Policia e Kosovës ka arrestuar pesë persona të dyshuar për krime lufte, në kuadër të një operacioni të zhvilluar në rastin e njohur si “Reçaku II”.

Sipas Prokurorisë Speciale të Republikës së Kosovës, operacioni është realizuar në bashkëpunim me Policinë e Kosovës, ku janë ekzekutuar urdhër-kontrolle në disa lokacione dhe si rezultat janë arrestuar pesë të dyshuar.

Drejtoria për Hetimin e Krimeve të Luftës në Policinë e Kosovës ka bërë të ditur se arrestimet janë realizuar pas një sërë veprimesh hetimore dhe urdhër-bastisjesh në pronat e të dyshuarve.

Të arrestuarit janë identifikuar si:

N.P, shtetas i Kosovës, i nacionalitetit serb, viti i lindjes 1968 Shtërpcë, ish-pjesëtar i Ministrisë së Punëve të Brendshme të Serbisë.

S.J, i nacionalitetit serb, shtetas Kosovar, i lindur më 1967 në Betollush të Shtërpcës, ish-polic i pensinuar.

B.P, i nacionalitetit serb, i lindur më 1969 në Serqe të Shtërpcës, ish-polic. Ky është arrestuar në likëkalimin kufitar të Merdares, në orët e para të mëngjesit të së dielës.

S.M, i nacionalitetit serb, viti i lindjes, 1968 në Shtërpcë, ish-pjesëtar i Ministrisë së Punëve të Brendshme të Serbisë.

Si dhe, S.S, i nacionalitetit serb, i lindur më 1966 në Gjilan, punëtor në shërbime postare në Serbi , pjesë e formacioneve policore gjatë kryerjes së krimit.

Operacioni është zhvilluar të dielën, ndërsa hetimet lidhur me rastin “Reçaku II” po vazhdojnë.

/A.K/

Dy aksidente të ndara trafiku janë raportuar në Kosovë, të cilat kanë rezultuar me viktima.

Në Autostradën “Ibrahim Rugova”,  një drejtues automjeti, shtetas kosovar, dyshohet se ka humbur kontrollin mbi automjetin, duke shkaktuar një aksident të rëndë. Si pasojë, pasagjerja femër kosovare ka pësuar lëndime vdekjeprurëse dhe vdekja e saj është konstatuar në vend nga mjeku. Në këtë aksident është lënduar edhe drejtuesi i automjetit, i cili është duke u trajtuar në QKUK. Me urdhër të prokurorit, trupi i pajetë i viktimës është dërguar në Institutin e Mjekësisë Ligjore për obduksion.

Ndërkohë, në Gjilan,  është raportuar se ka ndërruar jetë një burrë kosovar i cili po trajtohej në spital si pasojë e lëndimeve të marra në një aksident trafiku të ndodhur më 2 maj 2026. Lidhur me rastin janë njoftuar organet e drejtësisë dhe procedurat hetimore janë duke vazhduar.

Sipas raportit të Policisë së Kosovës, gjatë 24 orëve të fundit janë regjistruar disa raste të dhunës në familje në qytete të ndryshme të vendit, ndërsa disa persona janë arrestuar dhe dërguar në mbajtje.

Në Prishtinë, një grua ka raportuar se është sulmuar fizikisht nga një burrë. Gjatë kontrollit në shtëpinë e të dyshuarit, policia ka gjetur dhe konfiskuar 4.14 gramë substancë të dyshuar narkotike të llojit marihuanë. I dyshuari është arrestuar dhe, me vendim të prokurorit, është dërguar në mbajtje.

Po ashtu në Prishtinë, pas një mosmarrëveshjeje, një burrë dhe një grua janë përfshirë në një përleshje fizike. Të dy janë arrestuar, por pas intervistimit janë liruar në procedurë të rregullt.

Në Ferizaj, një grua ka raportuar se është sulmuar fizikisht dhe është kanosur nga një burrë. Pas trajtimit mjekësor, viktima është dërguar në strehimore, ndërsa i dyshuari është ndaluar.

Raste të tjera janë raportuar edhe në Gjakovë dhe Malishevë. Në një rast në Gjakovë, një person i dehur dyshohet se ka ushtruar dhunë psikike dhe ka tentuar të sulmojë një grua, ndërsa në një rast tjetër dyshohet se ka ushtruar vazhdimisht dhunë psikike ndaj familjes dhe ka demoluar orenditë shtëpiake. Të dyshuarit janë arrestuar.

Ndërkohë, në Malishevë është arrestuar një person i dyshuar për ushtrim të dhunës psikike ndaj një gruaje, por më pas është liruar në procedurë të rregullt.

Një rast tjetër është raportuar në Mitrovicën e Jugut, ku një grua ka deklaruar se është shqetësuar, sulmuar dhe kanosur nga një burrë. Viktima ka kërkuar urdhër mbrojtës, ndërsa i dyshuari është arrestuar dhe dërguar në mbajtje.

Autoritetet po vazhdojnë hetimet për të gjitha rastet e raportuara.

/A.K/

Në Qendrën e Numërimit dhe të Rezultateve po vazhdon procesi i numërimit të votave të zgjedhjeve të parakohshme të mbajtura më 7 qershor.

Aktualisht janë duke u numëruar votat me postë, ku nga 223 pako gjithsej janë numëruar 80 prej tyre, ose 35.87 për qind.

Sipas përditësimit të fundit në platformën e Komisionit Qendror të Zgjedhjeve (KQZ), Lëvizja Vetëvendosje prin me 69.67 për qind të votave të diasporës. Pas saj renditet Lidhja Demokratike e Kosovës me 15.17 për qind, Partia Demokratike e Kosovës me 7.98 për qind dhe Aleanca për Ardhmërinë e Kosovës me 5.34 për qind të votave.

KQZ-ja ka njoftuar se janë aprovuar mbi 82 mijë fletëvotime me postë nga më shumë se 85 mijë sa janë pranuar gjithsej.

Ndërkaq, zëdhënësi i KQZ-së, Valmir Elezi, ka bërë të ditur se 2.981 pako me vota të diasporës janë refuzuar për arsye të ndryshme.

/A.K/