Një person ka humbur jetën si pasojë e një aksidenti trafiku që ka ndodhur në Istog.

Sipas Policisë së Kosovës, aksidenti ka ndodhur më 27 korrik rreth orës 12:17 dhe ka përfshirë një motoçikletë dhe një kamion për bartjen e mbeturinave, të drejtuar nga dy shtetas të Kosovës.

Si pasojë e përplasjes, drejtuesi i motoçikletës ka pësuar lëndime vdekjeprurëse. Ekipi mjekësor ka konstatuar vdekjen e tij në vendin e ngjarjes.

Me urdhër të prokurorit, trupi i pajetë është dërguar në Institutin e Mjekësisë Ligjore për obduksion, ndërsa rasti është duke u hetuar./A.K/

Një person është proceduar penalisht në Pikën Kufitare në Dheu i Bardhë, nën dyshimin për veprën penale “Legalizim i përmbajtjes së pavërtetë”.

Sipas Policisë së Kosovës, gjatë kontrollit të një automjeti në hyrje të vendit, të drejtuar nga një shtetas i Kosovës, janë gjetur dokumente të ndryshme që u përkisnin personave të tjerë.

Në mesin e dokumenteve të sekuestruara janë certifikata të lindjes, certifikata të shtetësisë dhe të martesës të lëshuara nga Serbia, kopje të letërnjoftimeve të Republikës së Kosovës, si dhe vendime të ndryshme të gjykatave serbe.

I dyshuari është intervistuar nga organet kompetente, ndërsa me vendim të prokurorit është liruar në procedurë të rregullt hetimore. Rasti mbetet nën hetime./A.K/

Policia e Kosovës ka raportuar dy raste të ndara të dhunës në familje, të regjistruara në Obiliq dhe Prizren.

Në Obiliq, më 27 korrik rreth orës 18:00, është arrestuar një burrë, i cili dyshohet se ka ushtruar dhunë psikike ndaj një gruaje. Pas intervistimit, me vendim të prokurorit, palët janë liruar, ndërsa rasti do të trajtohet në procedurë të rregullt.

Ndërkaq, në Prizren, po atë ditë rreth orës 21:30, është arrestuar një tjetër burrë, i cili dyshohet se, nën ndikimin e alkoolit, ka ushtruar dhunë psikike ndaj një gruaje. Me vendim të prokurorit, i dyshuari është dërguar në mbajtje./A.K/