Lajmet

Ditari: Lajmet kryesore që shënuan datën 28 tetor 1993-1998

Published

on

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

28 tetor 1993

Edhe një kthim masiv i refugjatëve shqiptarë nga Greqia

Zëdhënësi i Ministrisë së Rendit Publik të Shqipërisë, konfirmoi se parmbrëmë ka filluar një kthim i refugjatëve shqiptarë nga Greqia. Edhe pse ende nuk ka shifra të plota për numrin e personave që janë dëbuar me dhunë nga forcat e policisë greke, besohet se vetëm parmbrëmë janë kthyer mbi 2.150 refugjatë në të dyja pikat kufitare në Kakavi dhe Kapshticë.

Ky është dëbimi i tretë masiv i refugjatëve shqiptarë nga Greqia brenda 20 muajve të fundit. Siç dihet vetëm në qershorin e kaluar me dhunë nga Greqia u dëbuan mbi 25.000 refugjatë shqiptarë.

Në të dy pikat e kufirit janë marrë masa të nevojshme, për pritjen, vendosjen dhe përcjelljen e refugjatëve në shtëpitë e tyre, bënë të ditur Radio-Tirana.

 

28 tetor 1994

Dhjetë raste të verdhëzës në Podujevë

Në komunën e Podujevës janë evidentuar 10 raste të sëmurësh nga verdhëza. Personat e sëmurë kryesisht janë nga Podujeva, Dumnica, Perani dhe Obranxha. Në fshatin Dumnicë deri më tash janë sëmurë 5 veta.

Tash për tash nuk dihet nëse është fjala për epidemi. Mjekët e Shtëpisë së shëndetit në Podujevë kanë rekomanduar që qytetarët të ndërmarrin masa preventive, sidomos në aspektin higjenik, në mënyrë që të pengohet përhapja e sëmundjes.

 

28 tetor 1995

Në Malishevë rreth 40 fshatra pa rrymë elektrike

Me vendimin e organeve të dhunshme të “Elektrokosovës”, që nga e enjtja, pa rrymë elektrike kanë mbetur 40 fshatra të komunës së Malishevës.

KI i Degës së LDK-së në Malishevë njofton se, sikur edhe sbumë herë deri më tash, rryma u ndërpre me pretekst të gjoja mospërmbushjes së obligimeve nga ana e banorëve të këtyre fshatrave.

Siç dihet edhe në aleboratin e fundit të radikalëve serbë të këtij muaji, ndërprerja e rrymës elektrike për vendbanimet shqiptare është propozuar si një mjet terrori për spastrimin etnik të Kosovës.

 

 28 tetor 1997

Studentët e Fakultetit Pedagogjik në Shkup edhe sivjet bojkotojnë mësimin

Shkup, 28 tetor (QIK)

Studentët shqiptarë në Fakultetit Pedagogjik të Shkupit për shkak të mossigurimit të kuadrit arsimor në gjuhën shqipe, edhe sivjet bojkotojnë mësimin dhe thonë se nëse kjo çështje nuk zgjidhet nga ana e dekanatit, ata do të organizojnë një protestë publike.

Tani për tani mësimi ndiqet vetëm në lëndët ku ligjërojnë profesorët shqiptarë.

Për gjendjen e këtillë, e cila hyri në vitin e tretë, studentët fajësojnë dekanin, për të cilin thonë se nuk është i interesuar për t’i plotësuar kërkesat e studentëve shqiptarë, të cilat janë të garantuara edhe me Ligjin për Fakultetin Pedagogjik, të cilin e solli Kuvendi i Maqedonisë para dy vjetësh.

Studentët e Fakultetit Pedagogjik në Shkup, deri tash kanë realizuar disa takime me përfaqësues të Ministrisë së Arsimit, por ata nuk kanë dhënë rezultate të pritura.

 

28 tetor 1998

Bill Klinton: Kosova të kthehet prapë në duart e popullit të saj

Jam i inkurajuar që qëndrimi këmbëngulës dhe vendosmëria e NATO-s e kanë detyruar presidentin Millosheviq të tërheqë forcat e tij dhe të përmbushë në masë të madhe kërkesat e bashkësisë ndërkombëtare. Shpresoj se klima e frikës dhe e kërcënimit do të eleminohet në Kosovë dhe se shqiptarët e Kosovës mund të kthehen në fshatrat e tyre, si dhe, çka është edhe më e rëndësishme në planin afatgjatë, mund të vazhdojnë negociatat për një zgjidhje të qëndrueshme e paqësore.

Që nga fillimi, kemi pasur tri objektiva dominuese në Kosovë: e para, të ndërpritet dhuna që kërcënon stabilitetin e brishtë të Ballkanit; e dyta, të pengohet shndërrimi i krizës humanitare në katastrofë, duke ndërprerë dhunën kundër shqiptarëve të Kosovës; dhe, e treta, Kosova të kthehet prapë në duart e popullit të saj, duke iu kthyer atij vetadministrimi.

Drejt të gjitha këtyre objektivave kemi arritur një përparim real. Luftimet janë ndalur; personat e zhvendosur kanë filluar të kthehen në shtëpitë e tyre; ndihma humanitare po qarkullon; ndërsa Milosheviqi është dakorduar të bëjë negociata për vetadministrim të Kosovës dhe është pajtuar me një kalendar për ta arritur këtë qëllim.

Megjithatë, nuk mjafton vetëm premtimi i Millosheviqit për zbatimin e kërkesave. Ai duhet të vazhdojë përmbushjen e tyre. Për verifikimin e kësaj, bashkësia ndërkombëtare do të dërgojë një prani të madhe ndërkombëtare në Kosovë, nga toka dhe nga ajri, gjë që Milosheviqi e ka kundërshtuar për një dekadë. Si rezultat i përmirësimit të klimës së sigurisë, rreth 40 mijë njerëz të zhvendosur tanimë kanë zbritur nga malet në shtëpitë e tyre dhe i janë shmangur vdekjes nga të ftohtit. Derisa armëpushimi të vazhdojë në Kosovë do të futen më shumë punëtorë humanitarë dhe më shumë ndihma humanitare. Forcat serbe duhet të rrinë anash, postblloqet duhet të hiqen, shkalla e besimit te njerëzit që ende janë të zhvendosur duhet të rritet, në mënyrë që edhe ata të kthehen në shtëpi para të ftohtit.

Në planin afatgjatë, stabiliteti i Kosovës varet nga zgjidhja e qëndrueshme politike dhe nga krijimi i demokracisë dhe i shoqërisë civile, përfshirë edhe shtypin e lirë në gjithë Jugosllavinë. Z. Millosheviq është pajtuar për zgjedhje demokratike në Kosovë, të mbikëqyrura ndërkombëtarisht, për vetadministrim substancial dhe për polici lokale – me një fjalë, të drejtat që kosovarët i kanë kërkuar qëkur Milosheviqi ua hoqi atyre autonominë, para një dekade.

Vullneti për veprim i NATO-s, i kombinuar me diplomaci të vendosur, ka krijuar mundësi për ndërprerrjen e vuajtjeve dhe represionit në Kosovë dhe për të futur njerëzit e saj në rrugën e paqes. Por, kjo është shans e jo garancë. Prandaj, NATO vendosi sot ta ruajë autoritetin, forcën dhe gatishmërinë e saj për të vepruar, në qoftë se Millosheviqi u bishtnon zotimeve që ka marrë. Jemi në një çast shpresëdhënës, por nuk duhet të kemi iluzione se është një rrugë e gjatë para nesh derisa shpresa të triumfojë mbi urrejtjen në Ballkan. Sot ndihem shumë më mirë, por ende kërkohet që të sundojnë liria dhe paqja. Edhe një herë dua të falënderoj zotin Solana, gjeneralin Klark, zotin Hollbruk, zotin Hill dhe të tjerët që kanë punuar shumë për arritjen e kësaj.

Foto: Bill Klinton

Continue Reading

Lajmet

Nisin rrënimi i gjashtë objekteve pa leje në zonën e Liqenit të Ujmanit

Published

on

Inspektorati i Ministrisë së Mjedisit ka nisur rrënimin e gjashtë objekteve pa leje në zonën përreth Liqenit të Ujmanit, prej të cilave katër janë veranda dhe dy shtëpi.

Lajmin e ka bërë të ditur Ministria e Mjedisit, Fitore Pacolli duke njoftuar se aksioni po vazhdon pas rrënimit të ndërtimeve ilegale dhe pastrimit të zonës përreth Liqenit të Radoniqit.

Pas Ujmanit, aksioni pritet të vazhdojë edhe në zonat përreth liqeneve të Batllavës dhe Badovcit.

Ministria ka theksuar se mbrojtja e liqeneve dhe burimeve ujore është përgjegjësi e përbashkët dhe se nuk do të tolerohen ndërtime të paligjshme që cenojnë pasuritë natyrore.

“Ligji do të zbatohet pa përjashtim”, thuhet në njoftimin e ministrisë./A.K/

Continue Reading

Lajmet

A më duhet antibiotik? Një pyetje e përditshme në ambulancat dhe barnatoret e Kosovës

Published

on

By

Opinion nga Prof. Dr. Fitim Alidema, profesor i farmakologjisë në Fakultetin e Farmacisë, UBT

“Doktor, fëmija ka temperaturë që nga mbrëmë. A i duhet antibiotik?” Prindi që e bën këtë pyetje dëshiron të dijë sa serioze është gjendja e fëmijës dhe çfarë mund të bëjë për të. Nëse pas kontrollit dëgjon vetëm fjalët “është virozë”, mund të kthehet në shtëpi po aq i shqetësuar sa kur erdhi. I duhet shpjeguar çfarë tregoi kontrolli, si mund t’ia lehtësojë fëmijës shqetësimet dhe cilat shenja kërkojnë një vizitë tjetër. Si profesor i farmakologjisë, besoj se kjo bisedë është një pikënisje e mirë për të folur për përdorimin e antibiotikëve në Kosovë.

Nga 18 deri më 24 nëntor shënohet Java Botërore e Ndërgjegjësimit për Rezistencën Antimikrobike. Këtë vit, Organizata Botërore e Shëndetësisë (OBSH) e ka vënë theksin te qasja “Një Shëndet”, që lidh shëndetin e njerëzve me atë të kafshëve dhe të mjedisit. Antibiotikët përdoren si në mjekësi, ashtu edhe në veterinari. Bakteret rezistente mund të përhapen mes njerëzve dhe kafshëve, por edhe përmes mjedisit. Prandaj, krahas përdorimit të kujdesshëm të këtyre barnave, OBSH-ja i kushton rëndësi parandalimit të infeksioneve përmes vaksinimit, higjienës dhe ujit të sigurt.

Po çfarë do të thotë rezistenca për një pacient? Në bisedat e përditshme dëgjohet shprehja “më është mësuar trupi me këtë antibiotik”. Në të vërtetë, rezistenca është veti e bakterit. Kjo do të thotë se bakteri mund t’i mbijetojë veprimit të një antibiotiku që zakonisht përdoret kundër tij. Për shembull, një paciente me infeksion urinar mund ta marrë barin pikërisht siç ia ka përshkruar mjeku dhe përsëri të mos përmirësohet. Një nga arsyet e mundshme është se bakteri që po e shkakton infeksionin është rezistent ndaj atij antibiotiku. Përdorimi i panevojshëm i antibiotikëve u jep baktereve rezistente më shumë mundësi të mbijetojnë dhe të shumohen. Ato mund të përhapen edhe te njerëz të tjerë.

Te ky shembull kuptohet edhe vlera e antibiogramit. Nëse infeksioni urinar përsëritet ose shqetësimet vazhdojnë pavarësisht trajtimit, mjeku mund të kërkojë urinokulturë me antibiogram. Me urinokulturë, laboratori kontrollon nëse në mostrën e urinës rritet ndonjë bakter dhe e identifikon atë. Nëse izolohet një bakter, antibiogrami tregon ndaj cilëve antibiotikë është i ndjeshëm dhe ndaj cilëve është rezistent. Mjeku e vlerëson rezultatin së bashku me simptomat dhe ecurinë e pacientes. Kështu ka një bazë më të saktë për të vendosur nëse trajtimi i filluar duhet të vazhdojë apo të ndryshojë.

Kur një analizë e tillë është e nevojshme, mostra merret, kur është e mundur, para dozës së parë të antibiotikut. Në rast të një infeksioni të rëndë që kërkon trajtim urgjent, mjekimi fillon pa pritur përgjigjen e laboratorit dhe rishikohet kur vjen rezultati. Për pacientin ka rëndësi edhe një hollësi që mund të harrohet lehtë. Kur e jep mostrën, duhet ta dijë kur pritet përgjigjja dhe me cilin mjek do ta diskutojë.

Në Kosovë, Ministria e Shëndetësisë ka hartuar një udhëzues për përdorimin e antibiotikëve në kujdesin parësor. Edhe Strategjia Sektoriale e Shëndetësisë 2025–2030 përfshin objektiva për uljen e përdorimit të tyre. Për mjekun familjar, vendimi nis nga pacienti që ka përballë. Kur një infeksion kërkon antibiotik, pacienti duhet ta marrë me kohë, në dozën e duhur dhe për aq ditë sa i nevojiten. Kur bëhet fjalë për grip ose ftohje, mjeku duhet t’ia shpjegojë se këto sëmundje shkaktohen nga viruset dhe antibiotiku nuk e përshpejton shërimin. Në të dyja rastet, pacienti ka nevojë të dijë çfarë të presë gjatë ditëve në vijim.

Qytetari ka të drejtë të pyesë “Pse po ma përshkruani këtë antibiotik?”, “Kur mund të pres përmirësim?” apo “A do të më ndihmonte një analizë në rastin tim?”. Këto pyetje duhen mirëpritur. Kujdes duhet pasur kur pacienti këmbëngul për një antibiotik të caktuar sepse “më ka bërë mirë herën e kaluar” ose sepse një familjar me shqetësime të ngjashme ka marrë të njëjtin bar. Dy njerëz me dhimbje fyti mund të kenë nevojë për trajtime të ndryshme. Po ashtu, nëse gjendja nuk po përmirësohet, hapi i duhur është rikontrolli. Ndërrimi i barit me iniciativë personale, me bindjen se një antibiotik tjetër është “më i fortë”, mund ta vonojë trajtimin që i nevojitet pacientit.

Disa qytetarë thonë se kanë mundur të marrin antibiotik pa recetë në barnatore. Këto përvoja meritojnë të dëgjohen dhe të trajtohen me seriozitet. Për shumë familje, farmacisti është ndër profesionistët shëndetësorë të cilëve u drejtohen më lehtë. Pikërisht për shkak të këtij besimi, këshilla e tij ka peshë. Kur dikush kërkon një antibiotik që e ka përdorur më parë, farmacisti mund ta dëgjojë, t’i shpjegojë pse të njëjtat shqetësime mund të kenë një shkak tjetër dhe ta drejtojë te mjeku për kontroll. Qytetari që del nga barnatorja pa antibiotik, por e ka kuptuar pse i duhet një vizitë dhe ku duhet të drejtohet, ka marrë një shërbim të vlefshëm profesional.

Puna e farmacistit është po aq e rëndësishme kur pacienti vjen me recetë. Për prindin që merr antibiotik të lëngshëm për fëmijën, një nga këshillat më të dobishme është t’i tregohet konkretisht si matet doza e përshkruar. Një pacient mund të ketë paqartësi për orarin e marrjes. Një tjetër mund të përdorë disa barna ose të ketë pasur më parë një reaksion alergjik që nuk e përmend pa u pyetur. Biseda në barnatore është rasti për t’i sqaruar këto hollësi para dozës së parë.

Si profesor i farmakologjisë, mendoj se në Kosovë duhet t’u flasim qytetarëve më hapur edhe për efektet anësore. Të përzierat, barkqitja ose skuqja e lëkurës mund të shfaqen edhe kur antibiotiku është përshkruar me të drejtë. Pacienti duhet të dijë me kë të këshillohet nëse i shfaqen këto shqetësime. Duhet t’i njohë edhe shenjat që kërkojnë veprim të menjëhershëm. Nëse pas marrjes së antibiotikut i vështirësohet frymëmarrja ose i ënjten buzët, gjuha apo fyti, duhet të kërkojë menjëherë ndihmë urgjente, sepse mund të bëhet fjalë për një reaksion të rëndë alergjik. Koha për t’ia dhënë këtë informacion është kur i përshkruhet bari ose kur e merr në barnatore.

Mesazhi im për qytetarin

Kur shkoni te mjeku, tregoni çfarë ju shqetëson, prej sa kohësh dhe çfarë barnash keni marrë. Pyeteni lirisht nëse ju duhet antibiotik dhe pse. Nëse infeksioni përsëritet ose nuk po përmirësoheni, kërkoni rivlerësim dhe pyesni nëse ka arsye për kulturë me antibiogram. Kur ju përshkruhet antibiotik, merreni në dozën, orarin dhe kohëzgjatjen e udhëzuar. Nëse keni paqartësi ose ju shfaqet ndonjë shqetësim gjatë trajtimit, këshillohuni me mjekun ose farmacistin. Mos përdorni antibiotikë të mbetur në shtëpi dhe mos ia jepni barin tuaj një familjari, edhe kur ju duket se ka të njëjtat shenja.

Nëse pas kontrollit mjeku vlerëson se mund të shëroheni pa antibiotik, bëjini edhe dy pyetje të thjeshta. “Çfarë mund të bëj që të ndihem më mirë?” dhe “Kur duhet të vij përsëri për kontroll?”. Si qytetar, keni të drejtë ta kuptoni vendimin që merret për shëndetin tuaj. Si profesionistë shëndetësorë, ne kemi për detyrë t’jua shpjegojmë me fjalë të qarta.

 

 

 

Continue Reading

Lajmet

Gjashtë nënoficerë të FSK-së përfundojnë me sukses trajnimet profesionale në Shqipëri

Published

on

Gjashtë nënoficerë të Forcës së Sigurisë së Kosovës (FSK) kanë përfunduar me sukses trajnimet profesionale në Qendrën e Përgatitjes Profesionale të Nënoficerëve në Forcat e Armatosura të Republikës së Shqipërisë.

Ceremonia e diplomimit përfshiu përfundimin e Kursit të Kryekapterit, Kursit të Avancuar dhe Kursit Bazë të Nënoficerit, ku morën pjesë pjesëtarë të Forcave të Armatosura të Shqipërisë dhe FSK-së.

Sipas FSK-së, pjesëmarrja dhe suksesi i nënoficerëve kosovarë dëshmojnë përkushtimin e vazhdueshëm në ngritjen profesionale, zhvillimin e lidershipit dhe avancimin e kapaciteteve të trupës së nënoficerëve.

Zhvillimi i një trupe profesionale dhe të përgatitur të nënoficerëve mbetet një nga prioritetet e FSK-së, me synimin e rritjes së gatishmërisë operacionale të njësive.

FSK-ja thekson se investimi në zhvillimin profesional të nënoficerëve është investim në lidership, profesionalizëm dhe gatishmëri operacionale./A.K/

Continue Reading

Lajmet

Bajrami: Për 60 ditë mund të ketë reduktime të energjisë në çdo kohë dhe vend

Published

on

Deputetja e Lidhjes Demokratike të Kosovës (LDK), Hykmete Bajrami, ka kritikuar vendimin e Kuvendit për shpalljen e gjendjes së jashtëzakonshme në sektorin e energjisë, duke thënë se ai nuk garanton furnizim më të mirë me rrymë.

Sipas saj, për 60 ditët e ardhshme ndërprerjet e energjisë mund të bëhen në çdo kohë dhe vend, ndërsa vendimi, siç pretendon ajo, mbron KEDS-in dhe KESCO-n nga paditë eventuale për dëmet e shkaktuara nga reduktimet.

Bajrami ka theksuar se vendimi parasheh edhe detyrimin e Ibër-Lepencit për të prodhuar energji për Shërbimin Universal, por ka vënë në pikëpyetje ndikimin e kësaj mase, duke përmendur kapacitetin e instaluar prej rreth 30 megavatësh.

Ajo ka pretenduar se vendimi krijon mundësi për arsyetimin e reduktimeve, blerjen e energjisë elektrike duke anashkaluar procedurat e prokurimit publik, si dhe kontraktimin e kompanive për investime dhe remontet në KEK pa procedurat e zakonshme.

Deputetja e LDK-së ka rikujtuar se masat emergjente për furnizimin me energji ishin shpallur për herë të parë më 21 dhjetor 2021, ndërsa, sipas saj, gati pesë vjet më vonë, sektori vazhdon të funksionojë nën masa të tilla.

Ndër problemet që ajo ka renditur janë mungesa e kontratave afatgjata për blerjen e energjisë, dështimi i remonteve, kostot e larta të kontratave, moszbatimi i Strategjisë së Energjisë dhe mungesa e kapaciteteve të reja gjeneruese.

Bajrami ka vlerësuar se zgjidhja afatgjatë e krizës qëndron në ndërtimin e kapaciteteve të reja të prodhimit të energjisë. Ajo ka paralajmëruar se, nëse nuk ndërmerren hapa në këtë drejtim, kriza mund të thellohet dhe qytetarët e buxheti i Kosovës mund të përballen me vështirësi për mbulimin e kostos së energjisë.

Deklaratat e saj janë publikuar në rrjetin social Facebook./A.K/

Continue Reading

Të kërkuara