Live

DITARI: Çfarë lajmesh kemi lexuar në çdo 6 mars, nga viti 1993-1999

Published

8 months ago

March 6, 2026

UBTNews

Sot lajmet janë nga më të ndryshmet. Bota ka ndryshuar. Teknologjia ka ndryshuar shumëçka në jetën tonë, edhe në mënyrën tonë të informimit. Edhe ngjarjet janë të tjera. Të kohës. Por, cilat ishin lajmet që mund të lexonin kosovarët, dekada më herët. Ta zëmë, në kohën më të rëndë për shqiptarët e Kosovës (1990-1999), kur Serbia kishte bërë përpjekje ta instalojë terrin informativ.

Ishin gazetarët shqiptarë që nuk heshtën, edhe pse Serbia mbylli Radiotelevizionin e Prishtinës, gazetën “Rilindja” dhe të gjitha revistat e tjera.

Ishin edhe korrespondentët e mediave të huaja, që ndihmuan që, megjithatë, shqiptarët e Kosovës të mos mbesin në terr informativ.

Për shkak të peshës së ngjarjeve, po sjellim së pari lajmet e datës 6 mars 1998:

Lajmi i parë (Ora 8:00):

Rifillon sulmi në Prekaz, të shtëna edhe në Rakinicë e në Açarevë

Në fshatrat e Drenicës që kishin qenë objekt i ekspeditës terroristike të forcave serbe, edhe gjatë natës pati krisma të herë pas hershme. Kurse në mëngjes sot rifilloi një sulm kundër fshatit Prekaz. Njoftimet nga fshatrat përreth thonë se forcat serbe po qëllojnë shtëpitë në lagjen Jasharaj, të cilat kishin mbetur pa u rrënuar gjatë sulmit të djeshëm. Një burim nga Llausha tha në mëngjes se dy autobus me policë i janë afruar fshatit Prekaz. Nga Mitrovica njoftohet se në drejtim të Skënderajt kanë shkuar sot forca serbe. Edhe nga Gllogoci ka njoftime se në drejtim të Skënderajt kanë shkuar dy autobusë me policë dhe dy autoblinda.
Të shtëna dëgjohen edhe nga Rakinica e Açareva.
Njoftimet nga Mitrovica e Vushtrria flasin për qindra familje të larguara nga fshatrat e Skënderajt dhe Vushtrrisë që janë afër caqeve të sulmeve serbe. Disa familje të larguara nga shtëpitë e veta kanë arritur edhe në Lipjan, Shtimje e në Gllogoc.

Ora 9:50:

Lajmi kryesor është: Numri i të vrarëve disafish më i madh

Ja përmbajtja e lajmit:
Së paku 50 shqiptarë janë vrarë gjatë ekspeditës terroriste serbe kundër Prekazit.
Druhet se gjatë kësaj ekspedite kanë pësuar anëtarët e familjes së Shaban Jasharit, duke përfshirë edhe fëmijët.
Dëshmitarët thanë mbrëmë se kjo shtëpi ishte djegë deri në themel.
Familja e Shaban Jasharit është sulmuar edhe më 22 janar, kur janë plagosur dy vajza të kësaj familjeje.

Lajme të tjera: Po shtrëngohet rrethimi i Llaushës; Policë me rroba civile keqtrajtojnë shqiptarët në Klinë; Si dezinformon policia serbe; Ambasadorët e Grupit të Kontaktit sot në Prishtinë; Përgatitet mbledhja urgjente e KS të OKB-së për Kosovën;

Ora 10:30:

Filloi sulmi masiv kundër Llaushës;

Lajmet nga politika: Konferencë me gazetarë e kryetarit të Republikës së Kosovës dr. Ibrahim Rugova; Kryetari Rugova priti diplomatë italianë, suedezë, norvegjezë; Për shkak të Kosovës, SHBA-të ia tërhoqën katër lehtësitë Beogradit; K. Kinkel: Serbia përjashtoi veten nga Evropa; Rubin Kuk: Dhuna policore e regjimit serb nuk do të japë rezultate për zgjidhjen e Kosovës; Qendrat e njohura televizive botërore për aksionet e forcave policore e ushtarake serbe në Kosovë; Reagime të shumta ndërkombëtare kundër regjimit serb për shkak të aksioneve policore e ushtarake në Kosovë; CIA ka ditur për përgatitjet e Beogradit për sulm në Kosovë; Ushtria serbe as nuk e konfirmon as nuk e demanton pjesëmarrjen e saj në sulmet në Drenicë;

Lajmet e pasdites: Vazhdojnë sulmet në disa lagje të Prekazit; Llausha mbahet në rrethim; Në Mitrovicë kanë arritur rreth 1000 të larguar nga Drenica; Mbi 450 veta, të ikur nga Drenica, janë vendosur në fshatrat e Fushë Kosovës; Malisheva dhe 40 fshatrat e saj që dje pa rrymë dhe pa lidhje telefonike; Suharekë: Lëvizje të ushtrisë;

Ora 13:30:

Lajmi i fundit: Forcat serbe kërcënohen me masakër ndaj familjeve të lagjes Lushtaku e Kadriaj.

Kjo është përmbajtja e lajmit:

“Në një bisedë telefonike prej Prishtinës me motrën e tij afër Prekazit të Ulët, Zenë Lushtaku nga Prekazi mirret vesh se forcat serbe kanë hyrë në lagjen Lushtaku me 70 shtëpi dhe në lagjen Kadriaj 50. Druhet se forcat serbe po terrorizojnë popullsinë që nuk ka mundur të largohet nga ky fshat.
Z. Zena i tha QIK-ut se familja e tij ka 30 anëtarë.
Ai druan se forcat serbe do të masakrojnë anëtarët e familjes së tij dhe të familjeve të tjera, njësoj si në Likoshan të Drenicës më 28 shkurt e 1 mars kur u vranë dhe u masakruan 24 shqiptarë në shtëpitë e tyre.
Dëshmitarja afër Prekazit tha me telefon se në këto lagjhe kanë hyrë forcat serbe me autoblinda, tankse e mjete të tjera.
Në një lajm të mëhershëm thuhej se në këtë fshat, në lagjen Brahovit po digjeshin katër shtëpi”.

Ora 15:00:

Re tymi nga fshati Prekaz; Kinkel: “Tani është e nevojshme diplomacia preventive”; Protestë e madhe në Tiranë në përkrahje të popullit të Kosovës; Kongresmeni amerikan Engel i bën thirrje SHBA-ve që të angazhohet totalisht me Kosovën; Reagime të qeverisë zvicerane dhe kanadeze mbi ngjarjet në Kosovë; Mbi 700 bashkatdhetarë protestuan në Shien të Norvegjisë; Në fshatrat e Lipjanit janë vendosur mbi 250 të ikur nga Drenica; Maqedonia përforcoi kufirin me Kosovën; Gjakovë: Policia arrestoi dy mjekë të SHHB “Nëna Tereze”; Pengohet shpërndarja e shtypit shqip;

Ora 17:00:

Vazhdon sulmi serb në fshatrat e Drenicës; Vazhdon sulmi në Prekaz, fshatrat përreth të boshatisura; Shumë të ikur nga Drenica janë vendosur në fshatrat e Vushtrrisë; Lëvizje të kolonave ushatarako-policore në drejtim të Mitrovicës;

Ora 19:00:

Kryetari Rugova priti një delegacion të vendeve të Grupit të Kontaktit; Deklaratë e ambasadorëve të Grupit të kontaktit pas takimit me kryetarin Rugova; Vazhdon sulmi në Prekaz, të shtëna me snajper në Llaushë; Dëshmi e Riad Jasharit që arriti t’i ikte vrasjes; Policë serbë në malet e fshatrave Broboniq e Lushtë; Policia nga shtëpitë e shqiptarëve shtin kundër banorëve që lëvizin në oborret e tyre; Policia plagosi Raif Bajramin dhe shtiu drejt dy vajzave të tij; Në Vojtesh u gjuajtën me snajper dy qytetarë, njëri mbeti i shtrirë; Lëvizje të policisë dhe mobilizim i serbëve edhe në lagjen Kodra e Diellit në Prishtinë; Rreth 2000 të larguar në Vushtrri; Ekspeditë policore në Dumosh të Podujevës.

Rikthehemi në rrjedhën logjike të rubrikës. Sjellim lajmet e datës 6 mars ndër vite:

6 mars 1993

Lajmi kryesor: Deri tani 79 të vdekur në fatkeqësinë ajrore në Shkup;

Lajmi vjen pasi një ditë më herët, në afërsi të aeroportit Petrovec të Shkupit, në afërsi të fshatit Haraçinë, eksplodoi aeroplani i tipit “Foker 110”, i cili fluturonte në relacionin Shkup – Cyrih. Në aeroplan ndodheshin 91 udhëtarë dhe 6 anëtarë të ekuipazhit. Pjesa dërrmuese e udhëtarëve ishin shqiptarë nga Kosova, Maqedonia dhe nga Presheva e Bujanoci.

6 marsi i vitit 1994 ishte e diele, nuk kishte zhvillime të rëndësishme.

6 mars 1995

Lajmi kryesor: Forcat serbe arrestuan shumë të rinj shqiptarë në komunën e Suharekës

Thekse nga lajmi:

Pardje në disa fshatra të komunës së Suharekës policia dhe ushtria serbe ndërmorën një një aksion të arrestimit të të rinjve shqiptarë dhe të dërgimit të tyre me dhunë në ushtrinë serbe.

Komisioni për Informim i Degës së LDK-së në Suharekë njoftoi se janë arrestuar: Faik Sali Suka (1967) nga fshati Bllacë, Sali Beqir Ramadani dhe Ruzhdi Kryeziu nga Sopija, Sami Gani Hajdari (1972), Qamil Nazif Bytyçi (1973), Shukri Xhemajli Asllani (1973) dhe Selami Tafil Bytyçi (1974) nga Kastërci, Banush Sylë Morina (1974) e Rifat Nezir Morina (1973) nga Stravaqina, Bashkim Agush Gashi (1972) nga Tërna, Jetish Hajrush Hajdaraj (1973) nga Gjinoci, Rexhep Kurtish Berisha (1972) dhe Rasim Muharrem Neziri (1970) nga Suhareka, si dhe Shaqir H.Kryeziu (1964) nga Leshani.

Njoftohet se forcat serbe kanë kërkuar në shtëpitë e tyre edhe këta të rinj: Sherif Kryeziu nga fshati Sopijë, Skënder Gashi dhe Hysni Gashi nga fshati Mohlan.

Disa prej të arrestuarve kishin dezertuar nga armata ish -jugosllave në kohën e shpërthimit të luftës në Slloveni, Kroaci e Bosnjë e Hercegovinë.

Mirëpo njoftohet se në mesin e të arrestuarve është edhe Feriz Kabashi (1969), i cili ka qenë liruar përkohësisht nga shërbimi ushtarak.

Gjatë aksionit policia rrahu në dyqanin e tij Liman Xhemali Gashin nga Suhareka për shkak se nuk e njoftoi policinë se ku gjendet shtëpia e Sadik Gashit.

Policia rrahu dhe Jeminin, baba i Nexhat Kabashit, i cili po kërkohet nga ushtria. Policët iu kërcënuan atij se do t’ia djegin shtëpinë në rast se nuk e dorëzon në polici djalin deri të hënën. Ndërkaq në fshatin Mohlan gjatë kërkimit të dy të rinjve në mënyrë të vrazhdë është sjellë polici Dragan Jeftiq.

Në rubrikën “Dhuna e përditshme në Kosovë”, njoftohet për dhunë ndaj shqiptarëve edhe në Junik, Prizren, Malishevë e Podujevë.

Lajme të tjera: Afër Deçanit për serbët ndërtohet një vendbanim me 224 shtëpi; Grindjet serbe rreth banesave në Lipjan; Në Prishtinë për kolonistët serbë jipen 22 kiosqe; Bankënotat e 12 vendeve evropiane të shtypura nga viti 1965 e deri më 1980 vlejnë vetëm deri më 30 qershor; Përfaqësuesi i kishës serbe viziton Shqipërinë?; Mbahet manifestimi “Takimet e poeteve”; Në Gllogovc tre shqiptarë u larguan nga puna; Ndërhyrje e policisë në një turne të futbollit; Fillon gjykimi kundër policit Boban Kërstiq, vrasësit të fëmiut Fidan Brestovci.

6 mars 1997

Lajmet kryesore: Kryetari Rugova priti diplomatët amerikanë, Deklaratë e Ministrit Bicaj me rastin e 110 vjetorit të Shkollës Shqipe e të Ditës së Mësuesit;

Perëndimi thekson të drejtën e përgjegjësinë e qeverisë së Shqipërisë për parandalimin e anarkisë; Masmediat e huaja për zhvillimet më të reja në Shqipëri; Armata maqedone ngriti nivelin e gatishmërisë; 14 shqiptarë u dëbuan nga Gjermania.

Në rubrikën “Dhuna e përditshme në Kosovë” jepen këto lajme:

Skënderaj: – Më 2 mars, policia ishte në fshatin Makermal dhe kërkoi Halil e Muhamet Gjinovcin. Muhameti u kërkua nga policia për të nëntën herë.

Kamenicë: – Më 3 mars policia shkoi në shtëpinë e Hasan Fazliut (70) në Karaçevë dhe e urdhëroi atë që të nesërmen të paraqitet në polici. Të nesërmen z. Fazliu u mor rreth një orë në pyetje me pretekst të kërkimit të një revoleje dhe u keqtrajtua fizikisht. Ai u urdhërua që të paraqitet sërish në polici.

Tituj të tjerë: Azilkërkuesit shqiptarë keqtrajtohen gjatë kthimit në atdhe; Një qytetari iu konsfiskuan 13.300 DM; Në Shkup 20 demonstrues filluan grevën e urisë.

6 mars 1999

Lajmi kryesor i ditës është ky:

Një i vrarë e gjashtë të plagosur në një sulm të armatosur në Prishtinë

Lajmi: Një shqiptar u vra dhe së paku gjashtë të tjerë u plagosën gjatë një sulmi kryer nga persona të panjohur mbrëmë në orën 22 në rrugën “Xhemail Ibishi” në Prishtinë.

Sipas informatave të para, në lokalin pronë e Bajram Zakutit, u shti me armë automatike nga një veturë e zezë e tipit “Golf”.

Gazeta “Kosova sot” ka njoftuar se është vrarë në vend një person me emrin Agim, ndërsa janë plagosur Shaban Zeqiri, Gani Pllana, Ismet Llapjani, Bajram Zakuti, Alush Mushica dhe Sabri Selmani.

Në lajmet e mëvonshme u konfirmua se i vrari është Agim Revuçi (36)

Në lajmet e paradites dominojnë këta tituj: Në Magurë të Lipjanit janë pozicionuar civilë dhe policë të armatosur serbë; Grupe civilësh të armatosur serbë thyen pothuaj të gjitha lokalet e shqiptarëve në qytezën e Lipjanit; Vushtrri: Forcat serbe granatuan rreth dy orë drejt fshatrave shqiptare; Ushtria serbe sulmoi sërish 3 fshatra të Mitrovicës dhe 3 të tjera të Vushtrrisë; Gjashtë serbë të plagosur nga një shpërthim në Pejë; Prishtinë: Prani e shtuar e policisë serbe në lagjen “Velania”; Malishevë: Sërish zhvendosje e banorëve; Forcat serbe nuk lejuan ndihmat humanitare për banorët e fshatit Glloboçicë; Hani i Elezit: Vazhdojnë të mbahen në arrest 3 shqiptarë; Gjakovë: Forca të mëdha të ushtrisë serbe janë përqëndruar në fshatin Goden; Kamenicë: Një shqiptar u kërcënua nga policia serbe; Vushtrri: Policia serbe keqtrajtoi fizikisht disa shqiptarë; Kërkohet Qamil D. Morina nga Drenoci i Malishevës.

Në lajmet e pasdites janë këta tituj: Seancë plenare e Kuvendit të Republikës së Kosovës – i thuhet Po marrëveshjes së Rambujesë për Kosovën; Në praninë e mijëra qytetarëve në Prekaz u shënua njëvjetori i rënies së Adem Jasharit; Vushtrri: Forcat serbe granatojnë fshatrat rreth Qyqavicës; Në gjykatën serbe të Pejës hetimet zhvillohen kundër 738 pjesëtarëve të UÇK-së; Në Zogaj të Ulqinit një shqiptare lindi katërneq; Ushtarët serbë u stacionuan në pushimoren e fëmijëve në Nashec të Prizrenit.

Aktualitet

Macron paralajmëron masa të rrepta ndaj protestave të paautorizuara, ndalohen tubimet në Lion

Published

3 days ago

October 23, 2026

UBTNews

Presidenti francez Emmanuel Macron ka deklaruar vendosmëri absolute për parandalimin e trazirave në vend, duke njoftuar një qasje të rreptë dhe shumëplanëshe pas valës së fundit të dhunës në rrugë.

Pas takimit të Këshillit të Sigurisë, Macron bëri të ditur se protestat legjitime të organizuara nga sindikatat do të lejohen dhe do të garantohen sipas ligjit, ndërsa çdo tubim tjetër i paautorizuar do të ndalohet plotësisht kurdo që të jetë e mundur. Në kuadër të përpjekjeve për të qetësuar situatën, Kryeministri Sebastien Lecornu do të takohet javën e ardhshme me organizatat studentore për të adresuar kërkesat e tyre.

Ndërkohë, autoritetet kanë ndaluar të gjitha protestat e planifikuara për këtë të shtunë në qytetin e Lionit, pas përleshjeve të ashpra dhe plaçkitjeve të javës së kaluar gjatë tubimeve kundër inflacionit të lartë.

Aktualitet

SHBA-ja urdhëron një pjesë të personelit të largohet nga Arabia Saudite

Published

4 days ago

October 22, 2026

UBTNews

Departamenti Amerikan i Shtetit ka urdhëruar largimin e stafit jo-thelbësor dhe anëtarëve të familjes në ambasadën e tij në Riad, një veprim që vjen mes sulmeve intensifikuese ndaj Arabisë Saudite nga rebelët Houthi, aleatë të Iranit, në Jemen.

“Departamenti Amerikan i Shtetit lëshoi një urdhër largimi për punonjësit e qeverisë amerikane që nuk janë emergjentë dhe anëtarët e familjeve të tyre në Arabinë Saudite”, ka shkruar zëdhënësi i Departamentit të Shtetit, Tommy Pigott, në X.

“Houthit e mbështetur nga Irani janë angazhuar gjithnjë e më shumë në armiqësi kundër Arabisë Saudite, duke përfshirë sulme ndaj aeroporteve civile dhe infrastrukturës tjetër kritike që rezulton në viktima civile dhe ndërprerje të rënda të udhëtimit”, thuhet më tej në njoftimin e tij.

Ndërsa Departamenti i Shtetit po zvogëlon gjurmën e tij në Arabinë Saudite mes rreziqeve në rritje, disa poste të tjera diplomatike amerikane në rajon po përshtatin gjithashtu stafin e tyre në përgjigje të kërcënimit të Houthit, ka thënë një burim për CNN.

Departamenti i Shtetit ka paralajmëruar gjithashtu në një alarm sigurie të mërkurën se qytetarët amerikanë duhet të jenë të vetëdijshëm për sulmet e mundshme ndaj aeroporteve dhe ndërprerjet e përgjithshme të udhëtimit.

Ky mesazh për amerikanët erdhi pas një serie sulmesh vdekjeprurëse të Houthit në javët e fundit që kanë synuar Aeroportin Ndërkombëtar King Khalid në Riad, objektet ushtarake saudite, infrastrukturën e naftës dhe trafikun detar.

Forcat e mbështetura nga Arabia Saudite, të lidhura me qeverinë e njohur ndërkombëtarisht të Jemenit, kanë zgjeruar operacionet kundër pozicioneve të Houthi-t në shumë vija fronti, ndërsa fuqia ajrore saudite vazhdon të ofrojë mbulim ushtarak.

Të mërkurën, Arabia Saudite ka thënë se ka kapur të paktën shtatë dronë, përfshirë një që synonte fushën e naftës Shaybah në Provincën Lindore të mbretërisë, në një sulm që vrau dy punëtorë emigrantë dhe plagosi dy të tjerë. /CNN/

Lajmet

Merz: Evropa po e nënvlerëson kërcënimin që vjen nga Rusia

Published

5 days ago

October 21, 2026

Safet Zejnullahu

Friedrich Merz thotë se Evropa mund të vazhdojë ta ndihmojë Ukrainën pa para nga SHBA-ja. Ai paralajmëron se Rusia jo vetëm që dëshiron territore në Ukrainë, por po përpiqet të destabilizojë edhe shoqëritë evropiane.

Në një intervistë ekskluzive për gazetaren e Bloomberg-ut, Francine Laqua, Kancelari gjerman Friedrich Merz (CDU) foli, ndër të tjera, për luftën në Ukrainë, ndryshimet në politikën amerikane nën Donald Trumpin dhe kërcënimin e nënvlerësuar që Rusia paraqet për shoqëritë evropiane.

I pyetur nëse ishte i përgatitur për një botë në të cilën Shtetet e Bashkuara do të ishin aleate të Rusisë kundër Ukrainës, Merz theksoi se SHBA-ja ka ndërprerë plotësisht financimin për Ukrainën që nga fillimi i vitit 2025. Sipas tij, për gati dy vjet, mbështetja financiare është siguruar nga Koalicioni i të Gatshmëve, i përbërë nga vende evropiane dhe disa vende joevropiane.

“Kjo tregon se ne mund t’ia dalim vetë”, tha Merz, duke shtuar: “Është një barrë e madhe për buxhetet shtetërore dhe një sfidë e rëndësishme për Bashkimin Evropian, por ne po e përballojmë dhe do të vazhdojmë ta ndihmojmë Ukrainën derisa kjo luftë e tmerrshme të përfundojë.”

Merz tha se në çdo takim përpiqet ta bindë Presidentin amerikan Donald Trump se një Evropë e qëndrueshme dhe një Bashkim Evropian i fortë janë gjithashtu në interes të Shteteve të Bashkuara. “Është në interes edhe të amerikanëve”, theksoi Kancelari.

Ndryshimi i qasjes amerikane

I pyetur pse administrata amerikane po ndjek këtë qasje, Merz tha se nën drejtimin e Trumpit, SHBA-ja ka ndryshuar mënyrën e saj të të vepruarit në politikën globale.

“Motoja ‘Ta bëjmë Amerikën Sërish të Madhe’ nuk do të thotë asgjë më shumë sesa: ne veprojmë në mënyrë të pavarur dhe të tjerët duhet të bëjnë të njëjtën gjë. Përgjigjja e Evropës është: ne e kuptojmë këtë. Edhe ne do të veprojmë në mënyrë të pavarur dhe në interesin tonë.”

Gazetarja e pyeti se si do të funksiononte mbështetja për Ukrainën nëse SHBA-ja nuk jep ndihmë financiare.

“Ne i kemi rritur shpenzimet për mbrojtjen në kuadër të NATO-s në pesë për qind të Prodhimit të Brendshëm Bruto. Po e bëjmë këtë brenda Bashkimit Evropian dhe së bashku me aleatët tanë evropianë. Po ashtu, po bashkëpunojmë ngushtë me Kanadanë, e cila sot është më e orientuar drejt Evropës se kurrë më parë. Ne kemi aleatë të vërtetë në botë”, tha Merz.

Ai theksoi se Gjermania është ndër kontribuuesit më të mëdhenj në mbështetjen e Ukrainës për mbrojtjen e saj, gjë që e ka bërë vendin objektiv kritikash dhe sulmesh politike. Kur u pyet nëse qytetarët gjermanë vazhdojnë ta mbështesin këtë politikë, Merz u përgjigj: “Po, ende e mbështesin. Rreth 60 për qind e qytetarëve janë në favor të kësaj politike, ndonëse ka edhe kritikë.”

Merz nuk pret që mbështetja për Ukrainën të zbehet në të ardhmen e afërt, megjithëse një gjë e tillë mund të ndodhë në një moment. “Shpresoj shumë që të kontribuojmë në përfundimin e kësaj lufte. Ky është qëllimi ynë kryesor, jo zgjatja e saj”, tha ai.

Shqetësimi nga nënvlerësimi i kërcënimit rus

Kur Francine Laqua e pyeti nëse kjo nënkuptonte përfundimin e luftës sipas kushteve të Ukrainës dhe jo sipas atyre amerikane apo ruse, Merz u përgjigj: “Ukraina është një shtet sovran dhe kushti themelor është ruajtja e integritetit të saj territorial. Kjo nuk vihet në diskutim.”

Në fund të intervistës, i pyetur se çfarë e shqetëson më shumë, Merz tha se është “nënvlerësimi i kërcënimit që Rusia paraqet për shoqëritë evropiane”.

Ai theksoi se lufta në Ukrainë është vetëm një pjesë e një problemi shumë më të gjerë. “Panorama e përgjithshme tregon se Rusia po përpiqet të destabilizojë të gjithë rendin politik në kontinentin evropian. Është e qartë se shumë njerëz, përfshirë edhe në vendin tim, e nënvlerësojnë këtë rrezik.”

“Njerëzit nuk e kuptojnë se cili është qëllimi i vërtetë i Rusisë. Nuk bëhet fjalë vetëm për pushtimin e territoreve në Ukrainë. Ambiciet e saj janë shumë më të gjera”, theksoi kancelari. “Njerëzit në Kremlin kanë frikë nga demokracia, nga shoqëritë e hapura dhe nga suksesi i integrimit evropian. Ata duan ta minojnë këtë sukses dhe tashmë po punojnë për ta arritur këtë.”

Sipas Merzit, shumë njerëz, edhe në Gjermani, vazhdojnë ta nënvlerësojnë këtë kërcënim, i cili shihet çdo ditë. I pyetur nëse sjellja e Shteteve të Bashkuara kontribuon në këtë situatë, Merz u përgjigj: “Shtetet e Bashkuara janë gjeografikisht shumë larg Rusisë. Ky është kontinenti ynë. Rusia është një fuqi evropiane dhe kontinenti evropian po kërcënohet. Kjo është ajo që më shqetëson më së shumti.”

Burimi: Deutsche Welle

Lajmet

Qeveria italiane dërgon 500 ushtarë në Milano pas trazirave të dhunshme

Published

6 days ago

October 20, 2026

UBTNews

Qeveria e Italisë ka vendosur të dërgojë 500 trupa ushtarake për të përforcuar sigurinë në Milano, pas dy ditësh përleshjesh të dhunshme mes demonstruesve dhe policisë. Vendimi u konfirmua nga zëvendëskryeministri Matteo Salvini dhe pritet të zyrtarizohet në paketën e re të masave të sigurisë nga kabineti qeveritar.

Trazirat shpërthyen gjatë fundjavës pas një proteste që fillimisht nisi paqësisht kundër rritjes së kostos së jetesës dhe shërbimeve të dobëta publike. Situata eskaloi kur qindra të rinj me kapuçë dëmtuan prona, i dhanë flakë koshave të mbeturinave dhe plaçkitën dyqane në qendër të kryeqendrës financiare.

Si pasojë e pasigurisë, bizneset në zonat më luksoze, përfshirë Via Montenapoleone dhe galerinë Vittorio Emanuele, mbyllën dyert para kohe, zbrazën vitrinat nga produktet me vlerë dhe mbuluan xhamat me dërrasa mbrojtëse.

Kryeministrja Giorgia Meloni dënoi ashpër dhunën dhe zhvilloi takime urgjente me drejtuesit e sigurisë. Qeveria po shqyrton masa të rrepta ligjore, përfshirë zgjatjen e paraburgimit parandalues për të miturit dhe veprime më të ashpra kundër bandave të të rinjve.

Sipas të dhënave zyrtare, policia italiane ka shoqëruar 271 persona gjatë trazirave, prej të cilëve 32 janë arrestuar — ku 23 prej tyre janë të mitur.