Sulmuesi Vedat Muriqi të hënën do ta luajë ndeshjen e 100-të në La Liga me fanellën e Mallorcas. Mallorca nga ora 21:00 luan në stadiumin “Ramon Sanchez Pizjuan” ndaj Sevillas, në kuadër të xhiros së 25-të të kampionatit spanjoll.

Muriqi në edicionin aktual ka pasur formë të luhatshme me skuadrën spanjolle, por së fundmi e ka gjetur ritmin e duhur. Ai ka realizuar tri gola në dy ndeshjet e fundit, ndërsa gjashtë i ka në total në 19 ndeshje të zhvilluara në elitën spanjolle. Lojtari kryesor i Kosovës ka kontribuuar edhe me dy asistime.

Sulmuesi shtatlartë është titullar i padiskutueshëm te Mallorca dhe shumë i dashur nga tifozët e skuadrës për përkushtimin dhe ndihmën e madhe që jep në fazën e mbrojtjes. “Pirati” ka prezencë të dukshme edhe në fazën sulmuese. 30-vjeçari iu bashkua Mallorcas në fillim të vitit 2022.

Që nga ajo kohë ai është bërë prej sulmuesve me më së shumti gola në elitën spanjolle për Mallorcan. Vetëm Samuel Eto’o, Juan Arango dhe Victor Casadesus kanë më shumë gola se Muriqi në elitë. Sulmuesi i Kosovës ka shënuar 33 gola në 99 paraqitje kampionale për Mallorcan. Është shumë afër që ta kalojë në renditje Casadesusin, i cili kishte realizuar 37 gola. Kamerunasi Eto’o i prin listës me 54 gola, ndërsa venezuelasi Arango i ka 46 gola.

Nëse merren për bazë statistikat e tjera, Muriqi është vetëm prapa Eto’os. Eto’o, 54 gola i realizoi në 133 ndeshje, Arango 46 gola i pati në 183 ndeshje, ndërsa 37 gola Casadesus i shënoi për 197 ballafaqime. Muriqi në gjysmën e dytë të edicionit 2021/22 i kishte pesë gola ndërsa e bëri diferencën falë lojës së fortë në ajër.

Ai kishte arritur në ishull nga skuadra e Lazios në formë huazimi, ndërsa transferimi ishte kompletuar në verën e vitit 2022. Mallorca i shpenzoi mbi 9 milionë euro për sulmuesin kosovar, duke e bërë blerjen më të shtrenjtë në histori të klubit. Edicionin 2022/23 e pati më të mirin kur i shënoi 15 gola.

Në edicionin e kaluar i pati shtatë gola. Muriqi me Mallorcan ishte afër që të fitonte trofe, por u mposht në finale në edicionin e kaluar të Kupës së Mbretit.

Synim i tij dhe skuadrës është që ta përfundojnë kampionatin në njërin prej vendeve që dërgojnë në kupat evropiane.

Mallorca pas 24 ndeshjeve të luajtura ka grumbulluar 34 pikë.

“Jam i vetëdijshëm se pesëshja e parë në tabelë është tregim tjetër. Por nga pozita e gjashtë deri në pozitën e 14-të, nuk ka diferencë të madhe të pikëve. Ajo që duhet të bëjmë ne është t’i përsërisim gjërat që i bëmë në dy ndeshjet e fundit. Për të qëndruar sipër në tabelë duhet të punojmë fort, për të qenë të gatshëm për ndeshjet si ajo e së hënës”, ka deklaruar të dielën në konferencën për shtyp trajneri Jagoba Arrasate.

Muriqi kishte oferta në verë, por vendosi të vazhdojë me Mallorcan.

Federata e Futbollit të Kosovës ka ndarë çmimin “Ylli i Javës”. Ky çmim për javën e 21-të në Albi Mall Superligë i është ndarë futbollistit të FC Ferizaj, Albion Kurtaj.

Kurtaj arriti që me golin e tij t’i sigurojë fitore shumë të rëndësishme ekipit të tij, FC Ferizaj, kundër FC Prishtinës (1:0) dhe të arkëtojë 3 pikë që e larguan nga zona e rrezikshmërisë në Albi Mall Superligë.

Pasi mori këtë çmim, Kurtaj u shpreh i lumtur që u vlerësua si më i miri i javës: “Ndeshja me Prishtinën ka qenë një ndeshje jashtëzakonisht e vështirë, duke marrë parasysh që Prishtina është njëra nga skuadrat më të mëdha në Kosovë. Por, sidoqoftë, stafi i skuadrës sonë ka marrë të gjitha masat e nevojshme, duke e përgatitur ndeshjen në mënyrën më të mirë, dhe nga ajo nxorrëm 3 pikë për të cilat jam shumë i lumtur.

Skuadra ka filluar të pjeket dhe gabimet që i kemi bërë në sezonin e kaluar, i kemi përmirësuar. Puna e trajnerëve është e jashtëzakonshme dhe kemi edhe një president që na rri shumë afër dhe nuk e ka humbur asnjëherë besimin tek ne.

Synimet tona janë gjithmonë të kërkojmë pjesën e epërme të tabelës dhe me këtë skuadër që kemi, besoj se mund ta arrijmë.

Të shpallesh “Ylli i javës” është një arritje shumë e madhe dhe e falënderoj gjithë stafin dhe skuadrën. Veçanërisht falënderoj familjen time që më kanë përkrahur deri këtu.

Shpresoj që t’i ndihmoj skuadrës në vazhdimësi që të marrim të gjitha pikët që na nevojiten për të qenë në pjesën e sipërme të tabelës.” – tha ai për faqen zyrtare të FFK-së.

Muaji shkurt ka qenë shumë i vështirë për Napolin, pasi kanë humbur kreun e renditjes pikërisht përpara një ndeshjeje të rëndësishme ndaj Interit. Napoli ka regjistruar vetëm 7 pikë nga 15 të mundshme gjatë këtij muaji, ndërsa Interi ka bërë më keq me 3 barazime dhe një humbje, duke grumbulluar vetëm 3 pikë në total.

Fitorja e fundit e Napolit ishte më 25 janar, ku mundën Juventusin 2-1, por pas kësaj diçka u thye në formën e tyre të shkëlqyer. Dëmtimet, si ai i Neresit, dhe mungesa e një zëvendësuesi të denjë për Kvaratskhelian, si Okafor, kanë ndikuar negativisht në ekip. Gjithashtu, ka pasur një rënie të përgjithshme të formës fizike dhe mendore të lojtarëve, me shembuj si autogoli i Rrahmanit.

Në sulm, një nga faktorët që ka ndikuar ka qenë rënia e formës së Lukaku, i cili nuk ka shënuar asnjë gol gjatë muajit shkurt dhe ka qenë shumë i paprezent në lojë. Kjo ka pasur ndikim të madh, pasi Napoli ka humbur ritmin që kishin deri më 25 janar.

Megjithatë, Napoli ka mundësi të rikuperohet, të mbrojë një vend në Champions League dhe, për fat të mirë, ende mund të shpresojnë për titullin, edhe nëse rezultati ndaj Interit nuk do të jetë i favorshëm. Objektivi kryesor mbetet arritja e Champions-it, ndërsa çdo sukses tjetër do të ishte një bonus për sezonin./UBTNews/

Njëzet e një xhiro janë zhvilluar në Superligën e Kosovës në futboll dhe tashmë kanë filluar të qartësohen shumë gjëra sa i përket garës për titullin kampion por edhe për skuadrat që pretendojnë garat evropiane apo edhe qëndrimin në elitën e futbollit kosovar.

Ky edicion garues po dominohet nga Drita. Skuadra nga Gjilani vazhdon ta kryesorë renditjen tabelare dhe tashmë ka krijuar diferencë prej 10 pikësh me ndjekësin e parë dhe kampionin në fuqi, Ballkanin.  Intelektualët kanë 47 pikë në vendin e parë, ndërsa Ballkani është i dyti me 37 sosh.

Ndërsa momentalisht Malisheva është e treta me 37 pikë, pastaj Prishtina me 29 dhe Gjilani i pesti me 28 pikë.