Lajmet

Ditari: Lajmet kryesore që shënuan datën 16 gusht 1993-1998?

Published

2 months ago

on

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

 Foto: Al Gor

16 gusht 1993

Vizita e një grupi amerikanësh në Kosovë dhe kundërthëniet rreth tij në mjetet serbe të informimit

Mjetet serbe të informimit, dje dhe sot bëjnë me dije se të shtunën në Kosovë, në një vizitë private, qëndroi një grup amerikanësh, të cilët vizituan Prishtinën, Pejën, Deçanin dhe Prizrenin.

Agjencia serbe “Tanjug”, sipas gazetës së sotme “Borba”, thotë se ky ishte delegacion i Këshillit për politikë dhe marrëdhënie me jashtë i Kongresit Amerikan. Po këtë prezentim këtij grupi ia bëri edhe Televizioni i Beogradit, i cili lajmin për këtë vizitë jo vetëm që e dha në emisionet qendrore të lajmeve, por e nxori si ngjarje pothuaj të dorës së parë. Gazeta serbe e Prishtinës “Jedinstvo”, ndërkaq, thotë se fjala është për një “delegacion biznismenësh dhe intelektualësh amerikanë”, të cilët Kosovën dhe Krainat serbe i vizituan me iniciativën e biznesmenit amerikan Brus Ralford, kurse udhëtimin e organizoi Kisha pravosllave serbe.

Në mjetet serbe të informimit, ka edhe kundërthënie të tjera rreth kësaj vizite. Agjencia serbe “Tanjug”, nuk përmend asnjë emër nga ky delegacion amerikan, kurse gazeta “Jedinstvo” kritikon filialën e SPS-it në Kosovë pse nuk i lejoi mjetet e informimit t’i prezentojnë anëtarët e këtij delegacioni. Kjo gazetë citon Zhivorad Igiçin të ketë thënë se “kjo vizitë është jozyrtare dhe se për të nuk do të shkruhet në gazeta”.

Këto dhe kundërthënie të tjera rreth këtij delegacioni amerikan, lënë të dyshohet se fjala është për një vizitë krejtësisht të aranzhuar, të cilën zyrtarët serbë të instaluar në Kosovë, deshën ta përdorin në funksion të politikës aktuale serbe. Mirëpo, gjykuar sipas asaj çfarë thanë anëtarët e këtij delegacioni, duket se kjo ishte një provë e dështuar.

Gazeta “Jedinstvo”, shkruan se “mysafirët, duke dashur t’ua bëjnë me dije nikoçirëve arsyet e qëndrimit në Kosovë, theksuan se kjo krahinë tash gjendet në qendër të vëmendjes të opinionit të jashtëm dhe se në Amerikë, mbisundon frika se mos do të shpërthejë konflikti në Kosovë, e kjo do të kërkonte praninë e trupave të huaj në këtë krahinë”. Kjo gazetë, po ashtu thekson se “atyre në mënyrë të veçantë u interesoi sistemi i arsimit dhe pyetën a po e mbajnë arsimin shqiptarët edhe pas bojkotimit dhe se cili është kualiteti i arsimimit të fëmijëve”.

Anëtari i këtij delegacioni, Brus Rallston, siç shkruan “Jedinstvo”, tha se “pa propagandë cilësore nuk do të ketë rezultate të njëmendëta për serbët”. Anëtarja tjetër e këtij delegacioni, Ana Paviqeviç-Harkins, theksoi se “situata në Amerikë nuk u shkon për shtati serbëve, duke ilustruar këtë me faktin se që në shkollat e mesme nxënësit mësojnë se serbët janë fashistë dhe nacistë dhe se fëmijët serbë në shkollat amerikane i pyesin se a do të luftonin ata kundër serbëve të këtillë në Ballkan”, shkruan “Jedinstvo”.

“Mysafirët nga SHBA-të, nuk qenë të kënaqur me materialin dëshmues që iu ofrua atyre rreth të vërtetës në këto hapësira”, konstaton gazeta serbe “Jedinstvo”.

 

16 gusht 1994

 l Gor: Rugova do të ftohet në Uashington

Çikago, 15 gusht. Më 15 gusht në Çikago Ramazan Bekteshi, kryetar i Degës së LDK-së dhe koordinator i degëve të LDK për Amerikë dhe Kanada Ramazan Bekteshi dhe Miron Hyseni, sekretar, patën një takim shumë të përzemërt me nënpresidentin amerikan Al Gore.

Takimi u mbajt në një shtëpi private të industrialistit dhe arqitektit të njohur Lew Manilow, ku ishin ftuar rreth 60 vetë – miq të ngushtë të Partisë Demokratike të Illinois dhe funksionarë të lartë të shtetit.

Delegacioni shqiptar me nënpresidentin e njoftoi kryetari i Partisë Demokratike të Illinois dhe senator shteti, Gary Lapaille.

Al Gore parashtroi pyetjen se kend e përfaqëson delegacioni –  Shqipërinë apo Kosovën, – iu tha se delegacioni përfaqëson Kosovën. Dega e LDK-së në Çikago njofton se nënpresidenti Al Gor tha:

“Më vjen shumë mirë që Kosova ka përfaqësues edhe në Illinois dhe se bashkëpunoni me PD të Illinois. E kam takuar presidentin Rugova në Uashington (National Breakfast Prayer) dhe jam i fascinuar. Rugova është një figurë e paqes dhe simbol i frenimit të një lufte ballkanike. Ai është njeri i mrekullueshëm!

Pyetjes, se a mendoni që dr.Rugova duhet të ftohet në Uashington, nënpresidenti amerikan iu përgjigj:  “Gjithsesi, në një të ardhme të afërt”.

Duke u përgjigjur në pyetjen se a do të përhapet lufta në Kosovë, nënpresidenti amerikan tha: “Serbisë i është bërë me dije vija kritike ku s’do të tolerohet”.

Pas takimit, për nder të nënpresidentit u shtrua darkë.

16 gusht 1995

Në shtypshkronjën e uzurpuar të “Rilindjes” punësohen refugjatët serbë nga Kroacia

E ashtuquajtura ndërmarrje gazetare botuese “Panorama”, një ndërmarrje fantome, e cila u krijua pas pushtimit të shtypshkronjës së “Rilindjes” dhe ndalimit të gazetës “Rilindja” dhe dëbimit nga lokalet e saj të ndërmarrjes së revistave dhe të edicionit, ka vendosur që t’i punësojë të gjithë punëtorët grafikë serbë të ikur nga Kroacia. Në një njoftim të Tanjugut thuhet se drejtori i kësaj ndërmarrje fantome, Jordan Ristiq tha se do t’i pranojë edhe të gjithë gazetarët praktikantë dhe ata me stazh më të gjatë pa kurrfarë procedure, për të krijuar marrëdhënie të rregullt pune.

 

16 gusht 1997

Kryetari Rugova u takua me sekretaren amerikane të Shtetit Medlin Ollbrajt

Kryetari i Republikës së Kosovës dr. Ibrahim Rugova dje pasdite u takua në Uashington me sekretaren amerikane të Shtetit, Medlin Ollbrajt. Në këtë takim merrnin pjesë edhe Robert Gelbard, përfaqësues i posaçëm i presidentit Klinton dhe i sekretares Ollbrajt për zbatimin e marrëveshjeve të Dejtonit, Toni Uejn, ushtrues i detyrës së sekretarit për çështje evropiane e zyrtarë të tjerë në Stejt Departament.

Në takimin e përzemërt e miqësor u bisedua gjerësisht për gjendjen në Kosovë dhe për mundësitë e zgjidhjes paqësore të çështjes së Kosovës.

Sekretarja e Shtetit Medlin Ollbrajt vlerësoi lart rolin e madh të kryetarit Rugova dhe të politikës së tij paqësore në rajon. Politika e dr. Ibrahim Rugovës për lirinë dhe për demokracinë e Kosovës meriton admirimin e thellë dhe përkrahjen amerikane, tha ajo.

Kryetari Rugova falënderoi zonjën Medlin Ollbrajt për preokupimin dhe për angazhimin e vazhdueshëm të SHBA-ve për çështjen e Kosovës. Ai theksoi rëndësinë e madhe që ka prania amerikane në Kosovë përmes Zyrës në Prishtinë, hapja e së cilës ishte një ngjarje historike për Kosovën.

Gjendja në Kosovë, tha kryetari Rugova, ka qenë dhe vazhdon të jetë e rëndë e represive, sidomos tash, në valën e gjykimeve të montuara politike të regjimit serb kundër shqiptarëve pas vrasjeve të pasqaruara në Kosovë. Kryetari i Kosovës theksoi edhe me këtë rast se me gjithë gjendjen e rëndë, populli i Kosovës është i vendosur që lirinë dhe pavarësinë e vet ta realizojë me mjete paqësore dhe politike. Kosova e pavarur dhe neutrale, e hapur ndaj Shqipërisë dhe Serbisë, është zgjidhja më e mirë, në mbështetje të vullnetit të shprehur politik të popullit të Kosovës. Kjo zgjidhje do t’i hapte rrugë stabilizimit afatgjatë të rajonit të Ballkanit, nënvizoi kryetari Rugova.

Pasi çmoi rëndësinë që ka mbajtja e “murit të jashtëm” të sanksioneve ndaj Beogradit deri në zgjidhjen e çështjes së Kosovës, kryetari Rugova kërkoi nga administrata amerikane që të angazhohet për një konferencë ndërkombëtare për Kosovën dhe që SHBA-të të marrin rolin udhëheqës në zgjidhjen e problemit të Kosovës. Populli i Kosovës ushqen shpresa të mëdha nga përkrahja e Shteteve të Bashkuara të Amerikës, si vendi i lirisë dhe i demokracisë, theksoi dr. Rugova.

Sekretarja e Shtetit Medlin Ollbrajt tha se SHBA-të do të vazhdojnë presionin mbi Beogradin. Pa zgjidhjen e drejtë të çështjes së Kosovës nuk ka kthim të Beogradit në organizmat ndërkombëtarë financiarë e politikë, theksoi ajo. Uashingtoni i kushton vëmendje shumë të madhe çështjes së Kosovës, tha shefja e diplomacisë amerikane, duke e siguruar kryetarin Rugova se Kosova vazhdon të jetë në ‘mendjen dhe në zemrën’ e Presidentit Klinton dhe të Administratës amerikane.

Pas takimit, kryetari Rugova dhe zonja Medlin Ollbrajt dhanë deklarata para një numri të madh gazetarësh e fotoreporterësh të tubuar në Stejt Departament.

 

16 gusht 1998

Në pritat e forcave serbe ndërmjet Kosovës e Malit të Zi janë plagosur 2 dhe janë arrestuar 5 shqiptarë nga komuna e Deçanit

Banorët e fshatrave të komunës së Deçanit e të Pejës që janë përfshirë në ofensivën e forcave ushtarake e policore serbe janë vënë nën një rrethim të hekurt. Shumë prej tyre që kanë provuar të dalin nga ky rrethim kanë rënë në prita të forcave serbe.

Burimet e Lidhjes Demokratike në Mal të Zi njoftojnë se, natën ndërmjet të martës e të mërkures, një grup prej 25 shqiptarësh nga komuna e Deçanit që ishin nisur maleve në drejtim të Rozhajës kanë rënë në pritat e forcave serbe, në bjeshkët ndërmjet Kosovës e Malit të Zi.

Idriz Imeri dhe Ali Zuki nga Isniqi, të cilët kanë arritur në Rozhajë, kanë bërë të ditur se forcat serbe kanë plagosur 2 dhe kanë arrestuar 5 prej tyre, ndërsa nuk dijnë për fatin e të tjerëve, sepse prita është organizuar gjatë natës dhe grupi është shpërndarë maleve duke u përpjekur që t’u shpëtojë masakrave.

Këta dëshmitarë kanë bërë të ditur se në këtë pritë janë arrestuar: Bujar Mehmeti, Xhavit Haklaj dhe tre shqiptarë të tjerë, emrat e të cilëve nuk dihen, ndërsa të plagosurit: Mustafë Imeri e Bashkim Balaj, të dy nga Isniqi, kanë arritur të kalojnë në Shqipëri.

Sipas tyre, në grupin prej 25 vetësh gjendeshin edhe Bujar Mehmeti, Xhavit Haklaj e Nezir Islamaj nga Isniqi, Mentor Mushkolaj nga Gramaçeli dhe një kushëri i tij, Riza Berisha nga Pozhari bashkë me një djalë dhe me një nip, ndërsa të tjerët ishin nga Deçani, Baballoqi, Rastavica e Carrabregu.

Nga Rozhaja bëhet e ditur se vetëm gjatë dy ditëve të fundit në këtë komunë kanë arritur rreth 1000 shqiptarë, kryesisht nga fshatrat e komunës së Deçanit e të Pejës, të cilat janë përfshirë në ofensivën e forcave ushtarake e policore serbe.

Burimet e Lidhjes Demokratike të Malit të Zi në Rozhajë bëjnë të ditur se në bjeshkët ndërmjet Kosovës e Malit të Zi janë vënë prita të shumta nga forcat serbe, prandaj tërheqin vërejtjen për rrezikun që u kanoset atyre që mësyjnë në këtë drejtim.

 

Një i vrarë e dy të plagosur të paidentifikur në Grazhdanik të Prizrenit

Mbrëmë rreth orës 23, në afërsi të Kishës katolike në fshatin Grazhdanik u dëgjuan për rreth gjysmë ore të shtëna nga të gjitha llojet e armëve, njofton KI i Degës së LDK-së në Prizren.

Sipas dëshmitarëve okularë, në momentin kur po kalonte një veturë e tipit Audi, në të u shti me armë. Dyshohet se me këtë rast është vrarë një person, ndërsa janë plagosur dy të tjerë, identiteti i të cilëve nuk dihet, por dyshohet se janë nga rrethi i Prizrenit.

Sot në mëngjes, një ekspeditë policore shkoi në fshatin Nashec dhe bastisi dhe demoloi shtëpitë e Murtezan dhe Adem Thaçit. Pasi nuk gjeti asgjë, polici arrestoi Murtezan dhe Jemin Thaçin, ndërsa kërkoi edhe Ramadan Thaçin, i cili është pronar i veturës në të cilën u shti mbrëmë në afërsi të kishës së Grazhdanikut.

Policia u thanë anëtarëve të familjes së nëse Ramadani deri nesër nuk paraqitet në polici dhe nëse nuk i dorëzon armët, do të pësojë e tërë familja.

 

Related Topics:
Continue Reading

lajme

UBT shënon 25-vjetorin, Hajrizi: Kemi dhënë kontribut në transformimin e arsimit dhe inovacionit në Kosovë

Published

1 day ago

on

October 16, 2026

By

Në një intervistë në emisionin “Five” në RTV Dukagjini, Rektori i UBT-së, Edmond Hajrizi, ka thënë se 25-vjetori i këtij institucioni përfaqëson jo vetëm një përvjetor jubilar, por edhe një moment reflektimi për të arriturat dhe synimet e ardhshme në arsim, shkencë, inovacion dhe teknologji.

Hajrizi ka deklaruar se gjatë këtij çerek shekulli, UBT-ja është angazhuar në ndërtimin e një sistemi arsimor me qasje inovative, duke synuar të ndikojë në zhvillimin e vendit në fusha të ndryshme.

“Është një vit që jo vetëm duhet të reflektojmë, por është një angazhim prej çerek shekulli, ku vitet më të mira të jetës kanë qenë angazhim për të ndërtuar një sistem të arsimit dhe një qasje inovative në arsim. Ka qenë një rezultat i mirë, por edhe një moment reflektimi se çfarë kemi arritur dhe çfarë duam të arrijmë”, është shprehur Hajrizi.

Ai ka theksuar se gjatë këtyre 25 vjetëve ka pasur zhvillim në fusha të ndryshme, përfshirë arsimin, shkencën, inovacionin, teknologjinë dhe zhvillimin e biznesit, duke vlerësuar se UBT-ja ka pasur ndikim në këtë proces transformues.

Në kuadër të shënimit të 25-vjetorit, UBT-ja ka planifikuar disa aktivitete që do të zhvillohen gjatë javës së ardhshme, me fokus të veçantë në fushën akademike dhe shkencore.

Sipas Hajrizit, gjatë kësaj jave në Kosovë do të organizohen tri ngjarje ndërkombëtare, njëra pas tjetrës, të cilat synojnë të sjellin në vend komunitetin akademik dhe profesionistë nga fusha të ndryshme.

Ngjarja e parë do të mbahet të mërkurën dhe do t’i kushtohet Konferencës Ndërkombëtare për Mjekësinë Sportive. Hajrizi ka bërë të ditur se kjo konferencë organizohet për herë të dytë dhe do të mbledhë përfaqësues të komunitetit vendor dhe ndërkombëtar në UBT.

“Kemi mbërritur në fund të vitit ku do të shënojmë edhe përmbylljen e 25-vjetori dhe mbi këtë kemi menduar t’i organizojmë disa evente të cilat ndërlidhen edhe në shenjë të 25-vjetorit. Këtë vit i kemi mbledh disa ngjarje, javen e ardhshme kemi disa aktivitete që lidhen me pjesën akademike shkencore dhe i kemi tri ngjarje të nivelit botëror që i organizmojnë në Kosovë në të njëjtën kohë njëra pas tjetrës që e plotësojnë gjithë javën. Konferenca e parë që e organizojmë të mërkurën ka të bëjë me Konferencën Ndërkombëtare Botërore për Mjekësinë Sportive, është hera e dytë që organizohet por është një konferencë që sjell gjithë komunitetin edhe ndërkombëtar edhe vendor në UBT në Kosovë”, u shpreh Hajrizi.

Përmes këtyre aktiviteteve, UBT-ja synon të shënojë përmbylljen e 25-vjetorit, duke vënë në pah të arriturat e deritanishme dhe duke hapur diskutime për zhvillimet e ardhshme në arsim, shkencë dhe inovacion.

Continue Reading

lajme

UBT hap AI Business Hub, duke kompletuar ekosistemin për zhvillimin e kompetencave dhe mbështetjen e bizneseve

Published

1 day ago

on

October 16, 2026

By

UBT ka hapur zyrtarisht AI Business Hub, një hapësirë të re që synon të forcojë kompetencat në fushën e inteligjencës artificiale dhe të ofrojë mbështetje për bizneset në Kosovë dhe më gjerë.

AI Business Hub është rezultat i projektit TBEAI (Transforming Business Education with AI in Western Balkans), një projekt i financuar nga Komisioni Evropian përmes programit Erasmus+, i cili synon transformimin e edukimit të biznesit përmes integrimit të inteligjencës artificiale në Ballkanin Perëndimor.

Me hapjen e këtij Hub-i, UBT plotëson edhe më tej ekosistemin e tij të inovacionit, duke krijuar mundësi konkrete për zhvillimin e kompetencave digjitale, avancimin e njohurive në inteligjencën artificiale dhe mbështetjen e sektorit të biznesit në përballjen me sfidat e transformimit digjital.

AI Business Hub synon të shërbejë si urë lidhëse ndërmjet akademisë, teknologjisë dhe biznesit, duke krijuar hapësirë për bashkëpunim, zhvillim të aftësive profesionale dhe zbatimin e zgjidhjeve të inteligjencës artificiale në praktikat e përditshme të bizneseve. Përmes kësaj nisme, studentët, profesionistët dhe ndërmarrjet do të kenë mundësi të përfitojnë nga një qasje më e orientuar drejt nevojave të tregut, duke nxitur inovacionin, rritjen e produktivitetit dhe përgatitjen për ekonominë digjitale.

Hapja e AI Business Hub dëshmon përkushtimin e UBT-së për të ndërtuar një ekosistem që jo vetëm zhvillon kompetencat e së ardhmes, por edhe përkrah bizneset në Kosovë dhe më gjerë, duke i ndihmuar ato të shfrytëzojnë potencialin e inteligjencës artificiale për zhvillim dhe konkurrueshmëri.

UBT vazhdon të investojë në inovacion, dije dhe teknologji, duke e shndërruar inteligjencën artificiale në një mundësi konkrete për zhvillimin e arsimit, sipërmarrjes dhe ekonomisë.

Continue Reading

Lajmet

Rama fajëson “duart e huaja” për trazirat në Shqipëri

Published

1 day ago

on

October 16, 2026

By

Kryeministri i Shqipërisë, Edi Rama, bëri thirrje për qetësi të premten, dhe fajësoi “duart e huaja” për trazirat e dhunshme disaditore, ndërsa protestuesit u mblodhën sërish në kryeqytet dhe në qytete të tjera.

Që nga e marta, Tirana është përfshirë nga protesta të dhunshme, ku mijëra protestues kanë kërkuar dorëheqjen e Ramës për shkak të kushteve të këqija në universitete dhe tarifave të larta të studimit.

Protestat janë përhapur edhe në disa qytete të tjera, ndërsa studentët iu bashkuan bojkotit të universiteteve, duke shënuar një përshkallëzim të ndjeshëm pas muajsh protestash kundër qeverisë në vend.

Përleshjet gjatë natës mes policisë dhe grupeve të protestuesve, shumica e të cilëve të maskuar, vazhduan deri në orët e para të së premtes.

Hyrja e Ministrisë së Financave u përfshi nga flakët, ndërsa xhamat e një kompleksi universitar u thyen.

Sipas një deklarate të Policisë, 160 protestues u ndaluan të enjten në mbrëmje për kryerjen e akteve të dhunshme.

Protestuesit grumbulluan dhe dogjën kontejnerë mbeturinash për të bllokuar rrugët, si dhe hodhën gurë drejt Policisë, e cila u kundërpërgjigj me gaz lotsjellës dhe topa uji për t’i shpërndarë.

Një gazetar i AFP-së pa, gjithashtu, grupe të maskuara duke thyer vitrina dhe duke plaçkitur dyqane. Të njëjtat incidente u raportuan edhe në pjesë të tjera të qytetit.

Të premten në mëngjes, qindra protestues marshuan drejt Ministrisë së Arsimit, e cila mbetet një nga pikat kryesore të protestave.

Përleshjet kanë lënë pas ndërtesa qeveritare me dëme të mëdha, vitrina të thyera dyqanesh dhe dhjetëra persona të arrestuar.

Përshkallëzimi i protestave këtë javë vjen pas muajsh të tërë demonstratash kundër qeverisë, të cilat fillimisht u nxitën nga një projekt i diskutueshëm për zhvillimin e një resorti, i lidhur me familjen e presidentit amerikan, Donald Trump.

Në një deklaratë të premten, Rama këmbënguli se protestat nuk kanë të bëjnë “fare me hallet, me problemet, me aspiratat legjitime të gjithkujt që dëshiron një jetë më të mirë”.

“E gjithë kjo është po ajo dorë, po ajo dorë që e ka kapur për fyti opozitën shqiptare, dhe që e ka djegur dhe shkatërruar jo një herë Shqipërinë, dhe që është gati ta djegë e ta shkatërrojë përsëri, për të mos e lënë të bëjë përpara”, tha ai.

Ai akuzoi “duar të huaja”, pa i identifikuar ato, se po nxisin trazirat dhe synojnë të pengojnë përpjekjet e vendit të tij për t’u anëtarësuar në Bashkimin Evropian.

“Këto janë duar të huaja që nuk e duan Shqipërinë të qetë”, tha ai në një video të publikuar në faqen e tij në Facebook.

Që nga e marta, dhjetëra persona, kryesisht zyrtarë policorë, janë plagosur në përleshje, sipas autoriteteve.

Burimi: AFP / REL

Continue Reading

Rajoni

127 të arrestuar pas protestave në Shqipëri, hetohen thirrjet për akte terroriste

Published

2 days ago

on

October 16, 2026

By

Drejtori i Departamentit për Sigurinë Publike në Shqipëri, Dhimitraq Ziu, ka njoftuar se 127 persona janë arrestuar dhe 244 të tjerë janë proceduar penalisht në Tiranë, në lidhje me protestat e dhunshme të ditëve të fundit.

Sipas tij, janë lënduar 120 punonjës policie në disa qytete të vendit.

Ziu bëri të ditur gjithashtu se strukturat e Krimit Kibernetik dhe Antiterrorit po hetojnë kanale dhe grupe në rrjetet sociale, ku janë shpërndarë mesazhe me thirrje për akte ekstreme e terroriste dhe kërcënime ndaj punonjësve të Policisë.

“Deri në këto momente në Tiranë, janë arrestuar 127 shtetas dhe janë proceduar në gjendje të lirë 244 shtetas, për ushtrim të dhunës ndaj punonjësve të Policisë, dëmtim të institucioneve shtetërore, shkatërrim të pronës publike dhe private, si dhe të bankomateve, kamerave, automjeteve dhe rrethimeve metalike”, ka thënë ai.

Ziu ka treguar edhe për rastet në qytetet e tjera. Në Durrës, ka thënë se janë arrestuar 23 shtetas dhe janë proceduar penalisht 12 të tjerë, në Korçë janë arrestuar 2 shtetas dhe janë proceduar në gjendje të lirë 23 shtetas, në Vlorë janë proceduar në gjendje të lirë 20 shtetas, në Shkodër janë proceduar në gjendje të lirë 9 shtetas.

Gjatë protestës në Shkodër Ziu ka deklaruar se është plagosur rëndë një oficer i Policisë së Rendit, i cili aktualisht ndodhet në Spitalin e Traumës Tiranë, për ndihmë mjekësore. Ai theksoi se autori i plagosjes është identifikuar, por për shkak të moshës nuk është arrestuar.

Kurse, në Elbasan janë proceduar në gjendje të lirë 6 shtetas dhe në Kukës janë proceduar në gjendje të lirë 10 shtetas, shtoi ai.

“Ndërkohë, nga dhuna e ushtruar mbi punonjësit e Policisë, në Tiranë, Durrës, Lezhë, Shkodër dhe Kukës, janë dëmtuar deri tani 120 punonjës policie”.

Sa i përket rasteve të dyshuara për akte ekstreme, Ziu ka theksuar po bashkëpunojnë me agjencitë partnere ndërkombëtare për zbulimin e adresave IP, identifikimin e administratorëve të këtyre kanaleve dhe të çdo përdoruesi që bën thirrje për dhunë dhe akte terroriste.

“Përveç ngjarjeve në terren, strukturat e specializuara të Hetimit të Krimit Kibernetik dhe Antiterrorit kanë marrë në shqyrtim të menjëhershëm hapësirën virtuale, ku gjatë monitorimeve intensive, janë identifikuar disa kanale dhe grupe komunikimi, nëpërmjet të cilave janë shpërndarë mesazhe me përmbajtje të drejtpërdrejtë kriminale, ndër to, thirrje për kryerje të akteve ekstreme dhe terroriste, si dhe kërcënime direkte kundër jetës së punonjësve të Policisë së Shtetit”, potencoi ai.

Ziu u ka bërë thirrje protestuesve të distancohen nga personat e maskuar dhe të dhunshëm.

“E drejta për protestë duhet të ushtrohet në mënyrë paqësore dhe nuk mund të përdoret si justifikim për dhunën dhe shkatërrimin”.

Ndërkohë Ziu ka theksuar se po udhëzojnë punonjësit e policisë që “pavarësisht situatave ku përballen me sulme të rrezikshme, apo gjatë ndërhyrjeve për të mbrojtur institucionet, të tregojnë vetëpërmbajtje dhe propocionalitet”.

Gjatë katër ditëve është raportuar për ushtrim dhune nga policët drejt qytetarëve./A.K/

Continue Reading

Të kërkuara