UBT njofton me kënaqësi se, pas një numri të jashtëzakonshëm të interesuarish për regjistrimet e vitit akademik 2024-2025, kanë mbetur nga 10 vende të lira në pesë drejtimet më të kërkuara. Kjo është një mundësi e shkëlqyer për studentët që dëshirojnë të fillojnë studimet në fusha me perspektivë të madhe punësimi.

Drejtimet me vende të lira përfshijnë: Inxhinierinë e Energjisë, programi fokusohet në teknologjitë e reja të energjisë dhe efikasitetin energjetik, duke përgatitur profesionistë të kualifikuar për të kontribuar në zhvillimin e qëndrueshëm të burimeve energjetike dhe për sfidat e industrisë energjetike.

Shkenca të Ushqimit dhe Bioteknologji, programi ofron një kuptim të thellë të proceseve që lidhen me prodhimin dhe përpunimin e ushqimit, si dhe përdorimin e bioteknologjisë për të përmirësuar cilësinë dhe sigurinë ushqimore. Studentët do të angazhohen në kërkime dhe aplikime praktike.

Inxhinieri Ndërtimore dhe Infrastrukturë, një ndër drejtimet më të kërkuara në treg, i përgatit studentët për të kontribuar në projektimin, ndërtimin dhe menaxhimin e infrastrukturës publike dhe private. Ata do të studiojnë struktura, materiale ndërtimi dhe teknikën e menaxhimit të projekteve.

Juridik, programi ofron një edukim të thellë në fushën e së drejtës dhe procedurave ligjore, përgatitjes së profesionistëve që do të kontribuojnë në fushën e drejtësisë dhe mbrojtjes së të drejtave të qytetarëve.

Inxhinieri e Mekatronikës, ky program integron inxhinierinë mekanike dhe elektronike për zhvillimin e sistemeve automatizimi, duke ofruar mundësi të shkëlqyera për inovacion dhe zhvillim teknologjik.

Të gjitha këto drejtime ofrojnë mundësi të shkëlqyera për zhvillimin profesional dhe akademik, duke e bërë UBT-në një nga zgjedhjet më të mira për ata që dëshirojnë të ndjekin një karrierë të suksesshme në fushat përkatëse.

Regjistrimet për këto drejtime janë duke vazhduar, dhe të gjithë ata që janë të interesuar janë të inkurajuar të aplikojnë sa më shpejt. Për më shumë informacion mbi procedurat e aplikimit dhe dokumentacionin e nevojshëm, ju lutemi vizitoni faqen zyrtare të UBT-së. Mos e humbisni këtë mundësi për të ndërtuar të ardhmen tuaj akademike në një nga universitetet me rankimin më të lartë për cilësi në rajon!/UBTNews/

Sipas një analize nga VOA, tensionet në Lindjen e Mesme po rriten, me shqetësime të thella mbi mundësinë e përfshirjes së drejtpërdrejtë të Shteteve të Bashkuara në konflikt. Presidenti Joe Biden ka paralajmëruar Izraelin të mos lejojë që lufta në Gazë, kundër Hamasit të mbështetur nga Irani, të përhapej në Liban dhe ndaj Iranit. Megjithatë, Izraeli ka intensifikuar sulmet ndaj Hezbollahut dhe ka premtuar hakmarrje ndaj Iranit.

Izraeli raportoi se ka goditur objektiva të Hezbollahut, ndërsa sulmet izraelite në Damask rezultuan me vrasjen e tre civilëve. Të martën, Irani lëshoi 180 raketa ndaj Izraelit, duke shkaktuar dëme dhe viktima.

Biden diskutoi situatën me liderët e Grupit të Shtatë, duke theksuar se Izraeli ka të drejtë të përgjigjet, por se përgjigja duhet të jetë proporcionale. Ai theksoi se nuk do ta mbështeste një sulm të mundshëm të Izraelit ndaj objekteve bërthamore të Iranit.

Disa analistë, si Aaron David Miller, paralajmërojnë se një përshkallëzim i mëtejshëm mund të sjellë hakmarrje nga Irani që do të prekte interesat amerikane, si sulmet ndaj objekteve të prodhimit të naftës në Arabinë Saudite apo forcimin e grupeve pro-iraniane në Irak dhe Siri.Shtetet e Bashkuara janë angazhuar tashmë në operacione për interceptimin e raketave iraniane, por mbetet e paqartë nëse Biden do të autorizojë sulme direkte ndaj Iranit. Ekspertë si Brian Katulis theksojnë se SHBA ka vepruar kryesisht si vëzhgues, duke u përpjekur të kufizojë pasojat e konfliktit.

Në mesin e gjithë kësaj, lideri suprem i Iranit, Ali Khamenei, ka fajësuar SHBA dhe vendet evropiane për konfliktet në rajon, duke thënë se largimi i tyre do të ndihmonte në zhdukjen e përplasjeve. Shtëpia e Bardhë ka njoftuar se do të vendosen sanksione të tjera ndaj Iranit, duke theksuar që tensionet mbeten të larta dhe pa një zgjidhje të qartë./UBTNews/

Kryetari i Komunës së Zveçanit, Ilir Peci, ka bërë të ditur se pas 25 vitesh janë vendosur tabelat informuese në shqipe dhe në gjuhët e tjera në këtë qytet.

Në një postim në Facebook, ai ka deklaruar se të gjitha këto shenja informuese janë thelbësore për banorët dhe për të gjithë komunitetet që jetojnë në Zveçan.

“Ato gjithashtu do t’u ofrojnë ndihmë vizitorëve nga e gjithë Kosova dhe më gjerë, duke treguar se kjo është një zonë ku diversiteti dhe bashkëjetesa janë vlera të çmuara. Bashkëpunimi ynë për të arritur këtë hap, gjithashtu shpreh angazhimin tonë të vazhdueshëm për promovimin e gjuhëve zyrtare në hapësirat publike”, ka thënë Peci.

Ballafaqimi i tanishëm mes Rusisë dhe Perëndimit për Ukrainën është i pakrahasueshëm në histori, si dhe një gabim i cili mund të çojë drejt katastrofës, ka thënë një diplomat i lartë rus të enjten.

Ai i bëri këto komente kur u pyet rreth krahasimeve mes ballafaqimit të tanishëm dhe Krizës Kubane të Raketave më 1962.

Lufta tashmë dyvjeçare e gjysmë në Ukrainë, lufta më e madhe tokësore në Evropë prej Luftës së Dytë Botërore, e ka nxitur një ballafaqim të madh mes Rusisë dhe Perëndimit, dhe zyrtarë rusë thonë se ballafaqimi tani po futet në etapën më të rrezikshme deri më sot.

Diplomatët rusë në të kaluarën kanë nxjerrë krahasime me krizën e vitit 1962 kur superfuqitë e Luftës së Ftohtë thuhet të kenë qenë shumë afër luftës bërthamore ndërkombëtare, pasi Moska vendosi fshehurazi raketa në Kubë.

Por, zëvendësministri i Jashtëm rus, Sergei Ryabkov, tha për gazetarë të enjten se “çfarë po ndodh [tani] nuk ka ngjashmëri me të kaluarën”.

Ryabkov, i cili është mbikëqyrës i kontrollit të armëve dhe marrëdhënieve me Amerikën Veriore, tha për gazetarë në Moskë se rreziku i përleshjeve me armë mes fuqive bërthamore nuk duhet të nënvlerësohet.

“Ne jemi duke ecur nëpër territor të pashkelur më parë ushtarak dhe politik”, tha ai.

Ryabkov tha se një gabim në këtë kohë mund të shkaktojë fatkeqësi të madhe, tha se dyshon nëse ata në Perëndim janë në gjendje t’i “kuptojnë pasojat e rrugës që kanë marrë”.

Ka javë që Rusia i paralajmëron Shtetet e Bashkuara dhe aleatët e tyre se, nëse ata i japin leje Ukrainës të godasë thellë brenda tokës ruse me raketa perëndimore, atëherë Moska do ta cilësojnë këtë si përshkallëzim të madh.

Presidenti i Ukrainës, Volodymyr Zelensky, ka kohë që u lutet aleatëve ta lejojnë Ukrainën t’i përdorë armët me të cilat ata e furnizojnë për sulme brenda Rusisë.

Presidenti i Rusisë, Vladimir Putin, tha më 12 shtator se Perëndimi do të futej në një lufte të drejtpërdrejtë me Rusinë, nëse do ta lejonte Ukrainën të kryejë sulme në tokën ruse me raketa me rreze të gjatë veprimi të prodhuara nga Perëndimi.

Putini e ndryshoi doktrinën bërthamore të Rusisë për ta ulur pragun e përdorimit të armëve të tilla nga Moska në përputhje me situatën.

Zelensky i ka kërkuar Perëndimit t’i kalojë dhe shpërfillë të ashtuquajturat “vija të kuqe” të Rusisë, dhe disa vende perëndimore i kanë bërë thirrje SHBA-së ta bëjë pikërisht këtë.

Rusia, fuqia më e madhe bërthamore në botë, thotë se kjo është marrëzi./REL