Mbrëmja e së mërkurës sjell dy superpërballje në çerekfinalet e Ligës së Kampionëve, që pritet të kenë ndikim të madh në fatin e sezonit evropian.

Pas fitoreve të Bayern Munichut ndaj Real Madridit (2-1) dhe Arsenalit ndaj Sportingut (0-1), sonte vëmendja zhvendoset te dy duele të zjarrta.

Barcelona përballet me Atletico Madridin në “Camp Nou”, në një ndeshje ku tensioni dhe intensiteti janë të garantuara.

Ndërkohë, në Paris, PSG pret Liverpoolin në “Parc des Princes”, në një duel të mbushur me cilësi, ritëm dhe emra të mëdhenj.

Të dy ndeshjet pritet të fillojnë nga ora 21:00, ndërsa ndeshjet kthyese do të luhen gjatë javës së ardhshme.

Ekipi i Kosovës në boks ka udhëtuar sot drejt kampit ndërkombëtar në Foz do Iguaçu, Brazil.

Pjesë e këtij kampi janë boksierja në kategorinë 60 kilogramë, Donjeta Sadiku, dhe boksieri në kategorinë 65 kilogramë, Shpëtim Bajoku, të shoqëruar nga selektori Faton Xhakli dhe Marjola Sallauka.

Gjatë periudhës 8-18 prill, ekipi do të zhvillojë përgatitje intensive në këtë kamp ndërkombëtar, të cilat konsiderohen tejet të rëndësishme në prag të një prej ngjarjeve më të mëdha të boksit ndërkombëtar.

Këto përgatitje vijnë para pjesëmarrjes në turneun prestigjioz “World Boxing Cup – Brazil 2026”, i cili do të mbahet nga 19 deri më 27 prill 2026.

Ky turne ka rëndësi të veçantë, pasi pikët e fituara do të vlejnë për kualifikimin në Lojërat Olimpike “Los Angeles 2028”.

Pasdite e sotme pritet të jetë “e zjarrtë” për futbollin kosovar, pasi vëmendja kryesore zhvendoset te ndeshjet gjysmëfinale të Kupës së Kosovës. Katër skuadra elitare do të zbresin në fushë nga ora 15:00 me një synim të vetëm: sigurimin e një bilete për finalen e madhe të këtij kompeticioni prestigjioz.

Në Suharekë, kampioni në fuqi, FC Ballkani, pret skuadrën e KF Dukagjinit. Ky ballafaqim shihet si një test i vërtetë force për “Xhebrailat”, të cilët synojnë ta mbajnë trofeun në shtëpi, përballë një Dukagjini që njihet për lojën e tij luftarake dhe befasitë që mund të shkaktojë në ndeshjet me eliminim direkt.

Paralelisht, në Podujevë do të zhvillohet sfida tjetër dramatike mes KF Llapit dhe KF Ferizajt. Skuadra e Tahir Batatinës, e cila ka pasur një histori suksesi në Kupë vitet e fundit, do të kërkojë të shfrytëzojë epërsinë e terrenit vendas. Megjithatë, Ferizaj udhëton me ambicie të qarta, duke premtuar një rivalitet të madh në fushën e blertë.

Ky trofe mbetet rruga më e shkurtër për daljen në garat evropiane, çka e rrit edhe më shumë peshën e këtyre dy përballjeve. Tifozët presin një spektakël të vërtetë futbolli, ku përgatitja fizike dhe strategjitë e trajnerëve do të jenë vendimtare për të përcaktuar dy emrat që do të luftojnë për titullin e kampionit të Kupës në finalen e madhe.

Mbrëmja e parë e ndeshjeve çerekfinale të Ligës së Kampionëve ka sjellë rezultate befasuese dhe emocione deri në sekondat e fundit.

Bayern Munich ka arritur një fitore historike në “Santiago Bernabeu”, duke mposhtur Real Madridin me rezultat 2-1. Kjo është zmbrapsja e parë që bavarezët i bëjnë Madridit në shtëpinë e tyre pas plot 25 vitesh (që nga viti 2001).

Golat për Bayernin u shënuan nga Luis Diaz në fund të pjesës së parë dhe nga Harry Kane sapo nisi pjesa e dytë. Ndonëse Real Madridi ngushtoi epërsinë përmes Kylian Mbappé në minutën e 74-t, kjo nuk mjaftoi për të ndalur hovin e skuadrës së Vincent Kompany.

Ndeshja e kthimit në “Allianz Arena” mbetet e hapur, por Bayerni udhëton drejt shtëpisë me një avantazh tejet të rëndësishëm.

Në Lisbonë, Arsenali ka marrë një fitore të artë kundër Sportingut me rezultat minimal 1-0. Ndeshja dukej se po shkonte drejt një barazimi pa gola, por në minutën e 91-të, Kai Havertz tundi rrjetën pas një asistimi nga Gabriel Martinelli.

Kjo fitore në minutat shtesë u jep “Topçinjve” një komoditet të madh për ndeshjen e kthimit që do të luhet në Londër, ku pritet të vuloset kalimi i tyre në gjysmëfinale.