Lajmet

DITARI: Çfarë lajmesh kemi lexuar në çdo 19 mars, në vitet nëntëdhjetë

Published

4 hours ago

March 19, 2026

UBTNews

19 mars 1993

Lajmet kryesore:

Konferencë për gazetarë e dr. Ibrahim Rugovës, kryetar i Republikës së Kosovës;

Alfred Serreçi u foli shqiptarëve në Vjenë;

Manfred Verneri foli në Kuvendin e Shqipërisë;

U bastisën dy familje në Resnik të Vushtrrisë;

Aspini u shtrua në spital;

Serbët mohojnë akuzën për shkeljen e të drejtave të shqiptarëve në Kosovë.

19 mars 1994

Lajmi kryesor: Represioni i policisë serbe në Kosovë

Podujevë: – Gjatë tre ditëve të fundit, policia serbe nën pretekst të kërkimit të armëve në komunën e Podujevës bastisi disa familje, si dhe mori në pyetje disa persona.

Një patrullë e policisë serbe hyri në lokalet e shkollës së mesme ekonomike “Isë Boletini” në Kërpimeh, me ç’rast morën me vete përgjegjësin e kësaj shkolle, i cili së bashku me drejtorin u detyruan që të paraqiten në stacionin e policisë në Podujevë.

Në fshatin Obrançë, me pretekst të kërkimit të një pushke, policia serbe mori me vete Murat Hoxhën në stacionin e policisë.

Dje në Obrançë, policia serbe bastisi edhe familjen e Muharrem Zenelit, të cilit iu la ftesa që të paraqitet në stacionin e policisë në Podujevë.

Dje në Bervenik u bastisën familjet e Sinan, Ali dhe Sheqir Nezirit, me ç’rast policia rrahu brutalisht Sinan Nezirin (70), në stacionin e policisë në Podujevë.

Në Obrançë u bastisën edhe familjet e Hamdi dhe Adem Hoxhës. Në prani të anëtarëve të familjes, policët rrahën brutalisht djemtë e Ademit, Enver dhe Bekim Hoxhën.

Në fshatin Kërpimeh, policia mori Halil Dibranin dhe e keqtrajtoi fizikisht.

Në fshatin Pakashticë, nën pretekst të kërkimit të armëve, u bastis familja e Ali Bajokut. Ali Bajoku rrah brutalisht në prani të anëtarëve të familjes.

Në Pakashticë bëhet me dije se u bastis edhe familja e Mehmet Aliut. Policët kërkuan djalin e tij Agim Aliun, i cili kohë më parë pat ikur nga ish-armata jugosllave.

Policia serbe dje ishte edhe në shtëpinë e Asllan Matarovës në Bellopojë. Asllan Matarovës iu la ftesa që të paraqitet në polici më 21 mars në stacionin e policisë në Podujevë.

Ndërkaq, dje në fshatin Halabak të Podujevës, policia serbe bastisi familjen e Ibrahim Krasniqit, me ç’rast mori me vete Ibrahimin, i cili ende po mbahet në stacionin e policisë në Podujevë.

Në fshatin Popovë, nën pretekst të kërkimit të armëve u bastis familja e Bejtë Bajçinovcit.

Në fshatin Batllavë u bastis familja e Vesel Berishës.

Në fshatin në Dyz u arrestuan Sejdi dhe Sadri Jashari.

Në fshatin Shtedim u bastis familja e Shemsi Kadriut, i cili tre ditë rresht u ftua në polici nën pretekst të kërkimit të armëve.

Në fshatin Polonicë, policia u la ftesa për t’u paraqitur sot në stacionin e policisë në Podujevë Ismet Stubllës, Raif, Fetah, Rizah dhe Hamdi Babatincës. Personat e lartëshënuar u mbajtën rreth një orë në stacionin e policisë në Podujevë nga të cilët bëhet me dije se u kërkuan armë.

Kamenicë: – Më 14 mars, policia serbe ia mori një revole Beqir Maliqit nga Busavata e Kamenicës, si dhe e urdhëruan që të nesërmen të paraqitet në stacionin e policisë.

Më 16 mars, policia serbe mori në pyetje Ali Maliqin po ashtu nga Busavata, me ç’rast të nesërmen ai dorëzoi një revole.

Më 16 dhe 17 mars, në stacionin e policisë në Kamenicë u mor në pyetje edhe Ilmi B.Maliqi, nga i cili kërkohej të dorëzonte armën. Ilmi Maliqi edhe më tej u urdhërua që të paraqitet në stacionin e policisë në Kamenicë.

Malishevë: – Pardje, policia serbe nga Isuf Kryeziu, arsimtar në shkollën fillore “Adem Bajrami” të Kijevës, konfiskoi 300 fletore për nxënës, të cilat kapin shumën prej 450 DM. Fletoret ishin të dedikuara për filloristët e Kijevës. Më pas policët morën me vete Isuf Kryeziun në stacionin e policisë në Kijevë.

Më 16 mars, policia serbe nën pretekst të kërkimit të armëve, bastisi familjen e Ukë Z.Thaçit në Shkarashnik të Malishevës. Pas bastisjes, policët morën me vete Ukën dhe djalin e tij Besim Thaçin (17), të cilin e futën në bagazh të veturës. Gjatë rrugës e nxorën nga bagazhi dhe në periferi të fshatit e rrahën brutalisht dhe e hodhën në një luginë.

Më 16 mars, policia serbe në Shkarashnik, nën pretekst të kërkimit të armëve, bastisi edhe familjet e Haxhi, Ramadan dhe Veli Thaçit. këtë të fundit e urdhëruan që të lajmërohet në stacionin e policisë në Kijevë.

Gjilan: – Pardje në fshatin Kmetoc të Gjilanit, nën pretekst të kërkimit të armëve, policia serbe bastisi familjet e Halit Azizit dhe të Zija Latifit. Meqë armë nuk u gjetën, personat e lartëshënuar u morën në polici.

Po këtë ditë policia serbe mori në pyetje Behxhet Murtezin, kryetar i Nëndegës së LDK-së në Livoç të Poshtëm të Gjilanit. Vlen të theksohet se në këtë fshat ditëve të fundit policia serbe bëri një varg bastisjesh, si dhe konfiskoi armë. Nga Behxhet Murtezi u kërkua që t’i tregojë njerëzit që kanë armë, si dhe u interesuan rreth aktivitetit të LDK-së.

Dje, policia serbe, në fshatin Bresalc të Gjilanit, arrestoi Shemsi Sylën, kryetar i Nëndegës së LDK-së në këtë fshat, si dhe Vehbi Kçikun e Naim Shalën. Preteksti i arrestimit të tyre nuk dihet, sepse ata ende po mbahen në arrest.

Gjithashtu, dje, nën pretekst të kërkimit të armëve, u arrestua edhe Gani Veseli, si dhe u kërkuan Nuhi e Ali Hasani dhe Ali Bajrami, të cilët nuk gjendeshin në shtëpi.

Policia serbe ishte edhe në shtëpinë e Ahmet Mahmutit në fshatin Lladovë, nga i cili kërkoi një automatik dhe një revole. Meqë Ahmeti deklaroi se nuk ka kurrfarë arme, policia serbe e urdhëroi atë dhe vëllanë e tij, Aliun që të paraqiten nën stacionin e policisë në Gjilan.

Prishtinë: Me pretekst të kërkimit të armëve, pardje, në rrugën “Drenica IV” në lagjen Kodra e Trimave në Prishtinë, policia serbe bastisi shtëpitë e Ramadan, Ferat dhe Murat Përveticës. Në shtëpinë e Ramadanit policia mori një revole, kurse nga Ferati dhe Murati kërkoi nga një revole.

Mitrovicë: – Mbrëmë rreth orës 19, tre policë të dehur serbë, legjitimuan të riun Ali Shalën dhe e pyetën se a e njeh policinë serbe. Pas përgjegjes së Alit se nuk e njeh regjimin policor serb, policët e dehur e rrahën brutalisht, me ç’rast njoftohet se edhe ia lënduan rëndë veshin e majtë.

Këto ditë në rrugën “Kolonia e vjetër” në Zveçan, policia serbe nxori me dhunë nga banesa vëllezërit Ismet dhe Enver Shatri, të cilët jetonin me bashkëshortet e tyre dhe tre fëmijë. Vëllezërit Shatri këtë banesë e trashëguan nga babai i tyre Isa Shatri, i cili ishte punëtor në Shkritoren e Plumbit në Zveçan.

Vlenë të theksohet se familja Shatri në këtë banesë ka jetuar plot 40 vjet.

Klinë: -Parmbrëmë në orën 19:00, nën pretekst të kërkimit të armëve u bastisën disa familje në fshatin Çabiq. U arrestuan Mujë Krasniqi nga Çabiqi dhe Xhavit Shala nga Ujmiri.

Lajmet e tjera:

Kryetari Rugova priti diplomatët nga Zvicra

Lordi Ouen: Në Zagreb mund te bisedohet edhe për Kosovën

Socialistët e rinj serbë kontaktojnë me socialdemokratët e rinj të Shqipërisë

Në kongresin e sindikalistëve të Malit të Zi marrin pjesë dhe përfaqësues nga Shqipëria

A do ta njohin SHBA-të Kosovën

“Dardania Banka” – banka kosovare në Tiranë

19 mars 1997

Lajmet kryesore:

“Bujku”: Institucionet nuk rrëzohen me kallashnikovë;

Sali Berisha: Njësi policore evropiane të domosdoshme në bashkëpunim me ato vendore;

Eksodi i refugjatëve shqiptarë për në Itali po vazhdon;

Kryqi i Kuq Ndërkombëtar dhe Komisariati për Refugjatë i OKB-së e ndihmojnë Shqipërinë;

Në Shqipërinë Jugore gjendja jashtë kontrollit;

U dogj biblioteka universitare në Kamëz;

Në Lezhë shërohen 50 të plagosur;

Stabilizohet situata në Pukë;

Asambleja parlamentare e KE-së mbështet Shqipërinë;

Situata në Korçë edhe më tej e tensionuar;

Koment i gazetës gjermane “Die Velt” për ngjarjet në Ballkan;

Greqia pritet t’i ndajë Shqipërisë 80 milionë dollarë;

Pritet rifillimi i punës së aeroportit të Rinasit;

SHBA: Shqipëria është një problem evropian dhe ajo duhet ta ndihmojë;

Mbledhje e KS të OKB-së për situatën në Shqipëri;

Tansu Çiler: “Turqia nuk mund të qëndrojë pasive përpara krizës në Shqipëri”;

Beogradi i bën shantazh OSBE-së;

U promovua libri “Letra shqipe” i Sabri Hamitit;

Botues nga Kosova marrin pjesë në Panairin e Librit dhe Shtypit;

Parlamenti maqedon vazhdon diskutimet për marrëdhëniet ndërnacionale;

SHHB “Nëna Tereze” nga Struga grumbullon ndihma për Shqipërinë;

Mbrëmë në Pejë një serb plagosi një grua shqiptare;

Policia serbe keqtrajtoi katër studentë.

19 mars 1999

Edicioni i orës 13:00:

Konferencë për gazetarë e Xhemail Mustafa, këshilltar për informim i Kryetarit Rugova;

Delegacioni i Kosovës: “Kosova pret vendosjen e trupave të NATO-s për implementimin e marrëveshjes”;

Në afërsi të fshatit Bishtazhin u gjet trupi i pajetë i Ferid Domit nga Gjakova;

Mitrovicë: Forcat serbe sulmuan edhe sot pozicionet e UÇK-së;

Granatime në drejtim të Obrançës e Katunishtës – ardhje të reja të forcave serbe në Kosovë;

Kufomat e gjetura dje në Peran dyshohet të jenë të Nazmi Ismajlit e Ismet Beqirit;

Vushtrri: Forcat serbe edhe gjatë natës granatuan Beçukun, Pantinën dhe Okrashticën;

Kaçanik: Një konvoj i madh i forcave serbe u vendos në fshatin Llanishtë;

Në vendkalimin kufitar Kosovë-Maqedoni policia serbe arrestoi një shqiptar;

Mbrëmë dhe sot në Mitrovicë pati lëvizje civilësh të armatosur serbë;

Istog: persona të armatosur tentuan të kidnapojnë një shqiptar nga Kashica;

Mitrovicë: Mësimi fillon sërish më 22 mars;

Klark: “Mbetet real opcioni për bombardimin e caqeve në Serbi”;

Liderët fetarë të Kosovës bëjnë thirrje për zgjidhje paqësore;

Aksion kundër urisë në komunën e Malishevës;

MPJ e Shqipërisë përgënjeshtron agjencinë “Beta”;

Kërkohen të dhëna për familjen e Agim Zenelit nga Jabllanica;

G.Svillanoviq: “Dikush dëshiron përsëri të ndodhë beteja e Kosovës dhe veten ta shpallë car Llazar”;

Boris Majorski hodhi poshtë pohimet e palës serbe se nuk ka pasur ndonjë dokument për Kosovën;

Një gjeneral serb thotë se serbët nuk do të heqin dorë nga vendimi që të mbrojnë Kosovën me çdo kusht;

Afër fshatit Kabash të Prizrenit u vra një ushtar serb;

Rusia i bën thirrje Beogradit të nënshkruajë marrëveshjen politike për Kosovën.

Edicioni i orës 14:30:

Klintoni bisedon sot për Kosovën me udhëheqësit e Kongresit;

Zëdhënësja e UNHCR-së paraqiti shifra alarmante rreth të zhvendosurve dhe refugjatëve kosovarë;

Klinë: Nuk dihet për fatin e disa civilëve shqiptarë;

Nuk dihet për fatin e disa banorëve të komunës së Prizrenit;

Tash dy ditë nuk dihet për fatin e dy shqiptarëve nga komuna e Malishevës;

Në Kabash të Prizrenit u vra luftëtari i UÇK-së, Rexhep F. Kukaj;

Vushtrri: Forcat serbe po shtijnë drejt fshatit Beçuk;

Policia serbe bastisi shtëpitë e tre shqiptarëve në Dushanovë;

PPT përkrah nënshkrimin e marrëveshjes për Kosovën;

Persona të maskuar plaçkitën një familje shqiptare;

Pejë: Një banor i Raushiqit vazhdon të mbahet në arrest;

Obiliq: Forcat serbe po legjitimojnë civilë shqiptarë në fshatin Vodicë.

Edicioni i orës 18:00:

Misioni i OSBE-së në Kosovë evakuohet, perëndimorët konsultohen për përgjigje ndaj Beogradit;

Bastisje, arrestime dhe lëvizje të forcave serbe komunën e Deçanit;

Forcat serbe po djegin lagjen e Prekazëve në Bukosh.

lajme

Kamberi: Provokimet e Serbisë në Bujanoc rrezikojnë sigurinë, NATO të ndërhyjë

Published

6 minutes ago

March 19, 2026

UBTNews

Deputeti shqiptar në Kuvendin e Serbisë, Shaip Kamberi, ka ngritur alarmin për rritjen e tensioneve në Luginën e Preshevës, duke deklaruar se stërvitjet e fundit ushtarake të Serbisë në territorin e Komunës së Bujanocit, pranë kufirit me Republikën e Kosovës, përbëjnë një kërcënim serioz për mjedisin e sigurisë në rajon.

Sipas Kamberit, këto aktivitete që përfshijnë kapacitete ajrore dhe zhvillohen afër zonave të banuara, ndikojnë negativisht në perceptimin e sigurisë te komuniteti shqiptar dhe ulin besimin ndërmjet aktorëve lokalë, duke u interpretuar si faktorë që nxisin destabilizimin e Ballkanit Perëndimor.

Ai ka theksuar se përballë provokimeve të vazhdueshme të regjimit të Vuçiqit ndaj Kosovës dhe shqiptarëve të Luginës, është bërë i domosdoshëm reagimi i bashkësisë ndërkombëtare për të inkurajuar transparencën dhe për të shmangur veprimet provokuese që shkelin normat ndërkombëtare.

“Duke marrë parasysh rëndësinë e stabilitetit afatgjatë në Ballkanin Perëndimor, mbetet thelbësore që të veprohet me përmbajtje dhe në përputhje me parimet e sigurisë bashkëpunuese. Në këtë drejtim, roli i bashkësisë ndërkombëtare është kyç për të inkurajuar dialogun konstruktiv, transparencën dhe shmangien e veprimeve që mund të perceptohen si provokuese”, shkruan Kamberi

Në këtë kuadër, Kamberi ka bërë thirrje urgjente për shtimin e forcave të KFOR-it si një masë të rëndësisë primare për ruajtjen e paqes, duke i kërkuar NATO-s që të rishikojë vendimin për Zonën Toksore të Sigurisë me qëllim parandalimin e krizave të mundshme dhe garantimin e një mjedisi të qëndrueshëm e të parashikueshëm në këtë pjesë delikate të rajonit.

Lidhur me këtë situatë, sot ka reaguar edhe Kryeministri i Kosovës, i cili gjatë mbledhjes së Qeverisë i dënoi fluturimet e helikopterëve dhe lëvizjet e parashutistëve mbi zonat e banuara me shqiptarë si një shfaqje të rrezikshme agresioni.

Kreu i ekzekutivit bëri një lidhje të drejtpërdrejtë mes këtyre njësive ushtarake dhe sulmit terrorist në Banjskë, duke theksuar se Beogradi po përdor armatimin rus e kinez për të shantazhuar stabilitetin e Ballkanit Perëndimor në interes të aleatëve si Rusia dhe Irani. Pavarësisht kësaj trysnie, Kryeministri u bëri thirrje shqiptarëve në Luginë që të mos bien pre e provokimeve, duke vlerësuar se këto veprime vijnë nga dëshpërimi i Serbisë pas dështimit të strukturave të saj ilegale brenda territorit të Kosovës.

Lajmet

Bëhu lider në sektorin e energjisë: Studime me standarde ndërkombëtare në UBT

Published

1 hour ago

March 19, 2026

UBTNews

Programi Bachelor në Inxhinieri të Energjisë në UBT është hartuar si një rrugëtim profesional për të gjithë ata që synojnë një karrierë të sigurt dhe me ndikim në industrinë e të ardhmes.

Ky drejtim fokusohet në përgatitjen e ekspertëve të rinj që do të merren me prodhimin, shpërndarjen dhe përdorimin efikas të energjisë, duke kombinuar metodat tradicionale me ato moderne dhe miqësore me mjedisin.

Nevoja për inxhinierë të rinj në Kosovë është mjaft e lartë, sidomos kur merret parasysh se në institucionet tona si KEK-u, mosha mesatare e punonjësve është rreth 60 vjeç. Kjo tregon se tregu i punës ka një kërkesë të madhe për kuadro të reja që zotërojnë njohuri kreative dhe teknike për të zgjidhur sfidat e sotme të sistemit energjetik.

Gjatë tri viteve të studimit, studentët fitojnë njohuri të plota që nga bazat e fizikës dhe matematikës e deri te teknologjitë më të avancuara si energjia solare, ajo e erës dhe sistemet e ruajtjes së energjisë përmes baterive.

Ky program është i harmonizuar plotësisht me Strategjinë e Energjisë së Kosovës 2022-2031, e cila parasheh investime të mëdha në burime të rinovueshme dhe në rrjete inteligjente të njohura si “Smart Grid”. Kjo u mundëson të diplomuarve që të jenë të gatshëm për t’u përfshirë në projekte të rëndësishme, qofshin ato shtetërore apo private, duke menaxhuar sisteme komplekse dhe duke kontribuar drejtpërdrejt në mbrojtjen e mjedisit.

Si një risi e rëndësishme për këtë vit, të gjithë studentët që bëhen pjesë e këtij programi do të kenë mundësi të përfitojnë një bursë prej 20% për të tri vitet e studimeve.

Ky është një lehtësim i konsiderueshëm që u mundëson studentëve të përkushtohen maksimalisht në ngritjen e tyre profesionale. Në përfundim të studimeve, ata do të jenë të aftë të projektojnë sisteme energjetike, të analizojnë faktorët ekonomikë dhe të udhëheqin ekipe multidisiplinare.

Ky program në UBT mbetet një pikë referimi për krijimin e liderëve të nesërm në njërin prej sektorëve më strategjikë të vendit dhe rajonit.

lajme

Këto janë vendimet që u morën sot në mbledhjen e Qeverisë

Published

1 hour ago

March 19, 2026

UBTNews

Qeveria e Kosovës ka mbajtur sot mbledhjen e pestë të rregullt, me ç’rast ka miratuar një varg vendimesh që ndërlidhen me reforma administrative, shëndetësi, infrastrukturë dhe integrime evropiane. Ndër vendimet kryesore ishte bartja e Zyrës për çështjet e kategorive të dala nga lufta e UÇK-së nga Zyra e Kryeministrit në Ministrinë për Punë, Familje dhe Vlerat e Luftës Çlirimtare.

Në kuadër të agjendës evropiane, ekzekutivi ka themeluar Sistemin për Zbatimin e Mbështetjes së Bashkimit Evropian përmes Instrumentit për Reforma dhe Rritje Ekonomike për Ballkanin Perëndimor. Për këtë proces, Jeton Zulfaj është emëruar Koordinator Kombëtar, me qëllim koordinimin ndërinstitucional për zbatimin e reformave të kërkuara nga BE-ja.

Në sektorin e shëndetësisë, kabineti qeveritar ka miratuar kërkesën për pagesën e specializantëve me vetëfinancim. Për këtë qëllim janë ndarë mbi 550 mijë euro, nga të cilat përfitojnë 55 specializantë brenda vendit dhe 37 të tjerë nga Lugina e Preshevës, Shqipëria, Mali i Zi dhe Maqedonia e Veriut.

Sa i përket infrastrukturës dhe pronave, janë miratuar disa vendime për shpronësime për interes publik. Këto vendime i hapin rrugë zgjerimit të rrugës nacionale Prishtinë–Podujevë (M25), ndërtimit të një Zone Industriale të Mbrojtjes në pronat e ish-KBI Erenikut, si dhe realizimit të projektit për linjën ajrore 110kV në Zatriq. Po ashtu, Qeveria ka dhënë në shfrytëzim ngastra kadastrale për nevojat e ndërtimit të një Terminali Publik për Doganën e Kosovës.

Gjatë kësaj mbledhjeje u ndanë edhe 138 mijë euro për mbështetjen e orkestrës së fëmijëve dhe të rinjve “Amadeus” për pjesëmarrje në gara ndërkombëtare në Spanjë dhe Çeki. Ndërkaq, për Fondin e Ekselencës, në bashkëpunim me trupat e OKB-së, janë alokuar 400 mijë euro. Ndër vendimet e tjera, vlen të theksohet zgjatja e mandatit të Komisionit për Verifikimin e Diplomave të Universitetit të Mitrovicës së Veriut edhe për tre muaj.

Lajmet

Qeveria dënon provokimet ushtarake të Serbisë pranë kufirit me Kosovën

Published

2 hours ago

March 19, 2026

UBTNews

Kryeministri i Kosovës ka shprehur shqetësim të thellë gjatë mbledhjes së sotme të Qeverisë lidhur me demonstrimin ushtarake të Serbisë në komunën e Bujanovcit, fare pranë brezit kufitar me Republikën e Kosovës.

Sipas kreut të qeverisë, fluturimet e helikopterëve H145M dhe lëvizjet e Brigadës 63 të parashutistëve mbi zonat e banuara me shqiptarë përbëjnë një shfaqje të rrezikshme të agresionit dhe trysni të hapur mbi banorët që po përballen me spastrim etnik administrativ.

Gjatë fjalës së tij, Kryeministri u shpreh se kjo shfaqje e forcës ushtarake mbi shtëpi, shkolla dhe qendra mjekësore është një provokim i hapur ndaj shtetit të Kosovës.

Kurti bëri një lidhje të drejtpërdrejtë mes kësaj njësie ushtarake dhe ngjarjeve tragjike në veri të vendit, duke deklaruar: “Kjo shfaqje bëhet edhe më alarmuese kur kujtojmë se e njëjta njësi ka trajnuar dhe mbështetur grupin e kriminelit Milan Radojçiq, të cilët realizuan sulmin terrorist në Banjskë, ku u vra rreshteri Afrim Bunjaku.”

Sipas analizës së prezantuar në mbledhje, këto lëvizje ushtarake po përdoren si mjet shantazhi nga regjimi në Beograd për të mbajtur rajonin në tension të vazhdueshëm.

Kryeministri theksoi se blerja e armatimit rus e kinez dhe retorika e Presidentit Vuçiq për gjoja sulme nga fqinjtë, konfirmojnë synimet destabilizuese të Serbisë në një kohë kur siguria globale është tejet e brishtë.

“Beogradi po shfrytëzon këtë moment për të sfiduar gatishmërinë e institucioneve dhe stabilitetin e Ballkanit Perëndimor, sipas interesave të aleatëve të saj, Rusisë dhe Iranit”, u shpreh Kurti.

Pavarësisht këtyre provokimeve, kreu i ekzekutivit vlerësoi se këto veprime vijnë nga dëshpërimi i Serbisë, pasi ajo nuk ka më struktura ilegale brenda Kosovës për të shkaktuar destabilizim të brendshëm.

Gjithashtu, ai dërgoi një mesazh për shqiptarët në Luginë, duke u bërë thirrje që të mos bien pre e politikave nxitëse.

“Institucionet e Kosovës mbeten vigjilente dhe të gatshme për t’u përballur me çdo kërcënim,” siguroi ai, duke kërkuar njëkohësisht nga komuniteti ndërkombëtar që të ndëshkojë këtë qasje të Serbisë që kërcënon drejtpërdrejt paqen rajonale.