Policia e Kosovës ka raportuar për disa raste që lidhen me përdorimin dhe posedimin e paautorizuar të armëve, si dhe një rast të therjes me thikë, të regjistruara gjatë dy ditëve të fundit në disa komuna të vendit.

Në fshatin Shtedim të Podujevës, pas një informate për të shtëna me armë zjarri në një aheng familjar, policia ka dalë në vendin e ngjarjes, ku gjatë kontrollit ka gjetur dhe sekuestruar një pistoletë me gaz. Një i dyshuar është arrestuar, ndërsa pas intervistimit është liruar në procedurë të rregullt me vendim të prokurorit.

Në Prishtinë, një qytetar ka raportuar se një predhë e armës së zjarrit ka goditur derën hyrëse të shtëpisë së tij. Predha është sekuestruar nga policia, ndërsa rasti mbetet nën hetime.

Po në kryeqytet, është arrestuar një i mitur, i dyshuar se ka therur me thikë një person. Viktima është dërguar për trajtim mjekësor në Qendrën Klinike Universitare të Kosovës, ndërsa i dyshuari është dërguar në mbajtje me urdhër të prokurorit.

Një tjetër rast është raportuar në fshatin Petrovë të Shtimes, ku pas raportimeve për të shtëna me armë në një aheng familjar, policia ka ndërhyrë dhe i dyshuari ka dorëzuar vullnetarisht një pistoletë me dy fishekë. Rasti është iniciuar dhe po hetohet në procedurë të rregullt.

Po në Shtime, në rrugën “Fazli Grajqevci”, policia ka arrestuar një person të dyshuar se kishte shtënë me armë zjarri. Ai ka dorëzuar vullnetarisht një pistoletë me gaz pa fishekë dhe, me vendim të prokurorit, është liruar në procedurë të rregullt.

Në fshatin Korishë të Prizrenit, gjatë veprimeve hetimore në lidhje me një rast, policia ka gjetur dhe sekuestruar një pistoletë me gaz në stallën e një të dyshuari. Hetimet lidhur me rastin janë duke vazhduar.

Ndërkohë, në Gjakovë, policia ka ndaluar një automjet, ku gjatë kontrollit ka gjetur një pistoletë dhe shtatë fishekë. Shoferi rezultoi të ishte nën ndikimin e alkoolit. Me vendim të prokurorit, ai është dërguar në mbajtje.

Policia e Kosovës ka bërë të ditur se hetimet për të gjitha rastet janë duke vazhduar në koordinim me prokuroritë kompetente.

D.L

Sipas raportit 24-orësh të Policisë së Kosovës, një person është gjetur pa shenja jete në Pejë.

Viktima, fillimisht është vërejtur i shtrirë në bodrumin e një ndërtese në gjendje të rëndë shëndetësore.

Ekipi mjekësor ka dalë në vendin e ngjarjes dhe e ka transportuar atë në Spitalin e Pejës, ku edhe është konstatuar vdekja e tij.

Me urdhër të prokurorit, rasti është inicuar dhe trupi i pajetë është dërguar në Institutin e Mjekësisë Ligjore (IML) për obduksion. Policia ka bërë të ditur se rasti ndodhet nën hetime. /E.A/

Mëngjesin e sotëm në Pejë, një grua ka humbur jetën si pasojë e goditjes nga treni.

Lajmin e ka konfirmuar zëdhënësi i Policisë së Kosovës për rajonin e Pejës, Fadil Gashi, i cili bëri me dije se incidenti ka ndodhur rreth orës 05:35.

Mjeku kujdestar që doli në vendngjarje konstatoi vdekjen e viktimës./E.A/

Prokuroria Themelore në Prishtinë, në koordinim me Policinë e Kosovës, përkatësisht Drejtorinë për Hetimin e Krimeve Ekonomike dhe Korrupsionit (DHKEK), si dhe në bashkëpunim me partnerët ndërkombëtarë të zbatimit të ligjit, ka arrestuar një person të dyshuar për veprat penale “Falsifikimi i dokumenteve” dhe “Legalizimi i përmbajtjes së rreme”.

Sipas Prokurorisë, rasti ka nisur më 17 qershor 2026, kur një person me inicialet B.K. ishte paraqitur në Agjencinë e Regjistrimit Civil (ARC) për të rinovuar dokumentet e identifikimit. Gjatë verifikimeve, zyrtarët kanë konstatuar se identiteti i paraqitur i përkiste një personi të ndjerë prej vitesh, duke ngritur dyshime për keqpërdorim të identitetit.

I dyshuari është shoqëruar në Polici dhe është intervistuar në prani të mbrojtësit të tij, ndërsa ka shfrytëzuar të drejtën për të mos u deklaruar. Me urdhër të Prokurorit të Shtetit ai është ndaluar për 48 orë, ndërsa më pas Gjykata ka caktuar masën e paraburgimit.

Për verifikimin e identitetit të tij të vërtetë, Prokuroria dhe Policia e Kosovës kanë iniciuar bashkëpunim ndërkombëtar përmes Interpolit dhe Europolit, duke shpërndarë të dhënat dhe gjurmët e gishtërinjve.

Nga informacionet e siguruara përmes autoriteteve të Gjermanisë, Francës, Austrisë, Belgjikës, Shqipërisë, Hungarisë dhe shteteve të tjera partnere, është konfirmuar se i dyshuari kishte përdorur pesë identitete të ndryshme, të lidhura kryesisht me Greqinë, Shqipërinë dhe Kosovën, me të cilat kishte vepruar dhe udhëtuar në disa shtete evropiane.

Hetimet e mëtejshme, në bashkëpunim me autoritetet e Gjermanisë dhe Shqipërisë, kanë bërë të mundur identifikimin e identitetit të tij të vërtetë. Sipas Prokurorisë, bëhet fjalë për shtetasin e Shqipërisë me inicialet E.K., i cili kërkohej ndërkombëtarisht me njoftim të kuq (Red Notice) nga Interpoli.

Autoritetet shqiptare kanë konfirmuar se E.K. është i dënuar me 17 vjet burgim për veprat penale “Vrasje” dhe “Shtrëngim me anë të kanosjes ose dhunës për dhënie të pasurisë”.

Prokuroria Themelore në Prishtinë dhe Policia e Kosovës kanë theksuar se mbeten të përkushtuara në luftimin e krimit dhe forcimin e bashkëpunimit me partnerët vendorë dhe ndërkombëtarë për sjelljen para drejtësisë të personave që kërkohen nga ligji./A.K/