Lajmet

Ditari: Çfarë ngjarjesh shënuan datën 16 maj 1993-1998?

Published

3 months ago

May 16, 2026

UBTNews

Lajmet e datës 16 maj pasqyrojnë jetën reale në Kosovë, në këtë periudhë shumë të rëndë. Nga represioni i përditshëm në fillimvitet e nëntëdhjeta deri te lufta e vitit 1998.

(Foto: Pas gati dhjetë ditësh, u mor vesh se Bahri Fazliu ishte vrarë më 5 maj në kufirin Shqipëri-Mali i Zi, afër fshatit Vuthaj)

16 maj 1994

Lajm i plotë:

Policia plagosi Zekë Hajrizin në oborrin e tij

Më 14 maj, rreth orës 11:00 në fshatin Strofc, policia serbe plagosi në oborrin e tij Zekë Hajrizin (38). Policia shtiu me automatik në Zekën derisa ai po bënte përpjekje për të ikur. Njoftohet se Zekë Hajrizi po kërkohej nga policia që prej dy javësh, nën pretekst se duhej të dorëzonte armën pa leje. Mirëpo ai nuk iu kishte përgjigjur thirrjes për t’u paraqitur në stacionin e policisë në Vushtrri.

Policia pasi e plagosi e dërgoi Zekën në stacionin e policisë në Prilluzhë e më vonë në stacion të policisë në Vushtrri.

Janë keqtrajtuar edhe anëtarët e familjes, duke përfshirë edhe babain Brahim Hajrizin (80) dhe të ëmën Nailen (75).

Anëtarët e familjes së të plagosurit kanë shkuar në spitalin e Mitrovicës për t’u interesuar, por përgjegjësit e atij spitali kanë deklaruar se Zeka nuk është pranuar në spital.

Supozohet se i plagosuri ende mbahet në stacionin e policisë.

Fshati Strofc i komunës së Vushtrrisë ka qenë objekt i ekspeditave të shpeshta ndëshkuese të forcave serbe. Më 14 maj, kur u plagos Zekë Hajrizi, policia bastisi dhe torturoi anëtarët e familjes së Selman Hasanit (djemtë Sokolin, Istrefin, Shabanin dhe Ilmiun), si dhe Ilmi Ademin (me të meta psikike) dhe të miturin Bekim Ademi (16).

Lajme të tjera:

Kryetari Rugova viziton disa vende evropiane

Të shtunën përfundoi “Mitingu i poezisë ’94”

“Deili Telegraf”: Presidenti shqiptar kërkon zgjidhjen e çështjes së Kosovës

Represioni në Kosovë

Nga shtëpia e shëndetit në Suharekë u dëbuan 11 punëtorë

Beogradi i shqetësuar për natalitetin e lartë të shqiptarëve në Kosovë

Drama shqiptare e TPK-së nuk merr pjesë në takimet “Joakim Vujiq”

Ballkani duhet t’u takojë vendeve të rajonit

Shqiptarët u akuzuan për marrëdhënie të këqija ndërnacionale në Medvegjë

Kosova është nën kontrollin e rreptë policor e ushtarak të Serbisë

16 maj 1995:

Lajm i plotë:

Ushtria serbe vrau një shtetas të Shqipërisë dhe plagosi një tjetër

Të shtunën (më 13 maj) në orën 17,30, në rajonin e piramidës kufitare D-14/2, rreth 30 metra thellësi të territorit të Shqipërisë, dy ushtarakë serbë vranë me armë zjarri Ferid Ramadan Vllaçën, 31-vjeçar dhe plagosën Meflan Halilhoxhën 48-vjeçar nga fshati Pakishtë, rrethi i Kukësit.

Në njoftimin e TVSH-së thuhej se ishin takuar ekspertët e dy vendeve dhe se ata kishin konstatuar se të dy bashkëfashtarët ishin qëlluar në befasi dhe pa asnjë shkak derisa kullosnin bagëtinë në territorin shqiptar.

Këtë e vërtetuan edhe provat materiale në vend të ngjarjes, njollat e shumta të gjakut rreth 30 metra në thellësi të territorit shqiptar si dhe një numër gëzhojash të armëve automatike në përdorim të ushtrisë serbe pesë deri gjashtë metra në thellësi të territorit shqiptar.

Lajme të tjera:

UE – me forca speciale për raste krizash

Ushtrime të përbashkëta të forcave speciale detare shqiptare e amerikane

Procesi ndaj Nevzat Halilit vazhdon pasnesër

Edhe dy ish-policë mohuan akuzën në Gjilan

Gjykimi i ish-policëve shqiptarë në Prizren vazhdon më 25 maj

Vazhdon paraburgimi i veprimtarëve në Kaçanik

Përfundoi Festivali i dhjetë i filmit shqiptar

Në Stokholm mbahet seminari për çështjen shqiptare në Ballkan

Dy mësimdhënës të SHMT “M. Beçikemi” në Vushtrri u dënuan me nga 10 ditë burg

Bastisje të policisë serbe në komunën e Podujevës

Java e rinisë evropiane në Strasburg

Përkujtohet shkrimtari Rexhep Elmazi

Beogradi përpiqet të krijojë problemin e paqenë të serbëve në Shqipëri

Gazetat serbe paralajmërojnë vendosjen e 10 mijë refugjatëve serbë në Kosovë

Pandeli Majko: “Për Kosovën të gjithë jemi të një mendimi”

Mitrovicë: Një shqiptarë u mor për herë të tetë në polici

Në Kosovë një rast i etheve hemorragjike

16 maj 1997:

Lajm i plotë:

Vrasja e qytetarit nga Gurbardhi i Malishevës ende e pasqaruar

Pas vrasjes në rrethana të pasqaruara me armë zjarri më 13 maj të Kapllan Isuf Berishës (50), nga Gurbardhi i Malishevës, KI i Degës së LDK-së në Malishevë, sjell informata plotësuese.

I ndjeri në ditën kritike kishte dalë në fushë dhe nga persona të panjohur vritet me tre plumba nga pushka e gjuetisë, ndërsa trupi i tij është gjetur të nesërmen rreth orës 5:00.

Të afërmit e të ndjerit theksojnë se nuk dihet motivi i kësaj vrasjeje, pasi ai nuk kishte raporte të këqija me askënd.

Të përkujtojmë se viteve të fundit, policia serbe ka bastisur disa herë shtëpinë e të ndjerit Kapllan I. Berisha, si dhe e ka keqtrajtuar fizikisht me pretekst të kërkimit të armëve.

Pardje, policia serbe ua ka konfiskuar pushkët e gjuetisë katër vetave, ndërsa pronarët e tyre i ka urdhëruar që të paraqiten në polici. Bëhet e ditur se policia ka gjetur dy nga tre gëzhojat e plumbave me të cilët është vrarë Kapllani.

Lajm i plotë

Dhuna e përditshme në Kosovë

Gjilan: – Më 6 maj, policia serbe me pretekst të kërkimit të armëve kërkoi në shtëpitë e tyre babë e bir Nazim e Jakup Halitin nga Dobërçani.

Po këtë ditë, në stacionin e policisë serbe në Gjilan u mor në pyetje Sadri Daku, kryetar i Nëndegës VII të FR të LDK-së në Gjilan. Ai nga inspektorët serbë u pyet për një vizitë të tij kohë më parë në Shqipëri, si dhe u pyet për aktivitetin e Forumit të Rinisë. Atij iu kthye pasaporta e cila i qe marrë kohë më parë, ndërsa nga inspektorët serbë u kërcënua se në rast se vazhdon të merret me aktivitet do të likuidohet!

Pardje, në të ashtuquajturën bisedë informative u thirr edhe Naip Rexhepi, nënkryetar i Nendegës së LDK-së në Malishevë. Meqë ai nuk gjendej në shtëpi, policët serbë urdhëruan nënën e tij që Naipi të paraqitet në polici.

Lipjan: – Dje, policia serbe me pretekst të kërkimit të armëve ishte në shtëpinë e Elvis Selimit (20) në Banullë të Lipjanit. Meqë ai nuk gjendej në shtëpi, policia urdhëroi anëtarët e familjes së tij që Elvisi të paraqitet në stacionin e policisë serbe në Lipjan.

Njoftohet se Elvis Selimi është keqtrajtuar rëndë.

Istog: – Më 11 maj, policia serbe, me pretekst të dorëzimit të armëve mori në shtpinë e tyre babë e bir Hajriz e Hamdi Idrizajn nga Zhakovci, të cilët u dërguan në stacionin e policisë serbe në Istog. Nga Hamdiu policia kërkoi edhe një thikë, ndërsa më vonë edhe e keqtrajtoi fizikisht.

Po këtë ditë, në postkomandën e policisë serbe në Rakosh u mor në pyetje edhe Izet Haxhijaj nga Rakoshi.

Më 14 maj, policia mori në pyetje edhe Nexhmedin Haxhiaj (25) nga Rakoshi, i cili pa kurrfarë shkaku është keqtrajtuar fizikisht.

Pardje policia serbe mori në pyetje Nazmi Bytyçin, arkatar i KKF-së në Istog. Ai është pyetur kryesisht për punën e tij në KKF të Istogut, si dhe është urdhëruar që të paraqitet sërish më 16 maj në polici.

Vushtrri: – Dje, një patrullë e policisë serbe, me pretekst të kërkimit të armëve ishte në familjet e vëllezërve Beqir, Shaqir e Shaban Begu në Vushtrri. Ata u kërcënuan se nese nuk i dorëzojnë armët, policia do t’i kërkojë sërish.

Më 11 maj, policia serbe me pretekst se i ka dëmtuar pyjet, ishte në shtëpinë e Shaqir Asllanit në Beçuk. Ai u urdhërua që të paraqitet në polici së bashku me djalin e tij Sabriun, të cilët në polici u maltretuan rreth katër orë.

Mitrovicë: – Nga 30 prilli deri më 10 maj të këtij viti për çdo të dytën ditë është urdhëruar që të paraqitet në stacionin e policisë në Mitrovicë, Jetullah Hajdrai (42) nga lagjja Tavnik e Mitrovicës. Njoftohet se z. Hajdari po thirret me pretekst të dorëzimit të armëve.

Malishevë: – Gjatë muajit të kaluar policia sebe postkomandës së Kijevës dhe ajo e Rahovecit, me pretekst të kërkimit të armëve ishin në katër familje shqiptare.

Bëhet e ditur se në Drenoc të Malishevës janë bastisur dy familje, me të njëjtin pretekst, ndërsa gjatë muajit që shkoi policia ka kërkuar dhe ka mbajtur në stacionin e policisë nëntë veta nga kjo komunë.

Lajm i plotë:

Një qytetar nga Panorci i Malishevës u mor 25 herë në polici

Banush Sahitaj (60) nga Panorci, tash një kohë është në shënjestër të policisë serbe dhe ai deri tash është marrë në polici dhe është keqtrajtuar fizikisht rreth 25 herë, njofton KI i Degës së LDK-së në Malishevë.

Njoftohet se vitin e kaluar qytetarët serbë e malazezë ia kanë prerë mbi 1 hektar pyje, me pretekst se hapësira pyjore nuk ishte e tij!

Lajm të tjera:

Konferencë me gazetarë e kryetarit të Republikës dr. Ibrahim Rugova

Biseda rreth arsimit shqip në UNESCO

PE kërkon hapjen e Zyrës Informative në Prishtinë

KMDLNj: Në Kosovë, gjatë prillit, u vranë 3 dhe u keqtrajtuan 272 persona

Në Prishtinë filloi dënimi me burg i shqiptarëve që kanë blerë prona serbe

Parlamenti i Shqipërisë miratoi ligjin e zgjedhjeve, socialistët nuk morën pjesë në votim

Në Shqipëri krijohet Bashkimi për Demokracinë

U identifikua viktima e vetme e gjetur nga tragjedia e Otrantos

Shefi i ushtrisë serbe qëndroi në brezin kufitar me Shqipërinë

Festivali i recituesve “Presheva ’97” do të mbahet nga 22-24 maj

Mbahet Mitingu i 34-të i Poezisë

Tërmet në Shqipëri

Nga Instituti i Zveçanit inxhinierët shqiptarë largohen nga vendet e tyre të punës

16 maj 1998

Ora 14:30:

Lajm i plotë:

Forcat serbe vranë dy shqiptarë në Çitak të Skënderajt

Rifat Çitaku (55) dhe nipi i tij Muhameti (24) nga fshati Çitak u vranë dje rreth orës 10:00 nga pjesëtarët e forcave serbe që udhëtuan me një konvoj prej rreth 100 automjetesh nga Mitrovica në Skënderaj e pastaj në Rakosh të Istogut. Gjysh e nip u vranë pas shpine duke ikur nga pjesëtarët e forcave serbe.

Fadil Geci, kryetar i nëndegës së LDK-së në Llaushë i tha QIK-ut se forcat serbe ndërmorën dje prej orës 10 deri në 18:00 një aksion kundër fshatrave Çitak e Padalishtë. Z. Geci tha se për pasojat e aksionit në Padalishtë nuk ka të dhëna, ndërsa policia ka hyrë në fshatin Çitak dhe ka plaçkitur shtëpitë. Beqir Çitakut, i janë marrë dy vetura kombi Volsvagen me regjistrim dhe dokumente në rregull dhe çdo gjë e vlefshme në shtëpi. Beqirin e kanë marrë në stacion dhe e kanë kërkuar djalin e tij Naserin dhe i janë kërcënuar se gjoja në shtëpinë e tij po mban terroristë.

Geci tha se janë gjtuajtur me armë shtëpitë e Hysen, Bajram, Shaqir, Sadri, Hamdi, Halit dhe Hajzer Çitakut.

Në një njoftim të Degës së LDK-së në Skënderaj thuhet se policët serbë vepruan në fshatin Çitak në stilin e hajnave, duke vjedhë çdogjë me vlerë nga shtëpitë e Zenel Sadik Loshit, Adem Tahir Shalës, Imer Hasan Shalës, Xhevdet Kadri Loshit, Gani Shalës, Haxhi Metë Zeqirit dhe Alush Qazim Loshit, të cilit ia plaçkitën veturën e tipit “Golf dysh”.

Në këtë njoftim thuhet se me plumbë pushkësh është goditur shtëpia e Demë Hasan Loshit, por për fat të mirë nuk është vrarë kush.

Në shtëpinë e Adem Shalës, pas kryerjes së aksionit, policia serbe me shkronja shqipe ka shkruar “UQK”. Dyshohet se në mesin e policëve ka pasur edhe kolaboracionistë shqiptarë nga komuna e Istogut.

Varrimi i dy personave të vrarë do të bëhet sot në varrezat e fshatit Çitak në ora 15.

Lajme të tjera:

Nuk është i saktë pohimi i mediumeve serbe për tre shqiptarë të vrarë në Rakosh

Granatime të fshatrave Kopiliq, Turiçec e Vojnikë

Thyerje të lokaleve zejtare në Skënderaj

Gjendje e rëndë në Deçan – sërish të shtëna drejt Baballoqit

Në hyrje të Podujevës policia keqtrajton kalimtarët

Nuk lejohet hyrja e kamionëve me mall në Kosovë

Snajperistët serbë u vendosën në një shtëpi të pabanuar në afërsi të Rahovecit

Rahovec: Policia serbe kidnapoi familjen shtatanëtarëshe të Zeqir Krasniqit

Në Rahovec nuk u mbajt protesta gjithëpopullore

Policët serbë shtinë në drejtim të fëmijëve

Kaçanik: Midis fshatrave Gërlicë e Epërme dhe Gabrricë policia serbe ka shtënë me armë zjarri

Lajm i plotë:

Bahri Fazliu u vra më 7 maj në Plavë

Në zonën e kufirit me Shqipërinë, në Plavë, më 7 maj është vrarë Bahri (Rrahman) Fazliu nga fshati Llaushë i komunës së Podujevës.

Siç njoftoi mbrëmë Televizioni Shqiptar, Bahriu ishte anëtar i Lëvizjes Kombëtare për Çlirimin e Kosovës dhe i Ushtrisë Çlirimtare të Kosovës. Në njoftim thuhej se ai ra heroikisht duke luftuar me forcat e agresorit serb.

Në njoftim thuhet se varrimi i tij do të bëhet në vendlindjen e tij, në Llaushë të Podujevës, pranë eshtrave të vëllait të tij Fahriut, i cili po ashtu ra heroikisht në vitin 1989, ndërsa për këtë opinioni do të njoftohet me kohë.

Organet e ushtrisë jugosllave Bahri Fazliun e kishin identifikuar si Fatmir Gashi. Trupi i tij pa jetë është mbajtur disa ditë në morgun e spitalit në Berane të Malit të Zi.

Ndërkohë, gazeta “Bujku” njofton sot se trupi i pajetë i Bahri Fazliut është varrosur pardje në varrezat e fshatit Vuthaj të komunës së Plavës me të gjitha nderimet tradicionale të shqiptarëve të kësaj ane.

Lajme të tjera:

Në protestën gjithëpopullore në Prishtinë morën pjesë rreth 100 mijë shqiptarë

Aeroplanët vëzhgues amerikanë “avaks” mbi territorin e Maqedonisë

Në Gostivar u varros polici maqedonas që ka luftuar në Drenicë

Shtatëvjeçari i plagosur – në shok dhomë

Të shtëna sporadike në Morinë, Ponoshec e Smolicë

Drejtuesit e Zyrës së Republikës së Kosovës në Bruksel u prit Senatin e Belgjikës

Raport mbi shkeljen e të drejtave dhe të lirive të njeriut në Kosovë gjatë muajit prill 1998

Të shtëna të policisë serbe midis fshatrave Gërlicë e Epërme dhe Gabrricë

UPSUP e çmon të papranueshëm dialogun pa ndërmjetësim ndërkombëtar

Civilët serbë keqtrajtuan dy të rinj shqiptarë

Policët serbë rrahën Bekim Sumën në Han të Elezit

Vendi

Studio regji, aktrim dhe dramaturgji në UBT — në programin Artet Dramatike

Published

28 minutes ago

August 25, 2026

UBTNews

Programi i Arteve Dramatike në UBT është ndërtuar për ata që duan të bëhen profesionistë të përgatitur, jo vetëm të talentuar. Ky është programi më inovativ i nivelit bachelor në fushën e arteve dramatike, me tri orientime specializimi: aktrim, regji dhe dramaturgji.

Aktrimi të përgatit për skenën, kamerën dhe mikrofonin, duke ndërtuar trupin, zërin, teknikën dhe interpretimin. Regjia të mëson të lexosh një tekst, të ndërtosh një vizion dhe të udhëheqësh një ekip nga ideja e parë deri në shfaqjen ose projektin e përfunduar. Dramaturgjia të përgatit për të shkruar tekst skenik dhe skenar, për të ndërtuar personazhe, konflikt dhe strukturë. Të tri orientimet ndajnë një bazë të përbashkët dhe punojnë bashkë në prodhime konkrete sikurse ndodh në industri reale.

Misioni i programit të Arteve Dramatike është të përgatisë profesionistë krijues dhe kritikë, që kontribuojnë në zhvillimin kulturor në Kosovë dhe më gjerë. Kjo nënkupton një qasje që e ndërthur artin me mendimin kritik: studenti nuk mëson vetëm si të krijojë, por edhe çfarë kuptimi ka një vepër, si komunikon me publikun dhe çfarë përgjegjësie mbart ndaj shoqërisë ku lind.

Programi ofron njohuri të avancuara në teori dhe praktikë dramatike, duke e lidhur bazën teorike drejtpërdrejt me punën në sallë provash dhe në set. Në të njëjtën kohë, nxit zhvillimin e kapaciteteve krijuese origjinale në aktrim, regji dhe dramaturgji, duke inkurajuar gjuhën artistike personale të secilit student në vend të formulave të gatshme. Përgjegjësia etike dhe profesionale është pjesë e formimit, jo shtesë e tij.

Studentët mësojnë standarde të qarta në prodhimin artistik, në punën me ekipin dhe në raportin me publikun, sepse arti i mirë ndërtohet mbi besim dhe disiplinë. Krahas kësaj, programi pajis studentët me aftësi ndërdisiplinare që funksionojnë njëkohësisht për teatër, film dhe media digjitale. Kjo qasje e gjerë nuk është rastësore. Arti dramatik i sotëm nuk jeton më vetëm në një skenë: një aktor filmon serial dhe luan në teatër, një regjisor kalon nga shfaqja në përmbajtje digjitale, një dramaturg shkruan tekst skenik dhe skenar njëkohësisht. Programi është ndërtuar mbi këtë realitet, me punë ekipore dhe prodhime konkrete gjatë studimeve, sepse eksperienca fitohet duke krijuar, jo vetëm duke lexuar për krijimin.

Të diplomuarit dalin të përgatitur për një spektër të gjerë rrugëtimesh profesionale: aktorë në teatër, film dhe televizion, regjisorë të shfaqjeve skenike dhe projekteve audiovizive, dramaturgë dhe skenaristë, krijues përmbajtjeje për media digjitale, si edhe kritikë, studiues, pedagogë dhe menaxherë projektesh kulturore.

Ky program i drejtohet të gjithë atyre që kanë pasion për skenën dhe rrëfimin, që duan të zhvillojnë zërin e tyre artistik dhe të punojnë me disiplinë profesionale. Nuk kërkohet të jesh i përsosur, kërkohet të jesh i gatshëm për të punuar.

Nëse skena, kamera dhe rrëfimi i historive të tërheqin, ky program është vendi ku ky pasion kthehet në profesion. Në UBT do të gjesh mentorë, ekip dhe hapësirë për të provuar dhe për të krijuar. Talenti e hap rrugën, puna e ndërton karrierën. Zgjidh orientimin tënd — aktrim, regji apo dramaturgji, apliko në programin e Arteve Dramatike në UBT dhe fillo atje ku fillojnë historitë.

Lajmet

Caktohet seanca për 53 të akuzuarit për krime lufte në Kosovë

Published

1 hour ago

August 25, 2026

UBT News

Gjykata Themelore në Prishtinë, Departamenti Special, ka caktuar seancën e shqyrtimit fillestar ndaj 53 personave të akuzuar për veprën penale “Krime Lufte kundër popullsisë civile”.

“Departamenti Special, njofton opinionin publik se ka caktuar seancën e shqyrtimit fillestar në çështjen penale PS.nr.66/2023, e cila ka për objekt shqyrtimi aktakuzën e ngritur nga Prokuroria Speciale e Republikës se Kosovës – PPS.nr.60/2010 të datës 23.12.2024, kundër të pandehurve Momir Stojanoviq, Sreten Çamoviq, Nikolla Miqunoviq, Millovan Kovaçeviq, Sergej Peroviq, Verolub Zhivkoviq, Millan Kotur, Radomir Çoliq, Danillo Zeçeviq, Dragutin Josifoviq, Franko Simatoviq, Momçillo Stanojeviq, Vllatko Vukoviq, Ilija Todorov, Stevo Kaponja, Dragan Zhivanoviq, Millosh Gjoshаn, Predrag Stojanoviq, Dimitrije Rashoviq, Millosh Shqepanoviq, Aleksandar Pekoviq, Zhivko Vuksanoviq, Millutin Novakoviq, Sokol Abazi, Novica Stankoviq, Misho Popoviq, Millan Noviqeviq, Nenad Rajiçeviq, Muharrem Ibraj, Millan Slavkoviq, Dragan Isailloviq, Sasha Antiq, Zllatko Odak, Savo Llekiq, Dragan Raciq, Milladin Novakoviq, Dragan Pekoviq, Njegosh Prashçeviq, Zoran Mirkoviq, Dushan Prashçeviq, Ranko Vukadinoviq, Momçillo Stijoviq, Dushan Nedoviq, Gjokica Mihajlloviq, Mirash Gegoviq, Aleksandar Miqunoviq, Llazar Drashkoviq, Mihill Abazi, Momçillo Novakoviq, Marko Abramoviq, Smajl Beqiri, Momçillo Pantiq dhe Predrag Miqunoviq”.

Sipas njoftimit të gjykatës, aktakuza është ngritur nga Prokuroria Speciale e Republikës së Kosovës, më 23 dhjetor 2024.

Gjykata njofton se, me propozim të Prokurorisë Speciale, procedura gjyqësore do të zhvillohet në mungesë të të pandehurve, pasi ata kanë qenë të paarritshëm deri në momentin e ngritjes së aktakuzës.

Përmes njoftimit publik, gjykata u ka bërë thirrje të akuzuarve që të paraqiten dhe të dorëzohen para organeve të ndjekjes së Republikës së Kosovës.

Po ashtu, gjykata ka kërkuar nga të gjithë personat që kanë informacione relevante për vendndodhjen e të akuzuarve që këto të dhëna t’ua përcjellin Policisë së Kosovës ose organeve të tjera kompetente.

Seanca e shqyrtimit fillestar është caktuar të mbahet më 15 shtator 2026, në ora 09:00, në Gjykatën Themelore në Prishtinë, Pallati i Drejtësisë në Hajvali, Objekti D.

Seancën do ta udhëheqë kryetarja e trupit gjykues, Violeta Namani-Hajra./E.O/A.K/

Vendi

Sveçla pret në takim shefin e ri të EULEX-it, e falënderon për ndihmën në gërmimet në Zubin-Potok

Published

2 hours ago

August 25, 2026

UBTNews

Ministri i Punëve të Brendshme në detyrë, Xhelal Sveçla, ka mirëpritur sot në një takim njoftues shefin e ri të misionit EULEX në Kosovë, Antero Lopes, të cilin e ka uruar për marrjen e detyrës së re.

Përmes një njoftimi zyrtar, bëhet e ditur se gjatë takimit është diskutuar për rëndësinë e bashkëpunimit dypalësh mes institucioneve të Kosovës, EULEX-it dhe partnerëve të tjerë ndërkombëtarë. Me këtë rast, ministri Sveçla ka shprehur mirënjohje të veçantë për mbështetjen teknike dhe profesionale që ky mision ka dhënë gjatë gërmimeve të fundit në varrezat masive në Zubin-Potok.

“Ministri Sveçla falënderoi EULEX-in për kontributin e vazhdueshëm dhe bashkëpunimin me institucionet e Republikës së Kosovës. Gjithashtu, Ministri Sveçla shprehu mirënjohje edhe për mbështetjen e dhënë gjatë gërmimeve të zhvilluara në varrezat masive në Zubin-Potok,” thuhet në njoftimin e Ministrisë së Punëve të Brendshme.

Ky takim vjen vetëm një ditë pasi kryeministri në detyrë, Albin Kurti, bëri me dije se mbetjet mortore të gjetura në tri lokacione në Zubin-Potok dyshohet se u përkasin së paku 23 personave, numër ky që përkon me të ashtuquajturin “grupi i intelektualëve”. Procesi i identifikimit të mbetjeve mortore tashmë ka nisur dhe sipas autoriteteve pritet të zgjasë disa muaj. /E.A/

Lajmet

Kosova e varur nga mishi brazilian, ndërsa BE-ja vendos kufizime

Published

3 hours ago

August 25, 2026

UBTNews

Mbi 50 milionë euro mish gjedhi dhe pule nga Brazili ka importuar Kosova vetëm në shtatë muajt e parë të këtij viti.

Brazili është furnizuesi më i madh i Kosovës me këto produkte, por nga 3 shtatori një pjesë e eksporteve të tij me origjinë shtazore do të përballet me kufizime në Bashkimin Evropian.

Arsyeja lidhet me rregullat e BE-së për përdorimin e antimikrobikëve te kafshët që përfundojnë në zinxhirin ushqimor.

Shqipëria ka njoftuar se do të zbatojë masa të ngjashme nga e njëjta datë.

Kosova, deri më tani, nuk ka njoftuar për ndonjë masë, ndonëse një pjesë e konsiderueshme e mishit që importon, vjen pikërisht nga ky shtet i Amerikës Jugore.

Sipas të dhënave të Doganës së Kosovës, nga janari deri në korrik të vitit 2026, vlera e mishit të gjedhit dhe të pulës të importuar nga Brazili ka kaluar 50 milionë euro.

Për krahasim, importet e këtyre dy llojeve të mishit nga të gjitha shtetet e tjera së bashku kanë arritur në mbi 65 milionë euro gjatë së njëjtës periudhë.

Në këto shifra nuk përfshihen kafshët e gjalla që importohen për therje dhe as produktet e përpunuara të mishit të gjedhit dhe të pulës.

Pse BE-ja po vendos kufizime?

Sipas rregullave të Bashkimit Evropian, kafshët e gjalla dhe produktet me origjinë shtazore që importohen nga vendet e treta nuk duhet të vijnë nga kafshë të trajtuara me produkte antimikrobiale për nxitjen e rritjes ose rritjen e prodhimit.

Një zëdhënës i Komisionit Evropian tha për Radion Evropa e Lirë se, nga 3 shtatori 2026, të gjitha kafshët dhe produktet me origjinë shtazore për konsum njerëzor që eksportohen drejt BE-së, duhet t’i përmbushin këto kërkesa.

“Brazili u përjashtua nga lista e vendeve të autorizuara, sepse nuk kishte vendosur masat e nevojshme për t’i dhënë BE-së garanci se rregullat për përdorimin e antimikrobikëve janë respektuar gjatë gjithë ciklit jetësor të kafshëve”, thuhet në përgjigjen e Komisionit Evropian.

Antimikrobikët janë substanca që përdoren për të luftuar mikroorganizmat që shkaktojnë sëmundje.

Në këtë grup bëjnë pjesë edhe antibiotikët.

Mish pule i importuar nga Brazili shihet në një dyqan në Prishtinë, Kosovë, 24 gusht 2026.

Profesori i sigurisë ushqimore në Universitetin e Prishtinës, Sali Salihu, thotë se përdorimi i pakontrolluar i antibiotikëve në blegtori mund të favorizojë krijimin e baktereve rezistente, të cilat mund të kalojnë te njerëzit edhe përmes zinxhirit ushqimor.

“Kur bakteret bëhen rezistente ndaj antibiotikëve, trajtimi i infeksioneve te njerëzit bëhet shumë më i vështirë dhe sëmundja mund të zgjasë më shumë”, thotë Salihu për Radion Evropa e Lirë.

Për këtë arsye, ai vlerëson se edhe Kosova duhet t’i shqyrtojë masat e ndërmarra nga Bashkimi Evropian, sidomos për shkak të varësisë së madhe nga importet braziliane.

“Kosova duhet t’i harmonizojë edhe ligjet, edhe vendimet me BE-në”, thotë ai.

A duhet Kosova ta ndjekë BE-në?

Kosova nuk është anëtare e Bashkimit Evropian dhe, ndryshe nga vendet e tjera të Ballkanit Perëndimor, nuk e ka statusin e vendit kandidat, ndonëse ka aplikuar për anëtarësim në dhjetor të vitit 2022.

Komisioni Evropian sqaron se masa për importet zbatohet për shtetet anëtare të BE-së.

“Në kuadër të negociatave për anëtarësim në BE, vendet kandidate do të duhet të harmonizojnë plotësisht legjislacionin e tyre me kërkesat e BE-së deri në momentin e anëtarësimit”, thuhet në përgjigjen e Komisionit.

Ministria e Bujqësisë e Kosovës nuk iu përgjigj pyetjeve të Radios Evropa e Lirë nëse po shqyrton masa të ngjashme ndaj importeve nga Brazili.

Çfarë do të ndodhte nëse kufizohen importet?

Çdo kufizim eventual ndaj mishit brazilian do të prekte një treg që tashmë varet në masë të madhe nga importet.

Sipas të dhënave të Ministrisë së Bujqësisë, prodhimi vendor i mishit mbulon vetëm 34.2 për qind të nevojave për konsum, ndërsa konsumi vjetor i mishit është rreth 35.7 kilogramë për banor.

Mishi i importuar nga Brazili gjendet në markete dhe mishtore, por, sipas Salihut, përdoret veçanërisht në sektorin e gastronomisë, ndër të tjera për shkak të çmimit më të ulët.

A mund të jetë kjo një mundësi për prodhimin vendor?

Salihu thotë se mungesa e mishit të importuar nga Brazili mund të shfrytëzohet si mundësi për të rritur prodhimin vendor.

Sipas tij, për këtë nevojitet rritja e fondit blegtoral dhe mbështetja më e madhe e fermerëve.

“Fermerët duhet të investojnë në këtë sektor. Është në interesin e tyre që ky sektor të bëhet i rëndësishëm, sepse kërkesa në treg po rritet. Por, pastaj, edhe shteti duhet ta rrisë fondin blegtoral”, thotë Salihu.

Kosova i mbështet fermerët përmes subvencioneve dhe granteve investuese.

Sipas Raportit të Gjelbër, në vitin 2024, buxheti për Programin e Pagesave Direkte ishte mbi 66 milionë euro.

Në kuadër të skemave për blegtorinë, për lopët qumështore janë ndarë 90 euro për një në vit, për therjen e raportuar të gjedheve 50 euro për një dhe për viçat 25 euro për një.

Megjithatë, fondi blegtoral nuk ka shënuar rritje të qëndrueshme.

Në vitin 2025, Kosova kishte 241.423 gjedhe – rreth 20 mijë më pak se në vitin 2020.

Për Salihun, pikërisht këtu duhet kërkuar një pjesë e zgjidhjes për varësinë nga importet.

“Çdo fermer që do të shtojë numrin e viçave, qoftë për mish apo për qumësht, mund të ketë interes ekonomik. Kushtet janë, vetëm nevojitet interesimi dhe efektet do të jenë zinxhirore: fiton fermeri, ekonomia, por edhe qytetarët ushqehen me mish cilësor dhe të sigurt”, përfundon Salihu. /REL/