Hidrauliku më i famshëm në botë rikthehet këtë javë në kinema me një vazhdim të filmit shumë të suksesshëm “Super Mario Bros”.

Kanë kaluar tre vjet që kur maskota me mustaqe e Nintendo-s u shfaq në ekran së bashku me vëllain e tij Luigi, Princeshën Peach dhe armikun e tyre Bowser, duke gjeneruar mbi 1.3 miliardë dollarë (gati 1 miliard paund) në mbarë botën.

Filmi “Super Mario Galaxy”, i frymëzuar nga loja e njohur e Wii me të njëjtin emër, e zhvendos ngjarjen në hapësirë dhe sjell personazhe të dashura si Yoshi dhe Rosalina.

Vlerësimet për këtë film të ri janë të përziera: disa kritikë vlerësojnë imagjinatën dhe ritmin, ndërsa të tjerë mendojnë se nuk arrin nivelin e filmit të parë.

Ngjarja vazhdon aty ku përfundoi filmi i parë, me Bowser të burgosur nga Mario dhe Luigi pasi është zvogëluar në madhësi xhepi.

Kur djali i tij, Bowser Jr., i zëruar nga regjisori dhe aktori Benny Safdie, organizon arratisjen, kjo shkakton një ndjekje ndërgalaktike.

Gjatë rrugës, Mario dhe Luigi miqësohen me dinosaurin Yoshi, i cili i jep zë aktori dhe muzikanti Donald Glover , si dhe me Rosalina-n, një princeshë e interpretuar nga ylli i “Captain Marvel”, Brie Larson.

Anya Taylor-Joy rikthehet në rolin e Princeshës Peach, ndërsa ylli i serialit “Wednesday”, Luis Guzmán, luan Wart – armikun kryesor nga loja “Super Mario Bros 2” e vitit 1988 për NES.

Edhe personazhe të tjera nga “Super Mario Galaxy”, që konsiderohet gjerësisht si një nga lojërat më të mira të realizuara ndonjëherë, shfaqen në materialet promovuese të filmit.

Mes tyre janë edhe Lumas – krijesa të ndritshme në formë ylli që lojtarët i hasin gjatë lojës.

Filim e parë, publiku e pëlqeu shumë, duke e kthyer atë në filmin e dytë më fitimprurës të vitit 2023, menjëherë pas filmit “Barbie”.

Marrë dhe përshtatur nga BBC.

Ylli ndërkombëtar i muzikës pop, Dua Lipa, po vazhdon të forcojë praninë e saj në industrinë kinematografike me një projekt të ri.

Këngëtarja i është bashkuar kastit të komedisë së ardhshme “Peaked”, një prodhim i studios së njohur A24, e cila shquhet për filma të suksesshëm dhe origjinalë.

Filmi do të drejtohet nga Molly Gordon, e cila njëkohësisht ka bashkëshkruar skenarin me Allie Levitan. Historia ndjek dy ish-shoqe shkolle që përpiqen të rikthejnë periudhën më të bukur të jetës së tyre gjatë ribashkimit të 10-vjetorit, pasi kanë kaluar përvoja të vështira gjatë adoleshencës.

Ende nuk është bërë e ditur se çfarë roli do të ketë Dua Lipa, por ajo do të luajë përkrah një kasti të njohur aktorësh, përfshirë Emma Mackey, Laura Dern dhe Simone Ashley.

Ky projekt shënon një tjetër hap të rëndësishëm në rrugëtimin e artistes shqiptare në aktrim, pas paraqitjeve të saj në filmat “Argylle” dhe “Barbie”, duke dëshmuar synimin e saj për të ndërtuar një karrierë të qëndrueshme edhe në Hollywood.

Sot pothuajse në të gjithë botën shënohet Dita e Gënjeshtrave.

Dita e Rrenave, që festohet më 1 Prill, është një zakon i vjetër që përfshin shaka dhe gënjeshtra të vogla. Origjina e saj nuk dihet me saktësi, por teoria më e besueshme e lidh këtë ditë me fundin e shekullit të 16-të, kur Papa Gregori XIII propozoi kalendarin gregorian.

Me kalendarin e ri, 1 janari u bë fillimi i vitit, duke zëvendësuar fillimin e vitit në fund të marsit sipas kalendarit julian. Franca ishte vendi i parë që e pranoi dhe e zbatoi këtë ndryshim.

Megjithatë, disa njerëz nuk e kuptuan ose nuk pranuan kalendarin e ri dhe vazhduan të kremtonin Vitin e Ri më 1 Prill. Ata që ndoqën kalendarin gregorian filluan t’i tallnin këta individë, duke i konsideruar budallenj. Kështu lindi tradita e Ditës së Gënjeshtrave më 1 Prill.

Celine Dion ka njoftuar rikthimin e saj në skenë, katër vite pasi u diagnostikua me një gjendje të pashërueshme që ndikoi në zërin e saj dhe në aftësinë për të ecur.

Ylli, e njohur për baladat e fuqishme si “My Heart Will Go On” dhe “Because You Loved Me”, do të mbajë një seri prej 10 koncertesh në Paris La Défense Arena me kapacitet prej 40,000 vendesh, gjatë muajve shtator dhe tetor.

Njoftimi erdhi në ditën e 58-të të lindjes së saj. Në një mesazh në Instagram, Dion e quajti rikthimin e saj “dhurata më e mirë e jetës sime”.

“Jam shumë gati për këtë,” u tha ajo fansave. “Po ndihem mirë, jam e fortë, jam e emocionuar, natyrisht, dhe pak e nervozuar.”

Duke folur për gjendjen e saj shëndetësore, Dion tha: “Jam shumë mirë, po e menaxhoj shëndetin tim, po ndihem mirë. Po këndoj përsëri, madje po bëj edhe pak vallëzim.”

“Por duhet t’ju them diçka shumë të rëndësishme: gjatë këtyre viteve, çdo ditë që kalonte, kam ndier lutjet dhe mbështetjen tuaj, mirësinë dhe dashurinë tuaj.”

Ajo shtoi: “Ju jam mirënjohëse të gjithëve. Mezi pres t’ju takoj sërish.”

Marrë dhe përshtatur nga BBC