Lajmet

Ditari: Lajmet kryesore që shënuan datën 1 qershor 1993-1998?

Published

2 months ago

on

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

Foto: Nga takimi Anan-Rugova

1 qershor 1993

Konferencë për shtyp e Këshillit Grevist të “Rilindjes”

Greva e urisë e Adem Demaçit dhe e gazetarëve dhe shkrimtarëve të tjerë për fjalën e lirë shqipe, si dhe ajo e përgjithshme e punëtorëve të “Rilindjes”, hyri sot në ditën e nëntë.

Adem Demaçi dhe grevistët e tjerë janë të vendosur që të mos e ndërprejnë grevën e urisë deri në përmbushjen e kërkesave për ç’gjë edhe filloi greva, tha dr. Ali Jakupi, kryetar i Këshillit Grevist të “Rilindjes”, në konferencën e sotme për shtyp. Gjatë ditës së djeshme, tha Ali Jakupi, kemi patur tri takime me përfaqësuesin e KSBE-së për Kosovë, i cili po ndërmjetëson në bisedimet në mes të “Rilindjes” dhe palës serbe, për arritjen e kushteve për ndërprerje të grevës. Edhe pse bisedimet ishin tejet të vështira, pala shqiptare, tha A.Jakupi, ka treguar kooperativitet për bisedime për shkak të keqësimit të vazhdueshëm të gjendjes shëndetësore të grevistëve. Ndonjë marrëveshje konkrete nuk është arritur ende, por bisedimet me ndërmjetësuesin e KSBE-së janë në vazhdim e sipër dhe brenda ditës së sotme, presim kontaktin e sërishëm me te, pasi që ai të ketë zhvilluar bisedimet me palën serbe. Deri tash, tha A.Jakupi, nuk kemi patur kontakte të drejtpërdrejta me përfaqësuesit e ndërmarrjes fantome “Panorama”, por në moratoriumin 15 ditësh, që duhet të fillojë nga dita që do të arrihej ndonjë marrëveshje konkrete, mund të ndodhë që të kemi kontakte të drejtpërdrejta, por gjithashtu me mbikëqyrjen e përfaqsuesëve të KSBE-së.

Për gjendjen shëndetësore të Adem Demaçit dhe grevistëve të tjerë, konziliumi i mjekëve të Fakultetit të Mjekësisë në Prishtinë, sot dha këtë njoftim: “Në bazë të vizitës konzilare të mjekëve që i është bërë Adem Demaçit dhe grevistëve të tjerë, duke u mbështetur në raportet e ekipeve mjekësore si dhe analizave laboratoriko-biokimike, konziliumi i mjekëve konstaton se gjendja shëndetësore e Adem Demaçit dhe grevistëve të tjerë po keqësohet gjithnjë e më tepër. Konstatohet edhe më tutje humbje rapide në peshën trupore. Në analizat e fundit laboratorike, konstatohet çrregullim funksional i mëlçisë dhe i veshkave, ndryshim në sistemin nervor qendror-periferik, si dhe atë kardiovaskular. Konziliumi i mjekëve, duke u bazuar në gjendjen momentale shëndetësore të grevistit Adem Demaçi dhe grevistëve të tjerë, u sugjeroi që të ndërprejnë grevën e urisë. Gjendja shëndetësore e grevistit Adem Demaçi dhe grevistëve të tjerë po mbikëqyret vazhdimisht nga ana e mjekëve”, thuhet në kumtesën që sot e lëshoi konziliumi i mjekëve të Fakultetit të Mjekësisë në Prishtinë.

 

 

1 qershor 1994

“Dagbladet”: Valë e re arrestimesh në Kosovë

E përditshmja norvegjeze “Dagbladet”, botoi një bisedë me kryetarin e Republikës së Kosovës, dr.Ibrahim Rugova me rastin e vizitës që i bëri Norvegjisë.

Në tekstin e bisedës thuhet: Kosova duhet të vëhet nën protektoratin e përkohshëm të OKB-së. Mendoj se kjo është e vetmja mënyrë që të evitojmë një gjakderdhje që do të ishte shumë më e madhe se ajo që u përjetua në Bosnjë, – thotë udhëheqësi i shqiptarëve të Kosovës, Ibrahim Rugova.

Derisa Rugova ishte në Danimarkë, Norvegji e Gjermani, policia serbe filloi një valë arrestimesh të udhëheqësve shqiptarë.

Gjatë vizitës së tij në Osllo, Rugova përsëriti vërejtjen për mospërfshirjen e Kosovës në veprimet rreth gjetjes së zgjidhjes paqësore në ish-Jugosllavi.

“Qëllimi ynë është Kosova e pavarur, neutrale dhe e demilitarizur, në të cilën do të ketë vend edhe për pakicën serbe”, – nënvizoi Rugova.

Ai apelon tek organizatat ndërkombëtare që të mos ia heqin sanksionet të ashtuquajturës Jugosllavi (Serbia dhe Mali i Zi), para zgjidhjes së çështjes së Kosovës.

– Udhëheqësia serbe në Beograd, ka vendosur një regjim apartheidi në Kosovë. Përdorimi i dhunës është në rritje. Njëkohësisht, ushtria serbe në mënyrë hermetika i ka mbyllur kufijtë me Shqipërinë dhe me Maqedoninë për të na izoluar nga miqtë tanë dhe nga bota, – thotë Rugova.

Policia serbe arrestoi këto ditë kryetarin e Odës Ekonomike, Ismail Kastratin dhe sekretarin, Sylejman Ahmetin.

Shumica shqiptare kanë ndërtuar institucionet paralele në të gjitha fushat, duke bojkotuar në të njëjtën kohë të gjitha organet serbe. Arrestimet e këtyre ditëve janë një përpjekje për t’i shkatërruar këto institucione, thuhet në fund të artikullit të gazetës norvegjeze “Dagbladet”.

 

1 qershor 1995

Sivjet vazhdon punën Seminari mbi Gjuhën, Letërsinë dhe Kulturën Shqiptare

Dekanati i Fakultetit Filologjik të Prishtinës, me anën e një informate me shkrim, njofton se sivjet do të vazhdojë punën seminari mbi Gjuhën, letërsinë dhe Kulturën Shqiptare.

Në njoftimin e këtij Dekanati thuhet: ” Me kërkesën e Presidencës së Kosovës, Fakulteti Filologjik i Prishtinës vendosi që të vazhdojë traditën e mbajtjes së Seminarit mbi Gjuhën, Letërsinë dhe Kulturën Shqiptare, i cili, siç dihet, ka qenë tradicional dhe është mbajtur për çdo vit në Prishtinë, nga viti 1974 deri më 1990. Pas pengesave nga më të ndryshmet, që nga viti 1981, qarqet zyrtare të Beogradit e ndaluan mbajtjen e këtij Seminari, atëherë kur i okupuan të gjitha institucionet universitare të Republikës së Kosovës dhe kjo ndërprerje zgjati katër vite të plota.

Sivjet, pas marrëveshjes ndërshtetëroree të Kosovës dhe Shqipërisë, u vendos që ky manifestim i rëndësishëm shkencor-kulturor të vazhdojë punën, tani si Seminar gjithëshqiptar, që do të mbahet herë në Prishtinë dhe herë në Tiranë, në organizimin e Fakultetit Filologjik të Prishtinës dhe Akademisë së Shkencave të Shqipërisë. Kohë më parë, Këshilli Mësimor-Shkencor i Fakultetit të Filologjisë zgjodhi drejtor të Seminarit prof. dr. Zejnullah Rrahmanin, dekan i këtij fakulteti, ndërkaq Akademia e Shkencave e Shqipërisë, emëroi drejtor dr. Bahri Becin, drejtor i Institutit të Gjuhësisë të Akademisë së Shkencave të Shqipërisë në Tiranë.

Në Seminarin e sivjemë, që do të mbahet në Tiranë, nga 15 gushti deri më 1 shtator të këtij viti, do të marrin pjesë 40 studiues të gjuhës dhe të letërsisë shqipe nga të gjitha kontinentet e botës. Kuadrot e Fakultetit të Filologjisë dhe të Institutit të Gjuhësisë të Tiranës do të jenë bartësit e kurseve dhe të ligjëratave që do të organizohen nga fusha e gjuhës dhe e letërsisë shqipe si edhe nga lëmi i kulturës shqiptare. Në dy ditët e fundit të Seminarit do të organizohet Sesioni shkencor për studiuesit e gjuhës dhe të letërsisë shqipe, me temën bosht “Meshari” i Gjon Buzukut, botimi i të cilit sivjet shënon jubileun 440 vjeçar.

Vazhdimi i mbajtjes së Seminarit mbi Gjuhën, Letërsinë dhe Kulturën Shqiptare ka rëndësi të madhe për riorganizimin e insitucioneve arsimore dhe shkencore të Republikës së Kosovës dhe tregon vendosmërinë për pavarësinë e plotë të saj”.

 

1 qershor 1998

Druhet për një masakër të forcave serbe në fshatin Poklek i Ri

Burimet e LDK-së në Gllogoc i thanë sot QIK-ut se forcat serbe kanë masakruar dje pasdreke disa banorë të fshatit Poklek i Ri të Gllogocit dhe kanë djegur e plaçkitur shumë shtëpi të këtij fshati.

Disa dëshmitarë që janë lejuar të largohen nga fshati kanë deklaruar se forcat serbe hynë furishëm në fshat dhe i tubuan me të shpejtë banorët në radhë të gjata. Një pjesë të tyre i lejuan të largoheshin, duke i urdhëruar që shkonin përtej Bjeshkëve të Nemuna, në Shqipëri, dhe që të mos ktheheshin më kurrë, ndërsa një pjesë të banorëve i ndalën.

Një pjesë e banorëve që janë ndalur në fshat janë vrarë. Burimet e LDK-së në Gllogoc dhe Nënkëshilli i KMDLNJ-së në këtë qytet thanë se janë vrarë Ahmet Berisha (40), Ardian Hazir Deliu (18), vëllezërit Hajriz e Ahmet Hajdini dhe Sahit e Sefer Qorri. Për Ardianin, thuhet se është prerë në fyt.

Një dëshmitar tha se policia i ka ndezur shtëpitë me benzinë. Janë djegur së paku njëzet shtëpi, ndërsa janë plaçkitur gati të gjitha të tjerat. Në shtëpinë e Ahmet Berisha policët kanë plaçkitur mbi 50. 000 DM. Në familjet tjera janë marrë vetura, si një “Golf” e një “Opel kadet” 1. 3. Janë vjedhë shumë risivera e pjesë të tjera të antenave satelitore.

Aksionit të djeshëm të forcave serbe i parapriu një incident banal mes vete i dy policëve serbë.

Burimet e LDK-së thonë se zëvendëskomandanti i policisë serbe në Gllogoc, Trajkoviq kishte bërë ndeshje me një polic tjetër dhe ishte lënduar, mirëpo ai këtë e kishte paraqitur si gjoja sulm të shqiptarëve kundër tij.

Masmediat serbe njoftuan sot se dje në orën 15:00 në fshatin Poklek të Gllogovcit është vrarë nga pusia polici Tomisllav Fatiq.

 

Nga granatimet e vazhdueshme, Deçani e fshatrat po shndërrohen në gërmadha

Kryetari i Nënkëshillit për të Drejtat dhe Liritë e Njeriut në Deçan, Musa Berisha, përmes Ambasadës së Shqipërisë në Beograd, njoftoi sot për gjendje dramatike në qytetin e Deçanit dhe në fshatrat Isniq, Llukë e Epërme, Beleg, Strellc, Vranoc, Carrabreg i Ulët dhe Carrabreg i Epërm e tjerë.

Të gjitha këto fshatra dhe qyteti i Deçanit po sulmohen parreshtur nga ushtria dhe policia serbe. Forcat serbe po shtijnë edhe me topa 220 mm. nga pozicioni Podi i Gështenjave dhe baza ushtarake në Hulaj.

Nga të shtënat e pandërprera, shumë fshatra dhe qyteti i Deçanit po shndërrohen në gërmadha, tha z. Musa Berisha.

 

Në Deçan e rrethinë forcat serbe vranë dje 20 shqiptarë

Musa Berisha, kryetar i Nënkëshillit për të drejtat dhe Liritë e Njeriut tha sot për mjetet e informimit se në Deçan dhe në disa fshatra të tij janë vrarë gjatë dy ditëve të fundit Tafil Kasumaj (47), profesor, Shaban Kasumaj (43), profesor, që të dy nga fshati Lloçan, Besart Dautaj (12) e Teuta Loshaj (21), nga Carrabregu i Epërm, Shyhrete Jeftaj nga Deçani, Beqir Rrustem Krasniqi (49), hoxhë, dhe Halit Zeqë Krasniqi (50), nga Vranoci, Avni Adem Përgjegjaj (32) nga Lumbardhi dhe Hajdar UKë Ukshinaj e Mehmet Ukë Ukshinaj nga Lubeniqi.

QIK-u ka njoftuar dje se janë vrarë edhe dy gra në Carrabreg të Epërm, emrat e të cilave nuk diheshin. Ato janë Hate Blakaj (60) dhe Ajmone Balaj (50) dhe Shaqir Dobraj (80) nga Carrabregu i Epërm, Fazë Krasniqi (43) e Imer Elez Ukaj (50) nga Vranoci, Xajë Kuçi (47) nga Deçani dhe Arif Mahmutdemaj e Rexhep Pavataj nga Strellci.

Musa Berisha tha se janë gjetur të vrarë edhe dy shqiptarë nga Strellci i Epërm, por nuk dihen ende emrat e tyre.

 

Kryetari Rugova u takua me Sekretarin e Përgjithshëm të OKB-së, Kofi Anan

Kryetari i Republikës së Kosovës, dr. Ibrahim Rugova, i shoqëruar nga kryeministri, dr. Bujar Bukoshi, u takua sot në selinë e OKB-së në Nju Jork me sekretarin e përgjithshëm të OKB-së Kofi Ananin dhe bashkëpunëtorët e tij. Gjatë takimit u bisedua për situatën në Kosovë dhe për shtimin e madh të dhunës së forcave serbe ndaj shqiptarëve.

Kryetari i Republikës së Kosovës foli për gjendjen e rëndë, sidomos në komunën e Deçanit, dhe për pozitën e vështirë të njerëzve që janë detyruar të largohen nga shtëpitë e veta për shkak të dhunës së forcave serbe. Ai kërkoi një veprim urgjent të OKB-së me qëllim të ndërprerjes së dhunës dhe të fillimit të procesit paqësor për zgjidhjen e çështjes së Kosovës, në bazë të vullnetit të popullit për pavarësi.

Sekretari i Përgjithshëm i OKB-së, Kofi Anan, përkujtoi se me qëllim të parandalimit të konfliktit në Kosovë dhe të parandalimit të destabilizimit të rajonit janë vendosur në Maqedoni trupat paqëruajtëse.

Dr. Rugova shprehu qëndrimin se trupat paqëruajtëse, si edhe forcat e NATO-s, është e nevojshme të vendosen në territorin e Kosovës dhe jo në kufijtë e saj.

  1. Anan tha se Këshilli i Sigurimit i OKB-së, OSBE-ja, Grupi i Kontaktit, NATO, e institucionet tjera ndërkombëtare po punojnë në drejtim të ndërprerjes së dhunës në Kosovë dhe të parandalimit të konfliktit. Ai tha se status kuoja në Kosovë është e papranueshme dhe shtoi se sa më shpejt duhet të gjendet një zgjidhje e kënaqshme për Kosovën.

Gjatë takimit u bisedua edhe për gjendjen e rëndë humanitare në Kosovë. Kryetari Rugova kërkoi nga z. Anan hapjen urgjente të një zyreje të OKB-së në Kosovë, ndërsa sekretari i përgjithshëm i OKB-së premtoi se do të angazhohet në këtë drejtim.

Related Topics:
Continue Reading

Lajmet

Ditari: Lajmet kryesore që shënuan datën 2 gusht 1993-1998?

Published

11 hours ago

on

August 2, 2026

By

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.
 
 
Foto: Për çdo ditë njoftime për të vrarë në rajonin e Drenicës: Skënderaj
 
 
2 gusht 1993
 
Bastisje në Prishtinë dhe Obiliq
Sot, rreth orës 5 të mëngjesit, policia serbe bastisi shtëpinë e Hamit Avdiut, në rrugën “Xhemail Ibishi” në Prishtinë. Policët kërkonin Ramadan Avdiun, ish-i burgosur i ndërgjegjes, i cili nuk gjendej në shtëpi.
Gjatë bastisjes, policët serbë me vandalizëm thyen dhe demoluan orenditë e shtëpisë, ndërsa me vete morën Hamitin dhe vëllain e Ramadanit, Rexhepin, të cilët ende po mbahen në organet e policisë në Prishtinë.
Në lagjen “Kodra e Trimave” në Prishtinë, rreth orës 8.30 u bastis shtëpia e Hajdin Krasniqit. Policia serbe kërkoi Xhavit Hazirin, ish i burgosur politik, i cili banon te Hajdini. Gjatë bastisjes policia u soll brutalisht ndaj familjes Krasniqi. Xhavit Haziri u arrestua.
Po ashtu sot rreth orës 5 të mëngjesit, policia serbe bastisi familjen e Bajram Hazirit, të cilët kërkuan djalin e tij Hazirin, ish i burgosur i ndërgjegjes.
Sot, rreth orës 5 të mëngjesit, tetë policë serbë bastisën familjet e Idriz Sveçlës dhe të Ahmet Haxhiut, ish i burgosur i ndërgjegjes. Përveç Ahmetit, policët arrestuan edhe Ismail Haxhiun, të cilët siç merret vesh ende po mbahen në lokalet e policisë në Prishtinë.
 
2 gusht 1994
Dje vazhdoi seanca në procesin e montuar në Prishtinë
Dje në Gjyqin e Qarkut në Prishtinë (të udhëhequr nga pushteti okupues serb) përfundoi marrja në pyetje e të shtatë shqiptarëve të akuzuar për gjoja ushtrime ushtarake në Fushën e Labinotit në Shqipëri.
Gjyqtarët e instaluar serbë dje morën në pytje Luan Hetën, Beqir Mulecin, Hysni Francën dhe Bajram Gallapenin. Këta të akuzuar rrëfyen për torturat që ua kishin bërë inspektorët gjatë hetuesisë.
– Nuk kemi bërë kurrfarë ushtrimesh ushtarake në Fushë të Labinotit. Ajo që shkruan në aktakuzë është rrenë. Inspektorët na rrahën e na shanë, na detyruan të nënshkruajmë deklaratat, duke na u kërcënuar edhe me likuidim, deklaruan dje para
gjykatës këta të akuzuar.
Fehmi Leshtrani madje është liruar si i paaftë për ushtri për rekrutim në Nish, meqenëse mbanë syzat minus 12. I paaftë për ushtri ishte edhe Luan Heta. Beqir Muleci nga ish-APJ e patën lëshuar si të paaftë pas gjashtë muajsh shërbimi. Beqiri është i sëmurë mentalisht.
Kryetari i trupit gjykues të të treve Zoran Saveliq kumtoi se seanca do të vazhdojë nesër, kur pritet të lexohen disa shkresa të lëndës. Shtatë mbrojtësit do të paraqesin edhe propozimet e tyre në fazën e procedurës së provave.
 
2 gusht 1995
Në burgun e Dubravës së Istogut – keqtrajtohen të burgosurit shqiptarë
Në burgun e Dubravës në Istog, në të cilin po vuajnë dënimet edhe një numër i madh të burgosurish politikë shqiptarë të Kosovës, më 23 korrik të këtij viti nga gardianët e burgut u keqtrajtuan rëndë, Hysen Gega nga Sallagrazhda e Suharekës, i cili është i dënuar për herë të dytë me 2,5 vjet burg, derisa dënimin e parë e vuajti me 10 vjet. Po për të njëjtën vepër në këtë burg gjendet edhe Gëzim Lushi, po ashtu i burgosur politik, njofton KI i Degës së LDK-së në Suharekë.
Njoftohet se ata nga gardianët e burgut janë keqtrajtuar rëndë, vetëm pse kanë përcjellë programin televiziv në gjuhën shqipe.
Bëhet e ditur se Gëzim Lushit të keqtrajtuar rëndë i është ofruar ndihmë mjekësore vetëm pas tre ditësh, ndërsa Hysen Gega pas një ndëshkimi është duke bërë grevë urie.
Ndërkaq, KI i Degës së LDK-së në Suharekë njofton se në Burgun e Qarkut në Prizren është keqtrajtuar rëndë fizikisht edhe Shaip Mustafa, i cili po mbahet nën hetime, kinse për formimin e SPB-së të Republikës së Kosovës.
Shaip Mustafa momentalisht për shkak të keqtrajtimeve të rënda fizike gjendet i shtrirë në spitalin e Prizrenit.
 
 
2 gusht 1997
Mitrovicë: Policia plaçkiti tre të rinj shqiptarë
Pardje, policia serbe plaçkiti disa tregtarë shqiptarë në lagjen Bair të Mitrovicës.
Policia ndaloi Lulzim M. Nulin (18), ia plaçkiti mallin që po e dërgonte në treg dhe pastaj e ktheu në shtëpinë e tij ku i plaçkiti mallin me vlerë prej 1500 DM.
Policia plaçkiti edhe Burhan Sahatçiun (20) duke i marrë mall me vlerë prej mbi 300 DM dhe Fadil Abitin (20) të cilit i mori mall me vlerë prej mbi 2000 DM.
Të tre tregtarët e plaçkitur u dërguan në lokalet e policisë në Mitrovicë ku u mbajtën rreth tri orë.
Lulëzim Nulit, më 28 korrik policia i pat plaçkitur mall me vlerë prej 700 DM, njofton KI i Degës së LDK-së në Mitrovicë.
 
2 gusht 1998
 
Njoftohet për 8 shqiptarë të vrarë në fshatrat e Drenicës
Gjatë sulmeve të sotme të forcave policore ushtarake serbe në disa fshatra të Drenicës, deri më tash dihet për 8 shqiptarë të vrarë.
Burimet e KMDLNJ njoftojnë se në fshatin Jashanicë të Klinës janë vrarë tre pjesëtarë të UÇK. Ndërkaq në fshatin Shtuticë të Skënderajt janë vrarë katër shqiptarë, për identitetin e të cilëve ende nuk dihet.
Në fshatin Polac dihet se është vrarë Fatmir Xhemajl Veliqi (20).
Njoftohet se sot janë sulmuar edhe fshatrat Polluzhë e Tërstenik.
 
Forcat serbe vranë katër e plagosën katër anëtarë të tjerë të familjes Zeqiri në fshatin Shtuticë të Gllogocit
Sot në fshatin Shtuticë të Gllogocit forcat serbe vranë katër dhe plagosën katër anëtarë të tjerë të familjes Zeqiri, njofton KI i degës së LDK.
Tragjedia mbi këtë familje ndodhi derisa forcat serbe po granatonin në drejtim të fshatrave Polac, Kryshec, Morinë e Shtuticë. Gjatë këtyre momenteve familja Zeqiri derisa po dilte nga shtëpia, për t’i ikur granatimeve të parreshtura të ushtrisë serbe, në oborrin e kësaj familjeje ra një granatë që ishte fatale. Me atë rast u vranë: Sofije Zeqiri (60), Vahide Zeqiri (20), Kada Zeqiri (17) dhe gruaja e Halimit, Emine Zeqiri. Ndërkaq u plagosën: Halim Zeqiri, (flitet se ka vdekur), Besim Zeqiri, Sherif Zeqiri dhe Rizah Zeqiri.
Gjithashtu sulmet serbe shkaktuan dëme të mëdha materiale, duke shkatërruar shtëpi, makina bujqësore, shtalla, e të tjera.

Continue Reading

Lajmet

Ditari: Lajmet kryesore që shënuan datën 1 gusht 1993-1998?

Published

1 day ago

on

August 1, 2026

By

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.
 
Foto: Eliot Engëll
 
 
1 gusht 1994
 
Represioni në Kosovë
Prizren: Parmbrëmë, disa ushtarë serbë në vendin e quajtur Mllaqne, afër liqenit të Bjeshkëve të Sharrit, rrahën rëndë Ramadan Fazliun nga fshati Lubinjë e Prizrenit, në kohën derisa ai po kthehej nga Maqedonia ku kishte blerë naftë.
Bëhet me dije se ushtarët serbë Ramadan Fazliut ia thyen hundën, nofullën, dy dhëmbë, si dhe i shkaktuan lëndime të rënda trupore.
Ramadan Fazliu njoftoi Komisionin për Informim të Degës së LDK-së në Prizren se ushtria serbe po i mban peng edhe 15 bashkëfshatarë të tij, për fatin e të cilëve nuk dihet.
Dje, policia mori në shtëpinë e tij Asllan Temajn nga Prizreni, i cili në stacionin e policisë në Prizren u lidh për radiatori dhe u keqtrajtua brutalisht. Inspektorët serbë u interesuan të dinë nga Asllan Temaj se kush ka armë, rreth veprimtarisë së tij si arsimtar dhe aktivist i LDK-së.
Asllam Temaj në polici u mbajt deri rreth orës 15:00 dhe u porosit që të mos e informojë askend. Asslan temajt policia ia plaçkiti orën e dorës.
Mitrovicë: – Parmbrëmë një patrullë e policisë serbe, nën pretekst të kërkimit të armëve, ishte në shtëpinë e Faik Ibrahimit në fshatin Rekë të Mitrovicës, nga i cili kërkuan që të dorëzojë një pushkë dhe një revole.
Policia urdhëroi Faik Ibrahimin që të paraqitet në stacionin e policisë në Mitrovicë.
Më 28 korrik, policia ishte dy herë në shtëpinë e Qerim Rrudhanit në rr.”Gjon Kenedi” në Mitrovicë për të kërkuar djalin e tij Besim Rrudhanin.
Ndërkaq, pardje policia mori Besim Rrudhanin dhe së bashku me të shkuan në fshatin Shipol në shstëpinë e Xhafer Rrudhanit, nga i cili kërkuan që të dorëzojë një pushkë dhe një revole.
Vushtri: – Më 28 korrik, një policë serb së bashku me rojën e fushës, keqtrajtuan rëndë Nazmi Sadikun dhe vëllain e tij (emrin e të cilëit nuk arritëm ta mësojmë). Rrahja e Nazmi Sadikut dhe vëllait të tij u bë pa kurrfarë shkaku.
Po këtë ditë një ekspeditë e policisë serbe, shkoi në fshatin Shilovicë të Vushtrrisë dhe bastisi nën pretekst të kërkimit të armëve shtëpitë e Ramadan Mehmetit, Hadi e Sadri Begut, Zymer Behramit dhe atë të Izet Krasniqit. Policia gjatë bastisjes rrahu brutalisht Ramadan Mehmetin dhe Sadri Begun.
1 gusht 1995
 
Eliot Engëll: Kosova është një çështje kyçe
Televizioni shqiptar emetoi parmbrëmë një bisedë me kongresistin amerikan Eliot Engëll, njohës i mirë i çështjes shqiptare dhe bashkëkryetar i Këshillit për Çështje Shqiptare në Kongresin Amerikan.
Duke u përgjigjur në një pyetje lidhur me Kosovën, z. Engëll theksoi se Kosova është një çështje kyçe në rajon dhe se një grup kongresistësh në Kongresin Amerikan janë të interesuar rreth situatës në këtë vend.
– Pas meje në mur është një tabelë e Lidhjes Demokratike të Kosovës, të cilën e kam marrë nga Kosova dhe e kam vendosur në zyrën time. Unë besoj se luftën e shqiptarëve të Kosovës për vetëvendosje do ta bënte çdo popull në botë, tha ai.
Duke folur më poshtë për Kosovën dhe angazhimin e Shqipërisë rreth saj, Eliot Engëll tha:
“Presidenti Berisha do të vijë dhe do të diskutojë për Kosovën me presidentin Klinton. Përfaqësues nga Kosova gjithashtu kanë ardhur në Shtetet e Bashkuara të Amerikës dhe kemi biseduar rreth këtij problemi. Fatkeqësisht ngjarjet në Bosnjë i kanë treguar botës dhe Shteteve të Bashkuara të Amerikës se sa brutal është regjimi i Beogradit dhe njerëzit e Millosheviqit. Ata i kanë ndihmuar më së miri serbët e Bosnjës. Unë them me shqetësim se ajo ç’po ndodh në Bosnjë mund të jetë si pikë uji në det krahasuar me atë çka mund të ndodhë në Kosovë, nëse bota nuk i shikon serbët me shumë vëmendje”.
Lidhur zhvillimet politike në katër vjetët e fundit në Shqipëri, z.Engël theksoi: “Unë mendoj se nuk ka vend që të ketë ecur në rrugë më të drejtë të demokracisë. I heq kapelën popullit shqiptar për atë që ka arritur. Është vërtetë për t’u lavdëruar demokracia në Shqipëri”, tha mes tjerash kongresisti amerikan Eliot Engëll në intervistën për Televizionin Shqiptar.
1 gusht 1997
Inspektorët serbë plaçkitën tregtarët shqiptarë në Prishtinë
Dje, rreth orës 12:00, një ekspeditë e inspektorëve dhe e policisë serbe e përbërë prej rreth 40 vetash bëri një plaçkitje të madhe në Tregun me shumicë të pemëve e perimeve në afërsi të Pallatit të Sporteve në Prishtinë.
Dhjetëra tregtarë u plaçkitën me pretekst se nuk kishin lejet për shitje. Për shkak të dëmtimit dhe drojës nga ndonjë ekspeditë e re sot në këtë treg kishte shumë më pak mall.
Disa tregtarë që ishin plaçkitur dje i thanë sot QIK-ut se
shuma e plaçkitjes individuale kapte shumën deri në 15. 000 dinarë serbë.
Bekim Deliaj nga Peja u dënua me 15 mijë dinarë, Zylbar Ramadani nga Prishtina me 800 dinarë, Ultrim Ymeri me 800 dinarë, Afrim Shala me 300 dinarë, Beqir Gashi me 200 dinarë, Besim Muja me 1. 200 dinarë, Ruzhdi Krasniqi me 350, Emin Sopi me 1. 500 dinarë, Fadil Gashi me 1. 200 dinarë, Fadil Dobratiqi me 620 dinarë etj.
Disa nga tregtarët e plaçkitur shqiptarë deklaruan se edhe përkundër kërkesave për leje të shitjes, organet e instaluara të drejtorisë së tregut në Prishtinë nuk u kanë dhënë lejet. Në këtë mënyrë inspektorët serbë mund plaçkisin se herë që dëshirojnë.
1 gusht 1998
Dihet edhe për një të vrarë e tre të plagosur në Rahovec
Gjatë sulmit të forcave serbe në Rahovec është vrarë edhe Nexhemdin Mushla (61), i cili është varrosur aty edhe ku është vrarë, në oborrin e shtëpisë së tij.
Një i afërm i tij, që kishte arritur të largohet nga Rahoveci, i tha QIK-ut se është plagosur edhe vajza e Nexhmedinit, Hajria, si edhe fqinjtë e tyre Naime e Driton Kadriu.
Skënderaji po i ngjan një baze ushtarake të forcave serbe
Edhe mbrëmë në qytetin e Skënderajt, arriti një konvoj i madh i forcave të ushtrisë serbe i përbërë nga 37 kamionë me ushtarë serbë, të cilët u vendosën në qytetin e Skënderajit dhe në fshatin Polac, njofton NKMDLNJ në Skënderaj.
I njëjti burim njofton se qyteti i Skënderajt është shndërruar në një bazë ushtarake, në të cilin janë vendosur mijëra ushtarë e policë serbë.
Dëshmitarët okularë kanë njoftuar se policia serbe ka ndëryrë pothuaj në secilën shtëpi shqiptare në Skënderaj dhe ka plaçkitur, thyer e demoluar çdo gjë që ka gjetur. Deri tash në tërësi është shkatërruar lagja “Skënderaj 2” dhe Lagjja e Re, ku tashmë nuk ka mbetur asnjë shtëpi e pashkatërruar nga forcat serbe.
Gjendje e rëndë dhe dramatike po mbretëron edhe në rrethinën e Runikut dhe të Turiçecit. Forcat serbe kanë granatuar lagjen Hajzeraj në Leçinë, si dhe ka djegur fshatrat si Padalishtin, Çitakun, Runikun, Kastriotin, Vitakun, Qubrelin, Radishevën e Kotorrin. Sipas informacioneve, forcat e policisë dhe të ushtrisë serbe në zonën e Drenicës po bëjnë spastrim etnik.
I njëjti burim njofton se deri tash nuk dihet për fatin e shumë banorëve shqiptarë si gra, pleq e fëmijë, të cilët kanë mbetur të bllokuar në fshatrat e lartëshënuara, në të cilat kanë hyrë forcat serbe.
Bëhet e ditur se vetëm në fshatin Çubrel kanë mbetur disa kufoma pleqësh ende të pavarrosura.
Ndërkaq, nga fshati Bingjë i Klinës, i banuar kryesisht me serbë, forcat serbe po granatojnë fshatrat e Drenicës, ndërsa granatime kanë arritur deri në Burojë, ku është rrezikuar popullsia civile, e cila ka filluar masovisht t’i braktisë vatrat e tyre.
Banorët shqiptarë që kanë braktisur shtëpitë e tyre, janë strehuar madje edhe në tunelet hekurudhore, ndërsa po bëhen 5 ditë që këtë trevë nuk e ka vizituar asnjë institucion humanitar.
Në këtë hapësirë tash ka filluar të ndodhë edhe katastrofa humanitare, pasi mungojnë të gjithë artikujt ushqimorë, sanitarë e higjenik, ndërsa as që mund të flitet për medikamente.
NKMDLNJ i Skënderajt pohon se propaganda serbe te popullata e këtushme shqiptare po zgjon neveri. Kjo propagandë në njërën anë po provon që ta mashtrojë opinionin botëror, se kinse në rajonin e Drenicës janë krijuar kushtet për kthimin e të ikurve nga shtëpitë e tyre, derisa në anën tjetër mijëra forca të policisë dhe ushtrisë sebe po depërtojnë dhe po i terrorizojnë banorët shqiptarë të Drenicës.

Continue Reading

Lajmet

Profesionet me rritjen më të shpejtë në botë janë pjesë e ofertës akademike të UBT-së

Published

2 days ago

on

July 31, 2026

By

Në një kohë kur teknologjia po ndryshon rrënjësisht mënyrën se si funksionojnë ekonomitë, bizneset dhe institucionet publike, një pyetje bëhet gjithnjë e më e rëndësishme për të rinjtë: cilat profesione do të jenë më të kërkuarat në pesë apo dhjetë vitet e ardhshme?

Përgjigjja vjen nga Future of Jobs Report 2025, raporti i World Economic Forum, i cili analizon transformimin e tregut global të punës përmes të dhënave të mbledhura nga mijëra punëdhënës në mbarë botën. Sipas raportit, deri në vitin 2030 do të krijohen rreth 170 milionë vende të reja pune, ndërsa miliona role tradicionale do të transformohen ose do të zëvendësohen si rezultat i inteligjencës artificiale, automatizimit, tranzicionit të gjelbër dhe transformimit digjital.

Në krye të listës së profesioneve me rritjen më të shpejtë renditen Big Data Specialists, FinTech Engineers, Artificial Intelligence and Machine Learning Specialists, Software and Applications Developers, Security Management Specialists, Information Security Analysts, Data Scientists, UI/UX Designers, Internet of Things Specialists, Environmental Engineers, Renewable Energy Engineers, si dhe specialistët e automjeteve autonome dhe elektrike.

Në këtë kontekst, një analizë e ofertës akademike të UBT-së tregon një përputhje të qartë me prioritetet që identifikon World Economic Forum. Institucioni ka ndërtuar një ekosistem të arsimit të lartë që i përgjigjet transformimit të tregut të punës, duke ofruar programe studimi në fusha që lidhen drejtpërdrejt me profesionet me rritjen më të shpejtë në nivel global.

Në fushën e teknologjisë, UBT ofron programe si Shkenca Kompjuterike dhe Inxhinieri, Sisteme të Informacionit, Inxhinieri e Mekatronikës, si dhe specializime në Inteligjencë Artificiale, Data Science, Cyber Security, Cloud Computing, Machine Learning, Internet of Things (IoT) dhe Robotikë, duke përgatitur profesionistë për rolet që raporti i World Economic Forum i rendit ndër më të kërkuarat në botë.

Një nga profesionet me rritjen më të shpejtë sipas raportit është FinTech Engineer, një profil që po transformon sektorin financiar përmes teknologjisë. Duke e parë këtë zhvillim, UBT ka zhvilluar programin FinTech, i cili kombinon financën, teknologjinë, analizën e të dhënave dhe inovacionin digjital, duke përgatitur specialistë për industrinë financiare të së ardhmes.

Transformimi global nuk kufizohet vetëm në sektorin e teknologjisë. Raporti evidenton se tranzicioni drejt ekonomisë së gjelbër po krijon një kërkesë të jashtëzakonshme për Environmental Engineers, Renewable Energy Engineers dhe specialistë të sistemeve energjetike. Për këtë arsye, programet e Inxhinierisë së Mjedisit, Inxhinierisë së Energjisë dhe Inxhinierisë Mekanike në UBT marrin një rëndësi strategjike, duke përgatitur profesionistë që do të kontribuojnë në zhvillimin e energjisë së pastër, teknologjive të qëndrueshme, efikasitetit energjetik dhe infrastrukturës moderne.

Në të njëjtën kohë, zhvillimi i industrisë automobilistike drejt automjeteve elektrike dhe autonome po krijon mundësi të reja për inxhinierët mekanikë dhe ekspertët e sistemeve inteligjente, fusha në të cilat UBT ka investuar në laboratorë modernë dhe mjedise praktike të të nxënit.

Raporti i World Economic Forum evidenton gjithashtu rritjen e vazhdueshme të kërkesës për profesionet që lidhen me sigurinë. Përveç Information Security Analysts, të cilët mbrojnë infrastrukturat digjitale nga sulmet kibernetike, raporti rendit edhe Security Management Specialists, si rezultat i sfidave të reja gjeopolitike dhe rritjes së nevojës për menaxhimin e rreziqeve. Në këtë drejtim, UBT ofron programe në Studime të Sigurisë, krahas programeve në Cyber Security, duke kombinuar sigurinë fizike, sigurinë kombëtare dhe atë digjitale në një qasje multidisiplinare.

Ndërkohë, transformimi i industrisë ushqimore dhe rritja e fokusit global në sigurinë ushqimore, teknologjitë e prodhimit dhe zhvillimin e qëndrueshëm kanë rritur rëndësinë e profesionistëve të Shkencave të Ushqimit. Përmes këtij programi, UBT përgatit ekspertë që kontribuojnë në kontrollin e cilësisë, nutricionin, inovacionin ushqimor, teknologjinë e përpunimit dhe standardet ndërkombëtare të sigurisë ushqimore.

Përtej programeve akademike, UBT ka ndërtuar zhvillimin mbi një ekosistem të plotë inovacioni. Institucioni ofron mbi 50 programe studimi, mbi 150 fusha specializimi, më shumë se 200 laboratorë modernë, bibliotekën më të madhe akademike në Kosovë. UBT Smart City, është kthyer në rol model dhe ka tërhequr interesin e institucioneve dhe studiuesve ndërkombëtarë për t’u analizuar si praktikë e zhvillimit universitar, ndërsa së fundmi USA Today e ka përshkruar UBT-në si “Silicon Valley of the Balkans”, duke theksuar rolin në ndërtimin e një ekosistemi të avancuar të teknologjisë, laboratorëve, parqeve teknologjike dhe inovacionit që përgatit profesionistë për tregun global.

Përmes laboratorëve të specializuar dhe qendrave kërkimore, studentët angazhohen në projekte që lidhen me Artificial Intelligence, Big Data, Cyber Security, Internet of Things, Cloud Computing, Virtual Reality, Extended Reality, Smart Cities, 5G, automatizimin industrial dhe transformimin digjital. Kjo qasje i afron ata me teknologjitë që sot po udhëheqin ekonominë globale dhe që sipas World Economic Forum do të përcaktojnë profesionet e dekadës së ardhshme.

Raporti vlerëson se deri në vitin 2030, rreth 39% e aftësive aktuale të fuqisë punëtore do të transformohen, ndërsa punëdhënësit do të kërkojnë gjithnjë e më shumë profesionistë me kompetenca në analizën e të dhënave, inteligjencën artificiale, zhvillimin e softuerit, sigurinë, inxhinierinë, energjinë, qëndrueshmërinë, kreativitetin dhe komunikimin.

Nëse dekada e kaluar u karakterizua nga revolucioni i internetit, dekada që po jetojmë po karakterizohet nga inteligjenca artificiale, ekonomia e të dhënave, tranzicioni i gjelbër dhe transformimi digjital. Treguesit globalë dëshmojnë se profesionet me rritjen më të shpejtë janë pikërisht ato që ndërthurin teknologjinë, inovacionin dhe qëndrueshmërinë. Përmes programeve në Shkenca Kompjuterike dhe Inxhinieri, Sisteme të Informacionit, FinTech, Studime të Sigurisë, Inxhinieri të Mjedisit, Inxhinieri të Energjisë, Inxhinieri Mekanike, Shkenca të Ushqimit, Media dhe Komunikim, si dhe dhjetëra programeve të tjera të orientuara drejt inovacionit, UBT po kontribuon në përgatitjen e profesionistëve që do të jenë pjesë e transformimit të ekonomisë globale dhe e tregut të punës të së ardhmes.

Continue Reading

Lajmet

34 të vdekur dhe mijëra migrantë në Ceutë, Spanja forcon masat në kufi

Published

2 days ago

on

July 31, 2026

By

Të paktën 34 persona kanë humbur jetën gjatë përpjekjeve për të kaluar kufirin nga Maroku drejt qytetit autonom spanjoll të Ceutës, në Afrikën e Veriut. Ndërkohë, rreth 60 mijë migrantë raportohet se kanë hyrë në territorin e Ceutës brenda 24 orëve të fundit, duke krijuar një situatë të jashtëzakonshme në kufirin mes Marokut dhe Spanjës.

Kryeministri i Spanjës, Pedro Sánchez, ka deklaruar se qeveria do të përdorë të gjitha mjetet në dispozicion për të garantuar sigurinë në Ceutë, pas tensioneve të fundit të shkaktuara nga fluksi i madh i migrantëve.

“Qeveria spanjolle qëndron me qytetin e Ceutës. Ne e kuptojmë shqetësimin dhe pasigurinë që qytetarët po përjetojnë në orët e fundit,” u shpreh Sánchez.

Ai theksoi se shteti do të angazhojë të gjitha burimet e nevojshme për të mbrojtur qytetarët dhe për të ruajtur rendin dhe bashkëjetesën në këtë territor spanjoll në bregdetin e Afrikës së Veriut.

“Qeveria do të përdorë çdo burim të shtetit për të garantuar sigurinë e qytetarëve të Ceutës,” shtoi ai, duke nënvizuar se asnjë qeveri e mëparshme nuk ka investuar aq shumë burime në këtë territor sa administrata aktuale.

Sánchez njoftoi gjithashtu se autoritetet do të vendosin barriera lundruese në zonën e molit si masë e përkohshme, ndërsa po shqyrtohen edhe ndryshime ligjore për menaxhimin e situatës.

Ceuta, e vendosur në bregun verior të Afrikës dhe e rrethuar nga territori maroken, mbetet një nga pikat kryesore të hyrjes së migrantëve drejt Bashkimit Evropian. Fluksi i ditëve të fundit ka rritur ndjeshëm tensionet në këtë zonë kufitare, duke shtuar presionin mbi autoritetet spanjolle./A.K/

Continue Reading

Të kërkuara