Riccardo Calafiori ishte ndër të paktat nota pozitive të Italisë në Euro 2024, aty ku të kaltrit u eliminuan që në fazën e 1/8-ave, teksa mbrojtësi i Bolognës tërhoqi vëmendjen me paraqitjen e tij në tre ndeshjet në grupe.

Italiani ndiqej nga shumë klube, përfshi edhe Juventusin në Itali, megjithatë e ardhmja duket se do të jetë në Premier League, aty ku Arsenali duket i vendosur të transferojë Calafiorin dhe është gati të plotësojë dëshirat e Bolognës.

Këta të fundit kanë bërë me dije se kërkojnë 50 milionë euro për kartonin e mbrojtësit, ndërsa Arsenali ka ofruar 47, shifër që mund të shkojë në 50 milionë euro bashkë me bonuset mbi performancën.

Kjo shifër është ndjeshëm më e lartë se ajo që ka ofruar Juventusi, teksa Arsenali ka joshur jo vetëm Bolognën, por edhe vetë Calafiorin, i cili pritet të japë miratimin për transferimin në Londër brenda fundit të kësaj jave. Vlen të theksohet se 40% të shumës së arkëtuar nga shitja e mbrojtësit 22-vjeçar, Bologna duhet ta kalojë në arkat e zviceranëve të Basel, klub ku Calafiori luante deri në verën e kaluar, kur edhe u transferua tek emilianët./UBTNews/

Ederson është pranë largimit nga Manchester City. Portieri brazilian ka marrë një ofertë tunduese nga arabët e Al-Nassr, pjesë e së cilëve është edhe Cristiano Ronaldo.

Kampionët e Anglisë nuk preferojnë shitjen e Edersonit, por ia kanë lënë në dorë “gardianit” të vendosë për të ardhmen e tij.

Shtypi sportiv britanik raporton se 30-vjeçari, i cili ka fituar gjithçka gjatë 7 viteve në “Etihad”, po mendon të pranojë milionat e sheikëve. Për të nisur një aventurë të re në Arabinë Saudite.

Dhe drejtuesit e Citizens janë gati të dëgjojnë ofertat që do të vijnë në drejtim të portierit të kombëtares braziliane. Nëse Ederson e mbyll me futbollin europian, Manchester City nuk do të hidhet në merkato për të siguruar pasardhësin e tij.

Zgjidhja do të gjendet brenda shtëpisë, me titullarin mes shtyllave të skuadrës së Pep Guardiolës që do të jetë Stefan Ortega. I cili bëri mjaft mirë edicionin e kaluar./UBTNews/

Nicolo Zaniolo rikthehet në Serinë A. Pas një viti e gjysmë shtegtim në Turqi dhe Angli, sulmuesi i talentuar Italian do të bashkohet me klubin e Atalantës, që ka arritur marrëveshjen me Galatasarayn, skuadër që ka edhe pronësinë e kartonit të tij.

Media italiane bën me dije se këtë të enjte Zaniolo do të kryejë testet mjekësore për llogari të Atalantës, para se të firmosë me klubin bergamask dhe të bëjë prezantimin zyrtar.

Marrëveshja me Galatasarayn është arritur mbi bazën e huazimit me të drejtë blerjeje, që mund të shndërrohet në detyrim blerjeje nëse Zaniolo arrin të luajë 65% të ndeshjeve me fanellën e Atalantës./UBTNews/

Erik ten Hag ka zgjatur kontratën e tij si menaxher i ekipit të parë të Manchester United deri në qershor 2026.

Erik ten Hag tha: “Jam shumë i kënaqur që kam arritur marrëveshje me klubin për të vazhduar punën së bashku. Duke parë dy vitet e fundit, ne mund të reflektojmë me krenari për dy trofe dhe shumë shembuj përparimi nga ku ishim kur u bashkova. Megjithatë, duhet të jemi të qartë se ka ende shumë punë të vështirë përpara për të arritur nivelet e pritura nga Manchester United, që do të thotë sfidë për tituj anglezë dhe evropianë”.

Ten Hag thotë se në diskutimet me klubin, është gjetur unitet i plotë në vizionin për arritjen e këtyre qëllimeve dhe të gjithë janë të përkushtuar fuqimisht për ta bërë atë rrugëtim së bashku.

Dan Ashworth, drejtor sportiv i Manchester United, tha: “Me dy trofe në dy sezonet e fundit, Erik ka përforcuar rekordin e tij si një nga trajnerët më të suksesshëm në futbollin evropian. Ndërsa rishikimi i klubit për sezonin e kaluar theksoi fushat për përmirësim, ai gjithashtu arriti në një përfundim të qartë se Erik ishte partneri më i mirë për ne për të punuar me të në ngritjen e standardeve dhe rezultateve. Ky grup lojtarësh dhe stafi kanë treguar tashmë se janë të aftë të konkurrojnë dhe të fitojnë në nivelin më të lartë; tani ne duhet ta bëjmë atë në mënyrë më të qëndrueshme”./UBTNews/