Prokuroria Themelore në Pejë ka ngritur aktakuzë ndaj I.Z., nën dyshimin se ka kryer veprat penale “Vrasje e rëndë” në tentativë dhe “Mbajtja në pronësi, kontroll ose posedim të paautorizuar të armëve”.

Sipas Prokurorisë, ngjarja ka ndodhur më 13 janar 2026, rreth orës 00:15, brenda një lokali në komunën e Deçanit.

Në aktakuzë thuhet se i pandehuri, i motivuar nga përkatësia kombëtare e të dëmtuarve, dyshohet se ka tentuar t’i privojë nga jeta katër persona duke përdorur armë zjarri.

Si pasojë e të shtënave, tre persona kanë mbetur të plagosur. Dy prej tyre kanë pësuar lëndime të rënda trupore, ndërsa njëri ka marrë lëndime të lehta. Personi i katërt ka arritur t’i shmanget sulmit pa pësuar lëndime.

Prokuroria bën të ditur se arma e përdorur në këtë rast dyshohet se mbahej pa autorizim ligjor, në kundërshtim me Ligjin për Armët. Pas arrestimit të të pandehurit, gjatë kontrollit dhe bastisjes janë sekuestruar arma e zjarrit dhe municioni.

Prokurori i Shtetit i ka propozuar gjykatës që, pas zhvillimit të shqyrtimit gjyqësor dhe administrimit të provave, I.Z. të shpallet fajtor dhe të dënohet sipas ligjit për veprat penale që i vihen në barrë./A.K/

Lexoni pesë kuriozitete nga bota. Mund të mos i keni ditur:

1. Truri juaj vazhdimisht po e ha veten. Ky proces quhet fagocitozë, ku qelizat mbështjellin dhe konsumojnë qeliza ose molekula më të vogla për t’i larguar ato nga sistemi. Mos u shqetësoni! Fagocitoza nuk është e dëmshme, por në fakt ndihmon në ruajtjen e lëndës suaj gri.

2. Copa më e madhe e jashtëqitjes së fosilizuar të dinozaurëve e zbuluar është mbi 30 cm e gjatë dhe mbi dy litra në vëllim. Besohet të jetë një jashtëqitje e Tyranosaur, jashtëqitjet e fosilizuara (të quajtura edhe ‘koprolit’) po i ndihmojnë shkencëtarët të kuptojnë më mirë se çfarë hëngri dinosauri.

3. Marsi në të vërtetë nuk është i rrumbullakët. Ndryshe nga çdo planet tjetër shkëmbor në Sistemin Diellor, Marsi në të vërtetë ka formën e një topi ragbi, por me madhësi të ndryshme përgjatë të tre boshteve.

4. Nuk ka diçka të tillë si ushqimet me zero kalori. Edhe ushqimet me pak kalori, të tilla si selinoja dhe lakërishta e ujit, përmbajnë më shumë energji sesa i duhet trupit për t’i përpunuar ato.

5. Ngjyra mesatare e Universit quhet ‘Latte Kozmike’. Në një studim të vitit 2002, astronomët zbuluan se drita që vinte nga galaktikat mesatarisht merrte një ngjyrë bezhë që është afër të bardhës.

Një burrë ka humbur jetën si pasojë e një vetaksidenti me traktor, që ka ndodhur në fshatin Gremnik të Klinës.

Sipas Policisë së Kosovës, ngjarja ka ndodhur më 14 korrik 2026, rreth orës 14:55, kur viktima, teksa po drejtonte traktorin, dyshohet se ka humbur kontrollin mbi mjetin. Si pasojë, traktori është rrokullisur dhe ka përfunduar në një greminë.

Në vendin e ngjarjes kanë dalë ekipet përkatëse, ndërsa mjeku kujdestar ka konstatuar vdekjen e viktimës.

Policia ka nisur hetimet për të sqaruar rrethanat e aksidentit./A.K/

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

Foto: Burgu i Nishit

15 korrik 1993

Të burgosurit shqiptarë në Nish hynë në ditën e shtatë të grevës së urisë

Katërmbëdhjetë të burgosur shqiptarë, që vuajnë dënimet në burgun e Nishit, të cilët ditë më parë nga organet kompetente të këtij burgu kërkuan që t’i vuajnë dënimet në Kosovë, sot hynë në ditën e shtatë të grevës së urisë.

Prej gjithësejt katërmbëdhjetë të burgosurve, në mesin e të cilëve është edhe i dënuari shumëvjeçar, Myslim Dobruna, nga Këshilli për Mbrojtjen e të Drejtave dhe Lirive të Njeriut në Prishtinë merret vesh se gjendja shëndetësore e këtyre të burgosurve shqiptarë është tejet e rëndë, ndërsa gjashtë prej tyre janë të rrahur rëndë. Bëhet e ditur se drejtoria e burgut po provon vazhdimisht që ndaj këtyre gjashtë të burgosurve ta thyejë grevën me anë të sondave nazale, mirëpo këta të burgosur, nuk pranojnë këtë mënyrë grevëthyese. Pikërisht për këtë, ata edhe gjenden në qelitë e këtij burgu. KMDLNJ gjithashtu njofton se emrat e të burgosurve të tjerë, përveç atij të Myslim Dobrunës, nuk dihen. Mirëpo, merret vesh se në grevë janë hedhur edhe të burgosurit shqiptarë të rastit të Paraçinit.

15 korrik 1995

U promovua monografia “Mbijetesa e Universitetit të Prishtinës 1991-1994” i Hajrullah Koliqit

Në rektoratin e Universitetit të Prishtinës, u bë promovimi i monografisë “Mbijetesa e Universitetit të Prishtinës 1991-1994” e autorit dr. Hajrullah Koliqi.

Duke folur për këtë libër, recensentët dr. Bektesh Bekteshi e dr. Xhavit Ahmeti, thanë se kjo monografi është një dëshmi e fortë se kur duam të organizohemi mund të mbijetojmë, ashtu sikur mbijetoi Universiteti i Prishtinës.

Monografia, “Mbijetesa e Universitetit të Prishtinës 1991-1994” e dr. Hajrullah Koliqit është libër kundër dhunës serbe, por edhe i rezistencës. Libri përmban një kronologji që nga themelimi i Universitetit të Prishtinës para 25 vitesh deri sot. Gjatë kësaj periudhe diplomuan më se 60 mijë studentë, kurse doktoruan 400 veta.

Për monografinë “Mbijetesa e Universitetit të Prishtinës…”, folën edhe dr.Emrush Gashi, dr. Ahmet Geca, dr. Islam Krasniqi dhe mr.Hasan Ymeri, të cilët vlerësuan punën e autorit Hajrullah Koliqi.

15 korrik 1997

Raport gjashtëmujor i KMDLNJ-së për dhunën e regjimit serb në Kosovë

Këshilli për Mbrojtjen e të Drejtave dhe Lirive të Njeriut (KMDLNJ) në Prishtinë (organizatë e anëtarësuar në Federatën Ndërkombëtare për të Drejtat e Njeriut – FIDH dhe IGFM në Frankfurt), tërheq vërejtjen në raportin e saj më të ri gjashtëmujorse megjithë rezolutat e shumta të OKB‑së (1992/S‑1 e datës 14 gusht

1992, 1993/7 e datës 23 shkurt 1993 dhe vendimi i saj 1992 /103 i datës 13 gusht 1992. Poashtu rezoluta 885 (1993) e datës 9 gusht 1993 e Këshillit të Sigurimit të OKB‑së, rezultat

E/Cn. 4/Sub. 2/193/L. 15 e datës 17 gusht 1993, 1994/L. 85 të datës 9 mars 1994 dhe 1995/L. 7 të datës 11 gusht 1995, rezultat e Asamblesë së Përgjithshme të OKB‑së A/C. 3/49/L. 58 1994, A/49/610/Add. 3 të datës 23 dhjetor 1994 dhe A/C. 3/50/L. 43, të datës 5 dhjetor 1995, rezoluta E/CN. 4/sub. 2/1996/L. 4 e datës 14 gusht 1996, rezoluta e Asamblesë së Përgjithshme A/51/111 e datës 23 dhjetor 1996) dhe rezoluta e Komisionit për të Drejtat e Njeriut në Gjenevë E/CN. 4/1997/L. 88 e datës 10 prill 1997 po vazhdon shkelja e të drejtave të njeriut në Kosovë.

Si pasojë e represionit sistematik gjatë periudhës janar‑qershor të vitit 1997 KMDLNJ ka regjistruar 1925 individë që iu janë nënshtruar keqtrajtimeve të ndryshme. Kundër këtyre personave janë kryer mbi 2122 shkelje të të drejtave dhe të lirive të njeriut.

Gjatë këtij gjysëmvjetori, Këshilli për Mbrojtjen e të Drejtave të Njeriut në Prishtinë ka regjistruar 25 raste të vdekjes: dy prej të cilët vdiqën nga torturat në stacionet e policisë; pesë shqiptarë u vranë me armë zjarri nga policia; nga kufitarët e AJ u vra një student shqiptar; gjashtë u vranë me armë zjarri në “rrethana të pasqaruara”; nga një civil serbë u therr me thikë një person; nga represioni policor dy persona bënë vetëvrasje; në “rrethana të pasqaruara” gjetën vdekjen tetë persona. Në mënyra të ndryshme gjatë kësaj periudhe gjashtëmujore u plagosën 14 persona.

Në raport thuhet se fushata për mbledhjen e armëve nga shqiptarët, e intensifikuar që nga viti 1992, po përdoret vazhdimisht si pretekst për numrin më të madh të keqtrajtimeve fizike e psikike. Në këtë periudhë janë shënuar 501 raste individuale të kërkimit të armëve. Duhet theksuar se në 90% të rasteve nuk janë gjetur kurrfarë armësh, pos ndonjë arme të gjuetisë edhe ato me leje.

Në gjashtëmujorin e parë të këtij viti, KMDLNJ‑së i janë paraqitur 466 persona të arrestuar, 100 të ndaluar, kurse tortura fizike është përdorur ndaj 333 individëve. Në 54 raste gjatë rrahjeve, viktimave u janë shkaktuar lëndime të rënda trupore me shkopinj gome e druri, mjete të mprehta metalike, tyta armësh, shqelmime me këpucë etj. Psiqikisht torturohen pothuajse të gjithë shqiptarët që merren në stacionet e policisë, që ndalen arbitrarisht, ftohen në biseda informative, bastisen ose kërkohen nga policia. Nga torturat nuk janë kursyer as fëmijët, as gratë, e as pleqtë e moshës 90 vjeçare.

Gjatë gjysmës së parë të këtij viti KMDLNJ evidencoi 420 individë të ftuar në polici, pasaportat u janë marrë 18 personave, 3 raste të marrjes peng, nga puna u larguan dy persona, veprimtaria ekonomike u ndalua në 8 raste, u regjistruan 9 raste të uzurpimit, 5 raste të konfiskimit, 8 individëve iu ndalua të kthehen në atdhe, nga represioni policor u arratisën 14 persona, nga banesat e tyre u larguan 18 familje shqiptare dhe në vend të tyre u vendosën familje serbe.

Po në këtë periudhë brutalitetit të policisë iu nënshtruan 53 femra dhe 32 fëmijë.

Shumica nga 209 personat që u morën në të ashtuquajtura biseda informative u keqtrajtuan fizikisht, ndërkaq numri i të torturuarve psikikisht është shumë më i madh. KMDLNJ nuk ka evidencuar këtë kategori shkeljesh të të drejtave dhe lirive anëtarët e familjeve të bastisura (190) edhe pse të gjithë iu janë nënshtruar keqtrajtimit psiqik. Brutaliteti dhe sjelljet e shfrenuara të policisë gjatë bastisjeve, vandalizmi i dëshmuar i ekspeditave ndëshkuese serbe janë argumentet më bindëse të respektimit të ligjeve nga vet regjimi.

KMDLNJ ka trajtuar në këtë raport posaqërisht gjykimet dhe dënimet e shqiptarëve për motive politike. Në këtë gjashtëmujor për motive politike dhe për kundërvajtje u dënuan 60 persona. Do përmendur grupin prej 20 shqiptarëve të akuzuar si anëtarë të “Lëvizjes Kombëtare për çlirimin e Kosovës”. Ata janë akuzuar për kryerjen e veprës penale të “bashkimit për veprimtari armiqësore” dhe të “cenimit të tërësisë territoriale” të RFJ‑së së vetëshpallur, kurse 6‑ve prej tyre iu ngarkua vepra penale e “terrorizmit”. Të gjithë këtyre u janë shqiptuar 107 vjet burg.

Gjatë periudhës janar‑qershor të këtij viti, KMDLNJ ka evidencuar 206 raste të keqtrajtimit të veprimtarëve partiak, politikë, për të drejtave njeriut, humanitarë si dhe veprimtarë të sportit. Në të shumtën e rasteve ftohen në polici dhe merren në “bisedë informative”, kryesisht në qendrat e sigurimit shtetëror por edhe në stacionet e policisë, ku mbahen me dhjetëra orë, keqtrajtohen fizikisht e psiqikisht dhe kërcënohen ta ndërprejnë aktivitetin e tyre.

Brenda gjashtëmuajve të vitit 1997 policia ndërhyri 30 herë në institucionet arsimore me ç’rast janë keqtrajtuar 89 veprimtarë arsimorë. Eleminimi i gjuhes shqipe nga administrata dhe shërbimet publike, thuaja sa ka marrë fund. Emrat e vendbanimeve, institucioneve publike, firmave, shesheve etj. , janë të shkruara në gjuhën serbe me shkrim cirilik, derisa në Serbi mund të gjenden gjithnjë e më shumë emra të shkruar me alfabetin latin. Aq më tepër rrënimi i monumenteve historike para fakulteve, shkollave, shesheve dhe zëvendësimi i tyre me emra të “heronjëve” dhe personaliteteve serbe.

Gjendje e jashëzakonshme është edhe në sferën e shëndetësisë. Institucionet kulturore e shkencore vazhdojnë të jenë të mbyllura për shqiptarët e Kosovës. Madje edhe aktivitet sportive nuk janë të lejuara për shqiptarët e Kosovës, gjatë kësaj periudhe u keqtrajtuan 12 veprimtarë të sportit.

Po ashtu kërcënimi, burgosja dhe keqtrajtimi i gazetarëve dhe pengimi i punës së mjeteve të informimit, është duke vazhduar. Po në këtë periudhë u regjistruan 13 raste të keqtrajtimit të gazetarëve.

Gjatë kësaj kohe janë shënuar 80 raste të plaçkitjeve. Duke u bazuar në të dhënat, KMDLN kërkon nga Nënkomisioni që të marrë veprime gjegjëse për të dënuar të gjitha format e torturës, trajtimet johumane, poshtëruese dhe mizore të shqiptarëve të Kosovës dhe të bëjë presion mbi qeverinë e Beogradit që t’i ndërpresë të gjitha format e diskriminimit dhe të apartheidit në Kosovë.

Në vazhdim, KMDLNJ paraqet disa të dhëna që ilustrojnë gjendjen e të drejtave dhe lirive të shqiptarëve në Kosovë

* Viktimë e dhunës së organizuar shtetërore ishte Besnik Muharrem Restelica (1967), i arrestuar më 30 janar 1997, në shtëpinë e tij në Podujevë, me pretekst se është anëtar i “Ushtrisë çlirimtare të Kosovës”. Lajmin për vdekjen ia kumtuan, babait të tij, policët e stacionit të policisë në Podujevë duke i thënë se Besniku kishte bërë vetvrasje para tri ditësh. Ditën kur e nxori trupin e Besnikut nga morgu i Spitalit të Prishtinës, personeli i Spitalit, babait të tij, Muharremit, i tha se trupi i të ndjerit është sjellë në Morg më 22 shkurt 1997 në orët e mbrëmjes.

Bashkëpunëtorët e KMDLNJ e fotografuan trupin e të ndjerit në shtëpinë e tij në Podujevë dhe u vërtetuan se në trupin e Besnikut shihen shenja të lëndimeve të rënda, sidomos në këmbë, duar e gishta, kurse rreth qafës e fytit vërehen shenja të ndrydhjeve e të lëndimeve si pasojë e shtrëngimeve në fyt. Nuk ka dyshim se ndaj Besnikut janë përdorë metodat më të tmerrshme të torturës.

Një delegacion pesëantarësh i Parlamentit Evropian, i kryesuar nga Doris Pak, kryetare e delegacionit në PE për Evropen, vizitoi familjen e Besnik Restelicës. Delegacioni pa trupin e të ndjerit Restelica dhe ndër të tjera Zonja Doris Pak, tha:

“Eshtë e pabesueshme që në fund të këtij shekulli në Evropë të përdorën tortura siç janë përdorur në mesjetë”.

* Rasti i Nait Hasanit nga Randobrava e Prizerenit,i arrestuar më 28 janar, për të cilin nuk dihej asgjë prej datës 31 janar, kur ishte nxjerrë nga policia prej Spitalit të Prishtinës, qenka gjallë dhe ndodhet në paraburgim. Avokatit të tij, Fazli Balajt, Naiti i deklaroi se është keqtrajtuar rëndë fizikisht. Ndaj tij është përdorur edhe elektro‑shoku. Gjurmët e lëndimeve trupore, si pasojë e keqtrajtimit, janë evidente. Tani për tani Nait Hasani gjendet në burg dhe pritet gjykimi i tij.

Ky rast dhe rastet e tjera të paraqitura pranë KMDLNJ‑së, dëshmojnë për tortura çnjerzore dhe të vazhdueshme që aplikohen ndaj të arrestuarve shqiptarë, për çka, me kohë, janë alarmuar edhe asociacionet ndërkombëtare.

* Një dukuri shumë e rrezikshme është numri i shtuar i incidenteve të shkaktuara nga civilët serbë, veprimet e të cilëve ndihmohen ose ndiqen me indiferencë nga policia. Më 11 mars, tre civilë serbë të armatosur me revole sulmuan Rashit Ismailin, anëtar i Kryesisë së Degës së LDK‑së në Lagjen e Spitalit dhe shkaktuan lëndime trupore. Në momentin kur njëri nga sulmuesit nxori revolen, Ismaili arriti të largohet falë një veture që kaloi në afërsi dhe kështu i shpëtoi më së keqes. KMDLNJ ka regjistruar 24 raste të tilla. Derisa policia serbe me pretekst të kërkimit të armëve bastis, arreston, keqtrajton fizikisht e psiqikisht dhe i dënon shqiptarët, civilët serbë të armatosur me lloje të ndryshme të armëve kanë të drejtë t’i bartin ato dhe t’i përdorin, në vende publike, të vrasin e të plagosin njerëz të pafajshëm pa u frikësuar se do të dalin para gjyqit.

* Është shumë shqetësues rasti i Beri Halimit, ish i burgosur politik, aktualisht kryetar i N/KMDLNJ‑së në Dragash dhe anëtar i KMDLNJ , i arrestuar, nga inspektorët e sigurimit serb më 15. 02. 1996, i liruar më 19. 02. 1997. Nga pasojat e keqtrajtimeve fizike ai u detyrua që të kërkojë ndihmën e mjekut dhe të shtrihet në spital pasi që i kishte të lënduara të dy veshkët, thuhet mes tjerash në raportin gjashtëmujor të KMDLNJ-së për dhunën e regjimit serb kundër shqiptarëve në Kosovë.

15 korrik 1998

 Një i vrarë e një i plagosur në Rekë të Keqe

Sulmet e forcave ushtarako-policore serbe mbi fshatrat e Rekës së Keqe nuk kanë të ndalur. Kështu mbrëmë dhe sot vazhduan granatimit mbi fshatrat Nec, Ramoc, Stubëll, Berjah, Smolicë e deri në rrethin e Junikut, njofton KI i Degës së LDK-së në Gjakovë.

Këtyre sulmeve po u kundërvihen forcat mbrojtëse të këtyre fshatrave në bashkëpunim me UÇK-në.

Njoftohet se gjatë sulmeve të pambrëmshme të ushtrisë serbe mbi fshatin Devë, u vra Vllaznim Avdyl Jetishi (20) dhe u plagos rëndë Qerim Ibrahim Jetishi (30), që të dy nga fshati Brekoc i Gjakovës.

Trupi i pajetë i Vllaznim Jetishit u dërgua dje pasdite nga policia serbe në morgun e spitalit të Gjakovës, ndërsa spital u dërgua edhe i plagosuri Qerim I. Jetishi.

Ndërsa dje, në fshatin Babaj Bokës, me nderime u varros i riu Ali Rrustemi, i cili vdiq pasi ditë më parë u plagos nga ushtria serbe në fshatin Duzhnje. Edhe me këtë rast ushtria serbe e stacionuar në këtë fshat vëzhgoi gjatë gjithë ceremonialin e varrimit.

Sot në mëngjes në burgun hetimor të Lipjanit u dërgua koordinatorja e SHHB “Nëna Tereze”, Fatime Boshnjaku.

Inspektorët serbë kthyen dje artikujt e konfiskuar të SHHB “Nëna Terezë”, ndërsa ndaluan automjetin të cilin e konfiskuan ditë më parë së bashku me barnat.

Por, ndonëse kthyen artikujt e konfiskuar, inspektorët serbë konfiskuan në lokelat e kësaj shoqate një kontigjent të medikamenteve të Kryqit të Kuq Ndëkrombëtar, i cili u soll para disa ditësh dhe ishte i dedikuar për banorët e anës së Junikut.

Sot në Gjakovë, pronarët e dyqaneve, me urdhërin e pushtetit të instaluar serb, mallin e paktë të ekspozuar jashtë dyqaneve u detyruan të fusin në dyqane.

Deçan: Tre të vrarë e një i plagosur

Mbrëmë rreth orës 19:00 forcat ushtarako-policore serbe, filluan të granatojnë me të gjitha armët artilerike fshatrat Carrabreg i Poshtëm dhe Strellc i Epërm të komunës së Deçanit.

Gjatë shkëmbimit të zjarrit me forcat serbe në Carrabreg të Poshtëm u vranë: Artan Nezir Qorraj (17) dhe Rexhë Sadik Qorraj (35), kurse u plagos Haki Ramë Qorraj (27). Ndërkaq, në Strell të Epërm u vra Enver Hasan Avdimetaj (29).

Luftimet në këto fshatra zgjatën deri në orën 22:00, ndërsa granatimi i tyre u bë në shenjë hakmarrjeje për shkak se forcat mbrojtëse shqiptare zbrapsën njësitë e këmbësorisë serbe që bënë përpjekje të depërtojnë në këto fshatra.

Si zakonisht, gjatë tërheqjes, forcat serbe dogjën shtatë shtëpi, tri në Carrabreg të Ulët dhe katër në Strellc të Epërm.

Komisioni për Informim i Degës së LDK-së në Deçan njofton se në të njëjtën kohë pati luftime të një inteziteti më të ulët në fshatin Prejlep, ndërsa nga Suka e Biteshit u granatuan edhe fshatrat Gramaqel e Baballoq. Njoftohet se nga granatimi i mbrëmshëm i Gramaçelit u shkatërruan plotësisht shtëpitë e Musë Ndout dhe Myrtë Agajt, ndërsa dëmet më të vogla pësuan shumë shtëpi të tjera.

Ndërkohë, vëzhguesit e UÇK-së kanë njoftuar se forcat forcat policore serbe kanë plaçkitur shtëpitë e shqiptarëve në disa fshatra të kësaj komune, ndërsa disa paramilitarë serbë janë strehuar mbrëmë në Manastirin e Deçanit. Për këtë autoriteteve të Kishës Ortodokse Serbe u bëhet thirrje që të pengojnë shndërrimin e objekteve fetare në objekte të strehimit të forcave të armatosura të regjimit të Beogradit dhe të njësive paramilitare serbe. Në të kundërtën ata do të trajtohen bashkëpjesëmarrës në krimet që po ushtrohen mbi shqiptarët.

Banorët e kësaj komune shpresojnë se vizita e përfaqësuesve të misionit të huaj vëzhgues dhe të misionit të OSBE-së në Deçan dhe në rajonet tjera të përfshira në luftë do të bënte të mundur pasqyrimin e drejtë të gjendjes dhe tejkalimin e saj.

Gjithashtu, ata u bëjnë apel partive politike të Kosovës që të gjejnë gjuhë të përbashkët dhe të bashkëveçprojnë për zgjidhjen e drejtë të çështjes së Kosovës.

U konstitua Kuvendi i Republikës së Kosovës

Kuvendi i Republikës së Kosovës e filloi mbledhjen konstituive sot në orën 12:30 në selinë e Presidencës së Republikës së Kosovës. Salla e vogël ishte stolisur më flamurin kombëtar dhe me një tufë lulesh. Në fytyrat e deputetëve, të ardhur edhe nga vise të Kosovës ku janë zhvilluar muajve të fundit luftime, shihej gëzimi dhe krenaria, për arsye se po merrnin pjesë në një ngjarje me rëndësi të madhe historike për Kosovën dhe popullin e saj.

Me hyrjen në sallë të Kryetarit të Republikës së Kosovës, deputetët duartrokitën në mënyrë frenetike. Pastaj u intonua Himni i Flamurit.

Në vazhdim, kryetari i Republikës së Kosovës, Ibrahim Rugova e hapi mbledhjen konstitutive të Kuvendit të Republikës së Kosovës.

Deputetja Edita Tahiri kërkoi një minut heshtje për shqiptarët e vrarë gjatë sulmeve serbe. Kurse deputeti Demë Fetaj kërkoi minut heshtjeje në nderim të të vrarëve, në mesin e të cilëve ka pasur edhe gra shtatëzëna. Deputetët mbajtën dy minuta heshtje.

Kryetari Rugova pyeti deputetët se a ishin dakord me amendamentin që Kuvendi i Republikës së Kosovës të ketë tre nënkryetarë. Deputetët thanë se ishin dakord.

Kryetari i Republikës së Kosovës dhe i LDK-së Ibrahim Rugova tha se LDK ka propozuar që kandidat i LDK-së për kryetar të Kuvendit të jetë akademik Idriz Ajeti. Deputetët zgjodhën me aklamacion Idriz Ajetin kryetar të Kuvendit.

Në vazhdim, Ramush Mavriqi nga PSDK-ja propozoi për nënkryetar të Kuvendit Ilaz Kurteshin, PSHDK propozoi Zef Morinën, ndërsa PLK propozoi Gjergj Dedajn. Të tre nënkryetarët u zgjodhën me aklamacion.

Kryetari Rugova propozoi Fatmir Sejdiun për sekretar të Kuvendit. Deputetët votuan për propozimin.

Në orën 12:40 Kryetari i Republikës së Kosovës Ibrahim Rugova e dha solemnisht betimin e kryetarit të Republikës së Kosovës. Rugova tha:

“Betohem se tërë fuqinë time do t’ia kushtoj arritjes dhe ruajtjes së pavarësisë së Republikës së Kosovës në tërësinë territoriale të saj, realizimit të lirive dhe të drejtave njerëzore e qytetare, respektimit dhe mbrojtjes së Kushtetutës dhe të ligjeve, ruajtjes së paqes dhe mirëqenies së gjithë qytetarëve të Republikës së Kosovës dhe me ndërgjegje e përgjegjësi do t’i kryej të gjitha detyrat e mia.

Betohem”.

Betimi u shoqërua me duartrokitje frenetike të deputetëve.

Naip Zeka propozoi që Kuvendi i Republikës së Kosovës të nxjerrë një Deklaratë për gjendjen në Kosovë. Deputetët kërkuan nga kryetarët e grupeve parlamentare që ta hartojnë tekstin e Deklaratës.

Në vazhdim Kuvendi verifikoi mandatin e deputetëve të Republikës së Kosovës.

Naim Jerliu dhe deputetët e pranishëm lexuan Betimin e deputetit. Në betim thuhet:

“Betohem se do të angazhohem me përgjegjësi dhe me ndërgjegje për pavarësinë dhe sovranitetin e Republikës së Kosovës, për realizimin dhe mbrojtjen e lirive dhe të drejtave njerëzore dhe kombëtare të qytetarëve të saj në përputhje me Kushtetutën dhe ligjet e Republikës së Kosovës”.

Kryetari i Republikës së Kosovës e shpalli të mbyllur mbledhjen e sotme konstituive të Kuvendit të Republikës së Kosovës.

Kryetari i Kuvendit tha vetëm një fjalë të shkurtër, përmes së cilës shprehu besimin në punën e Kuvendit të Republikës së Kosovës.

Në mbledhjen e sotme konstitutive morën pjesë 59 deputetë të LDK-së dhe 16 deputetë të partive të tjera. Në zgjedhjet e 22 marsit janë zgjedhur 118 deputetë, nga 130 sa është dashur. Në disa komuna zgjedhjet janë shtyrë për shkak të gjendjen së rëndë.

Derisa deputetët po dilnin nga ndërtesa e Shoqatës së Shkrimtarëve të Kosovës, policia serbe arriti para Shoqatës me dy pizgauerë, disa vetura civile dhe një furgon për transportimin e të arrestuarve. Policët e armatosur kërkuan nga deputetët dhe gazetarët e shumtë të pranishëm që të shpërndaheshin. Policë të shumtë shkuan deri te dera e Shoqatës, ndërsa kujdestarët e ndërtesës kërkuan nga policët që të mos hynin brenda në ndërtesë.

Një polic i armatosur hyri brenda në Qendrën për Informim të Kosovës dhe pyeti se çka bëhet në këtë institucion.

Në orën 13:05 para Shoqatës së Shkrimtarëve të Kosovës arriti Nikollas Hill, sekretar i parë në Ambasadën e SHBA-ve në Beograd. Pas tij arritën edhe një numër i policëve civilë. Z. Hill hyri në selinë e Shoqatës së Shkrimtarëve ku gjendej një numër funksionarësh të LDK-së e të partive të tjera dhe kryetari i Republikës së Kosovës Ibrahim Rugova. Pas Hillit në shoqatë hynë edhe një numër i policëve në rroba civile.

Në orën 13:08 një numër i policëve u largua prej hapësirës para Shoqatës së Shkrimtarëve të Kosovës. Në orën 13:10 drejt shoqatës erdhën një numër qytetarësh, të shqetësuar me praninë e policisë.

Në orën 13:13 policët civilë dolën nga ndërtesa e Shoqatës, ndërsa disa prej tyre mbanin në dorë disa dosje me dokumente. Punëtori në Biroteknikë tha se ishin marrë disa dosje që mbanin datën e sotme dhe për të cilat policët pretendonin se ishin dokumente të Kuvendit. Policia serbe më pas u largua. Para shoqatës mbetën deputetë të Kuvendit të Republikës së Kosovës, gazetarë e qytetarë që i uronin njëri tjetrit konsiutimin e Kuvendit të Republikës së Kosovës.

Para orës 14:00 nga ndërtesa doli Nikollas Hill, ndërsa në orën 14:00 edhe kryetari i Republikës së Kosovës. Qytetarët e deputetët e pranishëm e përshëndetën Rugovën me duatrokitje të gjatë.

Në deklaratat që i dhanë për gazetarë, deputetët e quajtën ditën e sotme si ditë historike për Kosovën dhe popullin shqiptar.

Deçan: Njoftohet për dy të vrarë

Në komunën e Deçanit sot gjendja ishte më e qetë. Shkrehje armësh kishte vetëm në Baballoç, Prejlep e Carrabreg të Poshtëm, por nuk pati viktima e dëme.

Megjithatë, njoftohet se mbrëmë, gjatë vëzhgimit të terrenit, u vra luftëtari Miftar Ali Bajraktari (46) nga Isniqi, i cili u varros në fshatin e tij.

Njoftohet gjithashtu se më 14 korrik, në afërsi të kufirit është vrarë Ramadan Ukë Hajdaraj (22) nga Strellci i Epërm.