Pas incidentit të dyshuar racist në ndeshjen e parë të playoff-it të Liga e Kampionëve, futbollisti argjentinas Gianluca Prestianni i Benfica është pezulluar përkohësisht për ndeshjen e kthimit kundër Real Madrid. Vendimi është marrë nga Komisioni i Disiplinës dhe Etikës i UEFA përpara ndeshjes që zhvillohet këtë të mërkurë.

UEFA bëri të ditur se pezullimi vlen pavarësisht vendimeve të mundshme që organet disiplinore mund të marrin pas përfundimit të hetimit në vijim. Si arsye për masën e përkohshme, institucioni evropian përmendi një shkelje të dyshuar të nenit 14 të Rregullores Disiplinore të UEFA-s, që lidhet me sjellje diskriminuese.

Incidenti ndodhi të martën e javës së kaluar. Pas golit të fitores 1:0 dhe festimit të tij, sipas deklarimeve të lojtarit dhe bashkëlojtarit të tij francez Kylian Mbappé, braziliani Vinícius Júnior është ofenduar në mënyrë raciste. Pretendohet se Prestianni e ka quajtur atë “majmun”.

Argjentinasi i ka mohuar akuzat. Gjatë incidentit, ai ishte parë duke e mbuluar gojën me fanellë.

Komiteti Olimpik i Kosovës (KOK) ka organizuar Mbrëmjen Gala “Laureatët 2025”, një ngjarje tradicionale ku nderohen më të mirët e sportit kosovar për arritjet e vitit paraprak.

Në këtë mbrëmje të veçantë morën pjesë përfaqësues të shumtë të komunitetit sportiv, si dhe Kryeministri i Kosovës, Albin Kurti.

Gjatë ceremonisë, Federata e Basketbollit e Kosovës (FBK) u nderua me çmimin “Arritje të Veçantë” për organizimin e suksesshëm të kualifikimeve për FIBA 3×3 Europe Cup dhe Kampionatit Evropian për Divizionin C për vajzat U18.

Çmimin në emër të FBK-së e pranoi Adriatik Rraci, zëvendës Sekretar i Përgjithshëm dhe Drejtor i Përfaqësueseve në federatë.

Në këtë mbrëmje gala, kryetari i FBK-së, Arben Fetahu – njëherësh nënkryetar i KOK-ut – ndau gjithashtu disa nga çmimet për laureatët e tjerë.

Nga Federata e Basketbollit e Kosovës morën pjesë edhe Granit Rugova, Drejtor i Programeve dhe Projekteve Zhvillimore, si dhe Aulona Muhadri, anëtare e Bordit të FBK-së.

Mbrëmja “Laureatët 2025” konfirmoi edhe një herë vlerësimin për kontributin dhe sukseset e federatave sportive në zhvillimin dhe promovimin e sportit në Kosovë.

Pas 16 ditësh garash emocionuese, Lojërat Olimpike Dimërore Milano Cortina 2026 u mbyllën me një ceremoni spektakolare të zhvilluar në Arena e Veronës.

Ceremoninë e shpalli zyrtarisht presidentja e Komiteti Olimpik Ndërkombëtar, Kirsty Coventry, e cila në fjalën e saj përmbyllëse iu drejtua sportistëve me mesazhin: “Ishit të guximshëm, të patrembur, plot zemër dhe pasion.”

Kosova ishte pjesë e kësaj ngjarjeje madhore sportive. Në ceremoninë e mbylljes, flamurin e Kosovës e mbajti skitari Drin Kokaj, i cili përfaqësoi vendin në disiplinën e sllallomit në skijimin alpin, duke përmbyllur kështu paraqitjen e ekipit kosovar në këto Lojëra.

Në renditjen e përgjithshme të medaljeve, Norvegjia kryesoi me 41 medalje, e ndjekur nga Shtetet e Bashkuara të Amerikës me 33 medalje dhe Italia me 20 medalje.

Lojërat e ardhshme Olimpike Dimërore do të mbahen në Alpet Franceze në vitin 2030, ku pritet të mblidhen sërish sportistët më të mirë të botës për një tjetër festë të madhe të sporteve dimërore.

D.L

Sporti kosovar shënoi një vit të suksesshëm në aspektin financiar gjatë vitit 2025, me një rritje të ndjeshme të investimeve nga bizneset vendore, sipas raportit vjetor të sponsorizimeve të publikuar nga Ministria e Kulturës, Rinisë dhe Sportit (MKRS).

Sipas të dhënave, vlera totale e sponsorizimeve në sport në Kosovë ka arritur në 24,456,036.98 euro. Nga kjo shumë, 21.3 milionë euro janë dhënë klubeve sportive, ndërsa 2.73 milionë euro kanë përfunduar te federatat sportive,.raporton telegrafi.

Në krye të përfituesve institucionalë renditet Federata e Futbollit e Kosovës me 1,313,000 euro, e ndjekur nga klubet e basketbollit: KB Ylli me 1,242,000 euro, KB Trepça me 1,239,000 euro dhe KB Sigal Prishtina me 1,210,100 euro. Ndër përfituesit kryesorë janë edhe FC Prishtina, KF Ballkani dhe SC Gjilani, me shifra që variojnë nga 940 mijë deri mbi 860 mijë euro.

Sa i përket ndarjes sipas sporteve, futbolli mbetet dominues me mbi 9.14 milionë euro, i ndjekur nga basketbolli me 6.62 milionë euro, volejbolli me 1.40 milionë euro dhe hendbolli me rreth 947 mijë euro. Kjo tregon se sponsorët preferojnë sportet me audiencë më të gjerë dhe impakt më të madh në publik.

Në anën tjetër, lista e bizneseve më të mëdha sponsorizuese kryesohet nga Frutex me 727,000 euro, e ndjekur nga IPKO me 690,999 euro dhe Viva Fresh me 635,000 euro. Kontribute të rëndësishme kanë dhënë edhe banka dhe kompani të tjera vendore, duke investuar qindra mijëra euro në sportin kosovar.

Ky nivel i lartë investimi dëshmon se sponsorizimi është shndërruar në një mekanizëm kyç për funksionimin, profesionalizimin dhe zhvillimin e sportit në Kosovë. Raporti nënvizon gjithashtu nevojën për forcimin e kornizës ligjore dhe institucionale, në mënyrë që sistemi i sponsorizimeve të jetë më transparent, i drejtë dhe më efektiv për zhvillimin afatgjatë të sportit. /telegrafi/