Lajmet

Ditari: Lajmet kryesore që shënuan datën 6 tetor 1993-1998

Published

3 weeks ago

on

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

6 tetor 1993

Në Klinikën e Gjinekologjisë në Prishtinë vdes çdo e pesta foshnje

Në një shënim të gazetës së sotme “Bujku”, jipen shifra shqetësuese lidhur me shkallën e vdekshmërisë së foshnjave, tre vjet pas pushtimit të Klinikës së Gjinekologjisë dhe Akusherisë në Prishtinë.

Në këtë shënim thuhet: “Prej janarit të këtij viti, deri një javë para fundit të shtatorit, në Klinikën e Gjinekologjisë në Prishtinë u lindën 4.959 foshnja. Ndërsa, vetëm gjatë nëntë muajve të sivjetëm vdiqën 879 foshnja, apo vdes çdo e pesta foshnje. Është kjo shifra më e lartë e foshnjave të vdekura në pesë vitet e fundit, edhe më e lartë se në vitin 1989, ku prej rreth 12.000 foshnjeve të lindura gjatë tërë vitit, vdiqën 857 sosh, ose çdo e 13-ta foshnje”.

 

6 tetor 1994

Pesë veprimtarë u dërguan në burg

Në vuajtjen e dënimit prej 30 ditësh burg dje u dërguan pesë veprimtarë shqiptarë të Ferizajt: Xhabir Morina, nënkryetar i Kryesisë së Degës së LDK-së, Sylejman Bytyçi, kryetar i FISH-it, Hyrë Emini, kryetare e Kryesisë së FR, Elmi Reçica, anëtar i Kryesisë së Degës së KMDLNJ-së.

Këta veprimtarë gjykata serbe për kundërvajtje i dënoi për shkak të organizimit të manifestimit “Flaka e Janarit”, të mbajtur më 30 janar të këtij viti me pretekst se ky tubim, që u mbajt në një shtëpi private, është organizuar pa lajmërimin e programit tek organet gjegjëse të pushtetit serb.

Siç dihet, me të përfunduar të këtij manifestimi kulturor-paqësor pat intervenuar policia e cila në qendrën e këtushme të sigurimit arrestoi dhe keqtrajtoi rreth dyzet pjesëmarrës, ndërsa tash pesë nga ta i dërgoi edh enë burg, njofton “Bujku” i sotëm.

 

6 tetor 1995

 “Zëri i Amerikës”: Kolonët serbë në Kosovë tensionuan edhe më tepër gjendjen

Në një vështrim rreth problemeve të sistemimit të refugjatëve serbë nga Kroacia në Kosovë, korrespondenti i “Zërit të Amerikës” nga Beogradi njoftonte, mes tjerash se zyrtarët e OKB-së vlerësojnë se përmirësimi i gjendjes në Vojvodinë ndryshon në mënyrë të dukshme me shkallëzimin e tensionit në Kosovë.

Në raport thuhet:

“Deri tash reth 10 mijë refugjatë serbë nga Kraina janë dërguar në Kosovë. Sipas autoriteteve serbe kjo shifër mund të rritet së tepërmi, ndërkohë që Beogradi po vazhdon programin e tij për vendosjen e tyre të përhershme. Zyrtarët e Kombeve të Bashkura, diplomatët perëndimorë dhe analistët politikë serbë thonë se nuk ka dyshim se ardhja e refugjatëve serbë në Kosovë e ka tensionuar gjendjen në këtë rajon, i cili edhe më parë ka qenë mjaft i acaruar.

Ata thanë se qeveria e Jugosllavisë së vetëshpalllur nuk ka bërë asgjë për ta qetësuar gjendjen aty. Beogradi ia hoqi Kosovës statusin e autonomisë para 6 vjetësh. Atje vërehet një numër mjaft i madh policësh dhe trupash ushtarake që mbahen për të kontrolluar popullsinë shqiptare, udhëheqësit e të cilës kundërshtojnë rreptësisht sundimin e Beogradit. Sipas udhëheqësve vendorë, 11 shqiptarë janë vrarë vetëm gjatë këtij viti nga forcat policore dhe ushtria jugosllave.

Muajin e kaluar u dënuan shumë shqiptarë me afate të gjata burgimi, nën akuzë se i përkisnin lëvizjes separatiste. Udhëheqja e shqiptarëve të Kosovës po kundërshton vendosjen e refugjatëve serb në Kosovë duke i vlerësuar ata si kolonë, të cilët qeveria e Beogradit i dërgon në Kosovë me qëllim që ta ndryshojë strukturën e përbërjes etnike të këtij vendi. Për autoritetev jugosllave pohimet e këtilla janë të pabaza. Sipas tyre edhe të gjithë refugjatët serbë nga Kraina sikur të vendoseshin në Kosovë, atje shqiptaret përsëri do të kishin shumicën dërmuese, thuhet në vazhdim të këtij vështrimi.

Zyrtari i Kombeve të Bashkuara, kundërshtoi përpjekjet e Beogradit për t’i sistemuar refugjatët si një gjë të papërshtatshme. Në të njejtën kohë, ata u kanë kërkuar autoriteteve të Beogradit që të kenë parasysh gjendjen etnike të shqiptarëve të Kosovës. Lidhur me këtë Ika Todoroviq, komesar i lartë i Kombeve të Bashkuara për Refugjatët thotë: “Një pjesë e shqiptarëve janë radikalizuar, por edhe një pjesë e refugjatëve dhe e serbëve vendës mund të jenë të ekstremizuar. Kuptohet se çfarë gjendjeje shpërthyese mund të krijohet po qe se këto dy grupe sulmojnë njeri tjetrin. Mendoj se kjo është gjendje shqetësuese”, tha Todoroviq.

Serbia thekson se në Kosovë refugjatëve serbë mund t’u sigurojë më shumë tokë e punë sesa në pjesët tjera të vendit. Megjithatë, si duket, askush prej këtyre refugjatëve nuk është i kënaqur me ofertat e qeverisë jugosllave. Sipas zyrtarëve të Kombeve të Bashkura shumë prej refugjatëve kanë kundërshtuar që të shkojnë në Kosovë, bile shumë prej tyre u hodhën nga trenat kur mësuan se po i dërgonin në Kosovë. Shumë prej tyre edhe janë të tronditur nga ikja prej Krainës, thotë një zyrtar i Kombeve të Bashkuara, gjë që ata nuk pranojnë më që të shkojnë në një rajon tjetër mjaft të tensionuar siç është Kosova. Andaj, me arsye, ata edhe kundërshtojnë një gjë të tillë dhe janë të shqetësuar për fatin e vet”, thuhet në fund të këtij vështrimi.

 

6 tetor 1997

Dhunë e shtuar në Kosovë

Listës së studentëve dhe qytetarëve shqiptarë të keqtrajtuar, të cilët morën pjesë në protestat paqësore të studentëve më 1 tetor në Prishtinë, po i shtohen emra të rinj.

Nga Malisheva njoftohet se janë keqtrajtuar edhe studentët e Fakultetit të Bujqësisë, Mehdi Krasniqi nga Drenoci, Osman Hoxha nga Shkoza dhe Mitat Salihu nga Radivojci i Vitisë.

Po këtë ditë në Prishtinë është keqtrajtuar edhe studenti i Fakultetit të Veterinarisë, Arsim Paçarizi nga Dragobili, si dhe Mujë e Gëzim Sahitaj, studentë të Fakultetit Juridik dhe Bali Rudaj, student i Fakultetit Filozofik nga Panorci.

Komisioni për Informim i Degës së LDK-së në Mitrovicë, njofton se më 1 tetor, policia serbe ka keqtrajtuar edhe Shyqri Mustafën e Xhelil Haxhiun nga Smrekonica e Vushtrrisë dhe Bejtush Hazirin. Po këtë ditë policia serbe ka ketqrajtur fizikisht edhe Latif Jasharin dhe Nexhmedin Mustafën, anëtarë të Kryesisë së Partisë Republikane Shqiptare me seli në Mitrovicë.

KI i Degës së LDK-së në Vushtrri bën të ditur se më 1 tetor, policia serbe ka keqtrajtuar edhe Naim Shabanin, student i SHLP-së në Prishtinë. Ai nga pesë policë serbë është keqtrajtuar rreth 45 minuta në stacionin e policisë në Prishtinë ku edhe i janë plaçkitur të gjitha paratë që i kishte me vete.

 

Gjakovë: Për herë të pestë u mor në pyetje plaku 72- vjeçar

Sot, për herë të pestë në stacionin e policisë serbe në Gjakovë u mor në të ashtuquajturën bisedë informative Mon Avdia (72), anëtar i Kryesisë së Nëndegës V të LDK-së në Gjakovë, njofton KI i kësaj Dege.

Ai u mor në pyetje me pretekst të dorëzimit të armëve dhe për shkak të shëtitjes së tij në korzon e Gjakovës.

Mon Avdia u urdhërua që sërish të paraqitet nesër në polici.

Ndërkaq, më 3 tetor, vetëm pse janë banorë të Jabllanicës, në afërsi të postkomandës së policisë serbe në Çallapek, policia serbe i keqtrajtoi fizikisht Shaqir, Bardhec, Avni e Ramadan Hajdarin.

 

6 tetor 1998

U gjetën edhe pesë shqiptarë të vrarë në fshatin Plloçicë të Malishevës

Në malet e fshatit Plloçicë të Malishevës u gjetën trupat e masakruar të Ahmet Xhemë Malokut, Hazir Osman Malokut dhe Kajtaz Sylë Malokut, ndërsa në një stoç kashte u gjet trupi i Rizah Malokut. Në malet e Plloçicës është gjetur edhe gjysma e trupit të një të vrari, identiteti i të cilit nuk dihet.

Të pesë shqiptarët janë vrarë gjatë ofensivës së fundit e forcave serbe në fshatrat e Çiçavicës. Thuhet se ka edhe shumë të vrarë në malet e Plloçicës që gjendet afër Obrisë.

 

Ferizaj: Ende nuk dihet asgjë për fatin e mbi 1 mijë banorëve shqiptarë të Jezercit

Tash tetë ditë, që kur forcat e ushtrisë dhe të policisë serbe kanë sulmuar fshatin Jezerc, në tri ditët e fundit nuk dihet asgjë për fatin e mbi 1 mijë civilëve shqiptarë të këtij fshati, bën të ditur KI i Degës së LDK-së në Ferizaj.

Njoftohet se rreth 300 banorë të Jezercit, të cilët pas gjashtë ditë udhëtimi kanë arritur që të depërtojnë nga unaza e hekurt e forcave ushtarake e policicore serbe, kanë dëshmuar se në këtë fshat forcat serbe kanë masakruar një plak dhe shqetëson numri i banorëve të këtushëm që kanë mbetur pa ushqime e barna, pastaj i të sëmurëve e shtatzënave.

Kryesia e Degës së LDK-së në Ferizaj edhe një herë apelon te organizatat e huaja humanitare ndërkombëtare, që të bëjnë ç’është e mundur që të shpëtojnë popullatën e këtushme, pasi gjatë tri ditëve të fundit, kjo Kryesi nuk ka asnjë informatë për fatin e civilëve që kanë mbetur të rrethuar nga forcat serbe.

 

Bill Klinton: NATO-ja është e gatshme të veprojë

Presidenti amerikan Bill Klinton shfrytëzoi sot takimin e përbashkët të Fondit Monetar Ndërkombëtar (FMN) dhe Bankës Botërore (BB) për t’ia tërhequr vërejtjen udhëheqësit serb Millosheviq rreth gjendjes në Kosovë dhe kërkesave ndërkombëtare që ai duhet të përmbushë.

Në fillim të një fjalimi për gjendjen ekonomike në botë, pjesëmarrësve të takimit FMN-BB Klintoni u tha se kishte biseduar sot më herët për Kosovën me kryeministrin e Britanisë, Toni Bler.

Më poshtë po e japim të plotë pjesën e fjalës së Klintonit që lidhej me Kosovën, transmetuar drejtpërdrejt nga rrjeti global televiziv CNN në orët e pasditës sot (e martë):

“Të gjithë pajtohemi se Kosova ështe fuçi baruti në Ballkan. Nëse dhuna vazhdon, do të mund të zgjerohej dhe të kërcënojë paqen dhe stabilitetin, në Bosnjë, në Shqipëri, në Maqedoni dhe në shtetet e tjera në rajon.

Ajo që tashti është krizë humanitare mund të shndërrohet në katastrofë. Rreth 250.000 njerëz janë detyruar t’i braktisin shtëpitë e veta. Prej tyre, përafërsisht 50.000 njerëz janë në në të vërtetë pa kulm mbi krye. Tani që dimri po afrohet, ata janë të rrezikuar të vdesin nga acari dhe uria.

Presidenti Millosheviq është përgjegjësi kryesor për këtë krizë. OKB-ja i ka bërë të qartë hapat që ai duhet t’i ndërmarrë për ta ndërprerë këtë krizë: të shpallë menjëherë armëpushimin, të tërheqë forcat serbe, t’u mundësojë organizatave humanitare depërtim të plotë dhe të menjëhershëm në Kosovë, të fillojë negociatat e mirëfillta me shqiptarët e Kosovës për të gjetur një zgjidhje paqësore dhe të përhershme për kërkesën e tyre të drejtë për autonomi.

Derisa ne jemi mbledhur këtu, emisari im special Dik Hollbruk po takohet me Millosheviqin për t’i përsëritur çfarë duhet të bëjë ai dhe t’ia bëjë të qartë se NATO është e gatshtme të veprojë në qoftë se Presidenti Milosheviq nuk i respekton rezolutat a OKB-së. Puna është shumë serioze. Është koha që dhuna të ndalet menjëherë në Kosovë. Shpresoj se ju të gjithë do të bëni çmos për këtë qëllim,” tha Bill Klinton, duke iu drejtuar pjesëmarrësve të takimit të përbashkët të FMN-së dhe BB-së në fillim të fjalimit të vet.

 

Foto: Bill Klinton

Related Topics:
Continue Reading

lajme

Prokuroria e Pejës nis hetime ndaj zyrtarëve që dyshohet se neglizhuan rastin e Arlinda Zekajt

Published

8 hours ago

on

October 26, 2026

By

Prokuroria Themelore në Pejë ka iniciuar hetime zyrtare ndaj një zinxhiri zyrtarësh që u përmendën nga e ndjera Arlinda Zekaj në një parashtresë drejtuar kryeprokurores, ku denoncohej neglizhenca e tyre institucionale.

Zëdhënësi i Prokurorisë, Shkodran Nikçi, bëri të ditur në një konferencë për media se viktima kishte dorëzuar letrën më 22 tetor – vetëm tri ditë para se të vritej. Në këtë parashtresë, Zekaj kishte kërkuar masa urgjente, duke paralajmëruar me shkrim se institucionet mund të reagonin vetëm pasi të humbiste një jetë njeriu.

Sipas Nikçit, viktimës i ishte njohur e drejta e shfrytëzimit të pronës dhe ishte lëshuar urdhër që bashkëshorti të mos i afrohej në distancë prej dy metrash. Vendimi gjyqësor u ekzekutua të enjten në prani të policisë, por pak orë më vonë shpërtheu një konflikt.

Zyrtarët i kishin kërkuar viktimës të mos qëndronte në atë shtëpi për shkak të rrezikut të lartë për sigurinë e saj, duke ftuar edhe dy vëllezërit e saj për ta bindur që të strehohej te ta derisa të gjendej një zgjidhje.

Arlinda Zekaj u vra të dielën në mbrëmje në Vitomiricë të Pejës. I dyshuari kryesor për këtë vrasje është kunati i saj, i cili vazhdon të jetë në arrati. /E.A/

 

Continue Reading

Lajmet

“Shteti e vrau Arlindën”: Organizata QIKA me aksion simbolik para Qeverisë kërkon përgjegjësi për vrasjen e Arlinda Zekajt

Published

8 hours ago

on

October 26, 2026

By

Organizata për Barazi Gjinore QIKA ka zhvilluar sot një aksion simbolik para ndërtesës së Qeverisë së Kosovës, duke kërkuar llogaridhënie të menjëhershme institucionale për vrasjen e Arlinda Zekajt në Pejë.

Aktivistet vendosën mbishkrimin “Shteti e vrau Arlindën” në hyrje të ndërtesës dhe hodhën ngjyrë të kuqe në shkallë, si simbolikë e jetëve të humbura të grave dhe përgjegjësisë shtetërore.

Përfaqësuesja e QIKA-s, Blenda Asllani, theksoi se e ndjera kishte ndjekur të gjitha procedurat ligjore, kishte siguruar urdhër mbrojtjeje dhe kishte paralajmëruar rrezikun e dokumentuar, por megjithatë u vra pak minuta pasi kërkoi ndihmë.

“Shteti u kërkon grave ta denoncojnë dhunën, t’i dokumentojnë kërcënimet dhe t’u besojnë institucioneve. Por çfarë vlere kanë këto procedura kur një grua mund t’i ndjekë të gjitha dhe, megjithatë, të vritet? Vrasja e Arlindës është pasojë e një shteti që i braktis gratë”, deklaroi Asllani.

QIKA kërkoi hetim të hollësishëm për të gjitha hallkat zyrtare, duke kërkuar që çdo person përgjegjës – përmes veprimeve apo mosveprimeve – të përballet me drejtësinë pa asnjë tolerim apo fshehje prapa procedurave burokratike. /E.A/

 

Continue Reading

Live

Izraeli voton të martën: Netanyahu në garë të ngushtë për mbijetesë politike pas tre vitesh luftë

Published

8 hours ago

on

October 26, 2026

By

Tre vjet pas sulmit të 7 tetorit 2023, Izraeli përballet të martën me zgjedhje parlamentare vendimtare, ku kryeministri 77-vjeçar, Benjamin Netanyahu, kërkon rizgjedhjen në një garë jashtëzakonisht të ngushtë.

Zgjedhjet shihen si një plebishit për të ardhmen e vendit dhe llogaridhënien e pushtetit:

Kundërshtarët: Të udhëhequr nga ish-shefi i ushtrisë Gadi Eisenkot, kërkojnë përgjegjësi për dështimet e sigurisë të 7 tetorit dhe e akuzojnë Netanyahun për udhëheqjen e një “luftë të përjetshme” pa fitore politike.

Mbështetësit: E shohin Netanyahun si të vetmin lider që i bëri ballë Hamasit, Hezbollahut dhe Iranit, ndërsa vetë ai ka mbështetur fushatën në sloganin e djathtë kundër krijimit të një shteti palestinez dhe mbështetjen e presidentit amerikan Donald Trump.

Përveç pasojave të luftës, votuesit mbeten të ndarë edhe për përjashtimin e ultraortodoksëve nga shërbimi ushtarak dhe reformën e diskutueshme në gjyqësor. Meqë asnjë parti nuk pritet të fitojë vetëm shumicën prej 61 mandatesh, rezultati do të përcaktohet nga bisedimet e vështira për koalicion.

 

Continue Reading

Lajmet

Reagimi i Prokurorisë: Si u trajtuan rastet dhe paralajmërimet e Arlinda Zekajt para se të vritej

Published

11 hours ago

on

October 26, 2026

By

Prokuroria Themelore në Pejë ka reaguar edhe njëherë lidhur me vrasjen e Arlinda Zekajt në Vitomiricë të Pejës, duke njoftuar për siç thuhet në komunikatë, veprimet që ka ndërmarrë kryeprokurorja e kësaj Prokurorie dhe prokurorët e shtetit pas pranimit të kërkesës së viktimës dhe gjatë trajtimit të rasteve të raportuara më parë.

Në komunikatë thuhet se dy ditë para vrasjes së saj, më 23 tetor, kishte ngritur aktakuzë ndaj ish-bashkëshortit të tani të ndjerës, J.S., për veprën penale të kanosjes në kuadër të marrëdhënies familjare. Ndërkaq më 16 tetor, disa ditë para ngritjes së aktakuzës,  Gjykata kishte nxjerrë një vendim përmes të cilit ishte urdhëruar që ish-bashkëshorti i tani të ndjerës ta lejonte atë të kthehej dhe ta shfrytëzonte shtëpinë e përbashkët. Po ashtu, ishte lëshuar urdhër mbrojtjeje për një periudhë gjashtëmujore, i cili kishte hyrë në fuqi menjëherë.

“Sipas vendimit gjyqësor, zbatimi i urdhrit dhe njoftimi i Gjykatës për zbatimin e tij apo për pengesat eventuale ishin përgjegjësi e Policisë së Kosovës”, thuhet në komunikatë.

Bëhet e ditur se në ditën kur viktima kishte kërkuar zbatimin e urdhrit dhe kthimin në shtëpinë e përbashkët, Policia e Kosovës e kishte njoftuar prokurorin kujdestar për rrethanat e rastit. Pas vlerësimit të situatës dhe të rrezikut të mundshëm për sigurinë e saj, thuhet se prokurori i shtetit kishte vlerësuar se kthimi i menjëhershëm në shtëpinë e përbashkët mund të paraqiste rrezik për jetën dhe sigurinë e viktimës.

“Me qëllim të mbrojtjes së saj, prokurori kishte kontaktuar familjarët e viktimës, përkatësisht vëllezërit e saj, të cilët ishin ftuar në stacionin policor dhe ishin njoftuar për rrethanat e rastit.  Pavarësisht insistimit të viktimës për t’u kthyer në shtëpinë e përbashkët, prokurori i shtetit, duke marrë parasysh rrethanat e paraqitura dhe rrezikun e mundshëm, kishte udhëzuar që ajo të dërgohej në shtëpinë e vëllezërve të saj”, thuhet në njoftim.

Me kërkesën e shprehur të viktimës, në komunikatë thuhet se prokurori i shtetit dhe hetuesit policorë, në praninë e saj dhe të familjarëve, kishin përpiluar një shkresë zyrtare në të cilën ishin paraqitur arsyet përse ishte vlerësuar e nevojshme që ajo të qëndronte te vëllezërit e saj.

Pas bisedimeve, thuhet se viktima kishte pranuar të shkonte te familjarët, por kishte kërkuar që të nesërmen të shoqërohej nga një patrullë policore për t’u kthyer në shtëpinë e përbashkët.

Po atë natë, prokurori i shtetit, së bashku me hetuesit e rastit, kishte bërë vlerësimin profesional të nivelit të rrezikut dhe të masave të nevojshme të sigurisë. Si rezultat, ishte vendosur që, gjatë kthimit të planifikuar të viktimës në shtëpinë e përbashkët, një patrullë policore të qëndronte në afërsi të shtëpisë.

“Për këto rrethana ishte përpiluar procesverbali i datës 22 tetor 2026. Prokurori i rastit kishte kërkuar që përmes së njëjtës shkresë të njoftohej edhe gjyqtari i çështjes që kishte nxjerrë vendimin për shfrytëzimin e shtëpisë së përbashkët nga bashkëshortët”, thuhet në njoftim.

Theksohet se pasi kryeprokurorja pasi kishte pranuar kërkesën nga Zekaj ku ishte ankuar për mënyrën e trajtimit të rasteve të mëparshme, kishte kërkuar që me urgjencë të vlerësohej situata në mënyrë që sipas saj “të verifikoheshin pretendimet për lëshime eventuale dhe të ndërmerreshin veprimet brenda përgjegjësive ligjore të secilit institucion”.

Nata kritike: Kthimi në shtëpi nën shoqërimin e Policisë dhe vrasja 

Prokuroria ka sqaruar se natën kritike, më 25 tetor 2026, në orën 19:48, Policia e Kosovës kishte kontaktuar prokurorin kujdestar të Departamentit të Përgjithshëm lidhur me një rast të dyshuar të dhunës në familje, i cili kishte ndodhur në shtëpinë e tani të ndjerës.

Në stacionin policor ishin shoqëruar ish-bashkëshorti i saj, J.S., dhe viktima. Në lidhje me rastin ishte iniciuar procedurë për veprën penale të mospërfilljes së gjykatës, ndërsa J.S. ishte ndaluar për 48 orë.

Gjatë trajtimit të rastit, Prokuroria thotë se viktimës i ishte ofruar mundësia për të shkuar në një strehimore, por ajo kishte refuzuar, duke kërkuar të kthehej në shtëpinë e përbashkët, ku ndodhej djali i saj dhe pasuria e saj.

Pas kësaj, viktima ishte shoqëruar nga një patrullë policore për në shtëpi, rreth orës 21:00. Pak minuta pas kthimit të saj, prokurori kujdestar ishte njoftuar se ajo ishte goditur me një mjet të fortë brenda shtëpisë nga kunati i saj, A.S., i dyshuar në këtë rast.

Pas marrjes së njoftimit, në vendin e ngjarjes kishin dalë njësitë përkatëse të Policisë së Kosovës, Kryeprokurorja e Prokurorisë Themelore në Pejë dhe prokurorja kujdestare e Departamentit për Krime të Rënda, me qëllim të përcjelljes nga afër të situatës dhe ndërmarrjes së veprimeve fillestare hetimore në vendin e ngjarjes.

Prokuroria njofton gjithashtu se, më 23 tetor 2026, kishte ngritur aktakuzë ndaj ish-bashkëshortit të tani të ndjerës, J.S., për veprën penale të kanosjes në kuadër të marrëdhënies familjare.

Prokuroria Themelore në Pejë deklaron se pretendimet e paraqitura nga tani e ndjera Arlinda Zekaj në kërkesën e saj janë trajtuar me seriozitet dhe se Kryeprokurorja ka ndërmarrë veprime për adresimin e tyre te institucionet kompetente, si dhe ka iniciuar rast për hetimin e veprimeve ose mosveprimeve të mundshme të personave zyrtarë.

“Prokuroria shpreh keqardhje të thellë për humbjen tragjike të jetës së Arlinda Zekajt dhe shpreh ngushëllimet më të sinqerta për familjen e saj. Në të njëjtën kohë, Prokuroria thekson rëndësinë e një hetimi të plotë, objektiv dhe profesional për zbardhjen e të gjitha rrethanave të këtij rasti dhe vlerësimin e përgjegjësive eventuale të të gjithë personave të përfshirë. Policia e Kosovës është duke ndërmarrë veprime për lokalizimin dhe arrestimin e personit të dyshuar, i cili ende nuk është arrestuar”, thuhet në njoftim.

 

Continue Reading

Të kërkuara