Aktoret Monica Bellucci dhe Cate Blanchett u pritën në Vatikan nga Papa Leo, në një audiencë të veçantë për krijuesit e njohur të filmit, ku ishte i pranishëm edhe regjisori Spike Lee.

Takimi u fokusua tek rëndësia e artit të shtatë dhe sfidat e kinemasë në ruajtjen e përvojës së shikimit të filmave.

Bellucci dhe Blanchett respektuan etiketën e Vatikani, duke zgjedhur kostume elegante të zeza, në vend të fustaneve tradicionale, që simbolizojnë respekt dhe modestinë.

Monica zgjodhi një kombinim minimalist të zezë dhe të bardhë, ndërsa Blanchett mbeti e rafinuar në të zezë nga koka te këmbët.

Papa Leo vlerësoi rolin e filmit në shpërndarjen e shpresës dhe publikoi edhe listën e filmave të tij të preferuar, ku përfshiheshin: “The Sound of Music”, “It’s a Wonderful Life”, “Ordinary People” dhe “La Vita è Bella”. /A.Z/UBT News/

Paris Hilton, trashëgimtarja 44-vjeçare e familjes Hilton, është përballur me reagime të forta online pas një deklarate ku e quajti veten “sipërmarrëse të vetëkrijuar”.

Në një intervistë për Sunday Times, Hilton foli për kompaninë e saj, 11:11 Media, e cila vlerësohet rreth 1 miliard dollarë, dhe tha:

“Jam e vetëkrijuar. E kam ndërtuar gjithçka vetë. Askush nuk më ka dhënë asgjë në jetën time”.

Deklarata e saj shkaktoi debate të menjëhershme në Reddit dhe rrjete të tjera sociale.

Përdoruesit vunë në dyshim pretendimin e saj, duke theksuar se fama dhe pasuria e familjes Hilton kanë ndihmuar në suksesin e saj.

“Po të mos ishe një Hilton, nuk do të ishe kaq e njohur,” shkroi një prej tyre.

Paris gjithashtu kujtoi mbështetjen e gjyshit të saj, miliarderit Barron Hilton, i cili i thoshte: “Paris, ti punon më shumë se çdo CEO që njoh”.

Hilton u bë e njohur në fillim të viteve 2000 përmes reality show-t The Simple Life dhe që atëherë ka ndërtuar një karrierë të gjerë si sipërmarrëse, duke lançuar parfume, veshje dhe marka të tjera.

Sot, është CEO dhe kryetare e 11:11 Media, ka një prani të fuqishme në rrjetet sociale dhe aktive si DJ dhe këngëtare. /A.Z/UBT News/

Tom Cruise është nderuar me një Oscar nderi gjatë Çmimeve të Guvernatorëve, duke shënuar një moment historik në karrierën e tij, pasi ky është çmimi i parë i Akademisë që aktori fiton.

Ylli 62-vjeçar mbajti një fjalim emocional, ku foli për lidhjen e tij të thellë me kinemanë dhe fuqinë e filmit për të bashkuar njerëzit.

Çmimi iu dorëzua nga regjisori Alejandro G. Iñárritu, me të cilin Cruise po bashkëpunon në një projekt që pritet të dalë vitin e ardhshëm.

Duke marrë çmimin, tha se filmat s’janë profesion për të, por pjesë e identitetit: “Bërja e filmave nuk është ajo që bëj, është kush jam unë.”

Aktori u nderua përkrah koreografes Debbie Allen dhe dizajnerit të skenës Wynn Thomas, që u vlerësuan për kontributet e tyre në art.

Cruise, i nominuar katër herë për një Oskar konkurrues, ende nuk ka fituar një të tillë, gjë që e bën çmimin nderi edhe më të veçantë.

Ai kujtoi momentin kur dashuria për kinemanë lindi në fëmijëri, teksa shikonte me mahnitje rrezen e projektorit që shfaqej në ekran: “Aty kuptova se bota ishte shumë më e madhe se ajo që njihja.”

Gjatë ceremonisë, u nderua edhe këngëtarja legjendare Dolly Parton me Çmimin Humanitar Jean Hersholt për dekada bamirësie.

Për shkak të problemeve shëndetësore, Parton dha falënderimin përmes një video-mesazhi. /A.Z/UBT News/

Pas vizitës së drejtorit të përgjithshëm të radiotelevizionit publik austriak, Roland Weissmann, në Jerusalem ku u takua me presidentin e Izraelit, Isaac Herzog, dhe me drejtorin e transmetuesit publik izraelit KAN, Golan Yochpaz – mediat izraelite dhe austriake raportojnë se mundësia që Izraeli të përjashtohet nga Eurovision 2026 tashmë është e eliminuar.

Më pak se një muaj para Asamblesë së Përgjithshme të EBU-së në Gjenevë, pritet të jepet vendimi zyrtar për pjesëmarrjen e Izraelit në edicionin e 70-të të Eurovisionit. Të dielën, më 9 nëntor, drejtori i ORF-it udhëtoi në Jerusalem për të riafirmuar qartë mbështetjen e Austrisë ndaj Izraelit dhe të drejtës së tij për të marrë pjesë në festival, shkruan EurovisionFun.

Eurovisioni vitin e ardhshëm shënon 70-vjetorin e tij, dhe Izraeli ka qenë prej dekadash një pjesëmarrës i rëndësishëm i këtij eventi.

Drejtori i KAN-it deklaroi se nuk ekziston asnjë bazë ligjore apo arsye për përjashtimin e Izraelit nga Eurovision 2026, duke theksuar se vendi ka respektuar gjithmonë rregullat e EBU-së dhe do të vazhdojë t’i zbatojë ato.

Presidenti Isaac Herzog nënvizoi rëndësinë e ruajtjes së pavarësisë editoriale dhe operacionale të KAN-it si transmetuesi publik i vendit.

Pas marrëveshjes së armëpushimit në Gaza, votimi që do vendoste për pjesëmarrjen e Izraelit u anulua dhe u zëvendësua me një sesion diskutimi që mbahet në dhjetor. Sipas burimeve, rreziku i përjashtimit të Izraelit është minimal dhe vendi merr pjesë në Eurovision 2026.

Mbështetja e fortë e Austrisë ka pasur rol vendimtar, dhe vizita e Weissmann-it në Rezidencën Presidenciale në Jerusalem, ne deklaratat e tij, konsiderohen gjerësisht si një konfirmim i pashpallur i pjesëmarrjes së Izraelit në festivalin e vitit të ardhshëm. /A.Z/UBT News/