Lajmet

Ditari: Lajmet kryesore që shënuan datën 31 gusht 1993-1998?

Published

2 months ago

on

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

31 gusht 1993

Arif Krasniqi vdiq në rrethana të pandriçuara në stacionin e policisë në Prizren

Mbrëmë, në rrethana ende të pasqaruara, në stacionin e policisë në Prizren, vdiq Arif (Mehmet) Krasniqi (1951), nga fshati Hatmagjaj i Prizrenit, baba i shtatë fëmijëve, me profesion taksist i kamionit.

Arif Krasniqi, nga policët serbë u arrestua dje, në hyrje të Prizrenit, rreth orës 17,30, derisa po punonte me kamionin e tij.

Sot, në mëngjes, në orën 9,30, Hazër Krasniqi, i afërm i të ndjerit, në organet e punëve të brendshme të Prizrenit, u njoftua nga një inspektor serb se Arifi kishte vdekur dhe se kufoma e tij gjendej në morgun e Spitalit të Prizrenit.

Qendrës për Informim të Kosovës, Hazër Kransiqi sot i tha se kufoma e të ndjerit ende po qëndron në morgun e Spitalit, ku gjoja po bëhet obduksioni.

Hazër Krasniqi po ashtu deklaroi se Arif Krasniqi nuk kishte kurrfarë shenja të ndonjë sëmundjeje dhe ai dje, sikur edhe ditëve të mëparshme, kishte dalë për të punuar me kamionin e tij. Para se ta arrestonte policia, Arif Krasniqi kishte kryer një punë taksie në drejtim të Zhurit, ndërsa u arrestua gjatë kthimit për në Prizren.

Disa dëshmitarë kanë theksuar se policët arrestimin e kishin arsyetuar me një aksident trafiku, që gjoja e kishte shkaktuar Arifi në afërsi të Zhurit. Më vonë, meqë u vërejt se ai nuk kishte kurrfarë lidhjeje me aksidentin, policia nga Arifi kërkoi armë.

Policia serbe deri më tash nuk dha kurrfarë sqarimesh se në çfarë rrethanash vdiq Arif (Mehmet) Krasniqi në stacionin e policisë.

Arif Krasniqi ëshë viktima e njëmbëdhjetë shqiptare gjatë këtyre muajve të këtij viti nga policia serbe në Kosovë.

 

31 gusht 1994

Represioni në Kosovë

Prishtinë: – Sot, me pretekst të kërkimit të armëve, në rrugën “Prilepi” në Prishtinë, policia bastisi famijen e Namon Canollit. Njoftohet se u rrah kryefamiljari dhe tre djemtë e tij. Janë demoluar dyer dhe dritare të shtëpisë dhe porta e oborrit.

Më 29 gusht, me pretekst të kërkimit të armëve, policia thirri në stacion Qamil Musliun (29) nga lagja e Spitalit. Pasi Qamili mohoi se ka armë, atë e futën në një zyrë, e zhveshën, i hodhën ujë të ftohtë dhe pastaj e rrahën, duke e goditur kokës, në vesh, fytyrës, ndërsa me shkopinj e goditën shpinës, këmbëve e duarve, dhe në fund, me shkop pingul e goditën barkut derisa u alivanos. Pas tri orë rrahje e torture e nxorën në rrugë në gjendje gjysmë të alivanosur.

Më 28.8.1994, në fshatin Sofali, afër Prishtinës, një lopë e pronarit Mehedin Aliu, ka hyrë në luadhin e një serbi, i quajtur Miroslav. Ky e merr lopën dhe e mbanë 48 orë të ngujuar. Të nesërmen Miroslavi ia dërgon Mehedinit lopën dhe i thotë se të kam paraqitur në polici. Milicët serbë e morën Mehedinin në ora 7 të mëngjesit dhe e mbajtën deri në orët e pasditës, duke i kërkuar armë. Pastaj ia kontrolluan shtëpinë e vëllaut të tij, Shekfiut me ç’rast ia orën një pushkë të gjuetisë me leje. Gjatë kësaj bastisje, policia rrahu edhe djalin e Mehedinit, Bekimin. Në fund policia kërkoi nga Mehedini që t’i sjellë djemtë në stacionin e policisë.

Podujevë: – Dje policia, me pretekst të kërkimit të armëve, shkoi në shtëpinë e Nexhmi Balës, drejtor i Qendrës së Kulturës dhe ish-i burgosur politik. Nexhmiu nuk gjendej në shtëpi, ndërsa policia ia la thirrjen që të paraqitet në stacionin e policisë.

Malishevë: – Më 24 gusht, duke u kthyer në shtëpi, u rrah brutalisht Valon J.Gashi, nxënës i shkollës së mesme, nga Kieva. kohë më parë policia serbe ka ndërhyrë edhe në oborrin e shkollës fillore “Bajram Curri” në Drenoc  dhe në oborrin e gjimnazit “Abdyl Frashëri”, ku janë rrahur nxënës dhe arsimtarë. Ndërsa, në Drenoc policia shtiu me armë zjarri në drejtim të nxënësve, anipse ata luanin në oborrin e shkollës së tyre. Në Malishevë policia rrahu edhe nuhi Mazrekun.

Më 30 gusht, me pretekst të kërkimit të armëve, policia bastisi shtëpinë e Haki Krasniqit në fshatin Carrallukë. PO atë ditë u bastis edhe shtëpia e Rrahman Krasniqit. Policia rrahu vëllanë e tij, Sinanin (18).

Prizren: – Më 28 gusht, rreth orës 19, policia mori para shtëpisë së tij Ilir Kraniqin, në rrugën “Imer Kasëmi” nr.60. Ky i ri 19-vjeçar, i nacionalitetit rom, u dërgua në kazermën ushtarake serbe në Prizren dhe u torturua nga policia ushtarake.

Mitrovicë: – Me pretekst të kërkimit të armëve, pardje, u bastis shtëpia e Beshir Aliut në fshatit Koshtovë e Gashit. Policia nuk gjeti armë, por mori në stacionin e Mitrovicës Beshirin, të cilin e liroi pas një ore.

Sot, në lagjen Ura e Gjakut, gjashtë policë shkuan në shtëpinë e Sylejman Halilit nga i cili kërkuan një revole. Ai mohoi se ka armë. Policia pastaj e rrahu në praninë e anëtarëve të familjes. Sylejman Halilin e morën edhe në stacionin e policisë dhe e rrahën derisa u alivanos. Njoftohet se policia ka shkaktuar dëme materiale në këtë familje 7-anëtarëshe.

Sot, në po këtë lagje, u bastis edhe shtëpia e Agim Ramës me pretekst të kërkimit të armëve. Policia nuk gjeti armë, ndërsa Agimin e rrahu në praninë e fëmijëve të tij deri në alivanosje. Derisa ishte i alivanosur, policia iu kërcënua nënës së tij se derisa të dorëzojë armën ai do të rrahet në këtë mënyrë.

Suharekë: – Dje, rreth orës 6 të mëngjesit, policia e arrestoi Sejdi Bytyçin nga fshati Nishor për shkak të një dënimi të para pesë vjetëve rreth refuzimit të shërbimit ushtarak. Ai ishte dënuar atëherë me 1 vjet burg. Familja e tij nuk di se ku është dërguar Sejdiu.

Ferizaj: – Para dy ditësh inspektori i policisë serbe Nebojsha Gjorgjeviq nga Nerodima shkoi në punëtorinë e Adem Sejdiut, kryetar i Nëndegës së LDK-së në fshatin Gaçkë dhe i tha se do ta arrestojë, por për shkak se në lokal kishte shumë palë, policia e urdhëroi atë që të paraqitet në polici më 31 gusht, në orën 9.

Dje, rreth orës 15, policia shkoi në shtëpinë e Hyzri Sejdiut dhe e mori në pyetje, gjoja të rastësishme, babain e tij.

 

 

31 gusht 1995

NATO vazhdon bombardimet në Bosnjë

Tridhjetë e tetë orë pas lansimit të operacionit kundër pozicioneve të serbëve të Bosnjës, edhe sot në mëngjes (31 gusht), avionët e NATO-s po vazhdojnë me bombardimin e pikave strategjike të serbëve të Bosnjës, të cilët po refuzojnë të respektojnë kërkesat e OKB-së, njofton agjencia Rojter nga Sarajeva.

Sipa agjencive Rojter e AFP, OKB-ja kërkon që serbët e Bosnjës të tërheqin të gjitha armët e rënda nga Zona e Sigurisë – 20 kilometra rreth Sarajevës, të pranojnë hapjen e bisedimeve për armëpushim dhe të ndërprejnë sulmet kundër “zonave të sigurisë” -Gorazhdë e Tuzëll.

Sipas agjencive të lartëpërmendura, komandanti i forcave të serbëve të Bosnjës, gjenerali Ratko Mlladiq, refuzoi mbrëmë të respektojë këto tri kushte të OKB-së.

Sipas burimeve të NATO-s, deri dje pasdite avionët e NATO-s kanë bërë më shumë se 200 “dalje” të grupuara në katër “valë sulmesh” kundër pozicioneve të serbëve të Bosnjës, në sektorët e Sarajevës, Pales e Tuzllës.

Sipas agjencisë Rojter që bazohet në burimet e Pentagonit, bombardimet e avionëve të NATO-s dhe të artilerisë së Forcës së Reagimit të Shpejtë (FRR), kanë dëmtuar dhe shkatërruar “një numër substancial të objektivave”, që nënkupton depot e municionit, telekomunikimin (komandën dhe kontrollin) armët e rënda etj.

Ndërsa përfaqësuesit e UNPROFOR-it kanë deklaruar dje, se është ende herët, për të bërë një bilanc të objektivëve të qëlluar prej fillimit të bombardimeve.

AFP nga Sarajeva njofton se dje pasdite, bateritë antiajrore të serbëve të Bosnjës kanë rrëzuar një avion “Mirazh 2000”.

Mbrëmë në ditarin televiziv të programit TF 1, ministri francez i Mbrojtjes Sharl Mion, deklaroi se piloti dhe navigatori i avionit të rrëzuar francez, e kanë lëshuar avionin para rrëzimit dhe nuk dimë më tepër për fatin e tyre.

Sipas burimeve të UNPROFOR-it nga Zagrebi, pesë observatorë të Unionit Evropian (tre spanjollë, një irlandez dhe një holandez) janë vrarë gjatë bombardimeve.

Agjencia AFP njofton gjithashtu se presidenti i Shqipërisë, Sali Berisha aprovoi dje intervenimin masiv të aviacionit të NATO-s, kundër forcave të serbëve të Bosnjës.

 

Dje ra borë në Luboten

Luboteni, maja më e lartë në malet e Sharrit gdhiu e mbuluar me borë në mëngjesin e djeshëm. Kjo është e pazakonshme për muajin gusht.

Pas motit me shi dje ra borë edhe në bjeshkët e komunës së Dragashit.

 

 31 gusht 1998

Në Duhël e Semetisht të Suharekës forcat serbe kanë masakruar edhe dy shqiptarë

Më 24 gusht të këtij viti në fshatin Duhël, forcat serbe kanë vrarë e masakruar Ilir Jemin Perteshin (21) nga Duhla, i cili ende nuk është varrosur, pasi është vështirë të depërtohet nga forcat serbe deri në vendin ku i ndjeri është vrarë, bën të ditur KI i Degës së LDK-së në Suharekë.

Njoftohet se në vendin ku është vrarë Iliri, ka edhe shqiptarë të tjerë të vrarë nga forcat serbe.

Ndërkaq më 26 gusht në fshatin Semetisht, forcat serbe kanë masakruar edhe të sëmurin mental Izet Bytyçin (45). Njoftohet se gjatë kohës derisa banorët e Semetishtit po evakuoheshin nga granatimet serbe, qytetarët shqiptarë i kanë dëgjuar të klithurat e tij derisa po masakrohej nga forcat serbe.

 

Shtime: Deri tash forcat serbe kanë vrarë 2 shqiptarë dhe kanë djegur 465 shtëpi shqiptare

Nga 14 qershori e deri në ditën e sotme, forcat policore, ushtarake e paramilitare serbe ndërmorën ofensivën në këto fshatra të Shtimes, Carralevë, Zborc, Reçak, Petrovë, Mollopolc, Pjetërshticë, Belincë, Zukë, Karaçicë, Racë e Petrovë të Re, njofton KI i Degës së LDK-së në Shtime.

Deri tash në këtë komunë forcat serbe kanë vrarë 20 shqiptarë, 11 prej të tyre të familjes Selim Asllani nga Ranca. Njoftohet se prej tyre 7 janë fëmijë, 4 nxënës, 3 gra dhe 6 burra. Ndërkaq, në këtë komunë numri i të plagosurve shqiptarë nga forcat serbe arrinë në 23 veta, ndërsa janë arrestuar 3 shqiptarë dhe 4 të tjerë janë zhdukur, për fatin e të cilëve ende nuk dihet asgjë.

Bëhet e ditur se në komunën e Shtimes, forcat serbe deri tash kanë djegur 465 shtëpi, ndërsa numri i shqiptarëve të zhvendosur arrinë në 11. 750 veta, të cilët vazhdojnë të jetojnë nën qiellin e hapur. Njoftohet se një numër i këtyre banorëve është vendosur në komunën e Ferizajt dhe të Lipjanit.

Gjendja humanitare në këtë komunë është shumë e rëndë, pasi ndihet nevojë e madhe për ushqim, shtrojë, mbulojë, veshëmbathje e mjete të tjera higjienike.

 

Foto: Fshati Duhël, Suharekë

Related Topics:
Continue Reading

Vendi

Qeveria prezanton projektbuxhetin për vitin 2027, parashihen 4.27 miliardë euro

Published

3 hours ago

on

November 2, 2026

By

Qeveria e Kosovës ka prezantuar projektbuxhetin për vitin 2027, i cili kap vlerën e 4.27 miliardë eurove.

Kryeministri Albin Kurti bëri të ditur se projektbuxheti i vitit të ardhshëm është 200 milionë euro më i lartë se buxheti i rishikuar për vitin 2026 dhe 300 milionë euro më i lartë se buxheti fillestar i këtij viti.

Nga shuma e përgjithshme, 908 milionë euro parashihen të ndahen si financim i drejtpërdrejtë për komunat e Kosovës.

Gjatë prezantimit, Kurti tha se rritja e vazhdueshme ekonomike ka ndikuar në zgjerimin e buxhetit dhe në qëndrueshmërinë e financave publike.

Sipas tij, ekonomia e Kosovës ka shënuar rritje prej 5.4 për qind në tremujorin e parë dhe 4.1 për qind në tremujorin e dytë të këtij viti.

“Kjo na vendos te vendet me rritjen më të shpejtë në rajon dhe më gjerë. Kjo nënkupton edhe rritjen në vazhdimësi të buxhetit dhe qëndrueshmërinë e financave publike”, deklaroi Kurti.

Kryeministri bëri të ditur gjithashtu se, sipas projektbuxhetit për vitin 2027, Administrata Tatimore e Kosovës (ATK) parashihet të mbledhë të hyra në vlerë sa 60 për qind e të hyrave që pritet t’i mbledhë Dogana e Kosovës.

Kurti e cilësoi projektbuxhetin si rekord edhe për komunat, duke theksuar se rritja e financimit për pushtetin lokal vjen si rezultat i rritjes së vazhdueshme të granteve qeveritare.

Pas miratimit në Qeveri, projektligji për buxhetin e vitit 2027 pritet t’i procedohet Kuvendit të Kosovës për shqyrtim dhe votim.

/A.K/

Continue Reading

Lajmet

Vrasja e dyfishtë në Demiraj, Prokuroria kërkon paraburgim për të pandehurin B.D.

Published

4 hours ago

on

November 2, 2026

By

Prokuroria Themelore në Gjilan, në bashkëpunim me Policinë e Kosovës, ka kërkuar caktimin e masës së paraburgimit ndaj të pandehurit me inicialet B.D., i dyshuar për kryerjen e veprës penale “Vrasje e rëndë”.

Sipas njoftimit zyrtar, ngjarja e rëndë ka ndodhur më 1 nëntor 2026, rreth orës 9:00 të mëngjesit në fshatin Demiraj të Komunës së Gjilanit. Viktimë të këtij meksuesi kanë mbetur vajza e tij A.D., 27 vjeçe, si dhe mbesa e tij D.D., foshnje vetëm tre muajsh. I dyshuari B.D. është ndaluar menjëherë për 48 orë me urdhër të prokurorit kujdestar.

“Më 01.11.2026, në fshatin Demiraj, Komuna e Gjilanit, ka ndodhur një rast Vrasje e rëndë, ku viktimë janë A.D (27 vjeç) dhe D.D. (foshnje 3 muajsh), ku i dyshuari B.D, babai i viktimës A.D, është ndaluar për 48 orë nën dyshimin për kryerjen e veprës penale ‘Vrasje e rëndë’”, thuhet në njoftim.

Kërkesa për caktimin e masës së paraburgimit i është dorëzuar sot Departamentit për Krime të Rënda në Gjykatën Themelore në Gjilan. Organet e hetimit bëjnë me dije se në vendin e ngjarjes kanë dalë të gjitha ekipet relevante policore dhe prokurori i rastit për mbledhjen e provave.

Në komunikaturën për media, Prokuroria nëntrimon angazhimin e saj për zbardhjen e tërësishme të tragjedisë:

“Prokuroria Themelore në Gjilan, në koordinim me Policinë e Republikës së Kosovës, ka ndërmarrë dhe do të ndërmarrë të gjitha veprimet hetimore, me qëllim të ndriçimit të plotë dhe të drejtë të gjendjes faktike.” /E.A/

Continue Reading

lajme

AUV ndalon hyrjen e mbi 1 ton patatinave me përmbajtje të rrezikshme

Published

4 hours ago

on

November 2, 2026

By

Agjencia e Ushqimit dhe Veterinarisë ka ndaluar hyrjen në Kosovë të 1,068 kilogramëve patatina “STIZA Potato Chips Paprika”, pas analizave laboratorike që konstatuan nivel të lartë të akrilamidit mbi vlerat e lejuara.

Ngarkesa me LOT 909073, e importuar nga kompania “BEST BT” nga Prizreni, është bllokuar nga Inspektorati Fitosanitar Kufitar dhe është vendosur kthimi i saj prapa, duke parandaluar hyrjen në tregun vendas.

Sipas AUV-së dhe Autoritetit Evropian për Sigurinë Ushqimore, ekspozimi afatgjatë ndaj kësaj substance kimike përbën rrezik për shëndetin publik për shkak të potencialit të saj kancerogjen. /E.A/

Continue Reading

Lajmet

REL: Nga Gjermania në Shqipëri, çfarë po i nxjerr të rinjtë në rrugë?

Published

4 hours ago

on

November 2, 2026

By

Kostoja e jetesës, mungesa e mundësive ekonomike, problemet në arsim dhe pakënaqësitë me qeveritë kanë nxjerrë mijëra të rinj në rrugët e qyteteve evropiane.

Nga Gjermania e Franca deri në Belgjikë dhe Shqipëri, protestat kanë kërkesa të ndryshme, por pasqyrojnë shqetësime të ngjashme për kushtet e jetesës dhe perspektivën e brezit të ri.

Protestat në disa vende janë shoqëruar me përleshje me policinë, dëmtime pronash dhe arrestime.

Çfarë ndodhi në Gjermani?

Më 31 tetor, rreth 120 mijë njerëz morën pjesë në protesta në më shumë se 30 qytete gjermane, sipas organizatorëve të nismës rinore “Gen Z regelt”.

Demonstruesit kërkuan më shumë investime në arsim, strehim të përballueshëm, drejtësi sociale dhe mbrojtje të klimës.

Ata kundërshtuan, gjithashtu, mundësinë e rikthimit të shërbimit të detyrueshëm ushtarak.

Protestat ishin kryesisht paqësore gjatë ditës, por më vonë u shoqëruan me incidente të dhunshme në disa qytete, përfshirë Berlinin, Frankfurtin, Këlnin dhe Hamburgun.

Në Frankfurt, persona të maskuar hodhën gurë dhe mjete ndezëse drejt policisë, ndërsa disa dyqane u dëmtuan dhe u plaçkitën.

Policia përdori topa uji dhe sprej irritues.

Organizatorët e protestave u distancuan nga dhuna, duke theksuar se demonstratat synonin të ishin paqësore.

Incidentet nxitën mospajtime brenda Qeverisë gjermane.

Ministri i Brendshëm, Alexander Dobrindt, fajësoi grupet e dhunshme të së majtës ekstreme dhe persona nga komunitetet migrante.

Ministrja e Arsimit, Karin Prien, tha se trazirat ngrenë pyetje për integrimin e migrantëve, duke kërkuar shqyrtimin e shkaqeve që mund t’i shtyjnë disa njerëz drejt dhunës.

Por, ministri i Mbrojtjes, Boris Pistorius, u distancua nga deklaratat e Dobrindtit, duke vënë në pikëpyetje përdorimin e termit “grupe migrante”.

Ai pyeti nëse ky përkufizim përfshin edhe shtetas gjermanë, familjet e të cilëve jetojnë në këtë vend me gjenerata, dhe tha se nuk kishte informacion të mjaftueshëm për të konfirmuar pretendimet mbi prejardhjen e autorëve të dhunës.

Prien, ndërkohë, pranoi se shumë nga kritikat e të rinjve për arsimin janë të arsyeshme, duke theksuar se mundësitë arsimore në Gjermani vazhdojnë të varen shumë nga prejardhja sociale.

Pse po protestojnë të rinjtë në Francë?

Në Francë, protestat nisën në mesin e shtatorit, në periferi të Parisit, për shkak të mungesës së mësimdhënësve dhe kushteve të dobëta në shkolla.

Pakënaqësitë u përhapën në qytete të tjera dhe u zgjeruan te kostoja e jetesës, pabarazitë sociale dhe gjendja e shërbimeve publike. Nxënësve dhe studentëve iu bashkuan edhe mësimdhënës, sindikata dhe qytetarë të tjerë.

Protestat janë shoqëruar me përleshje me policinë, dëmtime pronash dhe mijëra arrestime.

Ndërhyrjet e forcave të rendit kanë nxitur gjithashtu kritika, sidomos pas lëndimit të rëndë të disa protestuesve të mitur.

Më 31 tetor, rreth 320 mijë njerëz dolën në rrugë në mbarë Francën, sipas autoriteteve, ndërsa organizatorët raportuan rreth 500 mijë pjesëmarrës.

Në Paris, disa protestues hodhën gurë dhe mjete ndezëse drejt policisë.

Autoritetet raportuan 565 arrestime në nivel kombëtar, ndërsa prokuroria nisi hetime për tentativë vrasjeje pas sulmeve me mjete ndezëse ndaj forcave të sigurisë.

Më 2 nëntor, pas një pushimi dyjavor, nxënësit rifilluan bllokimin e shkollave, por në përmasa më të vogla.

Sipas Ministrisë së Arsimit, 41 shkolla u bllokuan ose u përballën me përpjekje për bllokim, krahasuar me qindra të tilla para pushimit.

Qeveria franceze ka propozuar katër miliardë euro për rinovimin e shkollave, kufizimin e numrit të nxënësve në klasa në 28, hapjen e 15 mijë vendeve të reja në arsimin e lartë dhe reformimin e sistemit të pranimit në universitete deri më 2028.

Por, përfaqësuesit e nxënësve dhe studentëve i konsiderojnë masat të pamjaftueshme dhe kanë paralajmëruar vazhdimin e protestave.

Çfarë po kërkojnë të rinjtë në Belgjikë?

Në Belgjikë, studentët po protestojnë kundër rritjes së kostos së arsimit, mbipopullimit të klasave dhe reformave që, sipas tyre, mund ta vështirësojnë qasjen në studimet e larta.

Një nga shqetësimet kryesore është rritja e tarifave universitare nga 835 në 1.194 euro për shumicën e studentëve në komunitetin frëngjishtfolës të vendit.

Protestat, të frymëzuara pjesërisht nga lëvizja në Francën fqinje, janë shoqëruar me përleshje me policinë, dëmtime pronash dhe arrestime.

Në fillim të tetorit, në qytetin e Liezhit u raportuan mbi 100 ndalime dhe arrestime gjatë trazirave.

Më 9 tetor, studentët iu bashkuan një demonstrate më të gjerë në Bruksel kundër masave buxhetore të Qeverisë. Rreth 30 mijë njerëz morën pjesë në marshim, ndërsa përleshjet me policinë përfunduan me 21 persona të ndaluar ose arrestuar.

Incidentet vazhduan edhe më 17 tetor, kur policia përdori gaz lotsjellës dhe topa uji për të shpërndarë protestuesit në Bruksel.

Përtej dhunës, studentët thonë se shqetësimet e tyre nuk janë marrë seriozisht nga autoritetet.

Maya Gourdel, një nxënëse 19-vjeçare në Bruksel, i tha agjencisë Reuters se përpjekjet e mëparshme për t’u dëgjuar në mënyrë paqësore nuk kishin tërhequr vëmendje.

“U përpoqëm ta bënim në mënyrë paqësore. Askush nuk na dëgjoi”, tha ajo, duke shtuar se mediat filluan t’u kushtonin vëmendje vetëm pasi nisën incidentet.

Si u përshkallëzuan protestat në Shqipëri?

Në Shqipëri, protestat kundër Qeverisë së kryeministrit Edi Rama kanë kaluar nga kundërshtimi i një projekti turistik në një lëvizje më të gjerë, të udhëhequr nga të rinjtë, që kërkon ndryshime politike dhe ekonomike.

Demonstratat nisën në maj, fillimisht kundër një projekti turistik luksoz në bregdetin jugor, të mbështetur nga investitorë që përfshijnë Jared Kushnerin, dhëndrin e presidentit amerikan, Donald Trump. Projekti është përballur me kundërshtime dhe konteste ligjore.

Në mesin e tetorit, protestat u përshkallëzuan, ndërsa nxënës dhe studentë dolën në rrugë për të kërkuar arsim më cilësor, ulje të kostos së studimeve dhe më shumë mundësi punësimi.

Pakënaqësitë u zgjeruan edhe te korrupsioni i pretenduar dhe mungesa e besimit ndaj institucioneve.

 

Protestat u përhapën nga Tirana në qytete të tjera, përfshirë Shkodrën, Lezhën, Elbasanin dhe Korçën, ndërsa disa demonstrata u shoqëruan me përleshje të dhunshme.

Në kryeqytet, protestues hodhën gurë dhe mjete ndezëse drejt policisë, u vunë flakën ndërtesave qeveritare dhe dëmtuan banka e biznese. Policia përdori gaz lotsjellës, topa uji dhe plumba gome.

Tensionet vazhduan edhe fundjavën që shkoi, kur persona të maskuar hodhën gurë dhe bomba ndezëse drejt policisë pranë Ministrisë së Arsimit në Tiranë.

Qeveria ka paralajmëruar gjoba deri në 5.500 euro për pjesëmarrësit që ushtrojnë dhunë.

Rama ka dënuar incidentet dhe ka refuzuar të japë dorëheqje, duke theksuar se qeveritë ndryshohen përmes zgjedhjeve demokratike.

A mund të sjellin ndryshime?

Serbia është shembulli më i fundit se si një lëvizje studentore mund të shndërrohet në forcë politike.

Pas gati dy vjetësh protestash kundër korrupsionit dhe kërkesash për përgjegjësi institucionale, lista e mbështetur nga studentët fitoi zgjedhjet parlamentare të 25 tetorit, duke i dhënë fund qeverisjes 14-vjeçare të partisë së Aleksandar Vuçiqit.

Por, fitorja zgjedhore nuk garanton se kërkesat e protestuesve do të përmbushen. Lëvizja studentore në Serbi ende përballet me sfidën e formimit të qeverisë dhe zbatimit të reformave të premtuara.

Në vendet e tjera evropiane, rezultatet e mobilizimit mbeten të paqarta.

Qeveritë po përballen me presion për t’iu përgjigjur kërkesave të të rinjve, ndërsa incidentet e dhunshme kanë hapur debate për kufijtë e ndërhyrjes policore dhe mbrojtjen e së drejtës për protestë paqësore.

Nëse protestat do të sjellin ndryshime të qëndrueshme, do të varet jo vetëm nga sa gjatë do të vazhdojnë, por edhe nga aftësia e lëvizjeve për t’i shndërruar kërkesat e tyre në rezultate konkrete. /REL/

Continue Reading

Të kërkuara