Pesë oficerë të Forcës së Sigurisë së Kosovës (FSK) kanë marrë pjesë në kursin “Defence Resource Management Course”, të organizuar nga Ushtria Kanadeze në Bosnje dhe Hercegovinë.

Gjatë trajnimit njëjavor, pjesëmarrësit avancuan njohuritë në menaxhimin e resurseve të mbrojtjes, prokurim, projekte dhe burime njerëzore, duke shkëmbyer praktikat më të mira ushtarake kanadeze që mund të zbatohen në FSK.

Përveç aktivitetit ushtarak, ekipi i FSK-së vizitoi edhe Shoqatën e Shqiptarëve në Bosnje dhe Hercegovinë, ku u prit nga përfaqësues të komunitetit shqiptar atje.

Pjesëmarrja në këtë program ndihmon në ngritjen e kapaciteteve profesionale të personelit ushtarak kosovar dhe fuqizon bashkëpunimin me partnerët ndërkombëtarë. /E.A/

Premiera botërore e veprës “Neighbours / from Motherland”, e cila hapi Festivalin Ndërkombëtar të Vallëzimit në Tiranë, u prit me duartrokitje për 10 minuta nga publiku.

Vepra, e krijuar nga Brigel Gjoka dhe Rauf “Rubberlegz” Yasi, bashkoi për herë të parë në të njëjtën skenë trupat e Baletit të Shqipërisë dhe Baletit të Kosovës.

E shfaqur në Teatrin Kombëtar të Operës dhe Baletit në Tiranë, kjo vepër e baletit bashkëkohor vuri në qendër rrënjët e përbashkëta dhe identitetin, duke sjellë një bashkëpunim artistik mes dy trupave shqiptare.

Salla e teatrit ishte e mbushur me artdashës, të cilët ndoqën hapjen e edicionit të pestë të Festivalit Ndërkombëtar të Vallëzimit në Tiranë (IDFT).

Ministri i Turizmit, Kulturës dhe Sportit në Shqipëri, Blendi Gonxhja, ndau pamje nga performanca dhe bëri të ditur se më 7 tetor shfaqja do të prezantohet edhe në Teatrin Kombëtar të Kosovës në Prishtinë.

Festivali vazhdon me aktivitete të tjera, duke sjellë në Tiranë artistë dhe produksione nga skena ndërkombëtare e vallëzimit bashkëkohor./ATSH/A.K/

Më 5 tetor shënohet përvjetori i lindjes së aktorit Xhevat Qena, një prej figurave të njohura të teatrit dhe kinematografisë shqiptare në Kosovë. I lindur në Mitrovicë më 5 tetor 1930, ai ndërtoi një karrierë të gjatë artistike dhe u nda nga jeta më 24 mars 2003 në Prishtinë.

Për më shumë se katër dekada në skenë, Qena interpretoi qindra role në teatër, film dhe produksione televizive. Ai u dallua veçanërisht në komedi, por gjatë karrierës së tij interpretoi me sukses edhe role dramatike.

Ndër rolet e tij më të njohura në teatër ishin Shvejku në shfaqjen “Ushtari i mirë Shvejk”, Vinetu në shfaqjen me të njëjtin emër, si dhe interpretimet në “Përqafimi”, “Duart e ndyra”, “Revizori”, “Gjenerali i ushtrisë së vdekur”, “Oda e errët”, “Mbreti Edip” dhe “Tartufi”.

Në kinematografi dhe televizion, ai u shfaq në produksione të njohura, ndër to “Kapetan Lesi”, “Po e zëm, po e zëm”, “Si të vdiset”, “Gjurmët e bardha”, “Kur pranvera vonohet”, “Proka”, “Autobusi” dhe “Shkolla e fshatit”.

Një pjesë e rëndësishme e jetës së tij artistike lidhet edhe me bashkëshorten, aktoren Leze Qena. Të dy interpretuan së bashku në shumë shfaqje dhe produksione, duke u bërë një prej çifteve më të njohura të skenës shqiptare në Kosovë.

Kolegët e kujtonin Xhevat Qenën si një aktor me imagjinatë, spontanitet dhe mjeshtëri të veçantë në interpretim. Ai dallohej për aftësinë për të krijuar atmosferë në skenë, për të bashkëpunuar me aktorët e tjerë dhe për ta mbajtur publikun të përqendruar gjatë shfaqjes.

Edhe pse komedia ishte një prej fushave ku shkëlqeu, Qena kishte një lidhje të veçantë me dramën. Ndër rolet që i kishin lënë mbresa ishte ai i një avokati në dramën “Oda e errët”.

Për më shumë se 40 vjet në skenë, Xhevat Qena i dha teatrit dhe filmit shqiptar një trashëgimi të rëndësishme artistike. Ai mbetet në kujtesën e publikut për humorin, energjinë dhe mënyrën e natyrshme të interpretimit, ndërsa rolet e tij vazhdojnë të kujtohen edhe sot./A.K/

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

2 tetor 1993

Vazhdojnë arrestimet e aktivistëve në Gjakovë

Gjatë javës së fundit, vala e arrestimeve të aktivistëve në Gjakovë nga ana e policisë serbe, vazhdon edhe më tej. Kështu sot në orët e hershme të mëngjesit u arrestuan Shefqet Vokshi, anëtar i Kryesisë së Partisë Fshatare të Kosovës, Dega në Gjakovë dhe Teki Dobroshi, kryetar i Orrganizatës sindikale të PTT-së në Gjakovë.

Komisioni për Informim i LDK-së së Gjakovës, gjithashtu njofton se policia serbe e mori peng Qazim Thaçin në vend të djalit të tij, Ilirit, të cilin kohë më parë e kërkoi policia serbe.

2 tetor 1995

Në Mitrovicë policia financiare serbe plaçkiti sasi të madhe të mallit dhe të parave

Më 30 shtator, siç kemi informuar edhe më parë, një ekspeditë e policisë financiare serbe ndërhyri në tregun e Mitrovicës, me ç’rast plaçkiti sasi të konsiderueshme parashë nga pronarët shqiptarë të firmave e dyqaneve, njofton KI i Degës së LDK-së në Mitrovicë.

Policia serbe dhe ajo financiare ndërhynë edhe në kompleksin e sharrave për përpunimin e drurit në fshatin Zhabar të Epërm të Mitrovicës. Ekspeditës plaçkitëse i printe njëfarë Safet Jakupi me përkatësi gorane, i cili plaçkiti sasi të mëdha parashë. Kështu, Arif Hysenit iu plaçkitën 2.000 dinarë, Bedri Mujës 400, Sylejman Jetullahut 700, Rexhep Ceranit 1.000, Fadil Bajraktarit 300, Basri Hysenit 1.000, Bedri Çitakut 300, Sabedin Ramës 500, Sahit Padruzit 2.000, Zenë Mujës 500, Sahit Pepiqit (mysliman) 1.000, Brahim Ahmetoviqit 1.000 dhe Hamit Pepiqit 500.

Njoftohet se disa pronarë të dyqaneve janë plaçkitur edhe në lagjet “Tavnik” dhe “Ura e gjakut”, si ato të Haki Shabanit nga i cili u plaçkitën 1.200 dinarë, Ali Malokut 600, Sami Krasniqit 400, Bajram Shabanit 1.200, Fehmi Avdiut 2.700, Selim Eminit 200, Shaban Sadikut 500, Sabri Jasharit 500, Sabri Haxhiut 100, Sejdi Parallankës 200, Abedin Behramit 400, Bedri Vocës 250, Beqir Morinës 300, Nerxhivane Vocës 600 dhe Mustafë Aruçit 2080.

Bëhet e ditur se inspektorët serbë plaçkitën edhe mobile, tavolina e gjësende të ndryshme.

Bëhet e ditur se policia finaciare dhe ajo e uniformuar në tregun e pemëve dhe perimeve në Mitrovicë, nga tregtarët shqiptarë kanë plaçkitur edhe artikuj të ndryshëm ushqimorë, pa u lëshuar kurrfarë vërtetimi, ashtu siç ndodhi edhe me plaçkitjen e parave, për të cilat gjithashtu nuk u dhanë kurrfarë vërtetimesh me shkrim.

Në Informatën shtesë të KI të Degës së LDK-së në Mitrovicë bëhet me dije se janë plaçkitur edhe këta pronarë dyqanesh: Ilaz Vojvodës i janë plaçkitur 7500 DM, Bashkim Behramit 600 dinarë, Pajazit Bekës 600, Qerim Galicës 300, Afrim Shabanit 700, Abdullah Ymerit 500, Musa Dragës 600, Osman Skënderit 500, Ramadan Rexhepit 600 dhe Lavdim Vojvodës 2000 dinarë.

Izet Bilallin nga Zhabari i Poshtëm inspektorët e ndalën në rrugë dhe ia plaçkitën 450 kilogamë fasule, në vlerë prej rreth 1350 dinarë.

Në këtë njoftim gjithashtu bëhet me dije se në tregun e druve, ku ekspozohet për shitje edhe druri ndërtimor, policia plaçkiti një sasi të madhe të devizave nga tregtarët muslimanë.

Sipas shënimeve të mbledhura deri më tash, llogaritet se në këtë treg janë plaçkitur rreth 65.000 DM.

 2 tetor 1997

Engël kërkon që SHBA-të të dënojnë energjikisht Serbinë

Kongresisti amerikan Eliot Engël lidhur me intervenimin e forcave policore serbe ndaj demonstruesve studentë shqiptarë në Kosovë i bëri thirrje administratës së Klintonit që t’i dënojë me forcë autoritetet serbe për ndërhyrje me forcë ndaj protestave të studentëve në Kosovë. Ai theksoi se ky është momenti i përshtatshëm që administrata të emërojë një përfaqësues të posaçëm për Kosovën.

Eliot Engël, ligjdhënës nga Nju-Jorku, i cili kryeson grupin e deputetëve të interesuar për çështjen shqiptare, tha se e kishte indinjuar ndërhyrja e forcave policore serbe ndaj protestave të studentëve në Prishtinë.

Jam i skandalizuar nga kjo që ndodhi dhe besoj se Shtetet e Bashkuara duhet që me fjalë më të ashpra t’i japin Sllobodan Millosheviqit dhe Qeverisë serbe që të kuptojë se kjo është krejt e papranueshme dhe se ne do t’i mbajmë S. Millosheviqin dhe Qeverinë serbe përgjegjëse për veprimet e tyre. Z. Engël tha se po i shkruan sekretares ameriakne të Shtetit Medlin Ollbrajt për t’i kërkuar asaj që të protestojë ashpër ndaj një veprimi të tillë të Qeverisë serbe. Ligjvënësi tha se do të përfitojë nga ky rast për të kërkuar vazhdimin e sanksioneve ndaj Jugosllavisë së vetëshpallur.

I bëj thirrje gjithashtu asaj që të vazhdojë sanksionet ndaj Serbisë dhe t’u lihet serbëve që të kuptojnë se veprimet e tilla do të kuptojnë se veprimet e tilla do të çojnë në sanksione shtesë dhe se komuniteti ndërkombëtar nuk do të qëndrojë duarkryq për të lejuar që protestat paqësore të shtypen me dhunë. I bëj thirrje edhe njëherë presidentit Klinton, tha z. Engël, që të caktojë një përfaqësues të posaçëm për Kosovën. Z. Engël është një nga kritikët më të hapur në kongres kundër politikave të autoriteteve serbe në Kosovë dhe ka bërë vazhdimisht thirrje që administrata të emërojë një përfaqësues të posaçëm për Kosovën. Vitin e kaluar dhoma e përfaqësuesve miratoi një rezolutë të hartuar prej tij ku shtrohej me forcë kjo kërkesë. Ajo nuk është bërë realitet. Ligjvënësi tha se tani është koha më e përshtatshme pë të ndërmarrë një hap të tillë. Z. Engël tha se nëse “të drejtat” e serbëve si ajo që të shtypen me dhunë protestat e shqiptarëve në Kosovë nga forcat e armatosura e gaz lotsjellës, të cilët rrahën brutalisht njerëzit aksionet shkojnë drejt rrijtes. Shtohet pakënaqësia dhe kjo e bën shumë të vështirë që z. Rugova t’i qetësojë protestuesit. Z. Engël tha se mundësia e gjakderdhjes ekziston, por ai shfaqi shpresën se njerëzit do t’i përgjigjen thirrjes dr. Rugovës që protestat të zhvillohen paqësore, pasi siç theksoi ai, çdo akt dhune do të shkonte në favor të z. Milosheviq, njofton “Bujku”.

2 tetor 1998 (Ora 14:30).

Ferizaj: Në Jezerc forcat serbe plagosën disa shqiptarë – fshati sërish sulmohet e mbahet në rrethim

Nga e shtuna e kaluar, forcat e ushtrisë dhe të policisë serbe pandërprerë kanë granatuar fshatin Jezerc, ndërsa granatimet serbe në drejtim të këtij fshati kanë vazhduar edhe mbrëmë, bën të ditur KI i Degës së LDK-së në Ferizaj.

I njëjti burim bën të ditur se në këtë fshat nga forcat serbe janë plagosur disa civilë shqiptarë dhe gjendja e tyre shëndetësore është shumë e rëndë. Lidhur me këtë, banorët e këtij fshati apelojnë te organizatat e huaja ndërkombëtare humanitare që t’u vijnë në ndihmë të plagosurve, por edhe rreth 1.500 banorëve të zhvendosur të këtij fshati, të cilët kanë mbetur pa ushqime, ilaçe e gjësende tjera më elementare.

Suharekë: U identifikuan trupat e pajetë edhe të 3 shqiptarëve të vrarë nga forcat serbe

Dje në komunën e Suharekës janë gjetur trupat e pajetë edhe të 3 civilëve shqiptarë të vrarë nga forcat serbe, njofton KI i Degës së LDK-së në Suharekë.

Bëhet e ditur se janë identifikuar trupat e pajetë të Qazim Kolollit (60) në Budakovë dhe trupat e djegur të bashkëshortëve Arif Ndrecaj (80) dhe të Xhyzide Ndrecajt (78) në Maçitevë, kufomat e të cilëve ende janë të paprekura dhe nuk janë varrosur.

Malishevë: Nëntë të vrarë gjatë ditëve të fundit

Ditëve të fundit Në fshatrat Golluboc, Plaçicë e Llazicë të Malishevës, forcat serbe kanë vrarë edhe 9 civilë shqiptarë.

Njoftohet se forcat serbe kanë vrarë edhe Fazli Hoxhajn (41), Selman Gashin (31), Rrustem Malokun (42), Rasim Malokun (38), Muhamet Malokun (35), Halim Malokun (37), Ahmet Malokun (25) Aziz Malokun (48) e Ilaz Maliq Javorin.

KMDLNJ dëshmon edhe identitetin e 11 shqiptarëve të vrarë nga forcat serbe

Më 26 shtator të këtij viti, në afërsi të tuneleve të Murgës në Klinë, forcat serbe kanë ndarë nga turma e civilëve të zhvendosur shqiptarë dhe kanë ekzekutuar Smail Millakun (72) dhe djalin e tij Sefer Millakun (49) nga Ujmiri, bën të ditur KMDLNJ me seli në Prishtinë.

I njëjti burim bën të ditur se po këtë ditë në fshatin Gollubovc, paramilitarët serbë kanë ekzekutuar edhe 8 të rinj shqiptarë si Agron Miftar Hasanin (25), Hysen Rifat Pantinën (20), Ahmet Pantinën (25) dhe Shaip Sali Manajn (19) nga Gllareva. Po ashtu forcat serbe kanë vrarë edhe Remzi Veselajn (35) e Zeqir Berishën (40) nga Gjurgjeviku i Madh dhe vëllezërit Rasim (39) e Halim Maloku (37), që të dy mësimdhënës nga Ceroviku i Klinës.

Ndërkaq, më 29 shtator në malin e Oshlanit të Vushtrrisë, banorët e këtushëm kanë gjetur trupin e pajetë dhe të masakruar të fëmijës, Arsim Ibrahimi (13) nga Oshlani.

Njoftohet se në fshatin Gollubovc, forcat serbe kanë plagosur edhe dy të rinj shqiptarë, emrat e të cilëve nuk janë konfirmuar ende.

Foto: Kongresisti amerikan Eliot Engël