Në një mbrëmje të shkëlqyer për Barcelonën, ekipi katalanas arriti fitoren e shtatë radhazi në të gjitha kompeticionet, duke mundur Crvena Zvezdën në Champions League. Ky triumf ka qenë një shenjë e vazhdimit të formës së shkëlqyer të ekipit, me fitoren e nëntë në 11 ndeshje.

Një rendiment i tillë pozitiv, që ka shkëlqyer edhe më shumë pas largimit të trajnerit Xavi dhe ardhjes së Hansit Flick, është arritur falë një sistemi rregullash shumë të rrepta, të cilat janë vendosur nga trajneri gjerman. Rregullat që ka zbatuar Flick janë më të ashpra dhe kërkojnë një disiplinë të lartë nga lojtarët e tij.

Mesfushori i Barcelonës, Pedri, ka folur për këto rregulla të reja në një program televiziv në Spanjë, duke theksuar ndryshimin e madh që ka ndodhur në ekipi nën drejtimin e Flick. Ai ka përmendur se, ndryshe nga periudha e trajnerit Xavi, ku një lojtar që vonohej për stërvitje duhej të paguante një gjobë prej një mijë eurosh dhe dyfishohej për çdo minutë vonesë, me Flickun rregullat janë edhe më të rrepta. Nëse një lojtar mbërrin me vonesë në stërvitje, ai përjashtohet automatikisht nga ndeshja e ardhshme.

Ky sistem disipline ka sjellë një atmosferë më të kontrolluar dhe një performancë më të lartë në fushë për Barcelonën, e cila tani është më e organizuar dhe e motivuar për të arritur objektivat e saj në këtë sezon. Kjo strategji e rreptë e trajnerit Flick duket se po e ndihmon Barcelonën të qëndrojë në krye të konkurrencës ndërkombëtare./UBTNews/

Pau Cubarsí, qendërmbrojtësi 17-vjeçar i Barcelonës, u përball me një moment të frikshëm gjatë ndeshjes kundër Crvena Zvezdës në Beograd. Në minutën e 63-të, ai u detyrua të largohej nga fusha për shkak të një dëmtimi të rëndë në fytyrë, që kërkoi ndërhyrjen e menjëhershme të mjekëve dhe përfundoi me dhjetë qepje.

Dëmtimi i Cubarsít ndodhi kur, gjatë një aksioni mbrojtës, ai tentoi të largonte topin me kokë brenda zonës së Barcelonës, ndërsa sulmuesi i ekipit serb, Spajic, hyri në duel me këmbën e djathtë. Për fat të keq, Spajic nuk arriti ta godasë topin dhe në vend të tij, preku fytyrën e lojtarit të ri të Barçës, duke shkaktuar një plagë të thellë që nisi të gjakoste menjëherë.

Reagimi i shpejtë i skuadrës mjekësore të Barcelonës, e drejtuar nga Dr. Pruna, ishte thelbësor. Mjekët futen menjëherë në fushë për të ndalur gjakderdhjen dhe për ta larguar lojtarin drejt dhomave të zhveshjes, ku i bënë dhjetë qepje për të mbyllur plagën. Shpresohet që Cubarsí të rikuperohet në kohë për ndeshjen e ardhshme kundër Real Sociedad.

Ky incident ka ngjallur komente në rrjetet sociale, ku ai është quajtur “luftëtari ynë” nga tifozët dhe bashkëlojtarët, të cilët e vlerësojnë për guximin dhe shpirtin e tij luftarak në fushë./UBTNews/

FC 2 Korriku U19 ka arritur një sukses të jashtëzakonshëm në UEFA Youth League, duke siguruar kualifikimin në fazën tjetër të këtij kompeticioni. Pas triumfit 2:1 në stadiumin “Fadil Vokrri”, skuadra nga Prishtina arriti tjetër fitore të merituar 3:1 në përballjen e kthimit kundër ekipit irlandez, UCD nga Dublini, në kuadër të rrethit të dytë.

Ky rezultat e dërgon FC 2 Korrikun në mesin e dhjetë skuadrave më të mira të Domestic Champions Path të UEFA Youth League, një arritje e jashtëzakonshme që pasqyron talentin dhe punën e palodhshme që po zhvillohet në futbollin kosovar.

Dy gola për FC 2 Korrikun në këtë ndeshje i shënoi Rin Ahmeti, derisa me një gol kontribuoi Omer Shala.

Presidenti i Federatës së Futbollit të Kosovës, Agim Ademi, përgëzoi futbollistët, trajnerët dhe drejtuesit e klubit për këtë arritje të madhe. Në urimin e tij, në rrjetet sociale ai shprehu krenarinë për paraqitjen e ekipit dhe uroi suksese të mëtejshme në këtë rrugëtim.

“Urimet më të përzemërta për FC 2 Korriku. Tjetër festë, tjetër natë magjike për futbollin e Kosovës në UEFA Youth League. Pas fitores 2:1 në stadiumin “Fadil Vokrri”, ekipi U19 i FC 2 Korrikut realizoi fitore edhe në ndeshjen e kthimit të rrethit të dytë kundër skuadrës irlandeze, UCD nga Dublini, me rezultat 3:1, duke vulosur suksesin historik për klubin dhe futbollin tonë me kualifikimin në mesin e dhjetë skuadrave më të mira të Domestic Champions Path në UEFA Youth League. Ky sukses është dëshmi e talentit të jashtëzakonshëm në vendin tonë dhe konfirmim i punës së shkëlqyeshme me gjeneratat e reja në klubin kryeqytetas. Përgëzoj futbollistët e rinj të FC 2 Korrikut për paraqitjen e jashtëzakonshme dhe prezantimin e denjë të futbollit tonë në këtë nivel të garave evropiane. Me këtë sukses ata na bënë krenarë të gjithëve. Urime edhe për stafin e trajnerëve dhe drejtuesit e klubit”, ka shkruar Ademi.

Qeveria e Republikës së Kosovës ka mbajtur mbledhje elektronike në të cilën ka ndër të tjera ka aprovuar ndërtimin dhe rinovimin e katër stadiumeve si projekte kapitale.

Këto projekte janë pjesë e një përpjekjeje për të përmirësuar infrastrukturën sportive në disa qytete kryesore të Kosovës.

Konkretisht, projektet e miratuara përfshijnë, ndërtimin e Stadiumit të Qytetit në Pejë, rinovimin e Stadiumit “Përparim Thaçi” në Prizren, ndërtimin e Stadiumit të Qytetit në Ferizaj si dhe rinovimi i Stadiumit të Qytetit në Vushtrri.

Këto investime janë një hap i rëndësishëm drejt përmirësimit të infrastrukturës sportive në Kosovë, me qëllim për të mbështetur zhvillimin e sportit dhe për të krijuar më shumë mundësi për ngjarje të nivelit lokal dhe ndërkombëtar./UBTNews/