Lajmet

Ditari: Lajmet kryesore që shënuan datën 3 qershor 1993-1998?

Published

3 weeks ago

on

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

Foto: Zëdhënësi i Shtëpisë së Bardhë, Nikolas Bërns

3 qershor 1994

Represioni në Kosovë

Skënderaj: – Dje rreth orës 16:00, policia mori në pyetje plakun 65 vjeçar, Hamit Jasharin nga Prekazi i Ulët i Skënderajt. Inspektorët serbë nga Hamit Jashari u interesuan gjoja të dinë rreth Sokol Rexhepit nga fshati Mikushnicë, i cili para pak ditësh u plagos në rrethana ende të panjohura.

Bëhet me dije se që nga viti 1991, Hamit Jashari dhjetëra herë u mor në pyetje dhe u keqtrajtua nga ana e policisë.

Prishtinë: – Më 31 maj policia serbe e mori në vendin e punës në Obiliq, Maliq Brajshorin dhe e mbajti rreth tri orë. Pastaj me te shkoi në shtëpinë e tij, në rrugën “Jabllanica” në lagjen Kodra e Trimave në Prishtinë dhe ia morën një revole.

Vushtrri: – Më 30 maj rreth orës 17:00, policia nën pretekst të kërkimit të armëve bastisi shtëpitë e Ragip Beqirit dhe ato të Bislim dhe Habib Krasniqit në fshatin Begaj të Vushtrrisë. Pas bastisjes, personave të lartëshënuar policia ua la thirrjet që të paraqiten në stacionin e policisë në Vushtrri. Njoftohet gjithashtu se policia tre ditë rresht torturoi Ragip Beqirin, nën pretekst se ai poseduaka me një pushkë dhe një revole.

Ferizaj: – Më 31 maj, policia mori në pyetje Shemsi Ryshën nga Varoshi i Ferizajt. Inspektorët serbë u interesuan të dinë nga Shemsiu për djalin e tij Selajdin Ryshën, për të cilin dyshohet se ka ikur nga shërbimi ushtarak.

Mitrovicë: – Dje rreth orës 11:00, policia bastisi shtëpinë e Xhelal Tahirit në lagjen “Tavnik” të Mitrovicës, me ç’rast në shtëpinë e tij policia plaçkiti mall me vlerë prej rreth 2 mijë markash gjermane.

Sot rreth orës 7:00, të mëngjesit, policia ndali autobusin e “Sion-toursit”, pronë e Behxhet Osmanit nga fshati Bare. Në autobus ishin disa arsimtarë, të cilët çdo ditë udhëtojnë falas me autobusin e “Sion-toursit”, të cilët mbajnë mësim në shkollat e fshatrave të Shalës së Bajgorës.

Pasi policët janë të njoftuar se transporti i arsimtarëve është falas, ata zbritën arsimtarët, autobusit ia hoqën tabelat dhe nuk e lejuan që të vazhdojë udhëtimin.

 

3 qershor 1995

Koment i “Bujkut” për përfundimin e vitit shkollor për maturantët e shtëpive-shkolla

Këto ditë, mbi 15 mijë maturantë shqiptarë në Kosovë me sukes i përfunduan mësimet në shkollën e mesme, thuhet në një vështrim të gazetës “Bujku” me titull “Maturimi i politikës shqiptare”.

Është kjo gjenerata e parë e shkollarëve tanë që diplomon jashtë objekteve të shkollave tona të okupuara, përkatësisht që mësimet i ka ndjekur 4 vjet rresht në shtëpi private, në shtëpitë e popullit. Është ky rast që me gjithë zemër të përgëzohen të gjithë së bashku, nxënës e arsimtarë, për suksesin e arritur, me përpjekje të jashtëzakonshme e në kushte tepër të vështira, ku, për shembull, në vend të bangës nganjëherë ishin vendosur dërrasa të thjeshta, në vend të karrigeve nxënësit detyroheshin të uleshin në tulla, në vend të kabineteve nganjëherë “eksperimentet” kryheshin edhe në dërrasë të zezë, në vend të teksteve shkollore shpesh mësimet shënoheshin në fletore, në vend të të ardhurave personale nganjëherë arsimtarët merrnin ndihma nga “Nëna Tereze”, në vend të përkrahjes, shumë shpesh, nxënës e arsimtarë, hanin dajak prej milicisë…

Ishte kjo një punë e madhe, një sakrificë e madhe, për një çështje të madhe.

Por, që në filim të mos i harrojmë edhe njerëzit tanë me zemër të madhe, ata të cilët i hapën hapekrah dyert e shtëpive të tyre, për nxënësit tanë, për fëmijët e tyre, pa llogaritur rrezikun që vinte nga milicia, as dëmin që u bëhej shtëpive të tyre. Ata i dolën krah arsimit, por në fakt i dolën krah shtetit të vetë, i cili veç sa ka filluar t’i bëjë hapat e parë, hapat e fëmijës.

Edhe një gjë: Suksesi i arritur s’ka dilemë se është dëshmi e lidhmërisë së fortë të popullit tonë me arsimin, e vitalitetit, aftësisë, gatishmërisë për sakrificë dhe e dashurisë së tij tepër të madhe për dritën e dijes. Njëkohësisht, kjo është dëshmi e vendosmërisë së politikës shqiptare që po udhëhiqet në Kosovë për të çuar në vend vullnetin e popullit për arsim, për liri dhe pavarësi. Në fakt është “maturim” i politikës shqiptare në Kosovë, thuhet në vështrimin e Qemal Aliut në gazetën “Bujku”.

 

3 qershor 1997

  1. Bërns: Për të mbajtur marrëdhënie diplomatike me palën shqiptare do ta ftojmë dr. Rugovën në Uashington

Në një intervistë dhënë të përditshmes së Beogradit “Blic”, zëdhënësi i Shtëpisë së Bardhë, Nikolas Bërns, u përgjigj në disa pyetje lidhur me Kosovën dhe vizitën e fundit të Medlin Olbrajtit në Beograd.

Në pyetjen se çka mendon për murin e jashtëm të sanksioneve dhe nëse ky mur gjatë muajve të fundit është bërë më i hollë, Bërns tha:

– Jo, kurrsesi nuk po bëhet më i hollë, ai mund të bëhet më i trashë. Mendoj se nuk ekzistojnë gjasat reale që muri i jashtëm i sanksioneve të hiqet shpejt sepse kryetari Millosheviq nuk ka ofruar asnjë fije shprese se situata në Serbi do të përmirësohet. Problemi i Kosovës ka mbetur i pazgjidhur, bashkëpunimi me Tribunalin e Hagës pothuajse nuk ekziston, kurse për demokracinë në këtë vend as të mos flas. Jemi të zhgënjyer, sepse kriminelët e luftës ende shëtisin të lirë dhe se dialogu në Kosovë ndërmjet përfaqësuesit të shqiptarëve të Kosovës dr. Ibrahim Rugova, dhe palës serbe nuk ekziston.

Duke u përgjigjur në pyetjen se sa është e informuar bota për situatën në Kosovë, Bërns tha:

– Ne kemi hapur kabinetin në Prishtinë, sepse konsiderojmë se kjo ka qenë e nevojshme në mënyrë që qeveritë dhe mediat e bashkësisë ndërkombëtare të mund të përcjellin me vëmendje ngjarjet në atë rajon. Nëpërmjet neve, qeveritë e vendeve të tjera marrin informacione për situatën në media, për jetën politike dhe për respektimin e të drejtave njerëzore. Për të mbajtur marrëdhënie diplomatike me palën shqiptare, kemi planifikuar ta ftojmë dr. Ibrahim Rugovën në një takim me sekretaren Medlin Olbrajt, tha mes tjerash në këtë intervistë zëdhënësi i Shtëpisë së Bardhë.

 

3 qershor 1998

Gjendje dramatike në Deçan e rrethinë – vendbanime të tëra të shkatërruara, qindra të plagosur, nuk dihet numri i të vrarëve

Edhe gjatë natës së mbrëmshme, nga baza ushtarake në Hulaj dhe nga “Podi i Gështenjave” herë pas here u dëgjuan granatime të fuqishme në drejtim të fshatrave të sulmuara.

KMDLNJ, duke iu referuar bashkëpunëtorit të vet Musa Berisha në Deçan, njofton se sot, më 3 qershor, gjendja është tejet dramatike. Dhjetëra mijëra banorë, të mbetur pa kulm mbi kokë, kanë mbetur rrugëve dhe livadheve të kësaj komune, ndërsa dhjetëra e mijëra të tjerë, kryesisht gra, fëmijë e pleq, janë nisur në drejtim të maleve të Shqipërisë dhe në drejtim të Pejës e të Gjakovës.

Në njoftim thuhet se populli i kësaj ane dhe UÇK me sukses po u bëjnë ballë sulmeve serbe.

Kanë mbetur vetëm banorët e nja 10 fshatrave, të cilët gjithashtu janë në ikje. Gjendja e të ikurve është dramatike, sikurse edhe e atyre që kanë mbetur këtu.

Nga ekipet mjekësore të këtij rajoni njoftohet sot në mëngjes se nuk ka as asnjë injeksion për të sëmurët e të plagosurit. Ndërkaq numri i viktimave të këtij terrori, që kanë mbetur nën gërmadhat e Deçanit dhe të fshatrave ët tij, që janë rrafshuar me tokë, dyshohet të jetë shumë i madh.

Sot u njoftua se vetëm në një punkt shëndetësor ka pasur 145 të plagosur, shumica e tyre gra, fëmijë, të plagosur gjatë granatimeve të ditëve të kaluara.

Sot, sërish, që nga ora 10, kanë filluar granatimet e fuqishme. Forcat ushtarake e policore serbe nga armët e rënda luftarake po shtijnë në drejtim të të gjitha fshatrave të kësaj komune, shumica nga të cilat kanë mbetur vetëm si nocione. Ndërsa dje janë përdorur edhe raketat shumëtytëshe – kaqusha, njofton KMDLNJ.

Burimet tjera njoftojnë se forcat serbe kanë përdorur edhe helikopterët e aeroplanët në sulmet e tyre kundër vendbanimeve të Deçanit.

 

Mbrëmë në Tropojë janë vendosur mbi 2500 shqiptarë nga zonat e rrezikuara të Deçanit

Vetëm gjatë natës së mbrëmshme nga zonat e rrezikuara të Deçanit dhe fshatrave përreth në Tropojë të Shqipërisë janë vendosur mbi 2500 shqiptarë, thuhej në një njoftim të emetuar sot në “Zërin e Amerikës”. Në këtë njoftim theksohej se gjendja e tyre shpirtrore ishte tepër e rëndë dhe se gjatë rrugëtimit të mundimshëm kishin vdekur pesë fëmijë.

Dje afër Deçanit një polic është vrarë dhe tre të tjerë janë plagosur

Në përleshjet e djeshme afër Deçanit midis policisë serbe dhe grupeve të armatosura shqiptare një polic është vrarë dhe tre të tjerë janë plagosur, njofton agjencia Beta. “Përleshjet kanë ndodhur kur grupet shqiptare disa herë me armë automatike dhe me minahedhës sulmuan punktet dhe kolonat e policisë”, thekson kjo agjenci.

Burimet serbe nuk njoftojnë nëse ka pasur të vrarë dhe të plagosur në mesin e shqiptarëve.

 

Me tanke e artileri bombardohen disa fshatra të Gjakovës

Njoftohet se qysh mbrëmë fshatrat e Rekës së Keqe, në brezin kufitar Kosovë-Shqipëri, të komunës së Gjakovës po granatohen pa ndërprerë nga ushtria dhe paramilitarët serbë. Tashmë shumë fshatra janë shndërruar në gërmadha. Në këto sulme po përdoren armë të rënda artilerike të ushtrisë serbe nga pozicionet ushtarake të vendosura në Kodrën e Çabratit, Bitesh, Bobaj, Hulaj, Kodra e Pllanikut të Ponoshecit dhe nga pozicione të tjera.

Në këto granatime po përdoren edhe tanke dhe autoblinda që kanë zënë pozicione përgjatë rrugës kryesore të Rekës së Keqë.

Tashmë janë shndërruar në gërmadha fshatrat Ponoshec, Smolicë, Stubëll, Morinë, Brovinë dhe lagje të Junikut. Shtëpitë po plaçkiten, po rrënohen dhe po digjen. Popullsia e kësaj ane po ndiqet nga ushtria serbe në drejtim të Shqipërisë, të cilat po keqtrajtohen në mënyrën më barbare. Supozohet se ka të vrarë, të plagosur edhe të kidnapuar.

Megjithatë, rezistenca e shqiptarëve të mbetur për të mbrojtur trojet e tyre vazhdon me një heroizëm të pashoq, ndërkohë që kërkohen ndihma humanitare për të plagosurit.

Ndërkaq, mbeti e shurdhër thirrja e propagandës serbe (përmes radio “Djakovica”) për t’u mbledhur populli i Rekës së Keqe pranë Palestrës Sportive në Gjakovë se kinse duhet të kthehen në shtëpitë e tyre.

Njofothet se asnjë individ nuk iu përgjigj këtij provokimi dhe skenari të okupatorit.

 

Forcat serbe shtrinë sulmin në Rahovec, po granatohen fshatrat Gradishë, Gexhë e Malësi e Vogël

Sot, forcat e serbe nga drejtimi i Gjakovës me artileri të rëndë po e granatojnë fshatin Gradishë dhe Gexhë e Malësinë e Vogël, njofton KI i Degës së LDK-së në Rahovec.

Sipas disa të dhënave supozohet se në Majën e Gradishit, forcat serbe kanë vendosur fusha të minuara.

Ndërkaq në orën 7:00 të mëngjesit, nga drejtimi i Prizrenit një konvoj i ushtrisë serbe me 20 kamionë shkoi në drejtim të Gjakovës.

 

Fluks i madh i refugjatëve nga Kosova në Mal të Zi

Gjatë dy ditëve të fundit në trevat etnike shqiptare të Malit të Zi është shtuar në masë të konsiderueshme numri i shqiptarëve nga Kosova, pjesa dermuese e të cilëve janë nga zonat e rrezikuara nga agresioni i forcave policore, ushtarake e paraushtarake serbe.

Këshilli për Mbrojtjen e të Drejtave dhe Lirive të Njeriut (KMDLNJ) në Ulqin njofton se Komesariati për Refugjatëve në këtë qytet ka regjistruar 650 shqiptarë të ardhur në Kosova. Shumica e të ikurve janë gra, fëmijë e pleq, por ka edhe të moshave të mesme. Në njoftim thuhet se edhe shumë kosovarë të tjerë, të cilët janë strehuar në Ulqin, nuk janë evidentuar fare, kështuqë besohet se numri i tyre është shumë më i madh.

Banorët e Ulqinit, siç bëhet me dije, po tregojnë ndaj vëllezërve të tyre nga Kosova një solidaritet të pashoq, edhepse ata nuk mund të marrin ndihmat që u takojnë, për shkak se të strehuarit nuk gëzojnë statusin e refugjatëve.

Komisariati komunal i Ulqinit ka kërkuar edhe ndihmën e organizatave humanitare të Malit të Zi dhe të atyre ndërkombëtare, mirëpo kosovarët nuk mund të gëzojnë ndihmat e tyre për shkak se, sipas normave të këtyre organizatave, ata nuk mund të trajtohen si refugjatë. Për fat të keq, të strehuarit në Mal të Zi nuk kanë as kontakte me Këshillin Republikan për Ndihma Emergjente të Kosovës.

Një delegacion i refugjatëve nga Kosova që vizitoi sot Komesariatin komunal të Refugjatëve dhe KMDLNJ në Ulqin, paralajmëroi se në këtë qytet do të themelohet Këshilli i Refugjatëve nga Kosova, i cili do të veprojë për bashkërenditjen e veprimtarisë me këto dy asociacione, në mënyrë që të sigurohet përkujdesje dhe strehim për të gjithë të ikurve nga Kosova. Ata janë angazhuar që të vënë kontakte edhe me Komitetin Shqiptar të Helsinkit në Tiranë, me qëllim të këmbimit të informatave dhe të mundësimit të bashkimit të anëtarëve të familjeve të shkapërderdhura.

Delegacioni i refugjatëve nga Kosova fton organizatat ndërkombëtare humanitare që të ndihmojnë refugjatët nga Kosova që janë strehuar në Mal të Zi, ndërsa nga institucionet dhe organet shtetërore të kësaj republike kërkojnë që t’ua njohin statusin e refugjatëve.

Të gjithë të interesuarit për kosovarët që janë strehuar në Mal të Zi mund të marrin informata në telefaksin e KMDLNJ në Ulqin, 085/82-645.

Related Topics:
Continue Reading

Vendi

Prof. Dr. Halil Krasniqi në United Hospital – ekspert i kirurgjisë vaskulare sjell standarde evropiane në trajtimin shëndetësor në Kosovë

Published

9 hours ago

on

June 23, 2026

By

Në botën moderne të mjekësisë, ku profesionalizmi, inovacioni dhe përkushtimi ndaj pacientit janë vlerat më të çmuara, emri i Dr. Halil Krasniqit zë një vend të veçantë. I njohur si një nga kirurgët shqiptarë më të suksesshëm në Evropë, ai ka ndërtuar një karrierë të jashtëzakonshme në Gjermani, duke u shndërruar në një figurë të respektuar në fushën e kirurgjisë vaskulare dhe endovaskulare.

United Hospital në Prishtinë njofton me kënaqësi ardhjen e një prej emrave më të njohur të kirurgjisë vaskulare dhe endovaskulare në Evropë, Prof. Dr. Halil Krasniqi, i cili do të jetë i pranishëm për konsulta dhe trajtime të specializuara në ambientet e këtij institucioni shëndetësor.

Prof. Dr. Krasniqi, i njohur për përvojën e tij të gjatë klinike dhe kontributin e rëndësishëm në avancimin e kirurgjisë moderne, vjen në Kosovë si një figurë me reputacion ndërkombëtar në fushën e kirurgjisë vaskulare, kirurgjisë endovaskulare, si dhe në trajtimet bashkëkohore diagnostike dhe ndërhyrëse.

Gjatë qëndrimit të tij në United Hospital, nga data 19.07.2026 deri më 22.07.2026, në orarin 08:30 – 16:00, pacientët do të kenë mundësinë të konsultohen dhe të marrin vlerësime profesionale nga një ekspert i nivelit të lartë ndërkombëtar, në kushte të standardeve evropiane të kujdesit shëndetësor.

Fushat e tij të specializimit përfshijnë kirurgjinë vaskulare dhe endovaskulare, kirurgjinë estetike, diagnostikën radiologjike, si dhe kujdesin intensiv dhe emergjencat mjekësore, duke ofruar një qasje gjithëpërfshirëse ndaj trajtimit të pacientëve.

United Hospital thekson se ky bashkëpunim përfaqëson një mundësi të veçantë për pacientët në Kosovë që të marrin shërbime mjekësore nga një ekspert me përvojë të gjerë evropiane, pa pasur nevojë për trajtime jashtë vendit.

Për shkak të numrit të kufizuar të termineve, pacientët e interesuar mund të rezervojnë vizitën e tyre në numrat e kontaktit: 038 60 70 70 dhe 046 60 70 70, ose të drejtohen në lokacionin e United Hospital në magjistralen Prishtinë–Ferizaj, Km 7.

Ky bashkëpunim vlerësohet si një hap i rëndësishëm në ngritjen e cilësisë së shërbimeve shëndetësore në Kosovë dhe afrimin e standardeve evropiane me pacientët vendorë.

Në këtë rrugëtim të avancimit të shërbimeve shëndetësore, një rol të veçantë po luan edhe rektori dhe vizionari i njohur kosovar, Prof. Dr. Edmond Hajrizi, i cili ndër vite ka lënë gjurmë të pashlyeshme në arsimin e lartë dhe në fushën e inovacionit teknologjik.

Si themelues dhe udhëheqës i një prej institucioneve më të suksesshme universitare në vend, ai ka kontribuar në edukimin e mijëra të rinjve dhe në ndërtimin e urave ndërmjet shkencës, teknologjisë dhe zhvillimit shoqëror.

Hajrizi është vlerësuar edhe për projektet inovative në fushën e robotikës dhe teknologjive të avancuara, përfshirë angazhimet në zhvillimin e sistemeve inteligjente me potencial aplikimi edhe për nevojat e institucioneve të sigurisë.

Sot, duke qëndruar në krye të United Hospital, Prof. Dr. Edmond Hajrizi po e transferon të njëjtin vizion të suksesit edhe në sektorin e shëndetësisë, duke krijuar një institucion modern që synon të ofrojë standardet më të larta të mjekësisë bashkëkohore.

Nën drejtimin e tij, spitali ka arritur të mbledhë një ekip profesionistësh me reputacion vendor dhe ndërkombëtar, duke sjellë në Kosovë ekspertë të fushave të ndryshme mjekësore dhe duke e shndërruar United Hospital në një qendër të rëndësishme të ekselencës shëndetësore. Angazhimi për cilësi, inovacion dhe profesionalizëm e ka bërë këtë institucion një adresë besimi për pacientët që kërkojnë trajtim modern dhe shërbime të nivelit evropian.

Dr. Halil Krasniqi – kirurgu shqiptar që po shkruan histori suksesi në mjekësinë evropiane

Në botën moderne të mjekësisë, ku profesionalizmi, inovacioni dhe përkushtimi ndaj pacientit janë vlerat më të çmuara, emri i Dr. Halil Krasniqit zë një vend të veçantë. I njohur si një nga kirurgët shqiptarë më të suksesshëm në Evropë, ai ka ndërtuar një karrierë të jashtëzakonshme në Gjermani, duke u shndërruar në një figurë të respektuar në fushën e kirurgjisë vaskulare dhe endovaskulare.

Me mijëra operacione të realizuara me sukses dhe me dekada përvojë profesionale, Dr. Krasniqi ka dëshmuar se dija, puna e palodhshme dhe përkushtimi ndaj pacientit janë çelësi i suksesit në mjekësi. Karriera e tij është ndërtuar mbi standardet më të larta evropiane të kujdesit shëndetësor, duke sjellë rezultate që kanë fituar vlerësime nga komuniteti ndërkombëtar i mjekëve dhe institucioneve shëndetësore.

Një nga arritjet më të rëndësishme të tij është kontributi në zhvillimin e teknikave moderne të kirurgjisë vaskulare, si dhe patentimi i instrumentit inovativ “Krassa”, një shpikje që ka zgjuar interesim të madh në qarqet shkencore dhe profesionale, duke ofruar mundësi më të avancuara për trajtimin e sëmundjeve të enëve të gjakut me metoda më pak invazive dhe më të sigurta për pacientët.

Përtej suksesit profesional, Dr. Halil Krasniqi mbetet një zë i fuqishëm në promovimin e dijes mjekësore dhe shkëmbimit të përvojave mes institucioneve shëndetësore evropiane dhe atyre shqiptare. Përmes ligjëratave, trajnimeve dhe aktiviteteve akademike, ai ka kontribuar vazhdimisht në ngritjen profesionale të mjekëve të rinj dhe në avancimin e shërbimeve shëndetësore.

Historia e tij është dëshmi se talenti shqiptar, kur mbështetet nga edukimi cilësor, puna dhe vizioni, mund të arrijë majat e suksesit ndërkombëtar. Sot, Dr. Halil Krasniqi konsiderohet jo vetëm një kirurg i shquar, por edhe një ambasador i vlerave profesionale shqiptare në mjekësinë evropiane, duke dëshmuar se kujdesi për jetën dhe shëndetin e njeriut mbetet misioni më fisnik i profesionit të mjekut./rajonipress/

Continue Reading

Lajmet nga UBT

Ministri i Mbrojtjes, Ejup Maqedonci, diskuton me studentët dhe stafin akademik të UBT-së rreth zhvillimit të industrisë së mbrojtjes

Published

10 hours ago

on

June 23, 2026

By

UBT mirëpriti Ministrin e Mbrojtjes së Republikës së Kosovës, Ejup Maqedonci, në një bashkëbisedim me studentët dhe stafin akademik, ku u diskutua për zhvillimin e industrisë së mbrojtjes, rolin e teknologjisë moderne dhe mundësitë konkrete për përfshirjen e të rinjve në sektorët strategjikë të vendit.

Gjatë takimit, ministri Maqedonci theksoi rëndësinë që kanë studentët e fushave të inxhinierisë, mekatronikës, elektroteknikës, makinerisë dhe kimisë në ndërtimin e kapaciteteve moderne mbrojtëse të Kosovës, duke vënë në pah transformimet globale që po sjell zhvillimi teknologjik në industrinë ushtarake.

“Në historinë e njerëzimit ka pasur gjithmonë evolucion, mirëpo vetëm dy raste kanë qenë revolucionare. I pari ishte zbulimi i barotit në shekullin e XV, ndërsa aktualisht po e përjetojmë revolucionin e dytë me zhvillimin e dronëve dhe teknologjive moderne, të cilat po e ndryshojnë tërësisht mënyrën e luftimit ”, u shpreh ministri Maqedonci para studentëve të UBT-së.

Ai bëri të ditur se Republika e Kosovës po synon të fillojë me projekte konkrete dhe të realizueshme në industrinë e mbrojtjes, duke u fokusuar fillimisht në prodhimin e municionit, si një nga sektorët me kërkesën më të madhe në tregun ndërkombëtar.

“Investimi në dije, inovacion dhe në potencialin e të rinjve është investim në sigurinë, zhvillimin teknologjik dhe të ardhmen e Kosovës. Jam i bindur se brezi i ri i inxhinierëve do të ketë një rol kyç në ndërtimin e një industrie moderne të mbrojtjes, duke sjellë profesionalizëm, kreativitet dhe zgjidhje inovative në forcimin e kapaciteteve mbrojtëse të Republikës së Kosovës”, u shpreh Maqedonci.

UBT vazhdon të mbetet një ndër institucionet kryesore në përgatitjen e kuadrove profesionale dhe inovative, duke kontribuar në zhvillimin e sektorëve strategjikë dhe në fuqizimin e potencialit të të rinjve të Kosovës.

Continue Reading

Lajmet

REL: “Në Kosovë ndihesh si në familje”: Turistët zbulojnë “perlën e fshehur” mes maleve të Ballkanit

Published

11 hours ago

on

June 23, 2026

By

Tre vjet më parë, kur Mariusz Zaremba dhe miqtë e tij vendosën të niseshin drejt Ballkanit për të përshkuar shtegun malor “Peaks of the Balkans” (shqip: Majat e Ballkanit), pritjet e tyre për Kosovën nuk ishin të mëdha.

Për vite me radhë, polaku – që tash jeton në Irlandë – kishte eksploruar Alpet, Dolomitet dhe malet e tjera të Evropës Perëndimore. Por, turizmi malor atje nisi t’i dukej gjithnjë e më komercial.

Kur dëgjoi për herë të parë për Ballkanin si destinacion për ecje malore, fillimisht ishte skeptik.

“Ballkani – ish-Jugosllavia – më bënte të mendoja për varfëri, luftë dhe një atmosferë të zymtë sovjetike. Përshtypja ime e parë bazohej në injorancë dhe stereotipa”, thotë ai për Radion Evropa e Lirë.

Në atë kohë, kujton Zaremba, shumë udhërrëfyes dhe artikuj për shtegun rekomandonin që Kosova të anashkalohej. Por, pikërisht këto këshilla shtynë atë dhe miqtë e tij të bëheshin edhe më kureshtarë për ta parë vendin nga afër.

Ata e nisën udhëtimin në Mal të Zi, ku gjetën peizazhe të bukura dhe shtigje relativisht mirë të shënuara, por me pak kontakt me banorët lokalë.

Në Shqipëri, sipas tij, natyra ishte ndoshta më mbresëlënësja përgjatë gjithë shtegut, por, gradualisht, nisi të ndihej prania e turizmit masiv, me vila që po ndërtoheshin përgjatë gjithë shtegut.

“Dhe, më në fund, erdhi Kosova. Male më të buta, më shumë pyje, lule dhe gjelbërim dhe më e rëndësishmja: qetësi dhe paqe totale”, kujton Zaremba.

Por, ajo që e veçoi Kosovën, sipas tij, nuk ishte vetëm natyra.

“Njerëzit ishin miqësorë kudo… Ndiheshim sikur po vizitonim familjarë dhe jo thjesht si turistë”.

Ai thotë se në shumë destinacione të njohura evropiane është ndier thjesht “si një klient tjetër”, ndërsa në Kosovë ka gjetur ngrohtësi të sinqertë dhe mikpritje.

Pikërisht kjo përvojë bëri që ai të kthehej një vit më vonë dhe të planifikojë edhe një tjetër vizitë këtë vit – kësaj radhe vetëm në Kosovë.

“Kosova është një perlë e fshehur”, thotë Zaremba. “Ende relativisht e paprekur dhe jo e prishur nga dora e njeriut”.

Sipas tij, potenciali i Kosovës nuk është shfrytëzuar ende plotësisht.

Ai thotë se shtigjet nuk janë gjithmonë mirë të shënuara dhe se sinjali telefonik është shpesh i dobët, ndërsa në disa pjesë edhe asfaltimi i rrugëve ka zbehur ndjesinë e natyrës së paprekur.

Kosova, sipas tij, duhet të ketë kujdes të mos ndjekë gabimet e disa vendeve të rajonit, veçanërisht komercializimin e tepruar, në mënyrë që të ruajë dhe shfrytëzojë më mirë potencialin e saj turistik.

Në malet e Kosovës, Safet Behrami e sheh këtë potencial nga afër.

I licencuar si guidë malore dhe aktiv prej vitesh në shtigjet e “Peaks of the Balkans” dhe “High Scardus Trail”, ai thotë se interesimi i turistëve është rritur vazhdimisht.

Behrami thotë se, viteve të fundit, ka shoqëruar turistë nga Shtetet e Bashkuara të Amerikës, Kanadaja, Izraeli dhe vende të tjera të largëta.

Përveç shtigjeve malore, Kosova tërheq vizitorë edhe për trashëgiminë e saj kulturore dhe historike.

Prizreni konsiderohet gjerësisht kryeqendra kulturore e vendit dhe një nga destinacionet më të vizituara nga turistët e huaj, ngjashëm si monumenti Newborn në Prishtinë që është bërë simbol i pavarësisë së vendit.

Ndërsa Gryka e Rugovës, Bjeshkët e Nemuna, Malet e Sharrit dhe Brezovica janë ndër atraksionet kryesore natyrore.

Megjithatë, sipas Behramit, Kosova vazhdon të mbetet në hije krahasuar me Shqipërinë dhe Malin e Zi.

“Fatkeqësisht, turistët shpesh e evitojnë pjesën e Kosovës”, thotë ai, duke shtuar se një nga arsyet kryesore është mungesa e promovimit ndërkombëtar.

“Kur i kam pyetur turistët se si kanë vendosur të vijnë në Shqipëri ose Mal të Zi, shumë prej tyre më kanë treguar se i kanë parë këto destinacione në televizionet kombëtare të vendeve të tyre”, thotë Behrami për Radion Evropa e Lirë.

Ai thotë se në grupet online të dedikuara për “Peaks of the Balkans” shpesh shihen itinerare që e anashkalojnë Kosovën, edhe pse vizitorët që e përfshijnë vendin, zakonisht largohen me përshtypje pozitive.

“Secili prej tyre bën apel që të mos evitohet pjesa e Kosovës. Thonë se është shumë e bukur”, tregon Behrami.

Në Qeverinë e formuar këtë vit, e që aktualisht është Qeveri në detyrë, për herë të parë është ndarë Ministria e Kulturës dhe Turizmit nga ajo e Rinisë dhe Sportit, duke krijuar një institucion të veçantë me mandat të dedikuar për zhvillimin e turizmit.

Në përgjigjen e dhënë për Radion Evropa e Lirë, Ministria thotë se kjo ndarje institucionale tregon përkushtimin më të madh të Qeverisë për ta trajtuar turizmin si sektor më vete dhe për ta forcuar zhvillimin e tij.

Megjithatë, ajo pranon se sfidat mbeten të shumta, duke filluar nga infrastruktura dhe kapacitetet akomoduese, deri te fuqia punëtore, promovimi ndërkombëtar dhe zgjatja e sezonit turistik gjatë gjithë vitit.

“Në bashkëpunim me partnerët ndërkombëtarë dhe pushtetin lokal, synohet zgjerimi i rrjetit të shtigjeve që lidhin destinacionet kryesore turistike dhe krijimi i standardeve më të larta për sigurinë dhe shërbimet për vizitorët”, thuhet në përgjigje.

Ministria shton se planifikimi i destinacioneve dhe përfshirja e komuniteteve lokale mbeten kyç për suksesin afatgjatë të sektorit të turizmit.

Por, në terren, sfida e kapaciteteve akomoduese del shpesh si pengesë konkrete për zhvillimin e turizmit malor.

“Ka turistë që anulojnë udhëtimet sepse nuk gjejnë vend për të fjetur”, thotë Behrami.

Sipas tij, kjo tregon edhe potencialin e pashfrytëzuar ekonomik të zonave malore, ku zhvillimi i turizmit mund të sjellë përfitime të drejtpërdrejta për komunitetet lokale.

Për turistë si Mariusz Zaremba, pikërisht ky autenticitet mbetet një nga asetet më të mëdha të Kosovës.

“Në Kosovë gjej atë që ndonjëherë më mungon: male, pyje, ushqim të vërtetë shtëpiak dhe një mikpritje që të bën të ndihesh pothuajse si pjesë e familjes. Ky është ndoshta komplimenti më i madh që mund t’i japësh një vendi të huaj dhe njerëzve të tij”, përfundon ai.

/A.K/

 

Continue Reading

Vendi

Një i vdekur nga një aksident komunikacioni në Vranidoll të Prishtinës

Published

13 hours ago

on

June 23, 2026

By

Një person ka humbur jetën si pasojë e një aksidenti të rëndë komunikacioni që ka ndodhur në fshatin Vranidoll të Prishtinës.

Lajmin e ka konfirmuar zëdhënësi i Policisë së Kosovës për rajonin e Prishtinës, Enis Pllana për Kosova Press.

Sipas njoftimit, në aksident kanë qenë të përfshira dy automjete. Si pasojë e lëndimeve të marra nga përplasja, një person ka ndërruar jetë në vendngjarje, ku vdekja e tij është konstatuar nga ekipi mjekësor emergjent.

Policia ka bërë të ditur se janë duke u ndërmarrë të gjitha veprimet e nevojshme hetimore për të sqaruar rrethanat dhe shkaqet që çuan deri te ky aksident fatal. /Kosova Press/ /E.A/

Continue Reading

Të kërkuara