Lajmet

DITARI: Çfarë lajmesh kemi lexuar në çdo 20 mars, në vitet nëntëdhjetë

Published

3 weeks ago

March 20, 2026

UBTNews

20 mars 1993

Lajmet kryesore:

Kryetari Rugova priti këshilltarin e Ministrisë së Jashtme të Francës;

Këshilltari i Ministrisë së Jashtme të Francës bisedoi me përfaqësues të partive politike të Kosovës;

Uoren Kristofer: SHBA-të do të veprojnë vendosmërisht në rast të agresionit në Kosovë e Maqedoni;

Manfred Verner: Konflikti në Kosovë rrezikon paqen ndërkombëtare;

Pjesë nga komenti i ATSH-së rreth luftës propagandistike serbe;

Pesë refugjatë të Kosovës pësuan në Itali;

Në fshatin Llazicë të Malishevës u stacionuan rreth 100 ushtarakë serbë;

Edhe në Klinë parakalime të ushtrisë serbe;

Në Gjilan vazhdon arrestimi i veprimtarëve shqiptarë;

Nga shkolla e mesme teknike “Fan S.Noli” të Podujevës u konfiskuan rreth 20.000 litra naftë;

Në Torinë të Lipjanit u bastisën gjashtë familje;

“Die Presse”: Austria veçmas do të ndihmojë arsimin shqiptar;

Nënkryetari i Bosnjës thotë se sulmi serb në Kosovë vjen mbas rënies së Bosnjës;

Kryeministri i Serbisë paralajmëron aksion energjik në Kosovë;

Arkani – personifikim i klasës politike të gangsterëve në Serbi;

Policia e Malit të Zi i dëboi emigrantët që kishin ardhur nga Shqipëria;

Policia serbe thekson se zuri një bandë vjedhësish të veturave;

Francezët ofruan ndihmë profesionale ndërmarrjeve të dhunshme serbe në Kosovë.

Dr.Ibrahim Rugova: NATO-ja do të na mbrojë

Presidenti i Republikës së Kosovës dr.Ibrahim Rugova pas turneut diplomatik në SHBA, Bruksel, Paris, Romë dhe Tiranë, i dha një intervistë revistës “Zëri” të Prishtinës.

Pas kontakteve që patëm me administratën e re amerikane, tha dr.Rugova, u vërtetuam se ajo ka një disponim mjaft të mirë ndaj çështjes së Kosovës dhe një interesim të shtuar për rajonin. Ne kërkuam nga SHBA-të të parandalojnë konfliktin në Kosovë, sepse po të ndodhë konflikti atëherë mund të jetë vonë. Deklarata e presidentit amerikan Klinton është një mbrojtje për Kosovën dhe një inkurajim për shqiptarët, që të qëndrojnë në rezistencën e tyre.

Duke folur për konfliktin e mundshëm në Kosovë, kryetari Rugova tha se shqiptarët nuk mund të fillojnë konflikt në Kosovë, sepse janë tërësisht të paarmatosur dhe janë populli më i pambrojtur, ata mund të revoltohen dhe Serbia mund ta përdor këtë si alibi për të intervenuar, prandaj mendimet e tilla se shqiptarët po inkurajohen nga Amerika për të hyrë në luftë janë joserioze. Brengën e SHBA-ve për Kosovën duhet ta shprehin edhe evropianët.

Në Kosovë mund të ketë grupe që janë më radikale në kërkesat e tyre, pra fjala është për një radikalizëm verbal, por askush nuk ka mundësi të organizojë mbrojtje. Ne kemi kontroll mbi popullin, por nëse nuk gjejmë zgjidhje në bazë të referendumit dhe kërkesave politike, atëherë radikalizimi do të shënojë rritje.

I pyetur të komentojë planin e tij paqësor, kryetari Rugova tha se është fakt se preventivë e vetme e sigurt, që të mos ndodhë konflikti në Kosovë, është vendosja e Kosovës nën protektoratin e Kombeve të Bashkuara. Kjo ide po depërton gjithnjë më shumë edhe në qarqet shtetërore diplomatike të Perëndimit dhe në vet OKB-në. Para nesh e shtrojnë çështjen e legalitetit të zgjedhjeve tona por ne ishim pjesë e ish-Jugosllavisë, e cila po ashtu nuk është legale, madje as vet Serbia nuk e ka njohjen ndërkombëtare. Po ashtu nuk mund të harrohet se Kosova ishte pjesë e ish-Federatës, kështu që ka legalitetin dhe legjitimitetin e vet edhe sipas ligjeve të ish-Jugosllavisë por edhe sipas atyre ndërkombëtare. Ideja e protektoratit do të ishte vërtetë zgjidhje që do të çonte kah një zgjidhje fatlume.

Duke folur për pritjen që iu organizua kryetarit Rugova në Itali, ai tha se Italia është zgjuar dhe ka zënë të interesohet më shumë për shqiptarët dhe për Ballkanin. Ajo e njeh më së miri çështjen shqiptare dhe Ballkanin në tërësi, ishte pak a shumë anash deri tash dhe tani dëshiron të inkuadrohet në këto çështje si anëtare e BE-së, e NATO-s dhe si fuqi në rajon. Ndoshta, Italia interesohet më shumë për këtë zonë edhe me mandatin e OKB-së, tha Rugova dhe vazhdoi se mund të jetë që Italia të ndërmjetësojë midis shqiptarëve dhe serbëve, por po ashtu ajo interesohet edhe për shkak të lidhjeve ekonomike në rajon.

Kryetari i Republikës së Kosovës foli edhe për rolin e NATO-s në Ballkan dhe shtoi se ajo po merr një rol të ri në Evropë, por jo më si në kohën e luftës së ftohtë. Aksionet e NATO-s i shikoj si preventivë në këtë pjesë të Ballkanit… NATO do të jetë mbrojtëse dhe stabilizuese në rajon.

Lidhur me marrëdhëniet e NATO-s me Shqipërinë, Rugova tha se Republika e Shqipërisë do të bashkëpunojë ngushtë me NATO-n dhe sigurisht do të bëhet edhe anëtare e saj, por dihet se janë edhe disa kushte të cilat duhet t’i plotësojë një anëtare e këtij pakti. Sidoqoftë, tha dr.Rugova në intervistën dhënë “Zërit”, është me rëndësi që Shqipëria është ndër vendet e para të Lindjes që bashkëpunon në mënyrë intensive me NATO-n.

20 mars 1995

Lajmet kryesore:

Ministri Serreqi: Statusi i Kosovës është çështje e bisedimeve në prani të palës së tretë;

Zhulali: Të aftë për ruajtjen dhe mbrojtjen e sovranitetit;

Kultura shqiptare në Festivalin XII të Emigracionit në Luksemburg;

Eksodi ndërpritet me shembullin personal;

Dhjetëra shqiptarëve nuk iu lejua hyrja në vendkalimin kufitar në Suboticë;

Dhuna e përditshme në Kosovë;

Mbledhja e Këshillit Profesional të Festivalit Kombëtar të Komedisë në Preshevë;

Shtypi serb për veprimtarinë private në Kaçanik.

20 mars 1997

Përmirësohet gjendja në Durrës

Balla: Përmirësohet furnizimi me artikuj të domosdoshëm në Tiranë

Ministria e Shëndetësisë bën apel për vazhdimin e vaksinimit të fëmijëve

Katër të vrarë gjatë ditës së djeshme në Shqipëri

Prishtinë, 20 mars (QIK)

Katër veta u vranë me plumba gjatë 24 orëve të fundit në Shqipëri, njofton AFP, duke cituar burime të Ministrisë së Brendshme të Shqipërisë. Këta persona u vranë në Pukë, Korçë dhe Fier dhe në Tiranë, ndërsa pesëmbëdhjetë persona ishin vrarë një ditë më parë.

Këto viktima të reja e çojnë në më se 115 veta numrin e të vdekurve, që nga 28 shkurti.

Lajmet kryesore:

U rihap Aeroporti i Rinasit;

Banorët e Gjirokastrës kërkojnë mbrojtje prej bandave;

Shpëtoi nga përmbytja një anije me 350 shqiptarë;

Sovraniteti i Maqedonisë mbështetet mbi sovranitetin e qytetarëve;

Parlamenti i Maqedonisë miratoi deklaratën për marrëdhëniet ndëretnike.

20 mars 1997

Lajmet kryesore:

Komiteti i Shpëtimit Mbarëkombëtar në mbrojtje të institucioneve demokratike;

Rezolutë e Unionit Kombëtar të studentëve danezë për arsimin në Kosovë;

Komitetit Danez për Kosovën nuk i lejohet vizita në Kosovë;

Rektori i UP-së priti diplomatët gjermanë;

Qeveria Shqiptare hodhi poshtë ultimatumin e rebelëve;

Shehu: Për organet legjitime, e jo komitetet e vetëshpallura;

BE e kushtëzon dërgimin e ndihmave në Shqipëri;

Brengosje për shkak të një vale të re të refugjatëve nga Shqipëria;

De Sharet: Evropianët të gatshëm për të ndihmuar Shqipërinë;

Tirana kritikon qëndrimin e zëvendësministrit të jashtëm grek në Gjirokastër e Sarandë;

Qeveria analizoi punën dhe detyrat që i dalin SHIK‑ut;

Korçë: Merren masa për stabilizimin e situatës;

Në Shqipëri vazhdon dorëzimi i armëve;

U mor në pyetje një nxënës nga Kamenica;

Dhuna e përditshme në Kosovë;

U lirua nga burgu Halit Rama.

Autoritetet italiane shpëtuan 400 shqiptarë

Prishtinë, 20 mars (QIK)

Autoritetet ushtarake të Barit kanë shpëtuar jetën e rreth 400 qytetarëve shqiptare, të cilët gjatë lundrimit për në Itali, kishin mbetur në det të hapur, pasi anija e tyre “Rozafa” pësoi një defekt të rëndë, ndërkohë që deti ishte me dallgë të medha.

Ka qenë një sinjal i Rita Bishës, punonjëse tek firma “Poseidon” në Shëngjin që ka njoftuar pronarin e kësaj firme në Itali, Alfredo Shermino për këtë ndodhi. Shermino mënjëherë ka njoftuar autoritetet ushtarake të Barit, të cilat kane nisur 2 helikopterë dhe 3 anije ushtarake në drejtim të anijes “Rozafa” që po mbytej.

Sipas zotit Shermino, rreth orës 16.00, të gjithë njerëzit janë imbarkuar në anijet ushtarake, duke i shpëtuar kështu tragjedisë.

20 mars 1999

Edicioni i orës , 10:00:

Sulme të forcave serbe në disa komuna të Kosovës

Në ditën e parë të largimit të Misionit Verifikues të OSBE-së nga Prishtina dhe qendrat tjera të Kosovës, forcat serbe kanë ndërmarrë aksione në disa anë të Kosovës.

Burime të degëve të LDK-së kanë njoftuar për sulme të ndërmarra nga forcat serbe që në orët e mëngjesit në komunat e Podujevës, Vushtrrisë, Mitrovicës, Skënderajt e Gllogocit.

Banorët e fshatrave Dumnicë e Epërme dhe Përpellac të komunës së Podujevës, që gjenden afër kufirit Kosovë-Serbi, janë larguar me orët e para të ditës së sotme nga shtëpitë e tyre.

Në këto fshatra ka hyrë një kolonë e madhe e forcave serbe e cila tash një kohë të gjatë qëndronte e stacionuar në afërsi të kufirit. Forca të mëdha dhe automjete të shumta luftarake janë vendosur në vendin e quajtur “Te lisat” në Dumnicë të Epërme dhe në afërsi të objektit të shkollës në Përpellac.

Ndërkohë forcat serbe në orët e mëngjesit kanë granatuar fshatrat Majac, Buricë, Godishnjakë e Sallabajë të Podujevës.

Nga ora 6.30 forcat serbe kanë filluar të granatojnë në drejtim të fshatrave Ashlan, Pantinë e Lkej të Vushtrrisë, të cilat pothuaj tash një muaj me radhë sulmohen e granatohen për çdo ditë.

Një konvoj i madh i forcave serbe, i përbërë prej mbi 50 automjetesh luftarake, ka shkuar sot nga Mitrovica në drejtim të Skënderajt, prej ku ditëve të fundit gjithashtu ka pasur njoftime për koncentrim të madh forcash dhe për zhvendosje të popullsisë nga frika e aksioneve të mundshme.

Në orën 6.30 forcat serbe kanë filluar granatimet në drejtim të Mikushnicës e Prekazit të Skënderajt.

Nga Mitrovica u njoftua se në rrugën nga Tërrnafci e deri në Skënderaj ka automjete të shumta të forcave serbe, ndërkohë që këmbësoria serbe ka mësyrë Prekazin e Ulët, Prekazin e Epërm dhe Polacin.

Ndërkohë, një burim nga Skënderaj njoftoi se përreth kësaj qyteze ka shumë forca serbe, ndërsa banorët kanë nisur të zhvendosen nga lagjja në afërsi të Fabrikës së Municionit. Gjithashtu, thuhet se rrugëve të Skënderajt po vërehen pjesëtarë të forcave serbe të veshur me uniforma të bardha. Banorët që kanë mbetur nëpër shtëpitë e tyre druajnë për ndonjë aksion të mundshëm kundër popullatës së pambrojtur.

Edhe nga komuna e Gllogocit është njoftuar se forcat serbe në orët e mëngjesit kanë filluar granatimet në drejtim të fshatrave të kësaj komune.

Edicioni i orës 11:30:

KMDLNJ: Forcat serbe sulmuan sot pesë fshatra të Prishtinës;

Kanë filluar të granatohen shumë fshatra të Drenicës;

Vazhdon gjendja e rëndë në Skënderaj;

Vushtrri: Granatohen disa fshatra shqiptare – stacionime të forcave serbe në Mihaliq;

Në Lipjan kanë mbërritur një konvoj i madh i mjeteve ushtarake;

Deçan: Policia arrestoi një të ri shqiptar;

Mediat serbe njoftojnë për tri sulme në stacionet e policisë serbe.

Edicioni i orës , 14:00:

LDK: Të mbrohet populli i Kosovës sa s’është bërë vonë;

Klinton: “Hezitimi për të vepruar është dhënie e lejes për të vrarë”;

Shtetet perëndimore u kërkojnë qytetarëve të tyre të largohen nga “RFJ”-ja;

Thaçi: “Morëm garanci për intervenim ndërkombëtar”;

Komunikatë e Kryesisë së Degës së LDK-së në Podujevë;

Vazhdojnë sulmet në fshatrat e Drenicës – mijëra të zhvendosur në Qirez;

Obiliq: Forcat serbe granatuan sot edhe Milloshevën e Breznicën;

Granatat serbe ranë edhe në katër fshatra të Vushtrrisë;

Shumë shtëpi të demoluara në Dumnicë te Epërme të Podujevës;

Podujevë: U varrosën Nazmi Ismajli e Ismet Beqiri;

Kaçanik: Forcat serbe hynë në fshatin Llanishtë, dogjën 2 shtëpi dhe arrestuan 11 shqiptarë;

Nuk dihet për fatin e Shqipe Kacabashit nga Topliçani i Lipjanit;

Ferizaj: Në stacionin e policisë u sollën rreth 20 persona të keqtrajtuar fizikisht;

Rahovec: Të shtëna me armë automatike dhe lëvizje të mëdha të forcave serbe;

Nga Bujanoci në drejtim të Gjilanit shkoi një konvoj i madh i ushtrisë serbe;

Anan: “Shpresoj se serbët do të marrin qëndrim pozitiv”;

Solana: “NATO është e gatshme të marrë gjithë përgjegjësinë”;

Klark: NATO ka disa opcione të gatshme;

KKA i Vushtrrisë ndërpreu procesin mësimor;

Rekomandim i LASH-it dhe organeve arsimore të Kosovës;

Për Moskën të papranueshme sulmet pa pëlqimin e KS të OKB-së;

Partia Socialdemokrate e Serbisë: “Procesi i negociatave nuk bën të mbyllet”.

Edicioni i orës , 17:30:

Në fshatin Vranidoll nga shpërthimi i një granate u plagosën babë e bijë;

Rreth 2000 banorë shqiptarë të Breznicës i braktisën shtëpitë e tyre;

Tensionet situata për shkak të lëvizjeve të forcave ushtarake serbe në Kamenicë e rrethinë;

LD në Mal të Zi kërkon kthimin e ushtrisë “jugosllave” në kazerma;

Gjakovë: Lëvizje të shtuara të forcave serbe;

U gjet trupi i Murat Sylajt nga Sllapuzhani i vrarë më 18 mars;

Në drejtim të Drenicës shkuan 12 tanke dhe disa kamionë ushtarakë;

Në fshatin Lubizhdë të Vitisë u arrestua një grup qytetarësh;

Fushë-Kosovë: Civilë të armatosur serbë sulmuan të rinjtë shqiptarë;

Forcat serbe për 10 orë kanë djegur shumë shtëpi në disa fshatra të Vushtrrisë;

Fëmija Gentian Nezir Berisha gjendet në Prishtinë.

Vendi

Studentët e Inxhinierisë së Energjisë në UBT thellojnë njohuritë praktike përmes vizitës studimore në KOSTT

Published

3 hours ago

April 9, 2026

ubtnews

Në kuadër të angazhimit të vazhdueshëm për të ndërlidhur teorinë me praktikën dhe për të përgatitur profesionistë të gatshëm për tregun e punës, studentët e vitit të dytë të programit Inxhinieri e Energjisë në UBT realizuan një vizitë studimore në ambientet e KOSTT, operatorit të sistemit të transmetimit të energjisë elektrike në Kosovë.

Kjo vizitë, e organizuar nën udhëheqjen e profesorëve Vehebi Sofiu, Sami Gashi dhe Nexhmi Krasniqi, kishte për qëllim që studentët të njihen nga afër me funksionimin real të sistemit elektroenergjetik, mekanizmat e tregut të energjisë dhe sfidat bashkëkohore të këtij sektori strategjik.

Gjatë qëndrimit në KOSTT, studentët u pritën nga Dispeçeri Nacional, Muhamet Purellku, si dhe nga Zyrtarja për Zhvillim dhe Trajnime të Stafit, Aida Mirdita, të cilët ofruan një prezantim të detajuar dhe profesional mbi organizimin dhe funksionimin e sistemit të transmetimit të energjisë elektrike në vend.

Në fokus të prezantimit ishin proceset e monitorimit dhe menaxhimit të rrjetit elektroenergjetik, koordinimi ndërmjet sektorëve teknikë dhe operativë, si dhe struktura dhe zhvillimi i tregut energjetik në Kosovë. Studentët patën mundësinë të kuptojnë nga afër rolin dhe përgjegjësitë e institucioneve kyçe në këtë sektor, duke përfituar një pasqyrë reale mbi sfidat dhe zhvillimet e industrisë së energjisë.

Një vëmendje e veçantë iu kushtua edhe rëndësisë së zhvillimit të qëndrueshëm të sistemit elektroenergjetik, investimeve strategjike në rrjetin e transmetimit dhe planeve afatgjata që lidhen me sigurinë energjetike dhe integrimin në tregjet rajonale dhe evropiane.

Kjo vizitë dëshmon qartë qasjen moderne të UBT-së në arsim, ku përveç përgatitjes teorike, studentëve u ofrohen mundësi konkrete për përvojë praktike dhe kontakt të drejtpërdrejtë me industrinë. Programi i Inxhinierisë së Energjisë në UBT synon të formojë kuadro të specializuara, të afta për t’iu përgjigjur kërkesave në rritje të sektorit energjetik, si në nivel vendor ashtu edhe ndërkombëtar.

Përmes bashkëpunimeve të tilla me institucione relevante si KOSTT, studentët e UBT-së fitojnë një avantazh të rëndësishëm profesional, duke lidhur njohuritë akademike me realitetin e punës dhe duke u përgatitur për sfidat e së ardhmes në një nga sektorët më vitalë të zhvillimit ekonomik.

Në përmbyllje të vizitës, studentët dhe profesorët shprehën mirënjohje për mikpritjen dhe për ndarjen e përvojave profesionale nga stafi i KOSTT, duke e vlerësuar këtë vizitë si një hap të rëndësishëm në rrugëtimin e tyre akademik dhe profesional.

Lajmet

Dita e Kushtetutës, UBT vlerëson rolin e saj në ndërtimin e shtetit ligjor

Published

9 hours ago

April 9, 2026

ubtnews

Në Ditën e Kushtetutës së Republikës së Kosovës, UBT vlerëson rëndësinë e këtij dokumenti si themeli kryesor i funksionimit të shtetit dhe garant i rendit juridik në vend.

Rektori i UBT-së, Prof. Dr. Edmond Hajrizi ka theksuar se Kushtetuta e Republikës së Kosovës përfaqëson një nga aktet më moderne juridike në botë, duke reflektuar standarde të avancuara demokratike dhe duke siguruar zbatimin e ligjeve në mënyrë të barabartë për të gjithë qytetarët.

Kushtetuta është baza mbi të cilën ndërtohet shteti ligjor, duke përcaktuar qartë të drejtat dhe obligimet e qytetarëve, si dhe funksionimin e institucioneve publike. Ajo garanton mbrojtjen e lirive themelore dhe krijon një sistem ku sundon ligji dhe drejtësia.

UBT thekson se respektimi dhe zbatimi i Kushtetutës mbetet një nga shtyllat kryesore për ndërtimin e një shoqërie të drejtë, të barabartë dhe me perspektivë të qëndrueshme zhvillimi.

Kujtesë

DITARI: Çfarë lajmesh kemi lexuar në çdo 9 prill, në vitet nëntëdhjetë

Published

11 hours ago

April 9, 2026

UBTNews

9 prill 1993

Lajm i plotë:

Konferencë për gazetarë e kryetarit të Republikës së Kosovës dr. Ibrahim Rugova

Kryetari i Republikës së Kosovës dr. Ibrahim Rugova tha në konferencën për gazetarë se në Kosovë po merr hov një valë e re e represionit. Me dënimin e përfaqësuesve të organizatave të ndryshme ndërkombëtare që vijnë në Kosovë dhe me njohjen ndërkombëtare të Maqedonisë, Kosovës i kërcënohet një izolim dhe bllokadë e plotë. Kryetari Rugova kërkoi që çështja e shqiptarëve në Maqedoni të shqyrtohet në OKB në kuadër të bisedimeve për Maqedoninë. Shqyrtimi i çështjes së Kosovës në Këshillin e Sigurimit të OKB-së është një formë parandaluese e shpërthimit të konfliktit, theksoi dr. Rugova.

Gjatë javës që shkoi u shënua edhe një viktimë e torturës së policisë serbe, Ali Ramë Zeqaj nga Bokshiqi i Klinës vdiq nga torturat e policisë serbe, me pretekst të kërkimit të armëve, tha në fillim të konferencës për gazetarë kryetari i Republikës së Kosovës dr. Ibrahim Rugova. Aksioni ndëshkues i policisë serbe, me pretekst të kërkimit të armëve, po zgjat ende. Gjatë javës që shkoi pati lëvizje të shumta të ushtrisë dhe të policisë serbe në Kosovë. Represioni i policisë serbe u koncentrua sidomos ndaj deputetëve të Parlamentit të Republikës së Kosovës, ndaj udhëheqësve të Degëve të LDK-së dhe ndaj aktivistëve të Këshillit për Vetëfinansim të Kosovës që bën financimin e arsimit në Kosovë dhe që është një organ që funksionon mirë në Kosovë, theksoi dr. Rugova. Në vazhdim ai dënoi plaçkitjet e firmave të shqiptarëve dhe e qytetarëve shqiptarë, ndërsa dërgimin e të rinjve shqiptarë me dhunë në ushtri dr. Rugova e vlerësoi si një dukuri të rrezikshme. Dr. Rugova tha se mbajtja rektorit të Universitetit të Prishtinës prof. dr. Ejup Statovcit dhe arrestimi i profesorit të Fakultetit të Mjekësisë Adnan Shabani po bëhen me qëllim që të provokohen studentët dhe Universiteti i Prishtinës që po funksionon në kushte tepër të vështira.

Kryetari Rugova tha se ka reaguar zyrtarisht ndaj burgosjes së anëtarëve të organizatës humanitare “Ekuilibre”, e cila dëshiron të jetë e pranishme dhe të ndihmojë në Kosovë. Është bërë e qartë se regjimit serb i pengon prania e delegacioneve të ndryshme, prania e gazetarëve dhe e përfaqësuesve të organizatave humanitare, e madje, e, edhe e njerëzve. Në këtë mënyrë Serbia synon izolim të plotë, material, shpirtëror dhe politik të Kosovës. Ne, si edhe bashkësia ndërkombëtare dhe Qeveria e Frëncës e dënojmë këtë burgosje të dy humanistëve të kësaj organizate të rëndësishme humanitare, theksoi dr. Rugova.

Kryetari i Republikës së Kosovës tha se pranimi i Maqedonisë në OKB, me emrin ish-republika jugosllave e Maqedonisë, nuk i ndryshon pozicionet e partive politike shqiptare në Kosovë, Maqedoni dhe në territoret etnike shqiptare lidhur me pozitën e shqiptarëve, si element shtetformues i Maqedonisë, në bazë të vullnetit politik të shprehur në referendum. Ne vlerësojmë, tha më tutje dr. Rugova, se pa një marrëveshje me shqiptarët, për Maqedoninë nuk ka ardhmëri të mirë. Kryetari Rugova kërkoi që çështja e shqiptarëve në Maqedoni, të vihet në rend të ditës në Këshilin e Sigurimit të OKB-së, në kuadër të bisedimeve lidhur me Maqedoninë.

Kryetari i Republikës së Kosovës tha se njohja e Maqedonisë do të ketë pasoja edhe për Kosovën. Kërkojmë nga Këshilli i Sigurimit që të ndihmojë qarkullimin e njerëzve nga Kosova nëpër Maqedoni. Kufiri me Maqedoninë nuk bën të shndërrohet në kufi primitiv, pasi, ashtu, do të bëhej i pamundur qarkullimi i njerëzve nga Kosova, me çka do të bëhej një bllokadë e plotë e Kosovës në këtë situatë, theksoi dr. Rugova.

Kryetari i Kosovës përsëriti edhe njëherë kërkesën që çështja e Kosovës të vihet urgjent në rend të ditës të Këshillit të Sigurimit të OKB-së. Shqyrtimin e çështjes së Kosovës në OKB, tha dr. Rugova, e konsiderojmë si një formë parandaluese të shpërthimit të konfliktit.

Duke u përgjigjur në një pyetje të gazetarëve që lidhej me gjoja ofrimin e dialogut nga ana e kryetarit të Kuvendit të Serbisë gjatë një vizite në Kosovë, dr. Rugova përsëriti qëndrimin se bisedimet me palën serbe duhet të zhvillohen me ndërmjetësimin e bashkësisë ndërkombëtare, përkatësisht në kuadër të Konferencës së Gjenevës. Përvoja e deritashme e bisedimeve me palën serbe për probleme të caktuara në Kosovë, është e keqe. Qe një kohë të gjatë po bëhen bisedime për arsimin në Kosovë në kuadër të Konferencës së Gjenevës, por, pa asnjë rezultat, tha kryetari i Kosovës. Duke u përgjigjur në një pyetje tjetër që lidhej me letrën e Lordit Ouen dërguar dr. Rugovës. ai tha se është shpresdhënës premtimi i bashkëkryetarit të Konferencës së Gjenevës se do të veprohet me qëllim të eliminimit të represionit në Kosovë dhe se ky problem do të shqyrtohet në kuadër të Konferencës së Gjenevës. Ne kësaj i dhëmë rëndësi, pasi jemi në një situatë kur ka marrë hov një valë e re e represionit të Serbisë në Kosovë. Ndërsa, lidhur me situatën në Bosnë, dr. Rugova tha se pala serbe dëshiron përfitim në kohë, implikimin e Rusisë si edhe krijimin e kushteve për transkancione të ndryshme lidhur me hartat,prandaj po shtyn momentin e nënshkrimit të Planit të Vensit dhe Ouenit.

Lajme të tjera:

Konferencë për shtyp e përfaqësuesve të Universitetit të Prishtinës

Radio-Kroacia: Agresioni serb filloi në Kosovë

Dagllas Hërd: Serbia e Madhe – kurrë

Klaus Kinkel: Nënshkrimi i planit përmes kërcënimeve kundër Serbisë

Ushtarët gjermanë kanë të drejtë të angazhohen ushtarakisht në Bosnjë

U arrestua dr. Adnan Shabani

U rrahën dhe u keqtrajtuan disa banorë të Stari Tërgut

Në ankand publik oborri i Shkollës Fillore

Maqedonia u pranua në OKB

Rreth 150 mijë shqiptarë në Greqi

9 prill 1994

Lajmet kryesore:

Koment i “Bujkut”: Pavarësia e Kosovës nuk e rrezikon Serbinë

Anketa e “Zërit” për dialogun eventual shqiptaro-serb: Vetëvendosja për Kosovën – kusht për bisedime

Represioni në Kosovë

Në Skënderaj persona të panjohur thyen lokalet e SHH “Nëna Terezë”

Kërkohet Sadie Zymer Rexha

9 prill 1997

Lajmet kryesore:

Vlerësime rreth tryezës së Nju Jorkut

Bërns: S’ka marrëdhënie me Serbinë pa u ndryshuar politika ndaj Kosovës

Reagimet e shtypit serb për tryezën e Nju-Jorkut

Elizabet Ren: Gjendja në Kosovë është dramatike

Në Saradran të Istogut nxënësi vrau nxënësin

Në Beograd arritën kufomat e mercenarëve të vrarë serbë në luftën e Zairesë

Serbia pa ligj të vetadministrimit lokal për shkak të Kosovës

Bastisje me pretekst të armës

Një delegacion i serbëve të Kosovës në Londër

Fitues i “Kurorës së Artë” në Strugë është poeti libanez Ali Ahmed Seid-Adonis

Lajm i plotë:

Azilkërkuesin shqiptar e vrau një algjerian

Prishtinë, 9 prill (QIK)

Pardje, Qendra për Informim e Kosovës, duke iu referuar agjencisë AFP, njoftoi për mbytjen me thikë të dielen në mbrëmje të një azilkërkuesi shqiptar në lokalitetin Recklinghausen në Gjermani.

Komisioni për Informim i Degës së LDK-së në Lipjan njofton sot se i mbyturi është nga fshati Dobrajë e Madhe e kësaj komune dhe quhet Esat Bahtiri (23).

Lajmin në familje e përcolli axha i Esatit, Ragipi, i cili gjithashtu ndodhet në Gjermani. Ai theksoi se i ndjeri është goditur me thikë dhe ka pësuar lëndime vdekjeprurëse nga një grup algjerianësh, gjithashtu azilkërkues në Gjermani. Rrethanat që sollën deri te ky akt tragjik nuk janë bërë të njohura.

Esat Bahtiri ka shkuar në Gjermani para dy vitesh dhe gjatë kësaj kohe ka ndihmuar vazhdimisht familjen e tij, e cila vdekjen e Esatit e priti më dhembje të madhe. Vdekja e për familjen e tij është edhe më e rëndë, pasi para një viti kjo familje humbi edhe një djalë tjetër trembëdhjetëvjeçar, i cili vdiq tragjikisht.

Esati është azilkërkuesi i tretë nga Dobraja e Madhe që u kthye në arkivol brenda një periudhe njëvjeçare. Vetëm tri ditë më parë në këtë fshat u varros Ramë Gashi, i cili humbi jetën tragjikisht në Zvicër.

Foto: Nikollas Bërns, diplomat amerikan

Lajmet

Dita e Kushtetutës së Kosovës

Published

12 hours ago

April 9, 2026

UBTNews

18 vjet më parë, Kosova u bë me aktin më të lartë juridik, dokumentin bazë të shtetësisë, Kushtetutën e Republikës së Kosovës duke i dhënë fund qeverisjes së Kosovës në bazë të rezolutës së Kombeve të Bashkuara 1244.

17 shkurti i vitit 2008 shënoi Kosovën në hartat politike të shteteve të pavarura ndërsa dy muaj më pas Kuvendi i Kosovës ratifikoi Kushtetutën e Republikës së Kosovës e cila më 15 qershor të po atij viti hyri në fuqi.

Kushtetuta e Kosovës u ratifikua më 9 prill 2008 dhe hyri në fuqi më 15 qershor 2008.

Kushtetuta është akti më i lartë juridik, që garanton të drejtat dhe liritë themelore të të gjithë qytetarëve të vendit.

Pjesa më e madhe e kësaj kushtetute rrjedh nga Plani i ish-presidentit Martti Ahtisaari, duke i dhënë kështu të drejta specifike grupeve minoritare dhe një ambient më të sigurt për të gjithë qytetarët e Kosovës.

Kushtetuta e definon Kosovën si një shtet me pikëpamje neutrale ndaj fesë – neni 8. Ajo ka 14 kapituj dhe 162 nene.

9 Prilli është zyrtarisht festë shtetërore në Kosovë që do të thotë se institucionet për këtë ditë do të pushojnë më 9 prill, e enjte.