Lajmet

Caktimi i datës së zgjedhjeve parlamentare, Osmani takon gjatë kësaj jave liderët e partive politike

Published

on

Gjatë kësaj jave pritet të mbahet takimi ndërmjet presidentes së vendit, Vjosa Osmani dhe liderëve të partive politike, ku do të diskutohet për caktimin e datës së zgjedhjeve parlamentare.

Takimi pritet të mbahet më 31 korrik, në orën 14:00, në ndërtesën e Kuvendit të Republikës së Kosovës, ndërsa subjektet politike tashmë kanë konfirmuar pjesëmarrjen.

Partitë politike kanë nisur ta konfirmojnë pjesëmarrjen në takimin e thirrur nga presidentja për t`u konsultuar për caktimin e datës së zgjedhjeve.

Presidenca kanë bërë të ditur se në letrën dërguar liderëve të partive, Osmani ka deklaruar se bazuar në Kushtetutë dhe Ligjin për zgjedhjet e përgjithshme, zgjedhjet duhet të mbahen përgjatë periudhës 26 janar- 16 shkurt 2025.

Lidhur me ftesën e presidentes Osmani, një reagim e ka bërë edhe Eugen Cakolli nga Instituti Demokratik i Kosovës.

Cakolli thotë se zgjedhjet e rregullta parlamentare mund të mbahen në periudhën, nga fundi i janarit deri në mes të shkurtit të vitit 2025.

“Datat e vetme të zgjedhjeve të rregullta që Presidentja mund t’i diskutojë me partitë politike në takimin e së mërkurës, janë 26 janari, 2, 9 apo 16 shkurti. Presidentja ka kohë më së voni deri në mes të nëntorit, për ta caktuar ndonjërën prej këtyre datave”, kishte pohuar ai.

Nga Lëvizja Vetëvendosje thanë se janë të gatshëm për zgjedhje kurdo që ato shpallen, ndërsa lidhur me datën e mundshme, ata do ta japin propozimin në takimin me presidenten, pas vlerësimit të të gjitha rrethanave.

“Është e rëndësishme që për herë të parë në Kosovë që nga shpallja e Pavarësisë një qeveri dhe legjislaturë po e mbyllë një mandat të plotë. Kjo falë mbështetjes plebishitare të qytetarëve në zgjedhjet e kaluara si dhe qeverisjes së mirë dhe legjislativit të suksesshëm. Sa i përket datës së zgjedhjeve, Kushtetuta dhe Ligji për Zgjedhjet nuk lënë shumë opcione dhe ato opcione ligjore që ekzistojnë e që janë katër data nuk janë larg njëra tjetrës”, tha Alim Rama, sekretar organizativ i Lëvizjes Vetëvendosje.

E sekretarja e përgjithshme e PDK-së, Vlora Çitaku, tha se do të marrin pjesë në takim por sipas saj, kjo ftesë nuk ndërlidhet me zgjedhjet e parakohshme, pasi një gjë të tillë ka kohë që e kërkon PDK-ja.

“PDK e ka pranuar ftesën e presidentes Osmani për një takim rreth përcaktimit të datës së zgjedhjeve. Sigurisht që ne do t’i përgjigjemi ftesës, e kemi obligim kushtetues dhe ligjor që të marrim në një takim të tillë. Ju e dini mirë që PDK-ja që nga korriku i vitit të kaluar ka kërkuar zgjedhje të parakohshme, mirëpo ftesa e presidentes Osmani nuk ndërlidhet me inicimin e zgjedhjeve të parakohshme por me përcaktimin e datës për zgjedhje të rregullta dhe ne do të marrim pjesë aty dhe qëndrimin për këtë çështje dhe datës e preferuar do ta themi aty”, tha Çitaku.

Edhe Lidhja Demokratike e Kosovës tashmë e ka konfirmuar pjesëmarrjen në këtë takim.

Ndërkohë, Aleanca për Ardhmërinë e Kosovës ka lënë të kuptohet se do të marrë pjesë në takim, por zëdhënësi i partisë ka theksuar se vendimi do të merret të hënën nga strukturat e partisë.

“Po kemi pranuar letren nga Presidentja. Në bazë të kesaj letre presidentja konsultimet do t’i zhvilloje për caktimin e datës së zgjedhjeve të përgjithshme brenda afatit të rregullt. Nuk shoh ndonjë arsye që Aleanca të mos jetë pjesë e konsultimeve por sidoqoftë vendimet për këtë çështje do t’i marrin strukturat e partisë, besoj ditën e hënë”, ka thënë Kushtrim Xhemajli, zedhenës i AAK-së.

Zgjedhjet e fundit nacionale janë mbajtur më 14 shkurt 2021, kur Lëvizja Vetëvendosje doli e para me më shumë se 50 për qind të votave. Partia e dytë ishte PDK, e treta LDK, kurse e katërta AAK./telegrafi/

Aktualitet

UBT pret në vizitë zyrtare Kryetarin e FFK-së, Agim Ademi – fokus te edukimi dhe inovacioni në sport

Published

on

Kryetari i Federatës së Futbollit të Kosovës (FFK), Agim Ademi, ka zhvilluar sot një vizitë zyrtare në UBT, ku është mirëpritur nga Presidenti dhe Themeluesi, Rektori, Prof. Dr. Edmond Hajrizi, në ambientet e Parkut Shkencor, Inovativ dhe Teknologjik të UBT-së në Lipjan.

Gjatë kësaj vizite, Ademi pati mundësinë të njihet nga afër me kapacitetet infrastrukturore, laboratorët e avancuar, si dhe projektet ndërdisiplinore që po zhvillohen në UBT.

Rektori Hajrizi dhe Kryetari Ademi diskutuan për mundësitë e bashkëpunimit ndërmjet UBT-së dhe FFK-së, me qëllim të ndërlidhjes së teknologjisë, inovacionit dhe sportit në funksion të zhvillimit të qëndrueshëm të të rinjve dhe shoqërisë në përgjithësi.

Gjatë vizitës së tij në UBT, Kryetari Ademi, vlerësoi rolin udhëheqës të këtij institucioni në fushën e arsimit, teknologjisë dhe inovacionit. Ai u shpreh i impresionuar nga projektet dhe potenciali që UBT ofron për zhvillimin e të rinjve dhe për krijimin e bashkëpunimeve konkrete ndërmjet sportit dhe edukimit.

“Sot pata kënaqësinë të vizitoj UBT-në në Prishtinë, një qendër jo vetëm e dijes dhe inovacionit, por që me të drejtë mund të quhet edhe një ‘smart city’ brenda kryeqytetit tonë. Ishte impresionuese të shihja nga afër një institucion që jo vetëm e ndjek hapin e zhvillimit teknologjik, por edhe kontribuon në të, me një program të sofistikuar që përfshin gjithçka – nga bazat deri te formimi i shkencëtarëve në profile të ndryshme”, u shpreh Ademi.

Rektori Hajrizi theksoi se përmes programeve bashkëkohore dhe investimeve në infrastrukturë moderne, UBT jo vetëm që udhëheq në fushën akademike, por gjithashtu kontribuon drejtpërdrejt në përgatitjen e sportistëve dhe trajnerëve të rinj, duke i dhënë vendit një bazë të fortë për afirmim në arenën ndërkombëtare.

“UBT është shndërruar në një qendër unike arsimore e inovative, ku talentet e reja jo vetëm edukohen, por edhe fuqizohen për të qenë kampionë në sport, shkencë dhe jetë. Kemi krijuar një ekosistem që i tejkalon kufijtë e edukimit tradicional – duke integruar teknologjinë, lidershipin dhe përgatitjen praktike me standarde ndërkombëtare, për të formuar gjenerata të gatshme të konkurrojnë në çdo arenë”, theksoi Rektori Hajrizi.

Vizita e Kryetarit të FFK-së në UBT hap perspektiva të reja për bashkëpunim në fusha të ndryshme si teknologjia sportive, edukimi i trajnerëve përmes platformave digjitale, organizimi i ngjarjeve të përbashkëta dhe mbështetja e inovacionit në sport.

UBT, si institucion lider në arsimin e lartë në rajon, vazhdon të dëshmojë se është një partner i besueshëm për bashkëpunime strategjike me institucionet vendore dhe ndërkombëtare.

Në këtë kontekst, UBT veçon edhe Fakultetin e Shkencave të Sportit dhe të Lëvizjes, përmes të cilit synon të kontribuojë në zhvillimin e sportit në vend duke nxjerrë kuadro të rinj profesionalë dhe talente të reja, të cilat do të mund të afirmohen në skenën ndërkombëtare përmes përgatitjes me standarde të larta dhe inspirimit nga kampionët botërorë.

Continue Reading

Lajmet

Edicioni i ri në Serie-A vjen me risi në ndarjen e drejtësisë

Published

on

Sezonin e ardhshëm, futbolli italian do të sjellë një risi të rëndësishme në komunikimin me publikun. Gjyqtarët do të shpjegojnë vendimet e marra pas ndërhyrjes së VAR-it drejtpërdrejt në stadium dhe në transmetim televiziv.

Lajmi u konfirmua nga Gianluca Rocchi, përzgjedhësi i gjyqtarëve të Serie A dhe Serie B, gjatë takimit parasezonal të mbajtur në Cascia.

“Ky është një hap i madh përpara në drejtim të transparencës, një vlerë që e kemi ruajtur prej vitesh”, tha Rocchi. “Tani shpjegimet do të jepen në kohë reale, përpara të gjithëve”.

Ai shtoi se për këtë risi po përgatitet një grup i posaçëm gjyqtarësh, me synim unifikimin e gjuhës dhe përmbajtjes së komunikimit, për t’u bërë sa më të qartë për publikun.

Sipas Rocchit, nuk do të vendoset një kohë maksimale për këto njoftime, pasi secili gjyqtar ka stilin dhe ritmin e vet. “Do të përqendrohemi tek cilësia e komunikimit, më shumë se tek kufijtë e ngurtë kohorë”, përfundoi ai.

Continue Reading

Lajmet

​Kriza në Barcelonë, përplasje e hapur mes klubit dhe Ter Stegen

Published

on

Te Barcelona ka shpërthyer një konflikt i plotë mes klubit dhe portierit gjerman, Marc-André ter Stegen, i cili është edhe kapiten i skuadrës. Shkak është bërë refuzimi i tij për të nënshkruar formularin e pëlqimit të informuar, që do t’i lejonte mjekëve të klubit të merrnin raportin e detajuar të operacionit që ai kreu në pjesën e poshtme të shpinës.

Klubi katalanas, i cili sapo ishte kthyer të martën nga turneu në Azi, kishte planifikuar një takim me portierin për të diskutuar raportin mjekësor. Dokumenti duhet t’i dërgohet La Ligës për të përcaktuar kohëzgjatjen e mungesës së tij. Nëse ajo do të ishte katër muaj ose më shumë, Barcelona do të përfitonte mundësinë të afronte lojtarë të rinj, përfshirë Joan Garcian, i cili është siguruar si zëvendësues i tij.

Refuzimi i Ter Stegen për të dhënë pëlqimin ka habitur drejtuesit e klubit dhe ka përshkallëzuar tensionet. Përplasja nisi pas lajmit për afrimin e Garcias, çka u interpretua si sinjal se gjermani mund të largohej. Situata u rëndua edhe më shumë kur Ter Stegen njoftoi i vetëm – dhe jo bashkë me klubin – vendimin për t’iu nënshtruar operacionit, duke parashikuar një rikuperim prej tre muajsh, më pak se koha e nevojshme që Barcelona të regjistronte portierin e ri.

Reagimi i klubit ishte i menjëhershëm: Ter Stegen nuk do të mbajë më shiritin e kapitenit. Ndërkohë, Barcelona ka paralajmëruar hapjen e procedurave disiplinore ndaj tij.

Continue Reading

Lajmet

​United paraqet megaofertë për sulmuesin slloven

Published

on

Manchester United ka bërë një ofertë për sulmuesin e RB Leipzig, Benjamin Sesko, mund të arrijë në 85 milionë euro.

Oferta përfshin një pagesë të garantuar prej 75 milionë eurosh të menjëhershme.

United ende nuk ka marrë një përgjigje, por beson se është një vlerësim i përshtatshëm për 22-vjeçarin slloven dhe se lojtari është i etur të përfundojë një transferim në “Old Trafford”.

Newcastle gjithashtu e dëshiron Sesko-n dhe ka bërë një ofertë për sulmuesin, e cila nuk është pranuar.

 

Continue Reading

Të kërkuara