Derbi i madh anglez mes Arsenalit dhe Manchester Cityt është mbyllur me barazim 1-1 në “Emirates Stadium”.

Skuadra mysafire kaloi në epërsi herët në ndeshje, kur Erling Haaland realizoi në minutën e 9-të.

Mirëpo, londinezët nuk u dorëzuan dhe arritën të shpëtojnë një pikë falë golit të Gabriel Martinellit në minutën e 93-të, duke ngritur në këmbë tifozët vendas.

Kjo përballje i takonte xhiros së pestë të Premierligës.

Pas këtij barazimi, Arsenali ka grumbulluar 10 pikë dhe renditet në vendin e dytë në tabelë, ndërsa Manchester City me shtatë pikë pozicionohet në vendin e nëntë./S.K/KP/

Xhudisti nga Kosova, Dardan Cena është shpallur kampion i Ballkanit në Kampionatin Ballkanik. Cena triumfoi ndaj të gjithë rivalëve të tij në kategorinë deri në 73 kilogram, duke treguar kështu fuqinë dhe potencialin e madh që ka për të ardhmen e tij në sportin e xhudos.

Për ta arritur një sukses të tillë, Cena tha se ushtron tre herë në ditë për përkushtim maksimal dhe se ia doli të triumfojë edhe për kundër rivalëve shumë të fortë që i kishte në rrugën drejt medaljes së artë në këtë kampionat.

“Normalisht ne ushtrojmë tre herë në ditë dhe jemi gjithmonë të përgatitur pavarësisht kohës edhe kemi ushtruar shumë jo vetëm për Kampionatin Ballkanik por edhe për garat tjera që na presin në të ardhmen. Edhe besoj që kjo performanca e Kampionatit Ballkanik do të vazhdojë edhe në garat tjera. Normalisht nuk ka rival të dobët, ka qenë konkurrenca mjaftë e fortë por kemi arritur që t’i mposhtim gjithashtu kundërshtarët tjerë dhe të dal rezultati i kënaqur për të gjithë, jo vetëm për mua”, theksoi Cena.

Në suksesin e tij, Cena thotë se meritat kryesore shkojnë për trajnerët Driton Kuka, Majlinda Kelmendi dhe trajnerë të tjerë.

“Unë kam pasur biseda gjithmonë para luftës, pas luftës, gjatë luftës me trajnerin Tonin, Majlindën, Fatosin dhe të gjithë trajnerët që kanë qenë aty të pranishëm, do të thotë nuk ka munguar asgjë brenda në sallë aty, kam qenë i përmbushur si me taktikë, si me forcë, si me gjithçka duke iu falënderuar trajnerëve. Puna ime kryesore është me Tonin (Driton Kuka), ajo është puna e gjithkujt, por pastaj kemi edhe ndihmës-trajnerët si Majlinda Kelmendi, Nora Gjakova, Fatos Tabaku e të tjerë.“, vijon tutje ai.

Përtej Ballkanikut, Cena thotë se në të ardhmen synon që trofe të tjerë edhe në garat që vijnë, derisa shton se sporti i xhudos tashmë i është bërë mënyrë jetese e përditshme.

“Synimet janë të mos ndalem, të vazhdojë kështu në çdo lloj gare edhe të jap maksimumin nga vetja që ta bëjë krenar trajnerin, klubin dhe të gjithë ata që na përkrahin…Gjithçka që duhet është disiplina dhe fokusi, të tjerat nuk janë problem. Ne punojmë në bazë të programit të trajnerit dhe nuk kemi asnjëherë probleme as për stërvitje as për asgjë. Do të thotë na u ka bërë pjesë e jetës xhudos, ushtrime gjumë, ushtrime gjumë dhe kjo është e gjitha për ne”, bëri të ditur Cena.

Ndryshe, Kosova shkëlqeu në Kampionatin Ballkanik me gjashtë medalje të arta, gjashtë të argjendta dhe një medalje të bronztë./S.K/KP/

FC Barcelona konfirmoi se ndeshja e saj e parë në shtëpi me PSG në Ligën e Kampionëve 2025/26 , që korrespondon me raundin e dytë të fazës së ligës, do të luhet në Estadi Olímpic Lluís Companys.

Ndeshja, kundër Paris Saint-Germain, është planifikuar për të mërkurën, më 1 tetor, në orën 21:00 .

Klubi katalanas vazhdon të punojë për të marrë lejet administrative që do të lejojnë që Camp Nou të rihapet në ditët në vijim, megjithëse për momentin Montjuïc, të paktën për ndeshjen kundër kampionëve aktualë, do të jetë selia evropiane e Barçës.

“FC Barcelona falënderon anëtarët dhe tifozët e saj për mirëkuptimin dhe mbështetjen e tyre gjatë një procesi kaq kompleks dhe emocionues siç është rikthimi në Spotify Camp Nou të ri “, thuhet në deklaratë.

Barça ka detajuar gjithashtu se si do të funksionojë procesi i biletave për atë që padyshim do të jetë ndeshja më e madhe e fazës së ligës së Ligës së Kampionëve të këtij viti, finalja e lakmuar që nuk ndodhi kurrë.

I njëjti kapacitet dhe sistem aksesi për anëtarët do të ruhet si në stadiumin Montjuïc të sezonit të kaluar.

16,151 anëtarët e rregullt të Kartës së Stadiumit Olimpik Lluís Companys për sezonet 2023/24 dhe 2024/25 do të kenë njoftim 24 orë përpara për të blerë biletat e tyre.

Pas kësaj periudhe, shitjet do të hapen për të gjithë anëtarët e mbetur që më parë kishin një kartë në Montjuïc.

Klubi së shpejti do të njoftojë orarin specifik dhe datat e fillimit si për anëtarët ashtu edhe për publikun e gjerë, të cilët do të jenë në gjendje të blejnë bileta që variojnë nga 11 deri në 37 euro , varësisht nga zona e stadiumit./S.K/KP/The Athletic/

Edon Zhegrova bëri një rikthim të bujshëm me Juventusin në ndeshjen dramatike ndaj Borussia Dortmundit duke asistuar golin e barazimit.

Kosovari u fut në lojë në minutën e 87-të dhe brenda dhjetë minutash u bë protagonist, ku pas një driblimi, ai shërbeu topin për Vlahovic, që asistoi golin e barazimit 4-4 të Kelly-t në minutën e 96-të.

Ky ishte një lehtësim i madh për Zhegrovën, i cili vuajti nga pubalgjia ose ndryshe e njohur si “hernia sportive” gjatë sezonit të kaluar dhe rrezikonte të mos ishte pjesë e listës për Ligën e Kampionëve.

Forma e tij fizike e përmirësuar bëri që trajneri Igor Tudor ta grumbullonte dhe të besonte tek ai në momentin e duhur.

Tani pritet që kosovari të ketë më shumë minuta edhe në ndeshjen e radhës kundër Veronës, edhe pse titullarizimi duket ende i parakohshëm.

Për Zhegrovën, rikthimi në fushë pas muajve të vështirë është tashmë një fitore, ndërsa objektivi mbetet të gjejë vazhdimësinë dhe ndikimin e tij te “Zonja e Vjetër”./S.K/KP/