Ushtarët e Forcës së Sigurisë së Kosovës (FSK) janë duke u bërë gati për dislokim në Gazë, dhe po e presin vetëm dritën e gjelbër nga institucionet shtetërore.

Kosova është zotuar se do të dërgojë trupa në këtë vend të shkatërruar nga lufta në kuadër tëForcës Ndërkombëtare Stabilizuese (FNS), mekanizëm që është paraparë të formohet me themelimin e Bordit të Paqes – nismës së presidentit amerikan, Donald Trump për arritjen e paqes në botë.

Krahas vendimit për dërgimin e trupave në Gazë, Kuvendi duhet të miratojë edhe marrëveshjen për anëtarësimin e Kosovës në këtë mekanizëm.

Komandanti i Forcës Ndërkombëtare Stabilizuese, Jasper Jeffers, ka bërë të ditur se Kosova është në mesin e pesë shteteve të para – përfshirë Indonezinë, Marokun, Kazakistanin dhe Shqipërinë – që janë zotuar se do të angazhojnë trupa, me qëllim të ofrimit të sigurisë në Gazë.

Megjithatë, në publik dihet pak se kur do të dislokohen ushtarët e FSK-së atje, dhe sa do të jetë numri i tyre.

Hapat deri te finalizimi i procesit

Funksionalizimi i punës së Kuvendit të Kosovës, pas vendimit të Gjykatës Kushtetuese më 25 mars, e ka hapur një pjesë të rrugës që duhet të ndiqet deri te nisja e ushtarëve.

Kjo pasi Ligji për dërgimin e FSK-së jashtë vendit parasheh që vendimi në këtë drejtim merret nga Qeveria e Kosovës.

Sipas Ministrisë së Mbrojtjes, propozimvendimi për dislokimin e FSK-së në Gazë është përcjellë për miratim në Qeveri më 3 mars. Pas miratimit aty, vendimi kalon në duart e ligjvënësve dhe në fund duhet të merret edhe miratimi i presidentit të shtetit.

Presidentja e Kosovës, Vjosa Osmani, ka qenë ndër themelueset e Bordit të Paqes dhe e ka përkrahur plotësisht nismën e Trumpit. Mandati i saj presidencial skadon më 4 prill.

Mundësitë për angazhim prej muajit maj?

Transmetuesi publik i Izraelit, KAN ka raportuar më 14 mars se Forca Ndërkombëtare Stabilizuese (FNS) do të nisë angazhimin në Gazë që nga muaji maj, përfshirë këtu edhe angazhimin e dhjetëra ushtarëve nga Kosova.

Me gjithë interesimin e Radios Evropa e Lirë (REL) Qeveria nuk ka konfirmuar nëse ky informacion është i saktë dhe as nuk ka treguar as kur do ta procedojë në Kuvend vendimin për këtë angazhim të FSK-së.

Njëjtë, përgjigje nuk ka kthyer as Presidenca e Kosovës, lidhur me afatet eventuale për ratifikimin e kësaj marrëveshjeje.

Maqedonci: Fillimisht planifikohen të dërgohen mbi 20 ushtarë

Zyrtarë të Ministrisë së Mbrojtjes i kanë thënë REL-it se janë në komunikim të vazhdueshëm me zyrtarët e FNS-së për përgatitjet që duhet të bëhen dhe se për këtë qëllim është caktuar edhe një ushtarak ndërlidhës që “ndihmon në përgatitje zbarkimin e kontigjentit të FSK-së në Gazë”.

“FNS, ashtu si dhe Bordi i Paqes, përbëjnë dy mjete që e kanë qëllimin e njëjtë e që është ruajtja e sigurisë dhe paqes në Gazë, andaj dhe për dërgimin e FSK-së në Gazë ka pasur koordinim mes Qeverisë dhe institucioneve të tjera”, është thënë në përgjigjen e ministrisë, duke rikujtuar se Forca Ndërkombëtare Stabilizuese ka edhe mandat të Këshillit të Sigurimit të Kombeve të Bashkuara.

Ministri i Mbrojtjes, Ejup Maqedonci, ka thënë në një intervistë për mediumin lokal në Kosovë, Tëvë1, se në Gazë planifikohen të dërgohen “fillimisht mbi 20 ushtarë” të fushave të ndryshme.

“Do të dominojë EOD-ja (Njësia për Eliminimin e Mjeteve të pashpërthyera) dhe deminimi, që është një specialitet tashmë i Forcës së Sigurisë së Kosovës. Do të kemi edhe oficerë dhe nënoficerë nga operacionet speciale, por gjithashtu do të kemi edhe oficerë planifikues që do të jenë të atashuar në komandën e Forcës Stabilizuese. Por, do të kemi edhe ekipe mjekësore të cilat do të jenë pjesë e këtij kontingjenti të Forcës së Sigurisë së Kosovës”, ka thënë Maqedonci më 24 mars.

Hollësi për kohën e dislokimit nuk ka dhënë as vetë Bordi i Paqes, duke u thirrur në “siguri operacionale”.

“Objektivi kryesor i FNS-së është të stabilizojë mjedisin e sigurisë në Gazë”, thuhet në një përgjigje të bordit drejtuar REL-it.

Për kolonelin e pensionuar të FSK-së, Afrim Veselin, numri i trupave që do të dërgohen në Gazë “nuk është aq i rëndësishëm”.

Sipas tij, FSK-ja ka oficerë e nënoficerë të përgatitur me standardet e NATO-s dhe ky operacion do t’i hapë Kosovës dhe ushtrisë së saj edhe më tej rrugën në arenën ndërkombëtare.

“Kjo do të ndikojë fuqishëm edhe në rrugën tonë drejt NATO-s”, tha ai për Radion Evropa e Lirë.

REL-i i është drejtuar edhe Qeverisë së Shqipërisë për të kuptuar se në çfarë faze janë përgatitjet atje, por nuk ka marrë ndonjë përgjigje deri në publikimin e këtij artikulli.

“Prania e FSK-së në Gazë, kthim i nderit për ndihmën e marrë më 1999”

Më 24 mars janë bërë 27 vjet nga nisja e bombardimeve të NATO-s mbi caqet ushtarake dhe policore serbe në ish-Jugosllavi për të ndalur dhunën e forcave serbe kundër shqiptarëve në Kosovë.

Bombardimet që zgjatën 78 ditë u ndalën një ditë pas nënshkrimit të Marrëveshjes së Kumanovës, pas së cilës forcat jugosllave u tërhoqën nga Kosova dhe u krijua forca paqeruajtëse ndërkombëtare, e udhëhequr nga NATO-ja, KFOR.

Kosova ka shprehur hapur aspiratën e saj për t’u bërë pjesë e NATO-s, derisa misioni i saj paqeruajtës, KFOR-i, vazhdon të jetë i pranishëm në Kosovë, ndonëse me numër më të reduktuar sesa në periudhën e pasluftës. Fillimisht përbëhej nga rreth 50.000 trupa, derisa sot numëron 4.767 trupa, nga 33 vende të botës.

Ish-koloneli Veseli thotë se Kosova, përmes angazhimit të saj në Gazë, është duke kthyer “nderin dhe ndihmën që e mori më 1999”.

“Nga një vend që më 1999 ishte vetë viktimë, tani Kosova dhe ushtria e saj marrin një operacion të tillë”, tha ai.

Hulumtuesi i Institutit të Kosovës për Drejtësi (IKD), Melos Kolshi, i tha Radios Evropa e Lirë se anëtarësimi i Kosovës në struktura të tilla “forcon subjektivitetin ndërkombëtar të shtetit dhe e thellon bashkëpunimin me aleatët kryesorë, përfshirë Shtetet e Bashkuara të Amerikës”.

“Në një kontekst më të gjerë gjeopolitik, zhvillime të tilla kontribuojnë në konsolidimin e partneritetit strategjik me SHBA-në dhe në ruajtjen e mbështetjes së vazhdueshme amerikane, e cila historikisht ka qenë vendimtare për shtetndërtimin dhe sigurinë e Kosovës”, tha ai.

Angazhimi i FSK-së jashtë vendit

Kjo nuk do të ishte hera e parë që pjesëtarë të FSK-së dislokohen jashtë vendit.

Më 2021, kjo forcë u dërgua në mision në Kuvajt në kuadër të bashkëpunimit me forcat amerikane, ndërsa më 2022 në Ishujt Falklands, në bashkëpunim me Mbretërinë e Bashkuar.

Pjesëtarë të FSK-së marrin pjesë edhe në trajnime jashtë vendit në kuadër të bashkëpunimit me shtete të ndryshme.

Në këtë drejtim, FSK-ja ka partneritet të ngushtë me Gardën Kombëtare të shtetit amerikan të Ajovës.

FSK-ja është në proces të shndërrimit në ushtri dhe planet janë që gjithçka të përmbyllet deri më 2028. /REL/

28 mars 1994

Lajmet kryesore:

Mbi 40 mijë shqiptarë në tubimin protestues në Bernë të Zvicrës;

Jehona e tubimit të shqiptarëve në Bernë në mjetet e informacionit të Zvicrës;

Në Melbourn të Australisë u mbajt tubim për Kosovën e pavarur dhe neutrale;

Pesëvjetori i vrasjes së 21 shqiptarëve dhe i suspendimit të dhunshëm të Kosovës nga ish-federata;

Partia Parlamentare e Kosovës u shkroi letër disa ambasadave në Beograd;

Mplakja e popullsisë serbe;

Kryetari i ASHAK-së njofton Klintonin e Miteranin për keqtrajtimin e shkencëtarëve shqiptarë;

Represioni i policisë serbe në Kosovë.

28 mars 1995

Lajmet kryesore:

Gjashtëvjetori i rezistencës kundër suspendimit të mëvetësisë së Kosovës nga ish-federata jugosllave;

Ata që ranë tash gjashtë vjet në mbrojtje të mëvetësisë së Kosovës;

Përkujtime me rastin e 6-vjetorit të vrasjes së Ismet Krasniqit, Sevdet Xhafollit e Mehmet Ejupit;

Serbët penguan mbajtjen e mësimit në shumë shkolla;

Shtypi gjerman rreth manifestimit të shqiptarëve në Bon për njohjen e Republikës së Kosovës;

Tirana dhe Bukureshti thellojnë bashkëpunimin;

Marrëveshje për shtimin e programit shqip televiziv në Maqedoni;

Në komunën e Gllogovcit u shpërndanë afro 600 thirrje për armatën serbe;

Drejtori i SHM “Marin Beçikemi” në Vushtrri u dërgua në vuajtje të dënimit;

Me burg u dënua edhe një profesor i gjimnazit “Frang Bardhi” në Mitrovicë;

Forca të policisë serbe ndërhynë sot në lokalet e shkollës fillore “Migjeni” në Mitrovicë;

Ulja e vlerës së dinarit shkaktoi çrregullim në furnizimin me bukë;

Borë e madhe në Prishtinë;

Dhuna e përditshme në Kosovë;

Ushtarakët serbë vëzhguan terrenet e dy fshatrave të Skënderajt;

Në Skënderaj rreth 200 policë serbë keqtrajtuan dhe plaçkitën disa qytetarë shqiptarë;

Gjaku që mirret në emër të pacientëve shqiptarë, shkon tjetërkund;

Policia financiare serbe në Prizren plaçkiti rreth 2 milionë dinarë;

Shtypi serb fajëson shqiptarët për rënien e dinarit;

Forcat e Maqedonisë ndërhynë kundër grevistëve në burgun e Idrizovës .

28 mars 1997

Lajmet kryesore:

Konferencë për gazetarë e kryetarit të Republikës së Kosovës dr. Ibrahim Rugova;

Në Kosovë shënohet 8- vjetori i rënies së dëshmorëve;

U pengua mbajtja e mësimit në shkollat shqipe;

Takim i përfaqësuesve të forcave politike të Tiranës;

Vazhdon puna në portin e Durrësit;

KS i OKB do të zhvillojë sot konsultimet rreth dërgimit të forcave evropiane në Shqipëri;

Trupat jugosllave në kufi me Shqipërinë në gjendje gatishmërie;

OSBE‑ja mbështeti dërgimin e një forcës në Shqipëri;

Dhuna e përditshme në Kosovë;

U thyen lokalet e ambulancës dhe të SHF në Panorc të Malishevës;

Studentët kërkojnë regjistrimin administrativ të semestrit;

Leka i Parë dëshiron ta udhëheqë vendin;

“Fantomët” grekë shkelën hapësirën ajrore të Maqedonisë;

Athina mohon përzierjen e saj në krizën shqiptare;

Parlamenti i Maqedonisë emëroi prokurorët dhe zëvendësprokurorët;

Në Bukuresht u botua libri “Marrëdhëniet rumuno-shqiptare”.

U ngrit aktakuza kundër 15 shqiptarëve

Prishtinë, 28 mars (QIK)

Prokuroria publike serbe e qarkut të Prishtinës ka ngritur aktakuzën kundër 15 shqiptarëve, për të cilët thuhet se kanë qenë anëtarë të organizatës “Ushtria Çlirimtare e Kosovës”. Tre nga të akuzuarit: Besim Rama (32) nga Prekazi i Ulët, Avni Nura (42) nga Prellovci dhe Idriz Asllani (43) nga Vushtrria gjenden në paraburgim, ndërsa Adem Jashari (42) nga Prekazi i Epërm, Jakup Nura (32) nga Prellovci, Fadil Kadriu (32) nga Prekazi i Ulët, Nuredin Lushtraku (30) dhe Safet Jashari (32), po ashtu nga Prekazi i Ulët, Rafet Rama (36) nga Prekazi i Epërm, Sami Lushtaku (36) dhe Iliaz Kadriu (31) nga Prekazi i Epërm, Rexhep Selmani (26) nga Açareva, Hashim Thaçi (29) nga Broçani, Zenun Kadriu (34) nga Prekazi i Epërm dhe Avni Jonuzi (23) nga Vushtrria janë në arrati.

Siç shkruan shtypi i sotëm serb, aktakuza i ngarkon të gjithë këta se prej vitit 1992, pas qëndrimit në Shqipëri ku gjoja paskan bërë stërvitje, në Kosovë kanë organizuar grupin “terrorist” i cili ka kryer shumë sulme, në të cilat janë vrarë 4 persona dhe janë plagosur rëndë ose lehtë 16 të tjerë.

Anëtarët e këtij grupi akuzohen se gjoja në maj të vitit 1993 kanë vrarë policët Zvonko Jevtiq dhe Nebojsha Gjorgjeviq, kurse kanë plagosur pesë policë të tjerë.

Besim Rama e Safet Jashari akuzohen se kanë kryer një sulm në qendrën shkollore në Vushtrri ku janë të vendosur refugjatët serbë. Ndërkaq, Nuredin Lushtaku dhe Zenun Kadriu akuzohen se në prill të vitit të kaluar kanë vrarë Dragan Neshiqin dhe kanë plagosur policin Slobodan Grudiq. Më tutje thuhet se anëtarët e kësaj organizate kanë kryer disa sulme në Deçan, në Pejë dhe në Shtime. Me këtë rast në Deçan janë vrarë dy persona civilë dhe janë plagosur dy policë dhe një civil.

Po ashtu, Besim Rama, Nuredin Lushtaku, Fadil Kadriu, Rexhep Selimi dhe Adem Jashari më 17 qershor të vitit të kaluar në Mitrovicë kanë vrarë policin Predrag Gjorgjeviq dhe kanë plagosur një polic tjetër.

Shtypi serb shkruan se është paralajmëruar edhe ngritja e aktakuzës kundër nja dhjetë personave të tjerë të një organizate tjetër e cila cilësohet “terroriste” me seli në rrethin e Prizrenit.

28 mars 1998

 Lajmet kryesore:

Kosova përkujton 22 martirët e marsit të vitit 1989;

Krenaria dhe turpi i 28 marsit të vitit 1989;

Gelbard: Rugova e ka bërë hapin e parë;

Gelbardi: Simpatitë e opinonit ndërkombëtar plotësisht janë në anën e Kosovës;

Zëdhënësi i Stejtdepartamentit tha se Milosheviqi nuk po e kupton se po i përgatiten më shumë sanksione;

Riçard Holbruk: Qëndrimi i SHBA-të ndaj Beogradit është i ashpër;

Nga postblloku i policisë në Kijevë u shti në një qytetar shqiptar;

Gjakovë: Lëvizje të shumta të forcave serbe, një helikoter fluturon mbi qytet;

Gjilan: Tre autobusë me gra e fëmijë shkuan drejt Bujanocit;

Vazhdon keqtrajtimi i shqiptarëve në postbllokun e Komoranit;

Në Athinë filloi një tryezë ndërkombëtare për Kosovën;

UNCHR: Disa fshatra në Kosovë janë zbrazura fare;

“U. Post”: Beogradi po sjellë përforcime policore në Kosovë;

Ushtria serbe nuk i ka ndihmuar policisë në Kosovë.

Foto: Riçard Holbruk, diplomat amerikan

Kryeministri i Kosovës, Albin Kurti, ka zhvilluar një takim me Presidentin e Francës, Emmanuel Macron, në Pallatin Elize në Paris.

Presidenti Macron e uroi Kurtin për rizgjedhjen dhe mandatin e ri, ndërsa Kurti shprehu falënderim për mbështetjen e vazhdueshme të Francës ndaj Kosovës.

Në takim u diskutua për integrimet evropiane, sigurinë dhe bashkëpunimin bilateral, ku u theksua edhe roli i NATO-s në Kosovë përmes KFOR-it dhe misioneve të Bashkimit Evropian.

Kurti, sipas komunikatës, theksoi se “Kosova mbetet e harmonizuar plotësisht me politikën e jashtme dhe të sigurisë së BE-së”, duke përmendur edhe progresin në reformat e brendshme.

Ai shtoi se vendi ka shënuar “progres në 35 nga 38 fusha”, sipas Raportit të fundit të BE-së, dhe kërkoi mbështetjen e Francës për integrimin evropian dhe anëtarësimin në organizata ndërkombëtare.

Në takim u diskutua edhe për dialogun Kosovë–Serbi në Bruksel, sigurinë rajonale, si dhe forcimin e bashkëpunimit me aleatët euroatlantikë.

Po ashtu, palët folën për investimet në arsim dhe organizimin e forumeve të reja të biznesit Kosovë–Francë, pas forumit të mbajtur në shkurt në Prishtinë, si dhe për përgatitjet për Lojërat Mesdhetare 2030 në Kosovë.

Në takim morën pjesë edhe zyrtarë të lartë francezë dhe diplomatë të Kosovës, ndërsa u konfirmua përkushtimi për thellimin e partneritetit mes dy vendeve.

E ngarkuara me punë në Ambasadën e SHBA-së në Prishtinë, Anu Prattipati, ka zhvilluar një takim zyrtar me Ministren e Ekonomisë, Artane Rizvanolli, për të diskutuar mundësitë e zgjerimit të bashkëpunimit në sektorët e energjisë dhe minierave.

Gjatë këtij takimi, Prattipati rikonfirmoi përkushtimin e Ambasadës amerikane për krijimin e mundësive të reja për bizneset nga Shtetet e Bashkuara, me fokus të veçantë tek ato që operojnë në sektorin e gazit natyror të lëngshëm (LNG) dhe në industrinë minerare.

Duke vlerësuar ecurinë e bisedimeve, diplomatja amerikane u shpreh se “ne mirëpresim bashkëpunimin e vazhdueshëm në fusha që promovojnë prosperitetin e ndërsjellë” mes dy vendeve.

Të dyja palët konfirmuan vullnetin për të forcuar lidhjet ekonomike, duke synuar projekte që sjellin stabilitet energjetik dhe zhvillim të qëndrueshëm për Kosovën përmes investimeve strategjike amerikane.