Të paktën 60 persona janë vrarë në 24 orët e fundit nga sulmet izraelite në Rripin e Gazës, sipas autoriteteve shëndetësore palestineze.

Izraeli ka nisur një tjetër ofensivë të gjerë në territorin palestinez, me synim – sipas zyrtarëve izraelitë – kthimin e pengjeve të mbajtura nga Hamasi dhe eliminimin e këtij grupi militant, raporton agjencia Associated Press.

Të hënën, kryeministri izraelit Benjamin Netanyahu njoftoi se do të lejohet hyrja e një numri të kufizuar kamionësh me ndihma humanitare në Gazë, për herë të parë pas mbi dy muajsh. Vendimi u mor pas presionit ndërkombëtar për lehtësimin e bllokadës ndaj popullsisë palestineze, e cila përbëhet nga rreth 2 milionë banorë.

Pavarësisht kësaj, agjencitë e Kombeve të Bashkuara kanë theksuar se ndihma e lejuar nuk mjafton për të përmbushur nevojat urgjente për ushqim, ilaçe dhe furnizime. Gjatë një armëpushimi të mëparshëm, në Gazë hynin rreth 600 kamionë në ditë.

Ushtria izraelite ende nuk ka dhënë ndonjë koment për sulmet e fundit.

Lufta në Gaza nisi në vitin 2023, pas një sulmi të militantëve të Hamasit që la 1.200 të vdekur në Izraelin jugor. Si pasojë e ofensivës izraelite që pasoi, më shumë se 50,000 palestinezë janë vrarë deri më tani, shumica prej tyre gra dhe fëmijë, sipas Ministrisë së Shëndetësisë në Gaza. Ofensiva ka shkatërruar pjesë të mëdha të infrastrukturës dhe ka detyruar rreth 90% të popullsisë të zhvendoset.

Një person është arrestuar të hënën në Gjilan nën dyshimin për përfshirje në një rast të sulmit seksual ndaj një gruaje.

Sipas raportit 24-orësh të Policisë së Kosovës, viktima ishte e paraqitur më parë si person i zhdukur. Ngjarja është raportuar të ketë ndodhur më 12 maj, rreth orës 07:40.

Me vendim të prokurorit, i dyshuari është dërguar në mbajtje, ndërsa rasti është duke u trajtuar nga organet kompetente.

Dy persona kanë humbur jetën si pasojë e një vetaksidenti të ndodhur mbrëmjen e së hënës në Fushë-Kosovë.

Sipas raportit të Policisë së Kosovës, aksidenti ka ndodhur rreth orës 22:11, kur një veturë që po drejtohej nga një femër ka dalë nga rruga. Si shoferja, ashtu edhe pasagjerja e veturës, janë dërguar në Qendrën Klinike Universitare të Kosovës, ku mjekët kanë konstatuar vdekjen e tyre.

Trupat e viktimave janë dërguar në Institutin e Mjekësisë Ligjore për obduksion, ndërsa rasti është duke u hetuar nga organet përkatëse.

Kryeministri në detyrë i Republikës së Kosovës, Albin Kurti, priti në takim mirëseardhës Ambasadorin e ri e Italisë në Kosovë, Maurizio Antonini.

Në këtë takim të parë, ai e uroi ambasadorin për detyrën e re, teksa vlerësoi lartë kontributin e vazhdueshëm të Italisë për vendin tonë.

Gjatë bisedës u nënvizua partneriteti i fortë ndërmjet dy vendeve, veçanërisht roli i rëndësishëm i Italisë në mbështetjen e paqes dhe sigurisë përmes kontributit të saj në misionin e NATO-s, KFOR. U diskutua gjithashtu për nevojën dhe mundësitë për thellimin e mëtejmë të bashkëpunimit bilateral, me fokus në fushën e ekonomisë, sigurisë e mbrojtjes dhe shkëmbimeve kulturore.

Kryeministri shprehu mirënjohjen për mbështetjen e Italisë në integrimin euroatlantik të Republikës së Kosovës.