Komisioni Qendror i Zgjedhjeve ka njoftuar se është duke vazhduar me aktivitetet e parapara në Ligjin për Zgjedhjet e Përgjithshme dhe aktet nënligjore.

Zëdhënësi i KQZ-së, Valmir Elezi ka thënë se të gjitha aktivitetet që po kryhen nga ana e KQZ-së kanë për qëllim që arrihet deri te shpallja e rezultateve përfundimtare për subjektet politike dhe kandidatët e certifikuar.

“Të shtunën, në QNR ka filluar skanimi i listës së votuesve nga 2,533 vendvotimet e rregullta në të cilën nënshkruhen votuesit që marrin pjesë në votim. Skanimi i listës së votuesve të vendvotimeve të rregullta është i domosdoshëm para se të fillojmë me numërimin e votave nga vendvotimet me kusht, sepse na ndihmon që të sigurohemi se askush nuk ka votuar dy herë, në vendvotimin e rregullt dhe në vendvotimin me kusht. Pasi të kryhen këto procese, do të mund të fillojë numërimi i votave me kusht, votave të personave me nevoja të veçanta dhe votave nga votimi jashtë Kosovës. Ashtu siç kemi thënë edhe më herët, ky proces planifikojmë të fillojë gjatë ditëve në vazhdim”, ka thënë ai.

Të dielën në mbrëmje, ai tha se ka përfunduar vlerësimi i pakove të supozuara me fletëvotime nga votimi jashtë Kosovës, respektivisht nga votimi përmes postës.

“Ne i referohemi si “pako të supozuara me fletëvotime” pasi në këtë fazë nuk hapen zarfet që supozohet se përmbajnë fletëvotime. Kjo do të bëhet gjatë numërimit.   Sipas të dhënave preliminare, procesit të vlerësimit apo verifikimit të pakove me fletëvotime nga votimi jashtë Kosovës i janë nënshtruar rreth 69 mijë pako, prej të cilave janë aprovuar rreth 63 mijë ndërkaq janë refuzuar rreth 4 mijë e 900. Arsyeja se përse janë refuzuar këto dërgesa, është se ato janë janë dërguar nga persona që janë anuluar gjatë regjistrimit si votues jashtë Kosovës; u mungon dëftesa e regjistrimit; janë dërguar më shumë se një herë; kanë dërguar më shumë se një fletëvotim; etj. Pra, këto janë vetëm të dhëna preliminare dhe në procesin e numërimit do të kemi shifrat plotësisht të sakta”, tha Elezi.

Procesit i vlerësimit, sipas ti përfshinë verifikimin nëse pakot e dërguara u takojnë votuesve të regjistruar dhe nëse janë ndjekur procedurat tjera të parapara.

Në përgjithësi, gjatë periudhës së regjistrimit, nga 104,924 shtetas të regjistruar për votim jashtë Kosovës, 84,600, ishin regjistruar për të votuar përmes postës dhe 20,324 të tjerë ishin regjistruar për votimin fizik në përfaqësitë diplomatike.

Nga 20,324 në përfaqësi diplomatike kanë votuar 15,352 votues, ndërkaq në votimin përmes postës KQZ ka pranuar rreth 69 mijë pako me fletëvotime.

Pjesëtarë të Forcës së Sigurisë së Kosovës janë trajnuar nga pjesëtarë të Forcave të Armatosura Turke, për përdorimin sa më efikas të armës Granatahedhës Automatik MK-19.

Kështu ka njoftuar FSK, duke bërë me dije se ky trajnim ka për qëllim përmirësimin e aftësive operative të ushtarëve dhe rritjen e gatishmërisë luftarake për përballimin e sfidave të ndryshme në misionet e ardhshme.

“Pjesëmarrësit në trajnim kanë kaluar një proces intensiv, ku janë njohur me karakteristikat teknike, përdorimin në terren, procedurat e sigurisë dhe rolin e saj në fushë betejë”, thuhet në njoftim.

Një rezolutë e hartuar nga Shtetet e Bashkuara dhe një tjetër e hartuar nga Ukraina dhe e mbështetur nga Bashkimi Evropian, që bëjnë thirrje për t’i dhënë fund luftës në Ukrainë, do të votohen të hënën në Kombet e Bashkuara.

Asambleja e Përgjithshme e OKB-së pritet të votojë për rezolutën e Ukrainës, e ndjekur nga rezoluta e SHBA-së. Këshilli i Sigurimit i OKB-së pritet të votojë më vonë gjatë së hënës për rezolutën e SHBA-së.

Shtetet e Bashkuara bëjnë thirrje për “përfundimin e shpejtë të konfliktit dhe më tej kërkojnë një paqe të qëndrueshme midis Ukrainës dhe Federatës Ruse”.

Rezoluta e hartuar nga SHBA nuk përmend agresonin e Rusisë ndaj Ukrainës, i cili filloi tre vjet më parë.

Sekretari amerikan i Shtetit, Marco Rubio tha të premten se rezoluta “tregonte se ky konflikt është i tmerrshëm, se OKB-ja mund të ndihmojë në përfundimin e tij dhe se paqja është e mundur”.

“Kjo është mundësia jonë për të ndërtuar një rrugë të vërtetë drejt paqes,” tha sekretari Rubio në një deklaratë.

Rezoluta ukrainase thotë se agresioni rus “ka vazhduar për tre vjet dhe vazhdon të ketë pasoja shkatërruese dhe afatgjata jo vetëm për Ukrainën, por edhe për rajone të tjera dhe stabilitetin global”.

Kievi bën thirrje për “ndërprerje të armiqësive dhe një zgjidhje paqësore të luftës kundër Ukrainës” dhe thekson nevojën që lufta të përfundojë këtë vit.

Projekt-rezoluta e Ukrainës thotë se rezolutat e mëparshme të miratuara nga Asambleja e Përgjithshme duhet të zbatohen plotësisht, duke përfshirë ato që bëjnë thirrje që Rusia të tërhiqet plotësisht nga kufijtë e njohur ndërkombëtarisht të Ukrainës.

Rezolutat e Asamblesë së Përgjithshme nuk janë ligjërisht detyruese, por ato tregojnë mbështetjen morale të komunitetit ndërkombëtar.

Në Këshillin e Sigurimit, një rezolutë që të miratohet ka nevojë për mbështetjen e të paktën nëntë nga 15 anëtarët dhe asnjë nga anëtarët e përhershëm, Britania, Kina, Franca, Rusia ose Shtetet e Bashkuara, të mos përdorin të drejtën e vetos. Rezoluta e SHBA-së pritet të ketë mbështetje të mjaftueshme të hënën.

Këto votime në OKB do mbahen ndërsa presidenti francez Emmanuel Macron viziton Shtetet e Bashkuara për bisedime me Presidentin Donald Trump që pritet të përfshijnë luftën në Ukrainë.

Zoti Macron tha javën e kaluar se ai do t’i thoshte presidentit Trump se udhëheqësi i SHBA “nuk mund të jetë i dobët” përballë presidentit rus Vladimir Putin.

Kryeministri britanik, Keir Starmer do të vizitojë Uashingtonin më vonë këtë javë për bisedime të ngjashme dhe ashtu si zoti Macron ai ka theksuar nevojën që sovraniteti i Ukrainës të jetë në qendër të çdo përpjekjeje për paqe.

Një grup udhëheqësish duke përfshirë Presidenten e Komisionit Evropian Ursula von der Leyen, Presidentin e Këshillit Evropian Antonio Costa, kryeministrin kanadez Justin Trudeau, kryeministren e Danimarkës Mette Frederiksen dhe kryeministrin e Spanjës Pedro Sanchez vizituan Kievin të hënën në shenjë mbështetjeje për Ukrainën.

“Ne jemi sot në Kiev, sepse Ukraina është Evropa”, tha von der Leyen në rrjetin social X.

“Në këtë luftë për mbijetesë, nuk është vetëm fati i Ukrainës që është në rrezik. Është fati i Evropës”, thekson ajo.

Luftimet vijuan edhe këtë të hënën me Rusinë që tha se rrëzoi 23 dronë ukrainas gjatë natës, duke përfshirë 16 mbi rajonin e Oryol-it.

Guvernatori i rajonit Ryazan, Pavel Malkov tha se rënia e mbeturinave nga një dron i rrëzuar ukrainas shkaktoi një zjarr në një ndërmarrje industriale.

Ushtria e Ukrainës tha të hënën se rrëzoi 113 nga 185 dronët që Rusia përdori në sulmet gjatë natës.

Ambasada Austriake në Prishtinë ka njoftuar se që nga 1 marsi 2025, patentë-shoferët e Kosovës të të gjitha kategorive do të jenë të barabartë me patentë-shoferët austriakë.

Kështu bëhet e ditur në njoftimin e ambasadës austriake në Kosovë.

“Patentë-shoferët kosovarë u njohën në Austri më 1 shtator 2023, me miratimin e marrëveshjes për krijimin e Bashkësisë së Transportit në nenin 23 të Ligjit për Patentë Shoferët (FSG). Bazuar në këtë, mbajtësit e patentë-shoferëve kosovarë kanë të drejtën të drejtojnë automjetet përkohësisht në Austri. Nëse qëndrojnë mbi 6 muaj në Austri ose vendosin vendbanimin në Austri, duhet të konvertojnë patentë-shoferin kosovar. Megjithatë, patentë-shoferët kosovarë nuk ishin të barabartë me ata austriakë, ndaj konvertimi kërkonte një provim praktik të vozitjes”, thuhet në njoftim.

Me ndryshimin e rregullores përkatëse, ambasada njofton se që nga 1 marsi 2025, patentë-shoferët e Kosovës të të gjitha kategorive do të jenë të barabartë me patentë-shoferët austriakë.

“Kjo do të thotë se patentë-shoferët kosovarë, që nga ky moment, mund të konvertohen në Austri pa pasur nevojë për një provim praktik të vozitjes, nëse qëndrohet mbi 6 muaj në Austri ose vendoset qëndrimi i përhershëm në Austri. Me këtë ndryshim të rregullores, Austria plotëson një kërkesë të rëndësishme dhe konkrete të ekonomisë dhe të gjithë atyre që posedojnë një patentë-shofer kosovar”, thuhet në njoftim.