Ekipi kosovar në xhudo e ka përmbyllur aventurën në Kampionatin Botëror të xhudos që u mbajt në Budapest të Hungarisë.

Kosova e mbylli si e 10-ta në renditje këtë Botëror, shkruan Gazeta Express.

Distria Krasniqi e fitoi medaljen e argjendtë në kategorinë deri në 54 kilogramë, kurse Laura Fazliu u stolis me medaljen e bronztë.

Gjatë ditës së djeshme dhe natën vonë janë zhvilluar disa ndeshje shumë interesante në garat e Botërorit të klubeve.

Lionel Mesi tregoi se, pavarësisht se luan në një ligë më të dobët, është ende ai i vjetri. Me një gol të bukur, i dha fitoren ekipit të tij Inter Miami ndaj Portos me rezultat 2:1.

Në ndeshjen tjetër, Palmeiras mundi Al Ahlyn 2:0. Atletiko Madrid u rikthye te fitorja, duke mundur Seattle Sounders 3:1.

Befasi e mbrëmjes ishe humbja e Paris Saint-Germain ndaj ekipit Botafogo me rezultat 1:0.

Sot në orar janë dy ndeshje gjithashtu interesante. Nga ora 18:00, Benfika ndeshet me Aucklanin, ndërsa nga ora 20 takohen Flamengo-Chelsea.

Dita kur do të marrim vesh kush do ta fitojë titullin në ligën më të fortë të basketbollit në botë, NBA, po afron.

Kur Oclahoma City thunder e ktheu serinë e fitoreve në favor të vetin (3:2), u mendua se garës i erdhi fundi.

Megjithatë, Indiana Pacers u kujdes për një fitore mbrëmë (108-91), për ta barazuar rezultatin dhe për të lënë që gjithçka rreth më të mirit të vendoset në ndeshjen e shtatë të finales.

Më të mirët te Indiana ishin Obi Topin me 20 pikë, Andrew Nembhan me 17 dhe Paskal Siakam me 16, derisa te Oclahoma u dalluan Shai Gilgeous-Alexander me 21 pikë dhe Jalen Williams me 16.

Prishtina sot mirëpret afro 300 pingpongist ne edicionin e tretë të turneut ndërkombëtar të pingpongut Prishtina Open 2025, një prej ngjarjeve më të mëdha sportive të vitit në vend.

Gjatë tri ditëve të ardhshme, Pallati i Rinisë dhe Sportit do të jetë qendra e këtij sporti, ku mbi 300 pingpongistë nga 25 shtete të ndryshme do të përballen në duele të mbushura me energji dhe pasion.

Turneu përfshin të gjitha kategoritë, nga më të vegjlit U11 e deri tek veteranët, duke ofruar mundësi për secilin sportist të tregojë talentin dhe përkushtimin e tij në një skenë ndërkombëtare. Krahas garave, organizatorët kanë përgatitur një atmosferë mikpritëse për pjesëmarrësit dhe spektatorët, me aktivitete përcjellëse dhe surpriza për publikun.

Ky event organizohet nga Klubi i Pingpongut Priping, ne kuadër te aktiviteteve te Ditës se Çlirimit te Prishtinës, dhe synon jo vetëm ngritjen e nivelit të pingpongut në vend, por edhe promovimin e Kosovës si një destinacion sportiv ndërkombëtar.

Turneu fillon ne ora 10:00 me kategoritë junior U19.