Kombëtarja e Kosovës në hendboll ka arritur një sukses historik, duke u kualifikuar për herë të parë në raundin e dytë të kualifikimeve për Kupën e Botës 2027.

Në ndeshjen e kthimit të luajtur të dielën mbrëma në Pallatin e Rinisë dhe Sportit në Prishtinë, “Dardanët” fituan ndaj Britanisë së Madhe me rezultat 35:30, në një atmosferë të zjarrtë para një numri të madh shikuesish.

Kjo ishte fitorja e dytë e Kosovës ndaj britanikëve, pasi të mërkurën në ndeshjen e parë në Angli kishin triumfuar 32:26. Me rezultatin e përgjithshëm 67:56, Kosova siguroi kalimin në fazën e dytë të kualifikimeve, diçka që ndodh për herë të parë në historinë e saj.

Pas një pjese të parë të dominuar nga kosovarët (17:13), pjesa e dytë nisi vështirë, me Britaninë e Madhe që mori epërsinë për disa minuta. Megjithatë, djemtë e përzgjedhur treguan karakter, rikthyen kontrollin dhe e mbyllën takimin me pesë gola epërsi.

Më i miri për Kosovën ishte Drenit Tahirukaj me shtatë gola, ndërsa Drilon Tahirukaj, Leonard Gegaj dhe Egzon Gjuka shënuan nga gjashtë herë secili.

Kjo ishte gjithashtu ndeshja e parë nën drejtimin e selektorit të ri, Jesper Ostlund, i cili debutoi me dy fitore në po aq ndeshje. Ai, bashkë me asistentin Jasmin Zhuta, do të ketë më shumë kohë për përgatitjet para fazës së dytë që zhvillohet në mars të vitit të ardhshëm, ndërsa priten edhe disa ndeshje miqësore në janar./S.K/KP/

Policia e Kosovës ka njoftuar se në 24 orët e fundit ka ndodhur një aksident me fatalitet dhe se kanë shqiptuar 1923 gjoba për kundërvajtësit e trafikut.

Gjithashtu janë raportuar 29 aksidente trafiku me dëme materiale, 21 aksidente trafiku kanë përfunduar me të lënduar, kurse një aksident përfundoi me fatalitet.

Policia e Kosovës ka arrestuar 23 persona, 15 janë dërguar në mbajtje, 2 persona janë në vuajtje të dënimit, kurse një tjetër është në ndalim policor. /S.K/KP/PK/

Pesë raste të dhunës në familje janë raportuar brenda një dite në disa qytete të Kosovës.

Policia e Kosovës ka njoftuar se rastet kanë ndodhur në Lipjan, Prishtinë, Obiliq, Rahovec dhe Gjakovë, ndërsa disa nga të dyshuarit janë arrestuar dhe dërguar në mbajtje me vendim të prokurorit.

Në Lipjan, një burrë është arrestuar nën dyshimin se ka ushtruar dhunë psikike ndaj bashkëshortes së tij. Me vendim të prokurorit, ai është dërguar në mbajtje.

Në Prishtinë, një grua ka raportuar se është sulmuar fizikisht nga bashkëshorti i saj. Viktima ka marrë trajtim mjekësor, ndërsa i dyshuari është arrestuar dhe ndodhet në mbajtje për 48 orë.

Në Obiliq, policia ka arrestuar dy persona të dyshuar se kanë ushtruar dhunë fizike ndaj një gruaje. Viktima ka pranuar trajtim mjekësor dhe është strehuar tek familja e saj, ndërsa të dyshuarit, pas intervistimit, janë liruar në procedurë të rregullt.

Në Rahovec, një burrë është arrestuar për dhunë fizike ndaj bashkëshortes. Viktima ka marrë trajtim mjekësor në QKMF Rahovec, dhe më pas është kthyer tek familja e saj. I dyshuari është dërguar në mbajtje me vendim të prokurorit.

Ndërsa në Gjakovë, pas një mosmarrëveshjeje familjare, një burrë është arrestuar pasi ka ushtruar dhunë fizike ndaj bashkëshortes. Viktima ka marrë trajtim mjekësor dhe ka kërkuar urdhër mbrojtës, ndërsa i dyshuari është ndaluar për 48 orë./EO

Seancat e parapara për këtë javë në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit, janë anuluar. Siç kanë njoftuar Dhomat e Specializuara të Kosovës (DhSK) në Hagë, kjo ka ndodhur për arsye logjistike.

Dëgjimi i dëshmitarit që ishte planifikuar për sot, ishte shtyrë vazhdimisht. Sipas një parashtrese të mbrojtjes së Thaçit, ky dëshmitar ishte planifikuar të dëshmonte më 15 shtator në vend të James Rubin. Sipas tyre, dëshmia e tij është dashur të shtyhet vazhdimisht për shkak të çështjeve që janë jashtë kontrollit të mbrojtjes.

Mbrojtja ka thënë se nëse dëshmitari që është planifikuar të dëshmojë më 3 nëntor 2025 nuk dëshmon, atëherë nuk ka asnjë dëshmitar të disponueshëm për këtë javë.

Ndërkohë, më 15 prill 2025, Prokuroria ka njoftuar se ka përfunduar paraqitjen e provave në këtë rast.

Ndërsa, seanca e radhës pritet të mbahet të hënën e 10 nëntorit 2025.

Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.

Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.

Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020. /S.K/EO/Betimi për Drejtësi/