Lajmet

Ç’duhet të bëni kur stresi merr përmasa epike?

Nga Leslie Finlay.

Published

on

Nga Leslie Finlay

Amerika është një vend me një popullsi shumë të stresuar. Sipas Institutit Amerikan të Stresit, edhe para pandemisë 94 për qind e punonjësve, thanë se ndiheshin rregullisht të stresuar. Dhe së fundmi, Shoqata Psikologjike Amerikane raportoi se stresi kolektiv i vendit ka arritur nivele alarmante.

Të gjithë prekemi ndonjëherë nga një gjendje e tillë, por ndjenja e vazhdueshme dhe kronike e shqetësimit dhe e mbingarkesës psikologjike, mund të çojë në një ezaurim nervor, gjë që mund të ketë pasoja të rënda. “Zakonisht, ezaurimi nervor përkufizohet si një gjendje ekstreme e tendosjes psikologjike” thotë Jaung Ah Park, profesor i asociuar në Shkollën e Punës dhe Marrëdhënieve të Punësimit në Universitetin e Ilinoisit.

Ajo është një përgjigje ndaj përballjes me faktorë të stresit që janë kronikë, zgjasin në kohë, dhe që shtrihen përtej aftësive tuaja ose burimeve të disponueshme për t’i kapërcyer. Për shkak se shumë nga ne ndihen shpesh të stresuar, mund të jetë e vështirë të dallohet se kur është kapërcyer kufiri maksimal.

Ezaurimi nervor i vërtetë ndryshon nga ndjenja e mbi-stresit. Majkëll Leiter, profesor i psikologjisë në Universitetin Akadia në Nova Scotia, shpjegon ”Ezaurimi nervor kombinon tre dimensione kryesore:lodhjen e madhe fizike, ndjenjën e cinizmit dhe një ndjenjë dekurajimi”.

Të ndjerit i rraskapitur sapo nis punën është një alarm i kuq. Më pas kjo lloj lodhje evoluon në ndjenja të tilla si pesimizmi dhe tërheqja nga jeta e përditshme “duke u bërë i ndrojtur dhe cinik për punën që dikur e donit, por ndiheni kështu edhe ndaj njerëzve për të cilët supozohet të interesoheni”.

Kjo është faza përfundimtare e ezaurimit nervor, por duhet ende pak kohë për të arritur në atë pikë. “Në fillim, mund të përjetoni një lloj hiperaktiviteti. Prandaj përpiqeni të menaxhoni faktorët e stresit duke punuar furishëm për t’i reduktuar ata” thotë Emili Balsetis, profesoreshë e asociuar e psikologjisë në Universitetin e Nju Jorkut.

Por fatkeqësisht, kjo lloj sjellje mund të kontribuojë në bërjen e gabimeve, humbjen e përqendrimit apo edhe fillimin e ndjenjës së pavarur emocionale. Dhe që të gjitha këto i hapin rrugën zhvillimit të problemeve më kronike. Të jetosh me një nivel stresi të vazhdueshëm, mund të shkaktojë pasoja të rënda shëndetësore, përfshirë modelet problematike të gjumit, problemet e tretjes, dhe madje një rrezik më të madh për depresion, probleme të zemrës, diabet dhe shtim në peshë thotë Balsetis.

Një studim i botuar në “Journal of Psychosomatic Research”, zbuloi se njerëzit që përjetojnë kronikisht ezaurim nervor janë 35 për qind më të rrezikuar nga vdekja e hershme. Ndaj para se stresi në jetën tuaj të rritet në atë nivel, ekspertët rekomandojnë disa hapa pro–aktivë që mund të ndërmerrni për ta parandaluar atë gjendje:

Kërkoni domethënien e punës që bëni

Ne mund ta tolerojmë më gjatë stresin që përjetojmë, nëse besojmë se po bëjmë diçka të qëllimshme dhe të vlefshme. Balsetis thotë se kemi më shumë gjasa të përjetojmë stres kronik, që çon më pas tek ezaurimi nervor, kur diçka duket jashtë kontrollit tonë, kundër vullnetit tonë, apo kur është tërësisht e pakuptimtë.

Përpiquni të identifikoni mënyrat përmes të cilave edhe detyrat tuaja më të vogla të përditshme kontribuojnë në jetën e të tjerëve. “Bëni një bilanc të asaj që është në pjatën tuaj. Në rast se keni mundësi, shkurtoni ose transferoni një ose dy nga ato gjëra që nuk ju japin personalisht kuptim”-shprehet Balsetis.

Kërkoni kuptim tek gjërat që bëni jashtë punës

Nëse po përpiqeni ta bëni sa më kuptimplotë punën tuaj, shumë e dobishme mund të jetë vendosja e prioriteve të jetës jashtë punës. Hulumtimet e botuara në “BMC Medicine” tregojnë se njerëzit më të prirur të përjetojnë një ndjenjë më të madhe angazhimi kur janë në punë, janë ata që kanë një hobi.

Mundohuni të ndani punën nga familja/jeta e jashtme

Sot kur ka një mjegullim të dukshëm të mes punës dhe kohës së lirë, Park këshillon të çaktivizoni njoftimet e postës elektronike të punës në telefonin tuaj, të përdorni llogari të veçanta të postës elektronike për punën dhe jetën personale, si dhe të vendosni kufij – fizikë dhe kohorë – midis punës dhe jetës personale, sidomos nëse punoni nga shtëpia.

Mos e neglizhoni veten

“Neglizhimi i dietës suaj ushqimore apo konsumimi i ushqimeve të shpejta, mund të bëhet një mënyrë për t’u përballur me stresin, por ai do t’i marrë trupit dhe trurit tuaj ushqyesit e nevojshëm për të pasur energjinë e duhur dhe për të rregulluar humorin” thotë Benxhamin Makson, një terapist familjar në Kaliforni.

Sipas tij aktiviteti fizik është thelbësor për të larguar hormonet e stresit. “Shumë individë janë më pak aktivë kur janë nën stres, dhe preferojnë të pushojnë shtrirë” thotë Makson. Në fakt lëvizja është përgjigja më e natyrshme evolucionare ndaj stresit të trupit tonë. Ndërsa sot nuk keni nevojë t’i largoheni me vrap një luan në mal, edhe një aktivitet i lehtë fizik ndihmon në “dhënien fund” të ciklit të stresit, duke nxjerrë jashtë qarkullimit të gjakut hormonet e stresit.

Kuptojeni në kohë kur stresi ka arritur në nivele alarmante

Flisni me eprorët tuaj kur mendoni se puna juaj duhet të jetë më e menaxhueshme, shpërblyese dhe nën kontrollin tuaj. “Është shumë e zakonshme që eprorët të vazhdojnë të shtojnë detyrat me kalimin e kohës”- thotë Makson, duke shtuar se nëse nuk i komunikojmë nevojat ose kufizimet tona, ato mund të anashkalohen.

Nëse nuk prisni që gjërat të përmirësohen, mendoni të ndryshoni punë apo edhe karrierë.
Për infermieren Uendi Rejnolds, drejtoreshë e një njësie të kujdesit intensiv spitalor (ICU) në Pensilvani, stresi ka qenë një pjesë e përhershme e punës. Më pas erdhi pandemia dhe stresi u rrit në një nivel krejtësisht të ri.

“Nuk flija dot, kisha gjithmonë dhimbje koke, isha gjithnjë në ankth dhe e shqetësuar për gjithçka. E dija se duhej të largohesha prej andej” kujton ajo. Uendi e kuptoi se puna në krye të ICU ishte bërë shumë stresuese. Ajo e zgjidhi problemin e saj të ezaurimit nervor, duke kaluar në një rol administrativ, ku ka mundësi mund të menaxhojë balancën e saj punë-jetë, ndërsa ka ende një karrierë që përputhet me pasionin e saj për kujdesin shëndetësor klinik.

“Më pëlqen puna ime e re. Tani kam mundësi të shoh më shpesh familjen time, dhe mund të përdor aftësitë e mia profesionale për të ndihmuar drejtuesit në spitale të tjera që të përmirësojnë ecurinë e punës për stafin e tyre” thotë ajo. Nëse ndiheni të ezauruar, terapia mund t’ju ndihmojë të menaxhoni stresin e lidhur me punën dhe të mësoni strategjitë e përballimit. Po ashtu, ajo mund t’ju mësojë të komunikoni me punëdhënësin tuaj dhe të vendosni kufij të shëndetshëm. Makson thotë se terapia konjitive e sjelljes është veçanërisht efektive për trajtimin e rasteve të ezaurimit nervor në vendin e punës./bota.al

Lajmet

Nis ndërtimi i aeroportit më të madh në botë që hapet më 2030

Published

on

Continue Reading

Lajmet

​Gjyqtarja kërcënohet me vdekje, reagon presidenti i FIFA-s

Published

on

Presidenti i FIFA-s, Gianni Infantino, ka shprehur mbështetje për gjyqtaren Katia Itzel Garcia dhe Federatën Meksikane të Futbollit (FMF), pasi gjyqtarja zbuloi se ajo ishte subjekt i abuzimit në internet pas një ndeshjeje të Kupës së Ligës.

Garcia, e cila ka arbitruar në gara të tjera të meshkujve, përfshirë Liga MX, Gold Cup dhe Lojërat Olimpike, raportoi se ka marrë kërcënime me vdekje pasi ka arbitruar ndeshjen e Kupës së Ligës midis FC Cincinnati dhe Monterrey të enjten.

Vendimi i saj për t’i dhënë një gol skuadrës së MLS-së që dukej se ishte në pozicion jashtë loje nxiti zemërim midis tifozëve të Monterrey-t pasi Cincinnati fitoi 3-2.

“Jam e tronditur dhe e trishtuar nga kërcënimet ndaj gjyqtares Katia Itzel pas performancës së saj në ndeshjet e raundit të parë të Kupës së Ligës midis Monterrey dhe Cincinnati ”, shkroi Infantino në llogarinë e tij në Instagram.

“Nuk ka vend në futboll dhe në shoqëri për abuzim, diskriminim dhe dhunë të çfarëdo lloji. Në FIFA, ne jemi në solidaritet me FMF-në dhe CONCACAF-in duke dënuar veprimet e atyre që bëjnë këto kërcënime të papranueshme. Ne ofrojmë mbështetjen tonë të pakushtëzuar për t’i mbajtur përgjegjësit para përgjegjësisë.”

FMF tha në një deklaratë se “do ta këshillojë dhe shoqërojë Garcian në procesin e ankesës para autoriteteve përkatëse”.

Continue Reading

Lajmet

Përurohet rruga në komunën e Shtimes në vlerë 900 mijë euro, ministri Aliu: Investim i rëndësishëm për qytetarët

Published

on

By

U përurua rruga e re në komunën e Shtimes, një projekt në vlerë rreth 900 mijë euro, që përfshin ndërtimin dhe rehabilitimin e afro 5.5 kilometrave rrugë.

Ministri në detyrë i Infrastrukturës, Liburn Aliu, i cili mori pjesë në përurim, tha se ky projekt është realizuar me bashkëfinancim ndërmjet ministrisë e komunës dhe se rruga do të ndikojë dukshëm në përmirësimin e qarkullimit të qytetarëve.

Me ftesë të kryetarit erdha në vizitë, e cila është ndërtuar nga komuna e Shtimes. Ministria në marrëveshje e ka bërë financimin e kësaj rruge. Komuna e Shtimes e shpenzoi ashtu siç duhet me rrugë alternative që janë mjaft të rëndësishme për qytetarët, krijon mundësi të qarkullimit sa më të mirë dhe mobilitetit sa më të rregullt. Kjo rrugë është mjaft e rëndësishme për qytetarët këtu”, tha Aliu.

Kryetari i Shtimes, Qemajl Aliu, tha se projekti përfshin ndërtimin e një rruge të re që lidh fshatrat.

Ky është një projekt që ka kushtuar rreth 900 mijë euro dhe ka trajtuar rreth 5.5 km rrugë ku gjysma është rrugë e re, që lidh fshatin Davidoc me fshatin Godanc dhe rivitalizimi i rrugës Davidoc, Rashicë dhe Muzeqinë, një rrugë në të cilnë nuk është ndërhyrë për 20 vjet. Ka qenë rrugë e demoluar. Ky investim është më se i qëlluar”, tha kryetari Aliu.

Ministri në detyrë Aliu dhe kryetari Aliu gjithashtu inspektuen punimet në rregullimin e shtratit të lumit në këtë komunë.

Continue Reading

Lajmet

​Shpalosen detaje të marrëveshjes së Jasharit me Milanin

Published

on

Po dalin më shumë detaje mbi ofertën e re të Milanit për Ardon Jasharin që bindi Club Brugge, përkatësisht 33.5 milionë euro plus 2 milionë euro bonuse për t’u arritur dhe 2.5 milionë euro që janë më të vështira për t’u aktivizuar.

I pari që raportoi një përparim në negociatat e gjata ishte eksperti belg i transferimeve Sacha Tavolieri. Ai u pasua shpejt nga Daniele Longo, i cili ka dalë me detaje më të sakta se çfarë ndryshoi në ofertë.

Duhet theksuar se nuk janë vetëm kushtet e reja të Milanit, por edhe presioni i shtuar nga Jashari, i cili kërkoi të lirohej për këtë transferim në “San Siro”. Oferta e fundit ishte refuzuar në 32.5 milionë euro plus 5.5 milionë euro bonuse, duke arritur në një total prej 38 milionë eurosh.

Sipas analistit të transferimeve të “Calciomercato”, Longo, oferta e re e paraqitur është një tarifë fikse prej 33.5 milionë eurosh. 2 milionë euro të tjera janë të garantuara për sa kohë që kuqezinjtë kualifikohen për në Ligën e Kampionëve vetëm një herë në pesë sezonet e ardhshme.

Ekzistojnë gjithashtu 2.5 milionë euro të tjera në bonuse që janë më të vështira për t’u aktivizuar.

 

Continue Reading

Të kërkuara