Lajmet

Cameron: Nëse ka probleme në Ballkan, atëherë ka probleme edhe në Evropë

Published

12 months ago

May 22, 2024

Betim Gashi

Kryeministri i Shqipërisë Edi Rama ka takuar sot sekretarin e Shtetit për Çështjet e Jashtme, Commonwealth-in dhe Zhvillimin e Britanisë së Madhe, Lord David Cameron në Tiranë.

Ata pas takimit kanë mbajtur një konferencë të përbashkët për media. Rama tha se fokusi është vendosur në raportet dypalëshe mes dy vendeve, ndërsa shtoi se Britania do të mbështesë projektin për ndërtimin e hekurudhës Durrës-Prishtinë dhe se shumë shpejt do të hapet gara për portin tregtar në Durrës.

“Sot ne kemi diskutuar për marrëdhëniet tona shumë të mira dypalëshe dhe për thellimin e mëtejshëm të tyre për të cilin kemi folur, qoftë në aspektin e marrëdhënieve si dy vende aleate në NATO, qoftë edhe në aspektin e marrëdhënieve bilaterale në kushtet kur Mbretëria e Bashkuar synon të jetë më e pranishme në rajonin tonë dhe pa hyrë në të gjitha planet e bashkëpunimit tonë bilateral. Unë dëshiroj të theksoj se kemi folur për përfshirjen e Mbretërisë së Bashkuar në një projekt strategjik me një rëndësi të veçantë për Shqipërinë, për Kosovën, por edhe për rajonin që është hekurudha Durrës-Prishtinë, e cila është një element kyç i projektit të rritjes së kapaciteteve të lëvizjes, jo vetëm mes dy vendeve tona, por në rajon dhe më gjerë, duke pasur parasysh që së shpejti ne hapim garën ndërkombëtare për Portin e Ri Tregtar të Durrësit”, ka thënë Rama.

Ai ka shtuar se janë në pritje të përgjigjes përfundimtare të NATO-s për krahun ushtarak të portit të Durrësit.

“Njëkohësisht siç jeni të informuar edhe Kosova do të ndërtojë një port të thatë në Prishtinë. Për të gjitha këto së bashku ky është një projekt që tejkalon thjesht dhe vetëm interesin e vetëm të dy vendeve tona dhe në të cilin Mbretëria e Bashkuar ka shprehur interesin të përfshihet, qoftë me financimin, qoftë edhe me ekspertizën dhe unë i jam mirënjohës Sekretarit pasi është siç thashë, është një avokat shumë i rëndësishëm i yni në mbështetje të të gjitha proceseve transformuese të rajonit tonë”, shtoi ai.

Në takim u bisedua edhe mbi projektin e përbashkët të luftës kundër trafikut të paligjshëm të qenieve njerëzore dhe bashkëpunimin në rajon, por edhe dialogun Kosovë-Serbi.

“Mbretëria e Bashkuar ka shprehur vazhdimisht një interes të veçantë për të parë normalizimin e plotë të marrëdhënieve rajonale dhe për të parë përfundimin me sukses edhe të procesit të dialogut mes Kosovës dhe Serbisë, ku ka pasur hapa pozitivë po ku në vijimësi ka edhe ngecje në vend apo në vijimësi ndihet edhe rreziku i kthimit prapa”, ka thënë Rama.

Ndërsa, Cameron ka shprehur kënaqësinë e tij për vizitën në Shqipëri, të cilën e ka quajtur një storie suksesi në aspektin ekonomik, por edhe rolin e saj në NATO. Ai ka thënë se hekurudha nga Prishtina në Durrës që do jetë e rëndësishme për të gjithë rajonin për të cilin tha se çdo problem eventual aty reflekton edhe në Evropë.

“Që kur Ballkani Perëndimor ia del mbanë, atëherë Evropa ia del mbanë. Në rast se ka probleme në Ballkanin Perëndimor, atëherë ka probleme edhe në Evropë, sepse në fakt është në interesin tonë të përbashkët të ndihmojnë në procesin e pajtimit dhe rritjes ekonomike dhe të mirëkuptimit”, ka thënë ai.

Cameron ka mbërritur në Tiranë ditën e sotme. Ai është mirëpritur nga ministri për Evropën dhe Punët e Jashtme Igli Hasani në aeroport. Sekretari i Jashtëm i Britanisë së Madhe pritet të takohet edhe me presidentin Bajram Begaj.

Lajmet

Sekuestrohen pasuri prej mbi 2 milionë eurosh në Prishtinë, nën dyshimet për shpëlarje parash

Published

1 minute ago

May 12, 2025

UBTnews

Autoritetet kosovare kanë sekuestruar pasuri me vlerë prej mbi 2 milionë eurosh, nën dyshimet për shpëlarje parash, ka bërë të ditur Prokuroria Speciale e Kosovës, të hënën.

Ajo ka njoftuar se është duke zhvilluar “hetime intensive në bashkëpunim me hetuesit e Sektorit të Hetimeve Financiare, në rastin e koduar me emrin ‘Mati’, ku gjatë muajit shtator të vitit të kaluar ishin arrestuar tre persona”.

Nëpërmjet një komunikate, Prokuroria Speciale ka treguar se janë sekuestruar njëzet njësi banesore me vlerë prej rreth 1.7 milion eurosh, dy lokale afariste me vlerë prej afër 335 mijë eurosh, 17 garazhe me vlerë prej rreth 145 mijë eurosh, si dhe gjashtë depo me vlerë prej afër 17 mijë eurosh.

Pasuria e sekuestruar, me vlerë prej 2 milionë e 286 mijë e 54 eurosh, sipas Prokurorisë Speciale, është identifikuar në emrin e të dyshuarit Sh.C.

Ajo është sekuestruar me urdhër ndalues përfundimtar të Gjykatës Themelore në Prishtinë, thuhet në njoftimin e Prokurorisë Speciale.

Shpëlarja e parave definohet nga fjalorët si proces ilegal përmes të cilit fshihet origjina e pasurisë së fituar në mënyrë të paligjshme, qoftë përmes transfereve bankare apo bizneseve jolegjitime.

Në Kosovë, sipas një raporti të vitit 2020 nga Njësia për Inteligjencë Financiare, pastrimi i parave ka më shumë gjasa të bëhet përmes sektorëve të patundshmërisë dhe ndërtimtarisë, organizatave joqeveritare dhe faturave të fryra artificialisht me vlera të larta.

Sipas Ligjit për parandalimin e këtij fenomeni, kushdo që kryen veprën penale të pastrimit të parave mund të ndëshkohet me deri në dhjetë vjet burgim dhe me gjobë deri në tri herë më të madhe sesa vlera e pasurisë që është subjekt i veprës penale.

Bashkimi Evropian kishte shprehur më herët shqetësimin se Kosova nuk po bën mjaftueshëm hapa për luftimin e shpëlarjes së parave.

“Rastet e pastrimit të parave, me të vërtetë, nuk trajtohen në mënyrë adekuate nga institucionet e sistemit të drejtësisë në Kosovë”, thuhej në përgjigjen e BE-së për REL-in, më 2024./REL/

Lajmet

AAK-ja i drejtohet Kushtetueses për çështjen e votimit të fshehtë

Published

2 hours ago

May 12, 2025

UBTNews

Aleanca për Ardhmërinë e Kosovës (AAK) do të dorëzojë, në ora 11:00, kërkesën për vlerësim kushtetues të vendimit të Kuvendit të Kosovës që refuzoi formimin e Komisionit për votim të fshehtë.

AAK-ja njoftoi nëpërmjet një komunikate se në Kushtetuese do të dorëzojnë “edhe të gjitha vendime të tjera me natyrë të njëjtë” që kanë të bëjnë me seancat e paraprake dhe të mëvonshme lidhur me këtë çështje.

Partia që drejtohet nga deputeti Ramush Haradinaj tha se dokumenti me këtë përmbajtje quhet “Transkript i Mbledhjes Konstituive të Kuvendit të Republikës së Kosovës, e mbajtur më 15, 17, 19, 21, 23, 25, 27, 29 prill, si dhe më 1, 3 dhe 5 maj 2025.”

Lajmet

Sot shënohet Dita Ndërkombëtare e Infermierëve

Published

2 hours ago

May 12, 2025

UBTNews

Dita Ndërkombëtare e Infermiereve festohet çdo vit më 12 maj, që këtë vit do të ishte ditëlindja e 205-të e Florence Nightingale dhe përdoret për të festuar profesionin e infermierisë dhe për të rritur ndërgjegjësimin për sfidat më të mëdha me të cilat përballen infermierët në mbarë botën.

Këshilli Ndërkombëtar i Infermierëve (ICN) zbuloi se tema e vitit 2025 do të jetë “Kujdesi për infermierët forcon ekonomitë”.

Ajo shënon vazhdimin e temës gjithëpërfshirëse shumëvjeçare të “Infermierëve tanë, e ardhmja jonë”, e cila synon të rrisë profilin e infermierisë dhe të tregojë se sa i rëndësishëm është profesioni për sistemet shëndetësore.

Pamela Cipriano, presidente e ICN, tha se do të promovonte rëndësinë e mbështetjes së shëndetit fizik dhe mendor të infermierëve.

“Infermierët përballen me sfida të shumta: fizike, mendore, emocionale dhe etike, dhe është e domosdoshme që ne t’i trajtojmë këto sfida në një mënyrë që promovon shëndetin e tyre të përgjithshëm,” tha Cipriano.

Tema e vitit 2025 është zgjedhur për të nënvizuar se si një fuqi punëtore e shëndetshme dhe e sigurt infermiere është thelbësore për funksionimin e përgjithshëm të kujdesit shëndetësor.

Lajmet

Shqipëri: Numërohen 26.52% e kutive të votimit

Published

2 hours ago

May 12, 2025

UBTNews

Deri në orën 4 të mëngjesit, numëruesit në të gjithë vendin kanë numëruar 1386 kuti votimi nga 5225 që janë në të gjithë Shqipërinë.

Sipas shifrave zyrtare të raportuara nga Komisioni Qendror i Zgjedhjeve, votat në çdo qark të përkthyera në mandate, japin një tablo ku Partia Socialiste kryeson thellë me numër mandatesh.

Kështu socialistët kanë deri tani 83 mandate, ku rezultatin më të mirë e kanë në Tiranë, Fier, Durrës dhe Elbasan.

Nga ana tjetër koalicioni i kryesuar nga Partia Demokratike është me 51 mandate.

Sa i përket partive të reja, PSD-ja e Tom Doshit është forcë e tretë politike në Kuvend me 3 mandate, koalicioni “Nisma Shqipëria bëhet” ka 3 mandate, ndërkohë që Partia Mundësia dhe Lëvizja Bashkë kanë nga një mandat.

Deri më tani janë numëruar 26.52% e kutive të votimit