Shkrimtari arbëresh Carmine Abate është shpallur fitues i Çmimit “Biella Letërsi dhe Industri”, në edicionin e XXIV.

Ky vlerësim iu akordua Abates “për aftësinë për t’i kënduar Kalabrisë së tij”, duke sjellë në qendër të rrëfimit ngjarjet dramatike të Eranovës së lashtë, një territor ku bukuritë natyrore rrezikoheshin nga projekti gjigand i kompleksit siderurgjik të Gioia Tauro-s.

Sipas motivacionit, edhe pse beteja e komunitetit dhe e dy të rinjve protagonistë kundër strukturave drejtuese të kohës rezultoi e humbur, autori ka arritur ta shndërrojë këtë histori në një paradigmë të dështimeve të politikave që sakrifikojnë natyrën në emër të përfitimit.

Çmimi “Biella Letërsi dhe Industri” nderon vepra artistike dhe jo-fiction të autorëve italianë ose të huaj të përkthyer në italisht.

Kryetari i jurisë, Alberto Sinigaglia, tha se “Carmine Abate vizaton portretin e një Italie të gatshme t’i nënshtrohet joshjes së mirëqenies, të pambrojtur ndaj krizave politike e sociale. Dhe ai e arrin këtë përmes një stili të dendur, të vrullshëm dhe jashtëzakonisht ndjellës.”

Abate, një nga zërat më të rëndësishëm të komunitetit arbëresh, ka fituar gjatë karrierës së tij disa çmime të rëndësishme letrare, përfshirë edhe Çmimin e 50-të Campiello me romanin “Kodra e erës”, botuar nga Mondadori.

Në historikun e tij, Çmimi Biella ka vlerësuar personalitete të njohura të kulturës dhe letërsisë italiane, ndër ta Giorgio Bocca (2001), Ermanno Rea (2003), Raffaele Nigro (2005), Edoardo Nesi (2012), Francesco Merloni (2020), Paolo Malaguti (2021), Antonio Franchini (2023) dhe Francesca Coin (2024). /A.Z/UBT News/

Peshqirët me kalimin e kohës ashpërsohen sepse shumica e njerëzve i lajnë gabim.

Përdorimi i shpeshtë i zbutësit krijon shtresë yndyrore mbi fibra, e cila mbledh sapun e baktere dhe i bën peshqirët të ngurtë dhe jo thithës.

Ekspertët e Secret Linen Store rekomandojnë një zgjidhje të thjeshtë dhe të lirë: uthullën e bardhë. Mjafton të shtoni 250 ml uthull së bashku me detergjentin dhe ta vendosni direkt në daullen e lavatriçes para ciklit të larjes. Aroma e uthullës zhduket gjatë shpëlarjes.

Uthulla e bardhë është një pastrues natyral që zbërthen mbetjet yndyrore dhe heq shtresën e krijuar nga zbutësi i rrobave. Ajo eliminon mikrobet dhe mykun, duke i lënë peshqirët më të butë, më thithës dhe më të freskët.

Mund ta përdorni të vetme: lani peshqirët në ujë të nxehtë vetëm me uthull, nëse doni bëni një cikël të dytë me detergjent (pa zbutës).

Pas larjes, tundi peshqirët mirë dhe thajini në tharëse me temperaturë të ulët ose varini për t’u tharë. /A.Z/UBT News/

Në prag të festave të 28-29 Nëntorit, shkollat dhe gjimnazet e Tiranës janë bërë skena arti, ku të rinjtë po sjellin shfaqje kushtuar ditëve më të rëndësishme të historisë shqiptare.

Kryeministri Edi Rama publikoi një video që e cilësoi si “kartolinë feste” nga artistët e rinj të Liceut Artistik “Jordan Misja” dhe qendrës kulturore “Albanian Night”. Në performancë morën pjesë rreth 150 nxënës, pjesë e programit jashtëshkollor Art e Zeje.

Të veshur me kostume tradicionale nga të gjitha trevat shqiptare, të rinjtë interpretuan me instrumente popullore këngën e njohur “Rrjedh në këngë e ligjërime”, duke krijuar një atmosferë festive dhe emocionuese.

Kryeministri ka ndarë së fundmi edhe performanca të tjera që shënojnë festën e Pavarësisë dhe të Çlirimit, ndërkohë që në çdo shkollë të Tiranës festimet vazhdojnë me dekorime kuqezi, vizatime, piktura dhe aktivitete kulturore, duke nxitur kreativitetin e fëmijëve për 113-vjetorin e Pavarësisë dhe 81-vjetorin e Çlirimit të vendit. /A.Z/UBT News/