik në Komunën e Gjakovës, duke shfrytëzuar pozitën zyrtare dhe në bashkëkryerje, me dashje dhe në kundërshtim me interesin publik, kanë lëshuar pëlqime për parcelim të paligjshëm të pronave publike në dobi të palëve të treta A.L., M.Ll. dhe Sh.B., duke u mundësuar këtyre bartjen e pronës publike në emër të tyre dhe duke dëmtuar pasurinë e Komunës së Gjakovës dhe KBI-së në Gjakovë.

Po ashtu, ekziston dyshimi se gjatë vitit 2019, A.L., Drejtoreshë për Kadastër, Gjeodezi dhe Pronë, dhe A.K., jurist, kanë tejkaluar kompetencat duke miratuar regjistrime të reja të parcelave në kundërshtim me ligjin për kadastër dhe atë për të drejtat e pronës së paluajtshme, duke i bartur në mënyrë të kundërligjshme parcela dhe objekte në emër të palëve A.L., M.Ll. dhe Sh.B., duke dëmtuar interesin publik dhe pronën e institucioneve publike.

“Me këto veprime të gjithë të pandehurit dyshohen se kanë kryer veprën penale të keqpërdorimit të pozitës apo autoritetit zyrtar, në bashkëkryerje”, thuhet në njoftim.

Në këtë procedurë Prokuroria Themelore e Gjakovës, ka kërkuar caktimin e masës së paraburgimit ndaj të pandehurve por gjyqtari i procedurës paraprake, Sulltan Dobraj, ka vlerësuar se në këtë fazë të procedurës penale masa e arrestit shtëpiak është e mjaftueshme për të siguruar praninë e katër personave të pandehur, të parandalojë përsëritjen e veprës penale dhe të sigurojë zbatimin e suksesshëm të procedurës penale.

Të pandehurit do të mbahen në arrest shtëpiak në kohëzgjatje prej një muaji, i cili do të llogaritet prej kohës së arrestimit më 23 korrik 2025 dhe do të zgjasë deri më 23 gusht 2025.